Ukadiku muele meji bua dibala dia Bible kadi kuyi umubala bua tubingila tudibu batele kuulu eku anyi? Bua bantu ba bungi, kubala Bible kutu bu kudi kubatonda. Kadi newenze tshinyi wewe mumvue ne: Bible udi mua kukuambuluisha bua kuikala ne nsombelu muimpe ne wa disanka? Newenze tshinyi wewe mumvue ne: kudi imue ngenyi idi mua kuenza bua dibala dia Bible dikusankishe bikole? Udiku musue kumanya malu adi Bible mua kukupetesha anyi?

Tukonkonone bilejilu bikese patupu bia bantu bavua bamone bulenga bua Bible pakatuadijabu kumubala.

Ezekiel udi ne bidimu 20 ne bia mu njila udi wamba ne: “Kumpala, mvua anu bu muntu uvua wendesha mashinyi kayi mumanye kudiye uya. Kadi dibala dia Bible ndingambuluishe bua kuikala ne nsombelu muimpe. Udi ne mibelu mimpe indi mua kutumikila dituku dionso.”

Frieda udi pende ne bidimu 20 ne bia mu njila udi wamba ne: “Kumpala mvua ngenza malu ne dilubakana tshiyi ngela meji. Kadi bua dibala dianyi dia Bible, ngakalonga mua kudikanda. Mbingambuluishe bua kusomba bimpe ne bantu ne mpindieu ndi ne balunda ba bungi.”

Mamu mukuabu diende Eunice, udi ne bidimu 50 ne bia mu njila, udi wamba bua Bible ne: “Mmungambuluishe bua kuikala muntu wa nsongo ne kushintulula bikadilu bianyi bibi.”

Anu mudi bantu aba ne bantu bakuabu miliyo ya bungi balonge, dibala dia Bible didi mua kukuambuluisha bua kuikala ne nsombelu wa disanka. (Yeshaya 48:17, 18) Bible udi mua kukuambuluisha kabidi bua 1) kuangata mapangadika a meji, 2) kupeta balunda bimpe, 3) kupita bimpe ne tunyinganyinga ne 4) bualu buimpe butambe, kulonga bulelela pa bidi bitangila Nzambi. Mibelu ya mu Bible idi ifumina kudi Nzambi, wewe muyilonde kua kututa dikasa dibi to. Nzambi kena mua kufila mibelu mibi to.

Tshia mushinga nkuanji kutuadija. Mmibelu kayi mimpe idi mua kukuambuluisha bua kutuadija dibala bipepele ne kuenza bua dikale dikusankisha bikole?

Ntshinyi tshiakuambuluisha bua kuanyisha dibala diebe dia Bible ne kusunamu malu a bungi? Mona ngenyi itanu ivua miambuluishe bantu ba bungi.

Keba muaba muimpe. Keba muaba mutalale. Epuka ditanaji bua umone mua kutuma meji ebe ku biudi ubala. Muaba mutoke udi kapepe katalale udi mua kukuambuluisha bua kupeta malu a bungi mu dibala diebe.

Ikala ne mmuenenu muimpe. Bu mudi Bible mukanda wa Tatu wetu wa mu diulu, neumanye malu a bungi adimu wewe udituala bu muana mukese udi musue kulonga malu kudi muledi udi mumunange. Wewe ne lungenyi lubi anyi udifuanyikijila malu kampanda bua Bible, biumbushe mu mutu bua Nzambi amone mua kukulongesha.​—Misambu 25:4.

Sambila kumpala kua kubala. Mu Bible mudi ngenyi ya Nzambi, ke bua tshinyi tudi dijinga ne diambuluisha diende bua kumumvua bimpe. Nzambi mmulaye bua kupesha “badi bamulomba nyuma muimpe.” (Luka 11:13) Nyuma muimpe eu udi mua kukuambuluisha bua kumvua meji a Nzambi. Mu kupita kua matuku, neakuambuluishe bua kumvua “too ne malu male a Nzambi.”​—1 Kolinto 2:10.

Bala bua kumvua. Kubadi anu bua kumana mabeji to. Ikala welangana meji ne muoyo mujima bua biudi ubala. Udiele nkonko bu mudi eyi: ‘Nngikadilu kayi indi mmona kudi muntu undi ngenda mbala bualu buende eu? Mmunyi mundi mua kutumikila bualu ebu mu nsombelu wanyi?’

