Christopher, Hannah ne Gina kabena nkayabu badi badiumvua nunku to. Bantu ba bungi pa buloba bujima mbatuishibue ne: Nzambi udi ubamona bu balunda bende. Wewe udi wela meji bishi? Udiku udiumvua pabuipi ne Nzambi anyi? Peshi udi musue kusemena pabuipi nende anyi? Pamuapa udi mua kudiebeja ne: ‘Bidiku mua kuenzeka bushuwa bua muntu wetu eu kuikalaye mu malanda mimpe ne Nzambi wa Bukole Buonso anyi? Bikalabi nanku, mushindu kayi?’

KUDI MUSHINDU WA MUNTU KUSEMENA PABUIPI NE NZAMBI

Bilondeshile Bible kudi mushindu wa muntu kuikala mu malanda ne Nzambi. Bible udi wamba ne: Nzambi wakabikila Abalahama nkambua wa bena Ebelu ne: “mulunda wanyi.” (Yeshaya 41:8) Mona kabidi dibikila didi mu Yakobo 4:8 dia ne: “Semenayi pabuipi ne Nzambi ne yeye neasemene pabuipi nenu.” Nunku, bidi biumvuika patoke ne: kudi mushindu wa muntu kudia bulunda ne Nzambi. Kadi bu mudi Nzambi kayi umueneka, mmunyi muudi mua ‘kusemena pabuipi’ nende ne kudia nende bulunda?

Bua kuandamuna lukonko elu, tukonkonone tshitu tshienzeka bua bantu kutuadijabu kudia bulunda. Pa tshibidilu patu bantu babidi basua kudia bulunda batu banji kuambilangana mêna abu. Pashishe, padibu bayukidilangana pa tshibidilu ne bambilangana malu, bulunda buabu budi bukola. Padibu badienzeja bua kuenzelangana malu mimpe, bulunda buabu budi bukola bikole. Ke mudibi kabidi bua bulunda budi muntu mua kudia ne Nzambi. Tukonkononayi mudibi mua kuenzeka nanku.

Udiku ne mulunda webe wa pa muoyo kampanda uudi kuyi mumanye dîna diende anyi? Kabiena mua kuenzeka to. Irina mamu wa mu Bulgarie udi uleja ne: “Muntu kena mua kusemena pabuipi ne Nzambi yeye kayi mumanye dîna diende to.” Diakalenga, anu mudibi bileja mu tshiena-bualu tshishale, Nzambi mmusue bua usemene pabuipi nende. Ke bualu kayi ku diambuluisha dia Bible, mmudileje kuudi wamba ne: ‘Meme ndi Yehowa, adi ndîna dianyi.’​—Yeshaya 42:8.

Kumanya dîna dia Nzambi ne kuditela anyi kubenga kudimanya bidiku ne mushinga kudi Yehowa anyi? Tukonkonone bualu ebu: dîna dia Nzambi didibu bafunda ne maleta anayi matshintamane a mu tshiena Ebelu didi disanganyibua misangu mitue ku 7 000 mu mifundu ya ntuadijilu ya mu Mifundu ya tshiena Ebelu. Mbaditele misangu ya bungi mu Bible kupita mêna makuabu. Ntshijadiki tshidi tshileja ne: Yehowa mmusue bua tumanye dîna diende ne tuikale tuditela.a

Bamue bantu badi mua kuela meji ne: bu mudi Nzambi muikale wa tshijila ne wa bukole buonso, kutela dîna diende nkupanga kanemu. Bushuwa, mbibi bua kutela dîna dia Nzambi mu mushindu mubi anu bu muudi kuyi mua kutela bibi dîna dia mulunda webe wa pa muoyo. Kadi, Yehowa mmusue ne: bantu badi bamunange banemeke dîna diende ne badimanyishe bantu bakuabu. (Musambu 69:30, 31; 96:2, 8) Vuluka ne: Yezu wakalongesha bayidi bende bua kusambila mushindu eu: “Tatu wetu udi mu diulu, dîna diebe ditumbishibue.” Tudi mua kutumbishisha dîna dia Nzambi patudi tudimanyisha bantu bakuabu. Kuenza nunku, kudi kutusemeja pabuipi nende.​—Matayi 6:9.

Bible udi uleja ne: Nzambi udi uteya ntema bikole kudi bantu ‘badi banemeka dîna diende.’ (Malaki 3:16) Bua muntu wa mushindu eu, Yehowa udi umulaya wamba ne: “Nemmukube bualu yeye mmumanye dîna dianyi. Yeye neambikile, meme nemmuitabe. Nengikale nende mu dikenga.” (Musambu 91:14, 15, NWT) Kumanya dîna Yehowa ne kuditela kudi ne mushinga tuetu basue kuikala nende mu malanda mimpe.

Misangu ya bungi balunda ba pa muoyo batu bayukidilangana mpala ne mpala, ku telefone, ku Enternete, anyi bafundilangana mikanda koku mushindu. Nunku bua kusemena pabuipi ne Nzambi, tudi dijinga ne kuyukila nende misangu yonso. Kadi mmunyi mutudi mua kuenza nanku?

