Udiku witaba tshidi Rogelio wamba etshi anyi? Mmuenenu kayi ku idi ilonda eyi uudi umona muimpe?

• Satana ki mmuntu mulelela to; mbubi kampanda.

• Satana udiku, kadi kena udifila bikole ku malu a bantu.

• Satana ntshifukibua tshia bukole tshia mu nyuma tshidi ne buenzeji bua bungi mu bantu.

Kudi bantu badi bitaba mmuenenu yonso eyi, pamuapa badi miliyo ne miliyo. Mbimpe bua kumanyaku mmuenenu mujalame anyi? Bikala Satana kenaku, nunku bantu badi bitaba ne: mmuntu mulelela mbapambuke. Bikala Satana udiku kadi kayi udifila ku malu a bantu, nunku bantu ba bungi badi bamutshina badi bamutshina pabu tshianana. Kadi, bikala Satana utu ushimakaja bantu, nanku mmuntu mubi bikole kupita mudi bantu ba bungi bela meji.

Tukonkononayi mudi Bible wandamuna nkonko eyi: Satana, mbubi anyi peshi mmuntu udi ne mubidi wa nyuma? Bikala Satana mmuntu, udiku mua kukukebela njiwu anyi? Bikalabi nanku, mmunyi muudi mua kudikuba?

Mbipepele bua kuitaba ne: Satana udibu bakuila mu Bible mbualu buonso bubi. Kadi ke tshidi bulelela Bible ulongesha anyi? Bikalabi nanku, bua tshinyi Bible udi uleja mudi Satana uyukila ne Yezu Kristo ne Nzambi Wa Bukole Buonso yeye nkayende? Tukonkononayi bilejilu bibidi bia muyuki wabu eu.

PAVUA SATANA MUYUKILE NE YEZU

Pavua Yezu mutuadije kuyisha, Diabolo wakamuteta misangu isatu. Musangu wa kumpala, Satana wakenzeja Yezu bua enze mudimu ne bukole buvua Nzambi mumupeshe bua kudisankisha bua kujikija nzala ivuaye nayi. Musangu muibidi, Diabolo wakasaka Yezu bua kuteka muoyo wende mu njiwu ne bua kukoka ntema ya bantu kudiye. Muisatu, Satana uvua musue bua Yezu amukukuile bua kumupeshaye bukokeshi bua makalenge onso a pa buloba. Yezu wakabenga mateta onso asatu aa, ne misangu yonso wakatela mêyi a mu Bible.​—Matayi 4:1-11; Luka 4:1-13.

Yezu uvua muyukile ne nganyi? Uvuaku muyukile ne ngikadilu kampanda mubi uvua munda muende anyi? Bilondeshile Bible, Yezu “uvua mutetshibue mu malu onso bu tuetu, kadi kayi ne bubi.” (Ebelu 4:15) Bible udi wamba kabidi ne: “Kavua muenze bubi, kabavua basangane dishima mukana muende.” (1 Petelo 2:22) Yezu wakashala anu mupuangane, mulame anu muoyo mutoke. Kavua mulekele musangu nansha umue ngikadilu kampanda mubi udiunda munda muende. Mu bulelela, Yezu kavua muyukile ne bubi kampanda buvua munda muende, kadi uvua muyukile ne muntu wetu mulelela eu.

Diyukidilangana dia mushindu eu didi dijadika ne: Satana mmuntu mulelela.

• Vulaka ne: Diabolo uvua mulombe Yezu bua amukukuile bua kumupeshaye bukokeshi pa makalenge a pa buloba. (Matayi 4:8, 9) Bu Satana kayi muntu mulelela, dijinga kupesha Yezu bukokeshi kadivua mua kumvuika to. Kabidi Yezu kavua muele mpata ne: Satana katu ne bukokeshi ebu to.

• Yezu mumane kubenga mateta aa, Diabolo “wakamushiya wakaya too ne ku tshikondo tshikuabu tshikumbane.” (Luka 4:13) Mu bualu ebu, Satana udiku umueneka bu ngikadilu kampanda wa bubi anyi peshi bu muena lukuna udi unanukila ne mateyi ende anyi?

• Mona ne: ‘banjelu bakalua, kutuadijabu kuambuluisha’ Yezu. (Matayi 4:11) Banjelu aba bavua bantu balelela bavua ne mubidi wa mu nyuma bavuaku bakankamije ne bambuluishe Yezu anyi? Bidi nanku. Kadi bua tshinyi tudi tuela meji ne: Satana uvua tshintu tshikuabu kayi muntu mulelela udi ne mubidi wa nyuma?

