Mbikolele bamue bantu bua kunanga Nzambi. Buabu bobu mbikole bua kumvua tshidi Nzambi, bamumona muikale kule anyi mene muena tshikisu. Tumonayi bidi bamue bamba:

• Marco wa mu Italie udi wamba ne: “Mvua nsambila Nzambi bua angambuluishe, kadi eku mmumona muikale kule tshiyi mua kusemena pabuipi nende. Buanyi meme, tshivua mmona Nzambi bu muntu mulelela udi uditeka pa muaba wa bantu to.”

• Rosa wa mu Guatemala udi wamba ne: “Nansha mumvua ne dijinga dikole dia kusadila Nzambi ne muoyo mujima, mvua mmumona muikale kule, ne bu muntu wa malu makole udi musue anu kutunyoka. Tshivua ngitaba ne: uvua uditeka pa muaba wa bantu to.”

• Raymonde wa mu Canada udi wamba ne: “Pantshivua muana, mvua ngela meji ne: Nzambi uvua ukeba bilema bietu ne yeye mutupete nabi, uvua utunyoka. Pashishe, mvua mmumona bu udi kule ne bantu. Mvua mfuanyikija Nzambi bu kavula-mbedi udi ulongolola malu a bantu badiye ulombola, kadi kayi uditatshisha bua bualu buabu to.”

Udi wela meji ne: kakuena mushindu wa kunanga Nzambi anyi? Kukadi bidimu bia bungi bidi bena Kristo badiela lukonko elu. Bushuwa, mu bikondo bia kale, bantu ba bungi ba mu bukua buena Kristo kabavua nansha kabidi basambila Nzambi wa Bukole Buonso to. Bua tshinyi? Bantu bavua ne ditshina dibi dia Nzambi. Will Durant mumanyi wa malu a kale udi umvuija bualu ebu mushindu eu: “Mmunyi mudi masambila a muenji wa mpekatu mua kufika kudi Nzambi mubi udi kule ne bantu?”

Bua tshinyi bantu mbatuadije kumona Nzambi bu muntu “mubi udi kule nabu”? Ntshinyi tshidi Bible ulongesha menemene bua Nzambi? Kulonga bulelela pa bidi bitangila Nzambi kudiku mua kukuambuluisha bua kumunanga anyi?

TSHIDI BANTU BA BUNGI BAMBA

Mulongeshi wa malu a teoloji David Cunningham udi wamba ne: “Katuena bafike ku kudiumvuangana bua kumanya ne: Nzambi udi ne dîna to, ne bikalaye nadi, ndîna kayi?”

BULELELA BUA MU BIBLE

Nzambi wakamba ne: “Meme ndi Yehowa, adi ndina dianyi.” (Yeshaya 42:8) Yehowa ndîna dia mu tshiena Ebelu didi diumvuija “Eu udi uvuija.”​—Genese 2:4.

Yehowa mmusue bua tumubikile mu dîna diende. Bible udi wamba ne: ‘Tumbishayi dîna diende! Ambilayi bantu bienzedi biende munkatshi mua bisamba bionso, nubamanyishe ne: Dîna diende didi ditumbishibua.’​—Yeshaya 12:4.

Yezu uvua utela dîna dia Nzambi. Yezu wakambila Yehowa mu disambila ne: “Ndi mubamanyishe [bayidi bende] dîna diebe, nendimanyishe kabidi.” Bua tshinyi Yezu uvua mumanyishe bayidi bende dîna dia Nzambi? Wakatungunuka wamba ne: “Bua dinanga diudi munnange nadi dikale munda muabu ne meme mu buobumue nabu.”​—Yone 17:26.

BUA TSHINYI BIDI NE MUSHINGA?

Walter Lowrie mulongi wa malu a teoloji mmufunde wamba ne: “Muntu udi kayi mumanye Nzambi mu dîna diende ki mmumumanye bimpe menemene bu muntu, ne kena mua kumunanga bikalaye mumumanye anu bu bukole kampanda.”

