MANDAMUNA A NKONKO YA MALU A MU BIBLE
Nnganyi udi ukokesha bulelela buloba ebu?
Bu Nzambi muikale mukokeshi wa buloba ebu, buloba buvua mua kuikala buule tente ne makenga nunku anyi?
Bantu ba bungi badi bamba ne: Nzambi mulelela ke udi ukokesha buloba ebu. Bikalabi nanku, buloba budiku mua kuikala buule tente ne makenga anyi? (Dutelonome 32:4, 5) Bilondeshile Bible, buloba ebu budi ku bukokeshi bua mubi.—Bala 1 Yone 5:19.
Mmunyi mudi muntu mubi mua kukokesha buloba? Katshia ku ntuadijilu wa bantu, muanjelu kampanda wakatombokela Nzambi ne kusakaye bena dibaka babidi ba kumpala bua kutombokelabu pabu Nzambi. (Genese 3:1-6) Bena dibaka aba bakasungula bua kutumikila Satana muanjelu mutomboke ne bobu kumuvuija mukokeshi wabu. Nzambi Wa Bukole Buonso ke Mukokeshi umuepele muakane, mmusue bua bantu basungule bukokeshi buende bualu mbamunange. (Dutelonome 6:6; 30:16, 19) Diakabi, badi bashima bantu ba bungi bua kuenza disungula dibi bu bena dibaka babidi ba kumpala.—Bala Buakabuluibua 12:9.
Nnganyi wajikija ntatu ya bantu?
Nzambi nealekele Satana utungunuka ne bukokeshi buende bubi ebu anyi? Tòo! Nzambi neakuate mudimu ne Yezu bua kujikija malu mabi adi Satana muenze.—Bala 1 Yone 3:8.
Ku diambuluisha dia bukole bua kudi Nzambi, Yezu neabutule Satana. (Lomo 16:20) Pashishe, Nzambi neakokeshe bantu ne neabapingaje mu nsombelu wa disanka ne wa ditalala uvuaye mulongolole ku ntuadijilu.—Bala Buakabuluibua 21:3-5.