MANDAMUNA A NKONKO YA MALU A MU BIBLE
Kudiku ditekemena bua bantu bakadi bafue anyi?
Lufu ludi anu bu tulu mu mushindu wa ne: bafue kabena bamanye bualu nansha bumue anyi kabena mua kuenza bualu nansha bumue. Kadi, Mufuki wa muoyo udi mua kupingaja bafue ku muoyo ku diambuluisha dia dibishibua. Bua kujadika bualu ebu, Nzambi mmupeshe Yezu bukole bua kujula nabu bantu ba bungi ku lufu.—Bala Muambi 9:5; Yone 11:11, 43, 44.
Mmu mushindu kayi mudi lufu luikale bu tulu?
Nzambi mmulaye ne: neajule bafue badi mu meji ende ku lufu bua bikale ne muoyo pa buloba bupiabupia bua buakane. Bantu babishabu ku lufu badi ne bua kushala mu lukita too ne pikala Nzambi mua kubapesha muoyo kabidi. Nzambi wa Bukole Buonso mmuindile ne muoyo kuulu kuulu bua kuenza mudimu ne bukole buende bua kupingajila bafue muoyo.—Bala Yobo 14:14, 15.
Dibishibua dia bantu ku lufu nedienzeke mushindu kayi?
Padi Nzambi ujula bantu ku lufu, nebikale bakumbane bua kudimanyabu, kumanyabu balunda babu ne bena mu mêku abu. Nansha mudi mubidi wa muntu ubola, Nzambi udi mua kujula anu muntu umue umue au ne mubidi mupiamupia.—Bala 1 Kolinto 15:35, 38.
Bantu bakese tshianana ke babishibua bua kuikala ne muoyo mu diulu. (Buakabuluibua 20:6) Bantu ba bungi babishabu ku lufu, nebikale ne muoyo pa buloba bukudimuna mparadizu. Nebatuadije nsombelu mupiamupia ne ditekemena dia kusomba pa buloba kashidi ne tshiendelele.—Bala Musambu 37:29; Bienzedi 24:15.