Tulasa tua malu a Nzambi—Tshijadiki tshia mudi Yehowa mutunange

YEHOWA udi “Muyishi” wetu munene. (Yesh. 30:20) Dinanga ke didi dimusaka bua kulongesha bakuabu. Tshilejilu, dinanga diakasaka Yehowa bua kuleja Yezu ‘malu onso adiye wenza.’ (Yone 5:20) Dinanga didi Yehowa nadi buetu tuetu Bantemu bende, didi dimusaka bua kutupesha “ludimi lua badi bayila” patudi tudienzeja bua kumutumbisha ne kuambuluisha bantu bakuabu.—Yesh. 50:4.

Komite wa Dilongesha wa Kasumbu Kaludiki udi widikija dinanga dia Yehowa padiye wenza mudimu ne tulasa tua malu a Nzambi dikumi bua kulongesha bantu badi ne dijinga ne mushindu wa kubuelamu. Utuku umona tulasa etu bu mushindu udi Yehowa uleja mudiye mutunange anyi?

Tumone tulasa tua malu a Nzambi ne malu adi bamue bakadi babuele mu tulasa etu bambe. Pashishe udiebeje ne: ‘Mmunyi mudi tulasa tua malu a Nzambi etu mua kungambuluisha?’

TULASA TUA MALU A NZAMBI TUKUAMBULUISHE

Bu mudi Yehowa “Nzambi wa dinanga,” udi utulongesha bua tuikale ne nsombelu udi ne tshipatshila, bua tutantamene ntatu ne utuambuluisha bua kupeta disanka dia bungi mu mudimu wa kuyisha. (2 Kol. 13:11) Anu bu bayidi ba mu bidimu lukama bia kumpala, tudi balongolola bimpe bua kuambuluisha bantu bakuabu, ‘kubayisha bua kuenza malu onso’ adibu batuambile.—Mat. 28:20.

Nansha mutudi katuyi mua kubuela mu tulasa tuonso, tudi mua kubuela mu kamue anyi tua bungi tua ku tulasa etu. Tudi mua kutumikila mibelu ya mu Bible idibu batupeshamu. Tudi kabidi mua kumanya mua kuenza mudimu wa buambi bimpe patudi tuyisha ne batendeledi ba Yehowa badi babuele mu tulasa etu.

Diebeja ne: ‘Nsombelu wanyi udiku unganyishila bua kubuela nansha mu kalasa kamue anyi?’

Batendeledi ba Yehowa badi bamona dibuela mu tulasa etu bu diakalenga dinene ne mbasue kulongamu. Malu audi upeta mu tulasa etu akusemeje pabuipi ne Nzambi ne akulongolole bua kukumbaja mudimu udiye mukupeshe nangananga mudimu wa lukasa wa kuyisha lumu luimpe.

AMUE MALU ADI ATANGILA TULASA TUA MALU A NZAMBI

Kalasa ka Mudimu wa Nzambi

Kipatshila: Kulongesha bamanyishi bua kuikala bayishi ne balongeshi bimpe ba lumu luimpe.

Matuku: Kakena ne ndekelu to.

Muaba: Mu Nzubu wa Bukalenge.

Badi mua kudifundisha: Bantu bonso batu babuela mu bisangilu bikole, badi bitaba malongesha a mu Bible ne badi ne nsombelu wa bena Kristo.

Mua kudifundisha: Mutangidi wa Kalasa ka Nzambi ke udi ufunda balongi.

Sharon udi ne disama didi ditekesha luseke lujima lua mubidi udi wamba ne: “Kalasa ka Mudimu wa Nzambi nkandongeshe mua kuenza makebulula ne mua kuamba malu bimpe menemene. Nkangambuluishe kabidi bua kuditatshisha bua majinga anyi a mu nyuma ne a bantu bakuabu.”

