“Newikale nanyi mu Mparadizu”

1. Bilondeshile Luka 23:39-43, Yezu wakambila muenzavi uvua ku luseke luende tshinyi kumpala kua kukula muoyo?

YEZU ne benzavi babidi bavua bamuele munkatshi bavua bakenga ne muoyo pavuabu benda bakula muoyo. (Luka 23:32, 33) Benzavi bonso babidi abu bavua bamba Yezu mêyi mabi, bimueneka ne: kabavua bayidi bende to. (Mat. 27:44; Mâko 15:32) Kadi muenzavi umue wakashitulula meji ende, kuambilaye Yezu ne: “Yezu, umvuluke pawabuela mu Bukalenge buebe.” Yezu kumuandamuna ne: “Bulelela, ndi nkuambila lelu ne: newikale nanyi mu Mparadizu.” (Bala Luka 23:39-43.) Kakuena tshidi tshitujadikila ne: muenzavi au uvua muitabe mukenji wa “Bukalenge bua mu diulu” uvua Yezu uyisha to. Yezu muine kavua muambe ne: muntu au neabuele mu Bukalenge bua mu diulu to. (Mat. 4:17) Uvua wakula bua Mparadizu wa pa buloba. Bua tshinyi tudi tuamba nanku?

2. Ntshinyi tshidi tshileja ne: muenzavi uvua munyingalale uvua muena Yuda?

² Muenzavi uvua munyingalale au uvua pamuapa muena Yuda. Wakambila muenzavi nende ne: “Kuenaku utshina Nzambi nansha kakese, pebe mukosela tshibawu tshia muomumue?” (Luka 23:40) Bena Yuda bavua batendelela Nzambi umuepele, kadi bantu ba bisamba bikuabu bavua bobu bantendelela nzambi ya bungi. (Ekes. 20:2, 3; 1 Kol. 8:5, 6) Bu benzavi abu bantu ba bisamba bikuabu, uvua muele muena diende lukonko au uvua mua kumuebeja ne: “Kuenaku utshina banzambi nansha kakese anyi?” Bualu bukuabu, kabavua batume Yezu kudi bantu ba bisamba bikuabu to, kadi “kudi mikoko mijimine ya nzubu wa Isalele.” (Mat. 15:24) Nzambi ukavua muambile bena Isalele ne: uvua ne bua kujula bantu ku lufu. Muenzavi uvua munyingalale au uvua pamuapa mumanye bualu ebu, ne anu bu mudi mêyi ende aleja, uvua muele meji ne: Yehowa neajule Yezu ku lufu bua kukokesha mu Bukalenge bua Nzambi. Uvua mua kuikala kabidi ne ditekemena dia ne: Nzambi neamubishe ku lufu.

3. Bilondeshile Genese 2:15, ntshinyi tshivua mua kuikala tshiluile muenzavi mu lungenyi pavua Yezu muakule bua Mparadizu? Umvuija.

³ Bu muvua muenzavi au muena Yuda, uvua ne bua kuikala mumanye bualu bua Adama ne Eva ne bua Mparadizu uvua Yehowa mubateke. Nunku uvua ne bua kuikala mujingulule ne: Mparadizu uvua Yezu muakuile uvua mua kuikala muaba mulenga wa pa buloba apa.​—Bala Genese 2:15.

4. Mêyi avua Yezu muambile muenzavi adi ne bua kutusaka bua kuenza tshinyi?

⁴ Mêyi avua Yezu muambile muenzavi adi ne bua kutusaka ku diela meji a muikala nsombelu mu Mparadizu. Bukokeshi bua ditalala bua mukalenge Solomo budi mua kutulongesha malu a bungi bua Mparadizu. Tutekemene ne: Yezu udi munene kupita Solomo neenze mudimu pamue ne bakokeshi nende bua kuakaja malu pa buloba. (Mat. 12:42) Biumvuika bimpe ne: “mikoko mikuabu” idi ne bua kutabalela malu adiyi ne bua kuenza bua kupeta muoyo wa kashidi mu Mparadizu.​—Yone 10:16.

