Semena pabuipi ne Nzambi
Tatu udi kayi kuelekeja
“TATU.” Kakuena miaku ya bungi idi ileja dinanga mu bantu bu muaku eu to. Tatu udi munange bana bende udi ubambuluisha bua bakole bimpe. Ke bualu kayi Bible udi ubikila Yehowa Nzambi ne: “Tatu.” (Matayo 6:9) Kadi Yehowa n’Tatu wa mushindu kayi? Bua kuandamuna lukonko elu, tukonkononayi mêyi avua Yehowa muambile Yezu mu tshikondo tshivuabu bamutambuisha. Mushindu udi tatu uyukila ne bana bende udi uleja bimpe tshidiye.
Mu ngondo wa dikumi mu 29, Yezu wakaya ku musulu wa Yadene bua kumubatizabu. Bible udi ulonda tshivua tshienzeke wamba ne: ‘Pakamubatizabu nunku, Yezu wakumuka mu mâyi, ne monayi, diulu diakamubulukila, yeye wakatangila nyuma wa Nzambi upueka bu nyunyu wa nkutshi, umuikila; ne umvuayi, dîyi diakafuma mu diulu ne: Eu udi muananyi munanga, yeye udi unsankisha bimpe.’a (Matayo 3:16, 17) Mêyi mimpe a Yehowa aa adi atuleja mudiye Tatu muimpe. Mona malu asatu avua Yehowa muambile muanende.
Bualu bua kumpala, pavua Yehowa muambe ne: ‘Eu udi muananyi,’ uvua wamba ne: ‘Ndi ne disanka dia kuikala Tatuebe.’ Tatu udi ne busunguluji udi ukumbaja majinga a bana bende bua kubatabalela. Bana batu basue babambile ne: badi ne mushinga wa bungi mu dîku. Elabi meji muvua Yezu (nansha mukavuaye muntu mukole) mua kuikala mudiumvue pavua Tatuende mumuangate ne mushinga mushindu eu!
Bualu buibidi, pavua Yehowa mubikile muanende ne: “munanga,” wakaleja patoke muvuaye munange Yezu. Mmu ngumvuilu wa Tatu wambila muanende ne: ‘Ndi mukunange.’ Tatu muimpe utu wambila bana bende ne: mmubanange bikole. Mêyi a mushindu eu ne dinanga dilelela bidi biambuluisha bana bua kukola bimpe. Bivua ne bua kuikala bilenge mutshima wa Yezu bikole pakumvuaye Tatuende uleja ne: mmumunange.
Buisatu, pavua Yehowa muambe ne: ‘Udi unsankisha bimpe,’ uvua uleja muvuaye muanyishe Muanende. Mbienze bu ne: Yehowa uvua muambe ne: ‘Muananyi, biudi muenze bidi binsankisha bikole.’ Tatu mulenga utu ukeba mishindu ya kuleja bana bende mudibu bamusankisha bua malu mimpe adibu bamba anyi benza. Padi baledi baleja mudibu banyisha bana, bidi bikolesha malanda abu ne bana. Bushuwa, bivua mua kuikala bikoleshe Yezu bua kumvua ne: Tatuende mmumuanyishe.
Bulelela, Yehowa udi Tatu udi kayi ne wa kuelekejangana nende. Muoyo webe mmusue tatu wa mushindu eu anyi? Bikalabi nanku, neumvue bimpe pa kumanya ne: kudi mushindu wa kuikala mu malanda ne Yehowa. Wewe muitabe malu ende audi ulonga ne muditatshishe bua kuenza disua diende, neudie nende malanda. Bible udi wamba ne: ‘Semenayi pabuipi ne Nzambi, ne yeye neasemene pabuipi nenu.’ (Yakobo 4:8) Udi wela meji kayi bua bukubi buudi mua kupeta mu disemena pabuipi ne Yehowa Nzambi, Tatu mutambe buimpe udi kayi kuelekeja?
[Mêyi adi kuinshi]
a Bilondeshile muyuki wa muomumue udi mu mukanda wa Luka, Yehowa wakatela muaku “wewe,” wamba ne: ‘Wewe udi muananyi munanga, udi unsankisha bimpe.’—Luka 3:22.