Difundila bipatshila bisunguluke. Bua dibala diebe dia Bible kukuambuluishadi, keba bua kulonga bualu kampanda buikala mua kulengeja nsombelu webe. Udi mua kudifundila bipatshila bu mudi: ‘Ndi musue kulonga malu a bungi adi atangila Nzambi nkayende.’ ‘Ndi musue kulua muntu muimpe, mulume muimpe anyi mukaji muimpe.’ Pashishe, sungula bimue bitupa bia mu Bible biakuambuluishe bua kukumbaja bipatshila biebe ebi.a

Ngenyi itanu eyi neyikuambuluishe bua kutuadija. Kadi mmunyi muudi mua kuvuija dibala diebe bualu bua disanka? Tshiena-bualu tshidi tshilonda tshidi tshifila imue ngenyi.

Ntshinyi tshiumvua bua dibala diebe dia Bible? Nedikutonde anyi nedikusankishe? Bidi bilondeshila mushindu uutu ubala. Tumonayi tshia kuenza bua kukolesha dijinga dietu ne dinanga dietu dia kubala Bible.

Sungula nkudimuinu wa kueyemena udi ne ngakuilu wa lelu. Wewe ubala mikanda idi ne malu a bungi adi makole bua kumvua anyi idi ne miaku ya kale iudi kuyi mumanye, dibala edi kadiakukusankisha to. Ke bualu kayi keba Bible udi ne ngakuilu mupepele uudi mua kumvua bimpe bua alenge muoyo webe. Kadi mbimpe ikale kabidi nkudimuinu muimpe ne mujalame.a

Enza mudimu ne biamu bidiku lelu. Lelu Bible ki mmupatula anu pa mabeji to, kadi udi kabidi mu biamu. Tudi mua kubala imue Bible ku enternete anyi kuyambula bua kuyela mu ordinatere, mu tablete anyi mu telephone bua kudibadila. Imue Bible idi ne bintu bikuabu bidi bikuambuluisha bua kukeba mvese mikuabu pa lukasa mu tshiena-bualu tshiudi anyi mene kufuanyikija nkudimuinu mishilashilangane. Wewe musue anu kuteleja patupu, manya ne: Bible ukadiku kabidi mu mêyi makuata. Bantu ba bungi batu basue kuteleja dibala dia Bible padibu mu mashinyi batangile ku miaba yabu ya midimu, padibu basukula bilamba anyi padibu benza midimu mikuabu idi kayiyi ibapangisha bua kuteleja dibala. Kuenaku mua kuteta mushindu uudi mua kukokesha anyi?

Enza mudimu ne bintu bia kulonga nabi Bible. Bintu ebi bidi mua kukuambuluisha bua kumanya malu a bungi mu didibadila diebe dia Bible. Kudi tuarte tua maloba a mu Bible tuakuambuluisha bua kumanya miaba iudi upeta mu didibadila diebe ne kumona mushinga wa malu avua menzeke. Biena-bualu bu mudi bidi mu tshibejibeji etshi anyi bidi mu site wetu mu tshitupa tshia ne: “La Bible et vous”, bidi mua kukuambuluisha bua kupeta diumvuija dia bitupa bia bungi bia mu Bible.

Ikala ushintulula mishindu iudi ulonga Bible. Wewe mumone ne: kubala Bible kubangila ku ntuadijilu too ku ndekelu kudi kukutonda, kuenaku mua kutuadija ne tshitupa tshidi tshikusankisha bikole bua kukolesha dijinga diebe anyi? Wewe musue kumanya malu a bantu ba mu Bible badi bamanyike bikole, udi mua kudienzeja bua kubala malu a bantu abu mu Bible. Mushindu eu mmuleja mu kazubu ka ne: “Bala Bible bikole bua kumanya bantu badimu.” Pamuapa udi mua kubala Bible tshiena-bualu ku tshiena-bualu anyi kubala malu avua menzeke bilondeshile muvuawu malondangane Kuena mua kuteta umue wa ku mishindu eyi anyi?