PAVUA SATANA MUYUKILE NE NZAMBI

Tshilejilu tshietu tshibidi tshidi tshitangila muyuki wa Yobo muntu uvua utshina Nzambi. Mu muyuki emu badi baleja misangu ibidi idi Diabolo muyukile ne Nzambi. Misangu yonso ibidi eyi Nzambi uvua wanyisha Yobo bua lulamatu luende. Satana wakaleja ne: Yobo uvua wenzela Nzambi mudimu anu bua kudisankisha, kulejaye kabidi ne: Nzambi uvua musumbe lulamatu lua Yobo. Mu bualu ebu, Diabolo uvua usua kuleja ne: mmumanye Yobo bimpe kupita Nzambi. Yehowa wakalekela Satana bua anyenge Yobo bintu biende, ashipe bana bende ne anyange makanda ende a mubidi.a Mu kupita kua matuku, bivua bilue kumueneka ne: Yehowa uvua muambe bulelela mu bualu bua Yobo, ne Satana uvua muena dishima. Nzambi wakabenesha Yobo bua lulamatu luende.​—Yobo 1:6-12; 2:1-7.

Mu diyukidilangana divua dienzeke pankatshi pa Nzambi ne Satana, Yehowa uvuaku muyukile ne ngikadilu mubi kampanda uvua munda muende anyi? Bible udi wamba ne: ‘Njila wa Nzambi udi muakane tshishiki.’ (2 Samuele 22:31) Dîyi dia Nzambi didi diamba kabidi ne: “Wa tshijila, wa tshijila, wa tshijila udi Yehowa Nzambi Wa Bukole Buonso.” (Buakabuluibua 4:8) Muaku Wa tshijila udi umvuija mukezuke, munsantu kayi ne bubi. Yehowa mmupuangane ne kena ne kalema. Kena ne ngikadilu wa bubi nansha umue to.

Kadi bamue badi mene mua kuamba ne: Yobo kavua muntu wetu mulelela eu to, nunku diyukidilangana adi divua dia mu tshimfuanyi. Kadi lungenyi elu ludiku lumvuika anyi? Mvese mikuabu ya mu Bible idi ileja ne: Yobo uvua muntu mulelela. Tshilejilu, mu Yokobo 5:7-11 mbangate tshilejilu tshia Yobo bua kusaka bena Kristo ku ditantamena bikondo bikole ne bu divuluija dia ne: Yehowa udi ufuta ditantamena ntatu dia mushindu eu. Tshilejilu etshi katshivua mua kuikala ne dikuatshisha bu Yobo kayi muntu mulelela ne bu mateta a Satana mikale a mu tshimfuanyi. Bualu bukuabu mu Yehezekele 14:14, 20, mbatele Yobo pamue ne Noa ne Danyele mu mulongo wa bantu basatu bakane. Anu bu Noa ne Danyele, Yobo uvua muntu mulelela, uvua ne ditabuja dikole. Bikala Yobo uvua muntu mulelela, kabienaku bileja ne: muntu uvua umukengesha uvua pende muntu mulelela anyi?

Bushuwa, Bible udi uleja Satana bu muntu mulelela wa mu nyuma. Nunku udi mua kuikala udiebeja ne: ‘Satana udiku unkebela meme ne bena mu dîku dianyi njiwu mu matuku etu aa anyi?’

NETUAMBE TSHINYI BUA MATUKU ETU AA?

Fuanyikija ne: bena tshinyangu mbabuele ba bungi mu tshimenga tshiudi mutshimpitshimpi. Kakuyi mpata, muoyo webe ne wa bena mutumba nebe newikale mu njiwu. Mpindieu fuanyikija bualu bumue bumue ebu: Satana ne bademon bende badi ne mubidi wa mu nyuma bavua batombokele Nzambi anu bu Satana. Bobu kubipata mu diulu ne kubelabu pa buloba diakamue. Mbipeta kayi bidi mua kumueneka? Ela meji bua ngumu iudi upeta pa muaba uudi musombele ne pa buloba bujima:

• Kuenaku umona divulangana dia malu a tshikisu kakuyi mushindu wa kudimanyika pa buloba bujima anyi?

• Kuenaku umona divulangana dia dijikija lutetuku ne malu a mîdima, nansha mudibi bitonda baledi ba bungi anyi?

• Kuenaku umona mudibu banyanga muaba udi bantu basombele nansha mudibu benza madikolela bua kulama muaba eu anyi?

• Bidiku bileja ne: kudi malu kampanda adi manyanguke mu bantu adi aleja ne: kudi bukole kampanda budi busaka bantu ku nsombelu mubi anyi?

Mona muntu udi Bible wamba ne: udi panyima pa malu mabi adi enzeka lelu: “Nunku, bakela dragon munene au panshi, nyoka wa kale au, udibu babikila ne: Diabolo ne Satana, udi upambuisha ba pa buloba bujima; bakamuimansha panshi pa buloba, bakamuimansha pamue ne banjelu bende. . . . Diakabi kudi buloba ne mbuu, bualu Diabolo mmupueke kunudi, muikale ne tshiji tshikole, mumanye ne: udi ne tshikondo tshîpi.” (Buakabuluibua 12:9, 12) Padi bantu ba bungi bakonkonone bijadiki ebi, mbafike ku nkomenu wa ne: Satana mmuntu mubi udi ne mubidi wa mu nyuma, udi wenzeja malu mabi adi enzeka pa buloba ebu.