Victor uvua uya mu tshitanda tshia Nzambi kampanda lumingu luonso, kadi kavua udiumvua ne: mmumanye Nzambi bimpe menemene to. Udi wamba ne: “Pashishe ngakalonga ne: dîna dia Nzambi n’Yehowa, bivua bienze anu bu ne: mvua mudimanyishe kudiye. Mvua ndiumvua anu bu mvua mupetangane ne Muntu umvua ngumvua bakula bikole bua bualu buende. Ngakatuadija kumumona bu Muntu mulelela ne ngakakolesha bulunda buanyi nende.”

Yehowa utu pende usemena pabuipi ne bantu badi bamubikila mu dîna diende. Bua bualu ebu Nzambi udi ulaya bantu badi ‘banemeka dîna diende’ ne: ‘Nembafuile luse bu mudi muntu ufuila muanende mulume udi umukuatshila mudimu luse.’ (Malaki 3:16, 17) Nzambi udi kabidi ufuta bantu badi babikila dîna diende. Bible udi wamba ne: “Muntu yonso udi ubikila dîna dia Yehowa neasungidibue.”​—Lomo 10:13.

TSHIDI BANTU BA BUNGI BAMBA

Bitendelelu binene bisatu bia bukua buena Kristo “tshia Katolike, Ortodokse ne tshia Mishonyi bidi bitaba Nzambi umue muenza ne bantu basatu: Nzambi tatu, Nzambi muana ne Nzambi spiritu munsantu. Bilondeshile mukanda kampanda wa malu a teoloji, dilongesha edi kadiena diamba ne: kudi Nzambi isatu, kadi bantu basatu aba badi benza muntu umue.”​—The New Encyclopædia Britannica.

BULELELA BUA MU BIBLE

Yezu Muana wa Nzambi kavua muanji kuditeka mu mulongo umue anyi mu tshipidia tshimue ne Tatuende to. Kadi wakamba ne: “Ndi nya kudi Tatu, bualu Tatu mmumpite meme bunene.” (Yone 14:28) Wakambila kabidi umue wa ku bayidi bende ne: “Ndi mbanda kudi Tatu wanyi ne Tatu wenu, kudi Nzambi wanyi ne Nzambi wenu.”​—Yone 20:17.

Nyuma muimpe ki mmuntu to. Bena Kristo ba kumpala “bakuwujibua tente ne nyuma muimpe,” ne Yehowa wakamba ne: “Nengitshikijile bantu ba mishindu yonso ndambu wa nyuma wanyi.” (Bienzedi 2:1-4, 17) Nyuma muimpe ki mmuntu wa mu Busatu Bunsantu to. Mbukole buenzeji bua Nzambi.

BUA TSHINYI BIDI NE MUSHIGA?

Karl Rahner ne Herbert Vorgrimler balongeshi ba mu Katolike badi bamba ne: “Busatu Bunsantu kabuena mua kumvuika padiku kakuyi dibuluibua ne nansha panyima pa muntu mupete dibuluibua kena anu mua kubumvua mu ndondo wabu to.” Udiku bulelela mua kunanga muntu uudi kuyi mua kumanya peshi kumvua tshidiye anyi? Nunku dilongesha dia Busatu Bunsantu didi dipangisha bantu mua kumanya Nzambi bimpe ne kumunanga.

Marco utudi batele mu tshiena-bualu tshia kumpala uvua umona Busatu Bunsantu bu mikalu mimuelela. Udi wamba ne: “Mvua ngela meji ne: Nzambi uvua unsokoka tshidiye, ne bualu ebu buvua bumuvuija kule, muntu uudi kuyi mua kumvua tshidiye ne kakuyi mushindu wa kusemena pabuipi nende.” Kadi, “Nzambi ki Nzambi wa malu mabuelakane to.” (1 Kolinto 14:33) Ki mmutusokoke tshidiye to. Mmusue bua tumumanye. Yezu wakamba ne: “Tudi tutendelela tshitudi bamanye.”​—Yone 4:22.

