‘Ngikadilu yende idi kayiyi imueneka, idi imueneka bimpe’

Udiku witabuja ne: Nzambi udiku anyi? Wewe witabuja, udiku mua kufila bijadiki bia dikalaku diende anyi? Bulelala budiku mbua se: kudi bijadiki bidi bitunyunguke bidi bileja mudiku Mufuki udi ne meji, bukole ne dinanga. Mbijadiki kayi abi? Mmunyi mudibi bileja dikalaku dia Nzambi? Bua kupeta mandamuna, tuanji kukonkonona mêyi a mupostolo Paulo adi mu mukanda wende uvuaye mufundile bena Kristo ba mu Lomo.

Paulo wakamba ne: “Ngikadilu yende [Nzambi] idi kayiyi imueneka, mmumue ne: bukole buende bua tshiendelele ne Bunzambi buende, idi imueneka bimpe katshia buloba buafukibua, bualu badi bayijinguluila ku bintu bidi bifukibue, nunku kabena ne tshia kudibingisha natshi nansha.” (Lomo 1:20) Mufuki mmuleje tshidiye mu bintu bidiye mufuke anu bu muvua Paulo muambe. Tukonkononayi bimpe mêyi a Paulo aa.

Paulo udi uleja ne: ngikadilu ya Nzambi idi imueneka bimpe “katshia buloba buafukibua.” Mu mvese eu, muaku wa mu tshiena Greke udibu bakudimune “buloba” kawena uleja buloba buetu buena dîna ebu to. Kadi budi buleja bukua bantu.a Nunku mêyi a Paulo adi aleja ne: kumbukila ku tshikondo tshivua Nzambi mufuke bantu, badi bamona bijadiki bia ngikadilu ya Mufuki mu bintu bidiye mufuke.

Bijadiki bionso ebi mbitunyunguluke. Ki mbisokoka mu bufuki kadi bidi ‘bimueneka bimpe’ patoke. Kumbukila ku bintu bitambe bunene too ne ku bintu bikese, bufuki budi buleja patoke ne: kudi Mufuki udi ne ngikadilu mimpe mitambe. Mushindu udi Nzambi mufuke bintu ne meji, kawenaku utuleja ne: udi ne meji anyi? Mitoto idi muulu ne mavuala a mâyi kabienaku bileja bukole buende anyi? Mishindu mishilashilangane ya biakudia bidi bitusankisha, dipatuka dia dîba ne dibuela diadi kabienaku bileja ne: Nzambi mmunange bantu anyi?​—Musambu 104:24; Yeshaya 40:26.

Bijadiki mbipite bungi bidi bimueneka patoke. Ke bualu kayi muntu yonso udi ubenga kubimona ne ubenga kuitaba Nzambi kena ne tshia “kudibingisha natshi” to. Mumanyi kampanda udi ufuanyikija bualu ebu mu mushindu eu: fuanyikija ne: muendeshi wa mashinyi udi ubenga kumona bimanyinu bidi bimuleja ne: udi ne bua “kunyunguluka anyi kukudimuka ku dia bakaji.” Mpulushi udi umuimanyika ne umukuata. Muendeshi wa mashinyi udi utuadija kudibingisha wamba ne: tshivua mumone bimanyinu to. Kadi mêyi ende kaena ne mushinga wa bungi bualu bimanyinu bidi bimueneka patoke ne kakuena tshintu tshidi tshileja ne: muendeshi kena umona bimpe to. Muendeshi udi kabidi ne bukenji bua kumona bimanyinu ne kubitumikila. Bidi bia muomumue bua ngikadilu ya Nzambi idi imueneka mu bufuki. “Tshimanyinu” tshia ngikadilu ya Nzambi etshi tshidi tshimueneka patoke. Bu mutudi bifukibua bia meji, tudi ne bua kumona tshimanyinu etshi. Kakuena mushindu wa tuetu kuamba ne: katuena batshimone to.

Mu bulelela, bufuki budi butuleja malu a bungi adi atangila Mufuki wetu. Kadi Bible udi utuleja malu a bungi menemene adi a mutangila. Mu Bible tudi mua kupeta diandamuna dia lukonko lua mushinga elu: Ntshinyi tshidi Nzambi mulongolole bua buloba ne bua bantu badi basombapu? Kumanya diandamuna dia lukonko elu kudi mua kutuambuluisha bua kusemena pabuipi ne Nzambi udi ‘ngikadilu yende idi kayiyi imueneka, idi imueneka bimpe’ mu bintu bidi bitunyunguluke.