Bible ki mmukanda bu mikanda yonso eyi to. Udi ne mibelu ya kudi Mufuki wetu. (2 Timote 3:16) Mukenji udimu udi ne buenzeji bua bungi kutudi. Ke bua tshinyi Bible udi wamba ne: “Dîyi dia Nzambi didi ne muoyo ne bukole.” (Ebelu 4:12) Didi ne bukole bua kuakaja nsombelu wetu mu mishindu minene ibidi eyi: didi ditulombola mu nsombelu wetu ku mpindieu ne dituambuluisha bua kufika ku dimanya Nzambi ne milayi yende.​—1 Timote 4:8; Yakobo 4:8.

Akaja nsombelu webe ku mpindieu. Bible udi mua kukuambuluisha mu malu ebe nkayebe. Udi ufila mibelu mimpe bua:

• Malanda etu ne bakuabu.​—Efeso 4:31, 32; 5:22, 25, 28, 33.

• Dilama lungenyi luetu ne makanda etu a mubidi.​—Misambu 37:8; Nsumuinu 17:22.

• Malu a bikadilu bilenga.​—1 Kolinto 6:9, 10.

• Malu a mpetu.​—Nsumuinu 10:4; 28:19; Efeso 4:28.a

Bena dibaka ba mu Asie batshivua bafuma ku diselangana bakanyisha bikole mushinga wa mibelu ya mu Bible. Anu bu bena dibaka ba bungi batshidi baselelanganaku, bana betu aba bakadienzeja bua kuibidilanganabu ne kuikala ne tshibidilu tshia kuyukidilangana badilekelele. Kadi bakatuadija kutumikila malu avuabu babala mu Bible. Mbipeta kayi biakamueneka? Vicent, bayende wa mukaji udi wamba ne: “Malu amvua mubale mu Bible akangambuluisha bua kupita bimpe ne ntatu ya mu dibaka dietu. Kutumikila mikenji ya mu Bible nkutupeteshe nsombelu wa disanka.” Mukajende Annalou udi wamba ne: “Kubala bilejilu bia mu Bible nkutuambuluishe. Ndi mpindieu ne disanka mu dibaka dietu ne bua mutudi badifundile bipatshila.”

Mua kumanya Nzambi. Pa kumbusha malu adi Vicent muambe bua dibaka diabu, udi wamba kabidi ne: “Pantu mbala Bible ntu ndiumvua mpindieu pabuipi menemene ne Yehowa kupita kumpala.” Tshidi Vicent muambe etshi ntshimanyine pa bualu bunene ebu: Bible udi mua kukuambuluisha bua kumanya Nzambi. Wewe wenza nunku, mibelu ya mu Bible neyikuambuluishe ne neumone kabidi ne: udi mua kufika ku dimanya Nzambi bu mulunda webe. Neumone ne: udi uleja malu onso mu katoba bua nsombelu muimpe wa mu matuku atshilualua, tshikondo tshiwapeta “muoyo wa bushuwa”, mmumue ne: muoyo wa kashidi. (1 Timote 6:19.) Ebu mbualu budi mukanda mukuabu kawuyi mua kutuleja.

Wewe muenze programe wa kuikala kubala Bible, udi pebe mua kupeta masanka aa: kuakaja nsombelu webe ku mpindieu ne kufika ku dimanya Nzambi. Kadi paudi ubala Bible pamuapa nkonko ya bungi neikuluile mu lungenyi. Padiyi ikuluila nanku, vuluka tshilejilu tshimpe tshia muntu wa muanzu munene muena Etshiopi uvua ne muoyo kukadi bidimu 2 000. Uvua ne nkonko ya bungi ya malu a mu Bible. Pakamukonka Filipo bua kumanya ni uvua mumvue bualu buvuaye ubala, wakamuandamuna ne: “Mmunyi mundi mua kubumvua bikala muntu kayi mundudike.”b Pashishe wakitaba ne disanka dionso diambuluisha dia Filipo, muyidi wa Yezu wa ku ntuadijilu, ukavua mulongeshi mukumbane wa malu a mu Bible. (Bienzedi 8:30, 31, 34) Bia muomumue, wewe musue kumanya malu a bungi a mu Bible, tudi tukulomba bua kuwuja dilomba ku Enternete mu site wa www.jw.org anyi fundila biro bidi pabuipi nebe mu adrese idi mileja mu mukanda eu. Udi kabidi mua kumonangana ne Bantemu ba Yehowa badi pabuipi nebe anyi kuya ku Nzubu wa Bukalenge wa muaba uudi. Kuenaku mua kuangata Bible lelu, ne kumulekela bua akupeteshe nsombelu muimpe anyi?