Arnie udi muenze mudimu wa butangidi buena ngendu bidimu bia bungi udi wamba ne: “Ndi mukole muikale ne tshikukumina ne ngumvua bundu bua kutangila bantu. Kalasa aka nkangambuluishe bua kudiumvuaku ne mushinga. Yehowa mmungambuluishe ku butuangaji bua kalasa aka bua kumanya mua kuakula bimpe ne kutuma lungenyi ku malu andi ngamba. Ndi ne disanka dia bungi bua mundi mukumbane bua kutumbisha Nzambi mu tshisumbu ne mu mudimu wa kuyisha.”

Kalasa ka bantu bapiabapia ku Betele

Kipatshila: Kuambuluisha bantu bapiabapia bua kuenza mudimu bimpe ku Betele.

Matuku: Minute 45 ku lumingu munkatshi mua mbingu 16.

Muaba: Ku Betele.

Malu malomba: Udi ne bua kuikala muena ku Betele bua kashidi anyi muena budisuile wa matuku a bungi, mmumue ne: bua tshidimu tshimue anyi kupita apu.

Mua kubuelamu: Batu basungula bena mu dîku dia Betele bapiabapia bua kubuelamu.

Demetrius uvua mubuele mu kalasa aka mu bidimu bia 1980 udi wamba ne: “Kalasa aka nkangambuluishe bua kuakaja mushindu untu ndilongela ne bua kuikala mudilongolole bua kuenza mudimu ku Betele matuku anyi onso a muoyo. Balongeshi, programe wa malongesha ne mibelu ivuabu batupesha mbinjadikile mudi Yehowa munnange ne musue kungambuluisha bua nkumbaje mudimu undi ngenza ku Betele.”

Kaitlyn udi wamba ne: “Kalasa nkangambuluishe bua kuimanyina pa malu adi ne mushinga wa bungi, mmumue ne: kuenza malu adi asankisha Yehowa. Kalasa ka bantu bapiabapia ku Betele nkakoleshe dianyisha dianyi bua Yehowa, bua nzubu wende ne bua bulongolodi buende.”

Kalasa ka Mudimu wa Bukalenge

Kipatshila: Kulongesha batangidi bena ngendu, bakulu ne imue misangu basadidi ba mudimu bua kuenza mudimu wa ditangila mikoko ne midimu ya mu bulongolodi. (Bien. 20:28) Mu Kalasa aka badi bakula bua amue malu adi enzeka mu bisumbu, amue mashintuluka ne bua amue majinga adiku mu bisumbu. Batu benza kalasa aka kunyima kua bidimu bikese bilondeshile tshidi Kasumbu Kaludiki kapangadija.

Matuku: Matuku etu aa, batu benza kalasa aku bua matuku abidi anyi abidi ne tshitupa bua batangidi bena ngendu, dituku dimue ne tshitupa bua bakulu ne dituku dimue bua basadidi ba mudimu.

Muaba: Nangananga ku Nzubu wa Bukalenge anyi wa mpuilu.

Malu malomba: Kuikala mutangidi muena ngendu, mukulu anyi musadidi wa mudimu.

Mua kubuelamu: Mutangidi wa tshijengu ke utu ubikila bakulu ne basadidi ba mudimu. Betele ke utu ubikila batangidi bena ngendu.

“Nansha mutu kalasa aka ne malu a bungi eku kenza mêba makese, kadi kakankamija bakulu ne kabambuluisha bua kuikala ne disanka dia ‘kuikala bu balume’ mu mudimu wa Yehowa. Bakulu bapiabapia ne ba kale batu balonga mua kulama bimpe mikoko ne kuikala mu buobumue tshishiki mu ‘lungenyi lumue.’”—Quinn (kuinshi).

“Kalasa aka kadi katuambuluisha bua kumvua bimpe malu adi akolesha ditabuja dietu, katudimuija ku njiwu idi mua kutufikila ne katupetesha ngenyi mimpe bua kulama mikoko. Kadi kaleja mudi Yehowa utuambuluisha ne bulenga.”—Michael.

Kalasa ka Bampanda-njila

Kipatshila: Kuambuluisha bampanda-njila bua ‘kukumbaja mudimu wa Nzambi’ bimpe.—2 Tim. 4:5.

