Yezu uvuaku mulaye muenji wa malu mabi muoyo mu diulu anyi?

Lukonko elu ludi lujuka bualu Yezu uvua mulaye muenji wa malu mabi uvuabu bapopele ku mutshi ku luseke luende muoyo mu matuku atshilualua mu Mparadizu. Bilondeshile Mukanda wa Nzambi wa bena Mishonyi, Yezu uvua mulaye muenji wa malu mabi uvuabu bapopele ku mutshi ku luseke luende ne: ‘Bulelela, ndi nkuambila ne: Lelu wewe newikale nanyi mu Mparadizu.’ (Luka 23:43) Bua tshinyi tudi tuamba ne: Yezu kavua mulaye muenji wa malu mabi au ne: dituku adi uvua ne bua kuya nende mu diulu?

Tshia kumpala tuanji kumona bikala muenji wa malu mabi eu mukumbaje malu malomba bua kupiana muoyo mu diulu. Bantu badi ne ditekemena dia kupeta muoyo mu diulu badi ne bua kubatijibua mu mâyi ne mu nyuma muimpe, nunku badi balua bayidi ba Yezu ne bana badi Nzambi wanyisha. (Yone 3:3, 5) Bualu bukuabu mbua ne: badi ne bua kutumikila mikenji ya Nzambi idi itangila bikadilu bilenga ne kuleja ngikadilu bu mudi bululame, muoyo mutoke ne kumvuilangana luse. (1 Kolinto 6:9-11) Badi kabidi ne bua kushala ne lulamatu kudi Nzambi ne kudi Yezu too ne ku ndekelu kua lubilu luabu lua pa buloba. (Luka 22:28-30; 2 Timote 2:12) Anu bobu bakumbaje malu aa ke kushishabu kuleja ne: mbakumbane bua kubishibua ne mbakumbane bua kuenza midimu mikole idi mibindile mu diulu, bu mudi mudimu wa buakuidi ne bukalenge pamue ne Yezu mu dikokesha bantu bidimu tshinunu.​—Buakabuluibua 20:6.

Kadi muenji wa malu mabi uvuabu bapopele ku luseke lua Yezu au uvua mumanyike bu ntomboji ne uvua mufue bu muenji wa malu mabi. (Luka 23:32, 39-41) Bulelela, uvua muleje ngikadilu wa kanemu pavuaye muambile Yezu ne: “Umvulukaku pawikala mu Bukalenge buebe.” (Luka 23:42) Kadi kavua mutambule bua kulua muana udi Nzambi wanyisha to; kavua nansha muleje ne: uvua muntu uvua ne lulamatu kudi Nzambi pavuaye ne muoyo to. Bidiku biumvuika bua kuamba ne: Yezu uvua mumulaye bua yeye kuikala pende mfumu mu diulu ne bayidi bende bavua bashale ne lulamatu kudi Nzambi too ne ku lufu anyi?​—Lomo 2:6, 7.

Tuangate tshilejilu etshi: muntu yeye mukulombe luse bua mudiye mukuibe makuta, udi mua kumufuila luse. Kadi udiku mua kumueyemena ne kumulekela bua alombole midimu yebe anyi bua akube dîku diebe anyi? Mudimu wa mushindu eu udi mua kuupesha anu bantu baudi weyemena ne muoyo mujima. Bia muomumue, bantu badi ne ditekemena dia kuikala ne muoyo mu diulu badi ne bua kufila bijadiki bidi bileja ne: nebatue mikenji miakane ya Nzambi nyama ku mikolo pikalabu mua kulombola bantu pa buloba. (Buakabuluibua 2:10) Nansha muvua muenji wa malu mabi au muleje ngikadilu muimpe mu minite ya ndekelu kumpala kua yeye kufua, kavua mukumbaje malu malomba aa to.

Kadi Yezu kavuaku muambile muenji wa malu mabi au ne: uvua ne bua kuikala nende mu diulu dituku adi anyi? Tòo, kabivua mua kuikala nanku to, bualu Yezu kavua muye mu diulu dituku adi to. Kadi utshivua anu ‘munda mua buloba’ matuku asatu, mbuena kuamba ne: mu lukita. (Matayi 12:40; Mâko 10:34) Nansha kunyima kua yeye mumane kubishibua ku lufu, uvua mushale matuku 40 pa buloba kumpala kua yeye kuya mu diulu. (Bienzedi 1:3, 9) Nunku muenji wa malu mabi au kavua mua kuikala mu diulu ne Yezu dituku adi to.

Kadi mmu Mparadizu kayi muvua muenji wa malu mabi au ne bua kubuela? Pabishibuaye, neikale mu Mparadizu pa buloba, buloba buikala Yezu ne bua kulombola. (Bienzedi 24:15; Buakabuluibua 21:3, 4) Bua kumanya malu a bungi a Mparadizu eu ne malu adi Nzambi ulomba bantu bua kuenza, yukila ne Ntemu wa Yehowa yonso uwamonangana nende.