Marco udi wamba ne: “Pamvua mulonge ne: Nzambi kena Busatu Bunsantu, ngakadimona mukumbane bua kudia nende bulunda.” Tuetu tumona Yehowa bu muntu musunguluke katuyi tumumona bu muntu utudi katuyi tumvua tshidiye, mbipepele menemene bua kumunanga. Bible udi wamba ne: “Muntu yonso udi kayi unangangana ki mmuanji kumanya Nzambi, bualu Nzambi udi dinanga.”​—1 Yone 4:8.

TSHIDI BANTU BA BUNGI BAMBA

“Diakamue padi bantu bafua, anyima ya bantu badi bafue mu mibi idi iya mu iferno muaba udiyi ne bua kuya kukenga mu ‘kapia ka tshiendelele.’” (Catechism of the Catholic Church) Bamue bamfumu ba bitendelelu badi bamba ne: bantu badi mu iferno badi kule ne Nzambi.

BULELELA BUA MU BIBLE

“Anyima yonso udi wenza mpekatu, yeye muine ke udi ufua.” (Yehezekele 18:4, NW) Bafue “kabena bamanye bualu bumue.” (Muambi 9:5) Pikala anyima ufua ne kayi mumanye bualu, mmunyi mudiye mua kukenga mu “kapia ka tshiendelele” anyi kukenga kashidi mu muaba udi kule ne Nzambi?

Mu Bible, miaku ya mu tshiena Ebelu ne tshiena Greke idibu batamba kukudimuna ne: “iferno” idi yumvuija mu bulelela lukita lua bukua-bantu. Tshilejilu pavua Yobo ukenga ne disama dibi, wakasambila Nzambi wamba ne: “Ngakadi kusua bua wewe unsokoke mu muaba wa Bafue [“mu iferno,” Douay-Rheims Version].” (Yobo 14:13) Yobo uvua musue kuikisha, ki mu mmuaba wa makenga anyi kule ne Nzambi, kadi mu lukita.

BUA TSHINYI BIDI NE MUSHINGA?

Malu a tshikisu kaena atusemeja pabuipi ne Nzambi kadi adi atuyisha kule nende. Rocio wa mu Mexique udi wamba ne: “Katshia ku buana mvua mulonge dilongesha dia iferno wa kapia. Bivua bingenza buôwa bua kumvua ne: Nzambi kavua ne ngikadilu muimpe nansha umue. Mvua ngela meji ne: uvua ne tshiji ne kayi ufuila bantu luse.”

Diumvua bimpe tshidi Bible wamba bua mapangadika adi Nzambi wangata ne bua mushindu udi bafue bivua bishintulule mushindu uvua Rocio umona Nzambi. Rocio udi wamba ne: “Mvua mudiumvue bu muntu udibu bumbushe bujitu bunene. Ngakatuadija kuitaba ne: Nzambi udi utujingila malu mimpe, ne mmutunange ne ndi mua kumunanga panyi. Udi bu tatu udi mukuate muanende ku tshianza ne mmusue diakalenga diende.”​—Yeshaya 41:13.

Bantu ba bungi mbaditatshishe bua kuenza malu mimpe bua buôwa bua iferno wa kapia, kadi Nzambi ki mmusue bua umuenzele mudimu bua buôwa bua bualu kampanda to. Ke bualu kayi Yezu wakamba ne: “Udi ne bua kunanga Yehowa Nzambi webe.” (Mâko 12:29, 30) Kabidi patudi tujingulula ne: Nzambi ki ngudi wenzeja malu mabi adi enzeka matuku etu aa, tudi tueyemena kabidi mapangadika ikalaye mua kuangata bua matuku atshilualua. Anu bu Elihu mulunda wa Yobo, tudi mua kuamba ne dishindika dionso ne: ‘Kabiena mua kuenzeka bua Nzambi mulelela kuenza malu mabi to, Bua Wa Bukole Buonso kuenza bibi nansha!’​—Yobo 34:10, NW.