NSOMBELU NEIKALE MUSHINDU KAYI MU MPARADIZU?

5. Udi wela meji ne: nsombelu neikale mushindu kayi mu Mparadizu?

⁵ Udi wela meji ne: nsombelu neikale mushindu kayi mu Mparadizu? Pamuapa udi wela meji a lupangu lulengela lengelayi bu budimi bua Edene. (Gen. 2:7-9) Pamuapa udi uvuluka mêyi a buprofete a Mika a ne: bantu ba Nzambi nebasombe “muntu ne muntu muinshi mua muonji wende wa tumuma tua mvinyo ne muinshi mua mutshi wende wa mfigi.” (Mika 4:3, 4) Mvese ya mu Bible itu ileja ne: nekuikale biakudia bipite bungi idi mua kuikala ikuluila mu lungenyi. (Mis. 72:16; Yesh. 65:21, 22) Nanku udi mua kudimona ukadi mu lupangu lulengela lengelayi, musomba ku mêsa muule ne biakudia bia muenya. Pamuapa udi udifuanyikijila umvua dipembu dimpe dia mitshi ne bilongo, anyi udi umvua tuseku tua bena mu dîku dienu badi basombe ne balunda ne bantu badi babishibue ku lufu. Malu atudi batele aa ki nga mu tshilota to, neakumbane bushuwa pa buloba apa. Nansha nanku, mu Mparadizu netuikale kabidi ne midimu mimpe yatusankisha.

6. Mmalu kayi atuenza mu Mparadizu? (Tangila tshimfuanyi)

⁶ Yehowa mmutufuke bua tuikale tusanka ne mudimu utudi tuenza. (Muam. 2:24) Netuikale ne bia bungi bia kuenza mu bukokeshi bua bidimu tshinunu bua Kristo. Bantu bapanduka ku dikenga dinene ne ba bungi babishibua ku lufu nebikale dijinga ne bilamba ne biakudia ne muaba wa kusombela. Netuenze mudimu wa bungi udi usankisha bua kubapetesha bintu ebi. Netuenze mudimu wa kuvuija buloba Mparadizu anu bu muvua Adama ne Eva benza bua kulama budimi bua Edene. Elabi meji a disanka ditumvua patualongesha bantu babishibua ku lufu bungi tshianana badi bamanye anu malu makese a Yehowa ne adiye mutulongoluele, ne kabidi dia mutuambuluisha bena lulamatu bavuaku kale kumpala ku Yezu bua bamanye bivua bishale kuenzeka katshia bafua.

7. Mbimpe tuikala batuishibue bua malu kayi? Bua tshinyi?

⁷ Mbimpe tutuishibue ne: mu Mparadizu nemuikale ditalala, katuakukengela tshintu, ne malu neikale malongolola bimpe. Bua tshinyi? Bualu Yehowa ukadi mumane kutupesha kadiosha ka muikala nsombelu mu bukokeshi bua Muanende. Malu avua menzeke mu bukokeshi bua mukalenge Solomo adi ajadika bualu ebu.

BUKOKESHI BUA MUKALENGE SOLOMO NKADIOSHA KA TSHIENZEKA MU MPARADIZU

8. Mmunyi muakakumbana mêyi a mukalenge Davidi adi mu Misambu 37:10, 11, 29? (Tangila “Nkonko ya babadi” idi mu tshibejibeji etshi.)