Udi mua kudiebeja tshiudi mua kuenza bua kupeta bukubi. Bualu bunene mbobu abu. Tshiena-bualu tshidi thilonda netshileje muudi mua kupeta buku]bi.

Anu bu kapepe kabi kadi kanyanga ne bintu bia mulungu, Satana kena umueneka, mbikole bua bantu kumujingulula ne udi ukebela bantu njiwu mikole. Kadi Nzambi ki mmutulekele mu bualu ebu to. Wewe muenze mudimu ne mapa adi Nzambi mutupeshe aa kuakutshina Satana to:

Bukole bua kudisunguila tshia kuenza. Yakobo 4:7 udi wamba ne: “Nukandamene Diabolo ne yeye neanunyeme.” Nansha mudi Satana ne bukole, kena mua kukuenzeja ku bukole bua kuenza malu audi kuyi musue kuenza to. Wewe ke udi ne bua kudisunguila tshia kuenza. 1 Petelo 5:9 udi wamba ne: “Numukandamene [Diabolo], bashindame mu ditabuja.” Vuluka ne: pavua Yezu mubenge mateta asatu a Satana, Satana wakamushiya. (Matayi 4:11) Nansha wewe pebe udi mua kusungula bua kukandamena Satana.

Bulunda ne Nzambi. Yakobo 4:8 udi utukankamija bua ‘kusemena pabuipi ne Nzambi.’ Yehowa nkayende udi ukulomba bua kudia nende bulunda. Mmushindu kayi uudi mua kuenza bualu ebu? Mushindu muimpe wa kutuadija nkulonga malu adi amutangila mu Bible. (Yone 17:3) Malu audi ulonga bua Yehowa neakusake bua kumunanga ne dinanga edi nedikusake padi bua wewe kuenza disua diende. (1 Yone 5:3) Wewe musemene pabuipi ne Tatu webe wa mu diulu, yeye pende neenze tshinyi? Yakobo udi utungunuka wamba ne: Nzambi ‘neasemene pabuipi nebe.’

Mulayi wa kutukuba. Nsumuinu 18:10 udi wamba ne: ‘Dîna dia Yehowa didi tshibumba tshikole; muntu muakane udi unyemenaku, udi upanduka.’ Bushuwa, kabiena bisua kumvuija ne: dîna dia Nzambi ntshintu kampanda tshidi mua kututshisha muntu dikasa dimpe mu tshishima to. Kadi bidi biumvuija ne: bantu badi banemeka dîna dia Nzambi ne muoyo mujima badi mua kumubikila bua kubakuba dîba dionso.

Tshilejilu tshia kulonda. Bienzedi 19:19 udi utuambila bualu kampanda budi butangila bena Efeso bavua balue bena Kristo ne: “Bantu ba bungi bavua benza malu a majimbu bakasangisha mikanda yabu, kuyoshabu kumpala kua bantu bonso. Bakabadika mushinga wayi yonso, kusanganabu muikale wa makuta a binjanja bia arjan 50 000.”a Bena Kristo aba bakosha bintu bionso bia malu a majimbu nansha muvuabi bia mushinga wa bungi. Tshilejilu etshi tshidi mua kutuambuluisha bikole lelu. Pa buloba apa malu a majimbu ne a ditendelela dia mpingu mmavulangane bikole. Nansha bintu bia majimbu bidibu banaya nabi ne bilele bidi bimuenaka bu kabiena ne bualu, bidi mua kututuangaja ne bademon. Mbia mushinga bua kumbusha bintu bionso ebi mu nsombelu webe nansha biobi bikale bia mushinga bungi kayi.​—Dutelonome 18:10-12.

Rogelio, utuvua bakule bualu buende mu tshiena-bualu tshia ntuadijilu tshia mu biena-bualu ebi, kavua witaba dikalaku dia Diabolo too ne pavuaye mukumbaje bidimu 50. Kadi pashishe wakashintulula mmuenenu wende. Bua tshinyi? Rogelio udi wamba ne: “Ngakapeta Bible bua musangu wa kumpala mu nsombelu wanyi. Dimanya dia malu a mu Bible diakantuisha ne: Diabolo udiku. Dimanya edi didi dinkuba bua kubenga kukuluka mu buteyi bua Diabolo.”

Udiku musue kumona dituku dikala Satana katshiyiku anyi? Eyowa, udi mua kudimona. Bible mmudianjile kuleja tshikondo tshikala Diabolo udi upambuisha bantu ba bungi mua kuedibua mu “dijiba dia kapia ne sufre.” (Buakabuluibua 20:10) Bushuwa, kapia kena dîna ne sufre kabiena mua kuenzela tshifukibua tshia mu nyuma bualu nansha bumue. Nunku, dijiba dia kapia didi dileja kabutu ka tshiendelele. Satana neajimine bua kashidi. Disankapu kayi dikala nadi bantu badi banange Nzambi tshikondo atshi!

Kadi bua mpindieu, tungunuka ne kulonga malu onso adi atangila Yehowa ne njila yende.b Ela meji wewe muikale ne muoyo mu tshikondo tshikalabu mua kuamba ne dishindika dionso ne: “Satana kenaku kabidi!”