Matuku: Mbingu ibidi.

Muaba: Biro bia filiale ke bidi bisungula muaba; nangananga ku Nzubu wa Bukalenge.

Malu malomba: Bonso bakadi bampanda-njila ba pa tshibidilu kukadi tshidimu tshimue anyi kupita apu.a

Mua kubuelamu: Mutangidi wa tshijengu ke utu umanyisha bampanda-njila ba pa tshibidilu badi bakumbane.

Lily (ku dia balume) udi wamba ne:“Kalasa aka nkangambuluishe bua kutantamena ntatu intu mpeta mu mudimu wa buambi ne mu nsombelu wanyi. Ndi mushintulule bikole mushindu untu ndilongela, ndongesha ne ngenza mudimu ne Bible. Ndi mudilongolole bimpe bua kuambuluisha bantu bakuabu, kukuatshisha bakulu ne kuambuluisha tshisumbu bua tshiye kumpala.”

Brenda ukadi mubuele mu kalasa aka misangu ibidi udi wamba ne: “Kalasa aka kavua kangambuluishe bua kudifila bikole mu malu a Nzambi, bua kukolesha kondo kanyi ka muoyo ne kutamba kuambuluisha bakuabu. Bushuwa Yehowa udi utupesha bintu bimpe.”

a Bampanda-njila ba pa tshibidilu bapiabapia buobu kabayi bungi bukumbane, badi mua kubikila bamue bampanda-njila ba pa tshibidilu bakadi babuele mu kalasa aka kukadi bidimu bitanu bua kubuela kabidi.

Kalasa ka bakulu ba mu bisumbu

Kipatshila: Kuambuluisha bakulu bua kuambula majitu abu mu tshisumbu ne kumanya bimpe tshidi Nzambi musue bua benze mu ntendelelu wabu.

Matuku: Matuku atanu.

Muaba: Biro bia filiale ke bidi bisungula muaba; nangananga ku Nzubu wa Bukalenge anyi wa mpuilu.

Malu malomba: Kuikala mukulu.

Mua kubuelamu: Biro bia filiale ke bidi bibikila bakulu.

Mona malu avua bamue bavua babuele mu kalasa ka 92 mu États-Unis bambe:

“Kalasa aka nkampeteshe masanka a bungi, nkangambuluishe bua kudilama ne kulama kabidi mikoko ya Yehowa.”

“Ndi mudiakaje bua kukankamija bikole bantu bakuabu pa kubumvuija malu a mushinga adi mu Bible.”

“Nentumikile malu a mu kalasa aka mu nsombelu wanyi mujima.”

Kalasa ka batangidi bena ngendu ne bakaji babu

Kipatshila: Kuambuluisha batangidi ba bijengu ne ba distrike bua kuambuluisha bisumbu mushindu muimpe ne ‘kuenza mudimu mukole wa kuamba ne wa kuyisha dîyi dia Nzambi.’—1 Tim. 5:17; 1 Pet. 5:2, 3.

Matuku: Ngondo ibidi.

Muaba: Biro bia filiale ke bidi bisungula muaba.

Malu malomba: Kuikala mutangidi wa tshijengu anyi wa distrike.

Mua kubuelamu: Biro bia filiale ke bidi bibikila batangidi bena ngendu ne bakaji babu.

“Tuvua bavudije dianyisha dietu dia mudi Yezu ulombola bulongolodi bua Nzambi. Tuvua bamone ne: bivua bikengela kukankamija bana betu batuvua tukuatshila mudimu bua kukolesha buobumue bua bisumbu bionso. Kalasa aka nkatuvuluije ne: padi mutangidi muena ngendu ufila mibelu peshi manyoka padibi bikengela, udi ne bua kuikala ne tshipatshila tshia kuambuluisha bana betu bua bamone mudi Yehowa mubanange.”—Joel, kalasa ka 1 mu 1999.

