“Tshintu tshidi katshiyi kupua muoyo” tshivua tshifike anu pa dîba diatshi

“TSHINTU tshidi katshiyi kupua muoyo,” ke muvuabu babikila “Drama wa bufuki.” Uvua mufike anu pa dîba diende ne mukemeshe bantu ba bungi bavua bamumone. Bushuwa, “Drama wa bufuki” uvua mufile bumanyishi bua bungi bua butumbi bua Yehowa matuku makese kumpala kua bukokeshi bua Hitler kutuadijabu kukengesha batendeledi ba Nzambi ba ku Mputu ne tshikisu. Kadi “Drama wa bufuki” uvua tshinyi?

Mu 1914, tshilombuelu tshia bantu ba Yehowa tshia pa buloba bujima tshidi ku Brooklyn mu New York mu États-Unis tshiakapatula “Foto-drama wa bufuki.” Uvua wenza mêba muanda mukulu ne uvua ne bimfuanyi bilenga ne bivua binyunga bikale ne mekala ne mêyi umvuika. Bantu miliyo ya bungi pa buloba bujima bakamona filme wa “Foto-drama.” Bakapatula kabidi drama mukuabu muîpi uvuabu babikila ne: “Drama wa Eureka” mu 1914. Kadi mu bidimu bia 1920, bimfuanyi, filme ne biamu bia kuleja nabi filme eyi biakanyanguka bikole. Kadi bantu ba bungi bavua basue kumona kabidi filme wa “Foto-drama.” Tshilejilu, bantu ba mu tshimenga tshia Ludwigsbourg mu Allemagne bakebeja ne: “Nebaleje kabidi filme wa ‘Foto-drama’ dîba kayi?” Tshituvua mua kuenza ntshinyi?

Bua kukumbaja dijinga dia bantu dia kumona Drama, mu bidimu bia 1920, baleji mpala ba Betele wa mu tshimenga tshia Magdebourg mu Allemagne bakasumba filme ya bungi kudi kumpanyi wa malu a ngumu wa mu tshimenga tshia Paris mu France ne kusumbabu mikaba ya bimfuanyi kudi kumpanyi wa malu a dizola wa mu Leipzig ne wa mu Dresde. Bakabisangisha pamue ne imue mikaba ya bimfuanyi ya kale ya “Foto-drama” itshivua ne mushinga.

Muanetu Erich Frost uvua kangimba kanene wakenza mizike ya kuela mu filme ayi ne mu mikaba ya bimfuanyi. Bavua bangatshile malu avuabu balondamu mu mukanda wetu wa Bufuki. (Angl.) Ke bua tshinyi bakinyika filme wa “Foto-drama” uvuabu benzulule ne: “Drama wa bufuki.”

Drama mupiamupia eu uvua ne bule bua muomumue ne wa “Foto-drama,” mmumue ne: mêba muanda mukulu, ne bavua bamuleja mu bitupa bia bungi mu ma dilolo malondangane. Filme eu uvua ne mumvuija avua atangila matuku a bufuki, ulonda kabidi miyuki ya mu Bible ne ya bantu ba kale ne uleja muvua bitendelelu bia dishima bidinga bantu. Bakaleja filme wa “Drama wa bufuki” mu Allemagne, mu Autriche, mu Luxembourg, mu Suisse ne mu miaba yonso ivuabu bakula tshiena Allemagne.

Muanetu Erich Frost wakamba ne: “Pavuabu baleja Drama au, ngakambila bena dianyi nangananga batuvua tuimba nabu misambu bua kufila mikanda yetu minene ne mikese kudi bateleji mu mulongo ne mulongo pavua tshitupa kampanda tshia filme tshijika kumpala kua tshikuabu kutuadija. Tuakafila mikanda ya bungi mu mushindu eu kupita mutuvua tufila ku nzubu ne ku nzubu.” Muanetu Johannes Rauthe uvua uleja bantu filme eu mu Pologne ne mu République tchèque, udi uvuluka muvua bantu ba bungi bavua babuele bua kumona filme eu bafile adrese yabu bua bana betu baye kubatangila. Adrese ayi yakambuluisha bua kupeta makumbula mimpe avua alubuluka.

Mu bidimu bia 1930, bantu bavua buula mu nzubu muvuabu baleja filme wa “Drama wa bufuki” tente ne bavua anu bakula bua Bantemu ba Yehowa. Mu 1933, bantu batue ku muliyo umue bakavua bamone filme ivuabu baleja kudi Betele wetu wa mu Allemagne. Muanetu Käthe Krauss udi uvuluka wamba ne: “Tuvua tuenda kilometre 10 dituku dionso munkatshi mua matuku atanu anu bua kumona Drama eu, tupitshila mu mêtu, tubanda mikuna ne tupueka mu bibandabanda.” Muanetu Else Billharz udi wamba ne: “‘Drama wa bufuki’ wakansaka bua kunanga bulelela bikole.”

Alfred Almendinger udi wamba ne: Pavua mamuende mumone Drama, “wakasanka bikole, kusumbaye Bible ne kukebamu muaku ‘mpurgatoriyo.’” Bu muvuaye kayi mupete muaku eu mu Bible wakalekela kuya mu tshitendelelu tshiabu, yeye kutambula. Erich Frost udi uvuluka wamba ne: “Bantu ba bungi bakitaba bulelela ku diambuluisha dia filme wa ‘Drama wa bufuki.’”​—3 Yone 1-3.

Pavua eku bantu ba bungi bamona filme wa “Drama wa bufuki,” bena ku Mputu bavua bobu benda batua bena Nazi nyama ku mikolo bua kujula bimvundu mu bantu. Kutuadijila mu 1933, bakakandika midimu ya Bantemu mu Allemagne. Kubangila ku tshikondo atshi too ne ku ndekelu kua Mvita mibidi ya buloba bujima mu 1945, bakakengesha Bantemu ba Yehowa ba ku Mputu bikole. Bakela Erich Frost mu buloko munkatshi mua bidimu muanda mukulu. Wakapatuka mu buloko ne muoyo ne pashishe kuenzaye mudimu ku Betele wa Wiesbaden mu Allemagne. Bivua bimpe muvua tshintu tshidi katshiyi kupua muoyo anyi “Drama wa bufuki” eu mulue anu pa dîba bua kuvudija dikima dia bena Kristo ba bungi bua kutantamenabu mateta a ditabuja diabu mu Mvita mibidi ya buloba bujima.​—Mu bintu bietu bia kale mu Allemagne.