MANDAMUNA A NKONKO YA MALU A MU BIBLE
Dibulunge dietu dia buloba edi bavua badifuke ne tshipatshila kayi?
Buloba buvua bufukibue bua kuikala muaba muimpe bua bantu
Dibulunge dietu dia buloba edi mmuaba muimpe udi bantu mua kusombela. Buloba budi ne mâyi a bungi adi ambuluisha bua muoyo wikalapu. Mushindu udibu babuenze, ne udibu bunyunguluka mu njila wabu udi wambuluisha bua ne: mâyi manene onso kaakami bua kulua mabue a mashika anyi kaabuki bu mabungi bua bukole bua munya. Kapepele ka pa buloba ne bukole budi nabu buloba bidi bikuba buloba ku nsese mikole ya dîba. Mitshi ne nyama mishilashilangane bidi pa buloba bidi bikemesha. Nunku, bantu ba bungi mbafike ku diamba ne: buloba buetu ebu mbufuka bua tshipatshila kampanda.—Bala Yeshaya 45:18.
Kadi udi mua kudiebeja ne: ntatu ne makenga bidiku pabi bua tshipatshila atshi anyi?—Bala Dutelonome 32:4, 5.
Tshipatshila tshivuabu bafukile buloba netshikumbane anyi?
Bavua bafuke buloba bua buikale muaba muimpe uvua bantu badi banemekangana ne banange Mufuki wabu mua kusombela. Nunku muoyo wa muntu udi ne tshipatshila tshipite tshia mitshi anyi tshia buloba. Tudi mua kumanya tshidi Mufuki wetu ne tudi kabidi mua kuanyisha ne kuidikija dinanga ne buakane bidiye nabi.—Bala Muambi 12:13; Mika 6:8.
Mufuki wetu udi mua kukumbaja malu onso adiye mulongolole bua kuenza. Nunku, tudi batuishibue ne: neumbushe makanga ne kansungasunga ne neenze bua buloba buetu ebu buikale muaba muimpe wa bantu kusomba ne disanka.—Bala Musambu 37:11, 29; Yeshaya 55:11.