Kalasa ka malu a mu Bible bua bana betu ba balume bajike

Kipatshila: Kulongolola bakulu ne basadidi ba mudimu badi kabayi banji kusela bua kuambula majitu makuabu mu bulongolodi bua Yehowa. Batu batuma balongi ba bungi badi bajikija mu kalasa aka bua kuya kuambuluisha muaba udi dijinga dinene mu ditunga diabu. Badi mua kutuma bakuabu mu ditunga dikuabu padibu bitaba bua kuyamu. Badi mua kutuma kabidi bakuabu bu bampanda-njila ba pa buabu bua matuku makese bua kuvudija mudimu mu misoko ya kule.

Matuku: Ngondo ibidi.

Muaba: Biro bia filiale ke bidi bisungula muaba; nangananga ku Nzubu wa Bukalenge anyi wa mpuilu.

Malu malomba: Bana betu ba balume ba bidimu kubangila ku 23 too ne ku 62, badi ne makanda a mubidi ne basue kuyisha muaba wonso udiku dijinga dinene. (Mâko 10:29, 30) Badi ne bua kuikala benze mudimu wa bumpanda-njila bua pa tshibidilu kukadi bidimu biobi bikese mbibidi ne bikale bakulu anyi basadidi kukadi bidimu bibidi anyi kupita apu.

Mua kudifundisha: Nebikale benza tshisangilu bua badi basue kubuela mu kalasa aka mu mpuilu wa tshijengu.

Rick uvua mubuele mu kalasa ka 23 mu États-Unis udi wamba ne: “Kutumikila malu adibu balongesha mu kalasa aka nkuambuluishe nyuma wa Yehowa bua kushintululaye bumuntu buanyi. Padi Yehowa ukupesha mudimu wa kuenza, udi ukuambuluisha bua kuukumbaja. Ngakamona ne: Nzambi neankoleshe meme ngenza anu malu adiye musue pamutu pa kuenza adi ansankisha.”

Andreas udi wenza mudimu mu Allemagne udi wamba ne: “Ngakamona mushindu udi malu enzeka mu bulongolodi bua Nzambi lelu anu bu tshishima. Kalasa aka nkangambuluishe bua kudilongolola ku mudimu udi mungindile kumpala. Bilejilu bia bungi bia mu Bible mbindongeshe bualu bua mushinga ebu: Kuenzela Yehowa ne bena Kristo nanyi mudimu kudi kupetesha disanka.”

Kalasa ka malu a mu Bible bua bena dibaka

Kipatshila: Kulongesha mulume ne mukajende malu kampanda bua Yehowa ne bulongolodi buende kukuata nabu mudimu bikole menemene. Batu batuma balongi ba bungi bua kuya kuambuluisha muaba udi dijinga dinene mu ditunga diabu. Badi mua kutuma bantu bakuabu mu ditunga dikuabu padibu bitaba bua kuyamu. Balongi badi bajikija mu kalasa aka badi mua kubatuma bu bampanda-njila ba pa buabu bua matuku makese bua kuvudija mudimu mu miaba ya kule.

Matuku: Ngondo ibidi.

Muaba: Kalasa aka kadi kenzekela ku États-Unis; kutuadijila mu ngondo wa 9 wa 2012 nekikale kabidi kenzekela mu imue Betele yasungulabu mu buloba bujima, nangananga ku Nzubu wa Bukalenge anyi wa mpuilu.

Malu malomba: Mulume ne mukajende badi ne bidimu kutuadijila ku 25 too ne ku 50, badi ne makanda a mubidi, badi mua kuitaba bua kuya muaba udi dijinga dinene ne badi ne lungenyi lua ne: ‘Ke meme eu, untume meme!’ (Yesh. 6:8) Bikale baselangane kukadi bidimu kutuadijila ku bibidi ne bikale mu mudimu bu mudi wa bumpanda-njila bua pa tshibidilu bidimu kutuadijila ku bibidi kabayi bawukose to. Mulume udi ne bua kuikala mukulu peshi musadidi kukadi bidimu biobi bikese mbibidi.