⁸ Ku bukole bua nyuma, mukalenge Davidi wakafunda muikala nsombelu pasomba mukalenge wa meji ne wa lulamatu mu nkuasa wa bukalenge. (Bala Misambu 37:10, 11, 29.) Tutu tubadila bantu Misambu 37:11 bua kubumvuija muikala Mparadizu. Tutu tubabadila mêyi adi mu mvese eu bualu Yezu wakaatela mu muyiki wende wa pa mukuna, uleja ne: avua ne bua kukumbana matuku kumpala. (Mat. 5:5) Mêyi a Davidi au avua aleja kabidi muvua nsombelu ne bua kuikala mu bukokeshi bua mukalenge Solomo. Pavua Solomo ukokesha Isalele, bantu ba Nzambi bavua mu ditalala dia dikema, ne kabavua bakengela tshintu mu buloba ‘buvua ne mabele ne buitshi bia bungi.’ Nzambi wakabambila ne: “Binuatungunuka ne kuendela mu mikenji yanyi mifunda . . . , nenteke ditalala mu buloba, nenulale kakuyi muntu unukuatshisha buôwa.” (Lew. 20:24; 26:3, 6) Milayi ayi yakakumbana pavua Solomo ukokesha. (1 Kul. 22:9; 29:26-28) Bavua babalaye kabidi ne: bantu babi kabavua ne bua ‘kuikalaku kabidi to.’ (Mis. 37:10) Nunku mêyi adi mu Misambu 37:10, 11, 29 avua makumbane kale, ne neakumbane kabidi kumpala eku.

9. Ntshinyi tshivua mukalenge mukaji wa ku Sheba muambe bua bukokeshi bua mukalenge Solomo?

⁹ Lumu lua ditalala ne lua bintu bivule bivua mu Isalele pavua Solomo ukokesha luakafika too ne kudi mukalenge mukaji wa ku Sheba. Mukalenge mukaji au wakenza luendu lule mutangile ku Yelushalema bua kuya kudimuenena malu avuaye mumvue ne ende abidi. (1 Bak. 10:1) Yeye mumane kumona muvua malu enzeka mu bukalenge bua Solomo, wakamuambila ne: “Kabavua bangambile nansha tshitupa tshia malu . . . Bantu bebe mba diakalenga, ne bena mudimu bebe badi bimana kumpala kuebe misangu yonso bateleja meji ebe mba diakalenga!” (1 Bak. 10:6-8) Kadi nsombelu uvua nende bantu bavua Solomo ukokesha uvua anu kadiosha patupu ka malu enzela Yehowa bantu mu bukokeshi bua Muanende Yezu.

10. Mmushindu kayi udi Yezu mupite Solomo kule ne kule?

¹⁰ Yezu mmupite Solomo kule ne kule. Solomo uvua muntu mupange bupuangane uvua muenze bilema bibi menemene bikebele too ne bantu ba Nzambi ntatu. Kadi Yezu yeye udi Mukokeshi mupuangane utu kayi wenza tshilema nansha tshimue. (Luka 1:32; Eb. 4:14, 15) Wakashala ne lulamatu mu mateta makole a kudi Satana. Wakaleja ne: kakuenza tshilema anyi bualu nansha bumue budi mua kunyingalaja bantu bakokeshaye to. Tudi ne diakalenge dia dikema dia mudi Yezu Mukalenge wetu!

11. Yezu neenze mudimu ne banganyi?

¹¹ Yezu neenze mudimu ne bantu 144 000 bakokesha nende bua kukumbaja tshivua Yehowa mulongolole bua buloba ne bua kutabalela bantu bonso. (Buak. 14:1-3) Bakokeshi aba nebikale baditeka pa muaba wa bakuabu bualu mbantu bavua batuilangane ne ntatu ya bungi ne makenga pavuabu pa buloba apa. Mmudimu kayi menemene wenza bakokeshi aba?

BELA MANYI NEBENZE MUDIMU KAYI?

12. Mmudimu kayi udi Yehowa mupeshe bantu 144 000?

¹² Mudimu udibu bapeshe Yezu ne bantu bakokeshaye nabu mmunene kupita uvuabu bapeshe Solomo. Solomo uvua ne bua kutabalela bantu ba bungi, kadi anu ba mu tshitupa tshia buloba tshimue patupu. Kadi bantu bakokesha mu Bukalenge bua Nzambi bobu nebatabalele bantu bungi tshianana bikala ne muoyo pa buloba bujima. Eu si mmudimu muimpe mutambe udi Yehowa mupeshe bantu 144 000!