Dikuabu dituku mu Yelushalema, Yezu uvua wakula bua Tatuende Yehowa ne wela bamfumu ba bitendelelu bia dishima ba mu tshikondo tshiende patoke. (Yone 8:12-30) Bualu buvuaye muenze ebu budi butulongesha mutudi petu mua kukonkonona malu adi bantu balongesha bua Nzambi mu matuku etu aa. Yezu wakamba ne: “Nuenu bashale mu dîyi dianyi nudi bayidi banyi bulelela, nenumanye bulelela, ne bulelela nebunupeshe budikadidi.”​—Yone 8:31, 32.

‘Nushale mu dîyi dianyi.’ Mêyi aa adi aleja mudi Yezu utukankamija bua kukonkonona malongesha a mu bitendelelu bua kumanya ni ‘mmalelela.’ Paudi umvua dilongesha kampanda didi ditangila Nzambi, diebeje ne: ‘Didiku mu diumvuangana ne mêyi a Yezu ne mvese mikuabu ya mu Bible anyi?’ Idikija bantu bavua bateleje mupostolo Paulo ne bavua “bakonkonona mêyi a mu Mifundu minsantu bimpe menemene dituku dionso bua kumanya bikala malu aa avua malelela.”​—Bienzedi 17:11.

Marco, Rosa ne Raymonde batuvua bakuile bualu buabu mu tshiena-bualu tshia kumpala tshia mu biena-bualu ebi, bavua bakonkonone ne ntema yonso malu adibu bitabuja pa kulonga Bible ne Bantemu ba Yehowa. Mmalu kayi avuabu balonge?

Marco udi wamba ne: “Mulongeshi wetu wa Bible uvua ukuata mudimu ne Bible bua kuandamuna nkonko yonso ituvua tumuela meme ne mukajanyi. Dinanga dietu bua Yehowa diakatuadija kudiunda, ne malanda avua pankatshi panyi ne mukajanyi akakola pawu!”

Rosa udi wamba ne: “Kumpala mvua ngela meji ne: Bible uvua anu mukanda udi ne ngenyi ya bantu idi ileja mudi Nzambi mua kuikala. Kadi mu kupita kua matuku, Bible wakandamuna nkonko yanyi. Mpindieu, ndi mmona Yehowa bu muntu mulelela. Mmuntu undi mua kueyemena.”

Raymonde udi wamba ne: “Ngakalomba Nzambi diambuluisha bua meme kulonga malu ende. Matuku makese pashishe, meme ne bayanyi tuakatuadija kulonga Bible. Ndekelu wa bionso, tuakalonga bulelela pa bidi bitangila Yehowa! Tuvua ne disanka dia kujingulula mudi Nzambi ne ngikadilu mimpe.”

Bible kena anu wela patoke malu a dishima adibu bamba bua Nzambi; kadi udi wakula kabidi bua ngikadilu yende mimpe. Mmukanda wende mufundisha ku nyuma muimpe, ne udi utuambuluisha bua ‘kumanya malu adi Nzambi mutupeshe ne muoyo mujima.’ (1 Kolinto 2:12) Kuenaku mua kukonkonona bua kumona mudi Bible wandamuna nkonko minene ya malu adi atangila Nzambi, disua diende ne matuku etu atshilualua anyi? Bala mandamuna a imue nkonko mu tshiena-bualu tshia “Malongesha a mu Bible > Mandamuna a nkonko ya malu a mu Bible” mu www.jw.org. Udi kabidi mua kulomba dilonga dia Bible mu site eu anyi kudi Ntemu wa Yehowa kampanda. Tudi batuishibue ne: wewe muenze nunku, neumone ne: udi mua kunanga Nzambi mu mushindu uuvua kuyi muelele meji to.