Mua kudifundisha: Nebikale benza tshisangilu mu mpungilu wa distrike bua kuleja bantu badi basue kubuelamu amue malu. Bobu kabayi benza tshisangilu etshi mu mpungilu idi yenzeka mu ditunga dienu eku wewe musue kubuelamu, udi mua kufundila biro bia filiale bua kumanya malu makuabu.

“Mbingu muanda mukulu ya kalasa aka idi ishintulula nsombelu wa bena dibaka ne ibambuluisha bua kuikala ne dijinga dia kuenzela Yehowa mudimu bikole. Tudi badisuike bua kuikala ne nkatshinkatshi bua kukuata mudimu bimpe ne dîba dietu.”—Eric ne Corina, (kuinshi) kalasa ka 1 mu 2011.

Kalasa ka Watchtower ka malu a mu Bible ka Gilada

Kipatshila: Kulongesha balongi bua kulua batangidi bena ngendu, bena ku Betele anyi bamisionere miaba idi bantu ba bungi. Kipatshila ka kalasa aka nka kukolesha ne kuenza bua mudimu wa buambi ne malu adi Betele ulongolola ende bimpe.

Matuku: Ngondo itanu.

Muaba: Ku Patterson, mu New York, mu États-Unis (Mu muaba wa dilongeshangana wa Watchtower).

Malu malomba: Bena dibaka bakadi benza imue midimu ya pa buayi mmumue ne: bamisionere badi kabayi banji kubuela mu kalasa, bampanda-njila ba pa buabu, batangidi bena ngendu ne bena ku Betele. Badi ne bua kuikala mu mudimu ewu kukadi bidimu biobi bikese mbisatu kabayi bawukose to. Badi ne bua kuikala bakula, babala ne bafunda Anglais bimpe.

Mua kubuelamu: Komite wa filiale ke udi ubikila bena dibaka bua kubuelamu.

Lade ne Monique ba mu États-Unis badi benza mudimu mpindieu mu Afrique. Lade udi wamba ne: “Kalasa ka Gilada nkatuambuluishe bua kuya muaba wonso udibu batutuma ne kuikala badiakaje bua kuenza mudimu ne bena Kristo netu.”

Monique udi pende wamba ne: “Pandi ntumikila malu a mu Dîyi dia Nzambi atudi balonge, ndi mpeta disanka dia bungi mu mudimu wanyi. Ndi mmona disanka edi bu tshijadiki tshikuabu tshidi tshileja mudi Yehowa munnange.”

Kalasa ka bena mu Komite ya filiale ne bakaji babu

Kipatshila: Kuambuluisha aba badi mu Komite ya filiale bua kuenza mudimu wabu wa kutangila Betele bimpe, bua kutangila malu a mudimu adi atangila bisumbu, ne batangidi ba bijengu ne ba distrike. Badi balonga kabidi mua kutangila mudimu wa dikudimuna, wa dipatula mikanda ku biamu ne wa diyabanya.

Matuku: Ngondo ibidi.

Muaba: Ku Patterson, mu New York, mu États-Unis (Mu muaba wa dilongeshangana wa Watchtower).

Malu malomba: Muanetu wa balume udi ne bua kuikala muena mu Komite wa filiale anyi wa ditunga peshi muntu udibu mua kulua kupesha midimu eyi.

Mua kubuelamu: Kasumbu Kaludiki kadi kabikila bana betu ba balume ne bakaji babu.

Lowell ne Cara bavua babuele mu kalasa ka 25, badi benza mudimu mu Nigéria. Lowell udi wamba ne: “Bavua bamvuluije ne: nansha meme ne bia kuenza bungi kayi anyi bampeshe mudimu kayi, tshia mushinga nkuenza malu adi Yehowa musue bua kumusankisha. Kalasa aka nkandongeshe kabidi mudibi ne mushinga bua kuidikija Yehowa mu mushindu udiye wenzela bantu bende malu.”

Cara udi wamba pende ne: “Bualu bumvua muelele meji budi ne: meme tshiyi mumanye mua kumvuija bualu kampanda mu mushindu muimpe, ndi ne bua kuanji kubulonga kumpala kua kubulongesha bantu bakuabu.”