13. Mmudimu kayi wa pa buawu wenza bantu bakokesha ne Yezu?

¹³ Bantu 144 000 nebikale bakalenge ne bakuidi anu bu Yezu. (Buak. 5:10) Patshivua bena Isalele batumikila Mikeji ya Mose, bakuidi ke bavua benza bua bantu bikale ne makanda a mubidi mimpe eku benza kabidi bua bikale mu malanda mimpe ne Yehowa. Mikenji ayi ivua “mundidimbi wa malu mimpe atshilualua,” ke bualu kayi mbikumbane bua kuamba ne: bantu bakokesha ne Yezu nebambuluishe bantu ba Nzambi bua kuikala ne makanda a mubidi mimpe ne kuikala mu malanda mimpe ne Yehowa. (Eb. 10:1) Mbimpe tuindile bua kumona muikala bakalenge ne bakuidi aba mua kueleshangana diboko ne bantu badi Bukalenge bua Nzambi bukokesha pa buloba. Nansha Yehowa mulongolole malu mushindu kayi, tuikale batuishibue ne: bantu bonso bikala mu Mparadizu pa buloba nebapete buludiki budi bukengela.​—Buak. 21:3, 4.

MALU ADI “MIKOKO MIKUABU” NE BUA KUENZA BUA KUBUELA MU MPARADIZU

14. Ntshinyi tshidi bantu ba mu “mikoko mikuabu” ne bana babu ne Kristo benza?

¹⁴ Yezu wakabikila bantu bakokesha nende ne: “kasumbu kakese ka mikoko.” (Luka 12:32) Wakalua kuakula bua tshisumbu tshikuabu tshivuaye mubikile ne: “mikoko mikuabu.” Bisumbu bionso bibidi ebi bidi bienza tshisumbu tshimue tshidi mu buobumue. (Yone 10:16) Bena mu bisumbu bibidi ebi bakadi benza mudimu pamue lelu eu, ne nebatungunuke ne kuenza nanku palua buloba Mparadizu. Kadi bena mu “kasumbu kakese ka mikoko” nebaye mu diulu, ne bantu ba mu “mikoko mikuabu” nebikale ne diakalenga dia kushala ne muoyo kashidi pa buloba. Kudi malu adi bantu ba mu “mikoko mikuabu” ne bua kuenza bua kubuela mu Mparadizu.

15. a) Mmunyi mudi bena mu “mikoko mikuabu” belesha bana babu ne Yezu diboko? b) Mmunyi mutudi mua kuidikija muanetu udi mu nzubu wa dipanyishila manga eu? (Tangila tshimfuanyi.)

¹⁵ Muenzavi uvua munyingalale au wakafua kumpala kua yeye kupeta mpunga wa kuleja dianyisha bua tshivua Kristo mumuenzele. Kadi tuetu ba mu “mikoko mikuabu” tudi ne mpunga ya bungi ya kuleja dianyisha bua malu adi Yezu mutuenzele. Tshilejilu, tutu tuenzela bena Kristo bela manyi malu mimpe bua kuleja mutudi bamunange. Yezu wakamba ne: nealumbuluishe bena mu mikoko mikuabu bilondeshile malu adibu benzela bela manyi. (Mat. 25:31-40) Tudi mua kutua bana babu ne Kristo mpanda tuetu tubambuluisha mu mudimu wa diyisha ne divuija bantu bayidi ne disanka dionso. (Mat. 28:18-20) Bua kukumbaja mudimu eu, mbimpe tumanye mua kulongesha ne mikanda yetu, tshilejilu bu mudi wa Shala ne muoyo kashidi! Wewe kuyi muanji kupeta muntu wa kulongesha Bible, difundila tshipatshila tshia kulomba bantu ba bungi bua kubalongesha Bible.

