Yezu Kristo​—Mmunyi mutudi mua kumuvuluka?

Mu ngondo wa dikumi ne muibidi, bantu ba bungi ba pa buloba bujima batu bavuluka Yezu bu muana, muladika mu tshidilu tshia nyama. Kadi tudiku mua kuvuluka Yezu anu bu muana anyi?—a Tuakulabi bua malu a bungi a mushinga adi mua kutuambuluisha bua kumuvuluka. Tudi mua kulongela ku tshivua tshifikile balami bavua balama mikoko butuku mu mpata pabuipi ne Beteleheme.

Muanjelu kampanda wakamuenekela diakamue balami ba mikoko. E kubambila ne: “mbanulelele lelu Musungidi, yeye udi Kristo Mukalenge.” Muanjelu wakabambila kabidi ne: nebasangane Yezu “mujingila mu tshilamba, muladika mu tshidilu tshia nyama.” Mutantshi eu, banjelu bakuabu ba bungi kumueneka ne kutuadijabu ‘kutumbisha Nzambi.’

Mmunyi muudi mua kudiumvua bu wewe mumvue banjelu batumbisha Nzambi?— Balami ba mikoko badi ne disanka. Badi bamba ne: “Tuyayi ku Beteleheme bua kumona bualu budi buenzeke.” Pakafikabu, bakamona “Mariya ne Jozefe ne muana muladika mu tshidilu tshia nyama.”

Pashishe, bantu bakuabu bavua ne bua kulua ku Beteleheme muaba uvua Mariya ne Jozefe. Pakabambila balami ba mikoko bualu buvua buenzeke, bakakema bikole. Udiku ne disanka bua kumanya malu a mushinga aa anyi?— Tuetu bonso badi banange Nzambi tudi ne disanka dia kumanya malu aa. Mpindieu tumona mudi diledibua dia Yezu ditupetesha masanka. Bua kumvua bimpe bualu ebu, tuanji kupingana mu tshikondo tshivuabu kabayi banji kusela Mariya.

Dimue dituku, muanjelu Gabaliele wakalua kutangila Mariya. Yeye kumulaya ne: nealele muana, “neikale munene, nebamubikile ne: Muana wa Mutambe Bunene.” Wakamba kabidi ne: “Neikale Mukalenge, Bukalenge buende kabuakuikala ne ndekelu to.”

Mariya uvua musue kumanya muvua bualu ebu mua kuenzeka bualu kavua muanji kumanyangana ne mulume to. Nunku, Gabaliele wakamumvuija ne: “Bukole bua Mutambe Bunene nebukubuikile. Bua bualu abu, muana waledibua nebamubikile ne: ngua tshijila, Muana wa Nzambi.” Nzambi wakenza tshishima tshinene pakangataye muoyo wa Muanende mu diulu kuwela mu difu dia Mariya bua aledibue bu muana.

Udiku umona bimfuanyi bidi muaba au bidi bileja bena meji basatu ne balami ba mikoko badi balue kutangila Yezu patshivuaye muana wa mu maboko anyi?— Batu batamba kuleja bimfuanyi bia buena ebi mu mafesto a Nowele. Kadi ki mmudibi to. “Bena meji” aba bavua mu bulelela bena mbuku ya mitoto, malu adi Nzambi ubenga. Tumona tshivua tshienzeke pavuabu bafike. Bible udi wamba ne: “Bakabuela mu nzubu, kumonabu muana [mukese, NW] ne mamuende Mariya.” Nunku Yezu katshivua kabidi muana wa mu maboko muladika mu tshidilu tshia nyama, kadi ukavua muana mubandile uvua musombe ne Jozefe ne Mariya mu nzubu!

Mmunyi muvua bena mbuku ya mitoto bafike muaba uvua Yezu?— Bavua balombola kudi “mutoto,” ki nku Beteleheme to, kadi uvua muanji kubalombola kudi Mukalenge Helode mu Yelushalema. Bible udi wamba ne: Helode uvua musue kumona Yezu bua kumushipa. Mpindieu ela meji bua bualu ebu. Udi umona ne: nnganyi uvua mupatule tshivua tshimueke bu mutoto uvua ulombola bena mbuku ya mitoto kudi Helode?— Ki n’Nzambi mulelela Yehowa to, kadi mmuena lukuna wende, Satana Diabolo!

Lelu Satana udi usaka bantu bua kumona Yezu anu bu muana udi kayi mua kuenza bualu. Kadi, muanjelu Gabaliele wakambila Mariya ne: “Neikale Mukalenge . . . , Bukalenge buende kabuakuikala ne ndekelu to.” Mpindieu Yezu udi ukokesha mu diulu, ne mu katupa kakese emu, neabutule baluishi bonso ba Nzambi. Tudi ne bua kuvuluka Yezu bua malu aa ne tudi ne bua kuambila bantu bakuabu.