16. Mmalu kayi atudi ne bua kuenza ku mpindieu bua kudilongolola bua kubuela mu Mparadizu?

¹⁶ Katuindidi bua kulua bantu badi Yehowa wanyishila bua kubuela mu Mparadizu anu patuabuelamu to. Kutuadijila ku mpindieu, mbimpe tuikale bena bululame mu ngakuilu ne mu bienzedi ne tuikale ne nkatshinkatshi mu nsombelu wetu. Tuikale ne lulamatu kudi Yehowa, kudi muena dibaka netu, ne kudi bena Kristo netu. Tuetu tutumikila mikenji ya Yehowa bimpe patutshidi mu bulongolodi bubi ebu, nebikale bipepele bua tuetu kuyitumikila mu Mparadizu. Tudi kabidi mua kupeta mamanya ne imue ngikadilu bua kuleja ne: tudi tudilongolola bua kubuela mu Mparadizu. Tangila tshiena-bualu tshia ne: “Ukadi mudilongolole bua ‘kupiana buloba’ anyi?” mu tshibejibeji etshi.

17. Tudi ne bua kushala anu tunyingalala bua mpekatu ituvua benze kale anyi? Umvuija.

¹⁷ Tudi kabidi ne bua kudienzeja bua kulekela kudipisha bua mpekatu minene ituvua mua kuikala benze kale. Mu bulelela, katuena mua kuikala “tuenza mpekatu ku bukole” tuamba ne: mulambu wa tshia kupikulangana natshi udiku, nebambuikidile to. (Eb. 10:26-31) Kadi tuetu banyingalale ne muoyo mujima bua mpekatu munene utuvua benze, bakebe diambuluisha kudi Yehowa ne kudi bakulu, ne balekele tshikadilu tshietu tshibi, tuikale batuishibue ne: mmutufuile luse ne muoyo mujima. (Yesh. 55:7; Bien. 3:19) Vuluka mêyi avua Yezu muambile Bafalese a ne: “Tshivua mulue bua kubikila bantu bakane, kadi mbua kubikila benji ba mpekatu.” (Mat. 9:13) Mulambu wa tshia kupikulangana natshi udi ne bukole bua kutubuikidila mpekatu yetu yonso.

UDI MUA KUSHALA NE MUOYO KASHIDI MU MPARADIZU

18. Mmalu kayi awajinga kuyikila ne muenzavi uvua mufue ku luseke lua Yezu?

¹⁸ Fuanyikijabi wewe mu mparadizu uyikila ne muenzavi uvua muyikile ne Yezu au. Bushuwa nuenu bonso nenuleje dianyisha dia bungi bua mulambu wa Yezu. Pamuapa neumuebeje bua akulondele malu a bungi avua menzeke mêba makese kumpala kua Yezu kukula muoyo, ne muvuaye mumvue pavua Yezu muandamune dilomba diende. Yeye pende neakuebeje pamuapa muvua nsombelu mu matuku a ku nshikidilu wa ndongoluelu wa malu wa Satana. Netshikale diakalenge dia dikema dia kulongesha bantu ba nanku Bible.​—Ef. 4:22-24.

19. Bua tshinyi nsombelu kakututonda mu Mparadizu? (Tangila tshimfuanyi tshia pa tshizubu.)

¹⁹ Nsombelu wa mu Mparadizu kakututonda to, bualu nekuikale anu bantu bimpe batuatuilangana nabu ne mudimu muimpe wa kuenza. Kadi bualu bua mushinga mukole budi ne: dituku dionso, netuikale tuenda tumanya Tatu wetu wa mu diulu bimpe ne tusanka ne bintu bionso biatuenzelaye. Malu adi amutangila atualonga kaakujika to, ne netulonge malu a bungi adi atangila bifukibua biende. Pikala bidimu bienda bipita, dinanga ditudi banange Nzambi wetu wa dinanga nediende divula padi. Tudi ne disanka dia bungi bua mudi Yehowa ne Yezu batulaye bua kusomba mu Mparadizu bua kashidi!