Tudi mua kuyukila ne Yehowa mu disambila. Kadi kusambila Nzambi kakuena mushindu umue ne kuyukila mu mpukampuka ne muntu wa mulongo wetu to. Tudi ne bua kumanya ne: patudi tusambila tudi tuyukila ne Mufiki wetu Mutambe Bunene wa diulu ne buloba. Bualu ebu budi ne bua kutusaka bua kusambila ne kanemu kakole. Bua Nzambi kuteleja masambila etu, tudi ne bua kukumbaja amue malu. Tuakule bua asatu a kudiwu.

Bualu bua kumpala, tudi ne bua kusambila anu Yehowa Nzambi nkayende, kadi katuena ne bua kusambila Yezu anyi munsantu kampanda peshi mpingu to. (Ekesode 20:4, 5) Bible udi wamba patoke ne: “Mu malu onso mu disambila ne mu disengelela pamue ne disakidila, numanyishe Nzambi milombu yenu.” (Filipoyi 4:6) Bualu buibidi, tudi ne bua kuenza masambila etu mu dîna dia Yezu Kristo Muana wa Nzambi. Yezu nkayende wakumvuija ne: “Muntu kena mua kulua kudi Tatu kayi mupitshile kundi.” (Yone 14:6) Bualu buisatu, masambila etu adi ne bua kuikala mu diumvuangana ne disua dia Nzambi. Bible udi wamba ne: “Tshintu tshionso tshitudi tulomba bilondeshile disua diende, udi utumvuila.”a​—1 Yone 5:14.

Bushuwa, bulunda buimpe kabuena mua kunenga bikala muntu umue ke udi wakula. Anu bu mutubi bienza disanka padi balunda babidi bayukila bashilangana mêyi, tudi ne bua kupesha Nzambi mpunga wa kutuambila bualu ne tudi ne bua kumuteleja padiye utuambilabu. Udi mumanye mudi Nzambi uyukila netu anyi?

Lelu eu, Yehowa Nzambi udi uyukila netu ku diambuluisha dia Bible Dîyi diende difunda. (2 Timote 3:16, 17) Bua tshinyi tudi tuamba nanku? Tuangate tshilejilu etshi: fuanyikija ne: udi upeta mukanda wa kudi mulunda webe wa pa muoyo. Paudi uubala, bidi bikuenza disanka dia kuambila bakuabu ne: “Mulunda wanyi uvua muntumine mukanda!” Kadi diyukidilangana edi kadivua dia mukana to, kadi divua dia mu mukanda mufunda. Bia muomumue, paudi ubala Bible, udi upesha Yehowa mpunga wa kuyukila nebe. Gina utuvua batele mu tshiena-bualu tshia kumpala udi wamba ne: “Ndi ngela meji ne: meme musue bua Nzambi angitabe bu mulunda wende, ndi ne bua kukonkonona Bible mukanda udiye mutufundile.” Udi wamba kabidi ne: “Kubala Bible dituku dionso, nkungambuluishe bua kusemena pabuipi ne Nzambi.” Utuku ushila Yehowa mpunga bua kuyukila nebe dituku dionso paudi ubala Bible Dîyi diende dituku dionso anyi? Kuenza nunku nekukuambuluishe bua kudiumvua pabuipi ne Nzambi.

“Ungambile tshionso tshiudi natshi dijinga, nenkuenzelatshi ne disanka.” Udi pamuapa mua kuelakana bua kuambila muntu muenyi uudi kuyi muibidilangane nende mêyi a mushindu eu. Kadi kuakuelakana bua kuambila mulunda webe wa pa muoyo mêyi a mushindu eu. Balunda bimpe batu pa tshibidilu benzelangana tshidi mukuabu ulomba.

Bible udi uleja ne: Yehowa utu misangu yonso wenza malu adiye mumanye ne: neasankishe batendeledi bende. Tshilejilu, mukalenge Davidi uvua mulunda wa Nzambi wakamba ne: “Bintu bungibi nunku biudi muenze, Yehowa Nzambi wanyi, midimu yebe ya kukema ne meji audi utuelela. . . . Nebikale bungi tshianana bundi tshiyi mua kulondelangana!” (Musambu 40:5, NWT) Yehowa udi wenza malu adi asankisha nansha bantu badi kabayi bamumanye ‘uwuja mioyo yabu tente ne biakudia ne disanka.’​—Bienzedi 14:17.

Bu mudi Yehowa usanka bua kuenza malu adi asankisha bakuabu, mbimpe bua bantu badi basue kuikala balunda ba Nzambi beenze malu adi ‘asankisha mutshima’ wende. (Nsumuinu 27:11) Kadi mmalu kayi masunguluke audi mua kuenza bua kusankisha Nzambi? Bible udi wandamuna ne: “Kanupu muoyo bua kuenza malu mimpe ne kuabanyangana bintu binudi nabi ne bakuabu, bualu Nzambi udi usanka bua milambu ya nunku.” (Ebelu 13:16) Bidi bisua kumvuija ne: kuenza malu mimpe ne kuambuluisha bakuabu ke bualu bumue budi ne mushinga bua kusankisha Yehowa anyi?

Bible udi wamba ne: “kakuyi ditabuja mbikole bua kusankisha Nzambi bimpe.” (Ebelu 11:6) Anu panyima pa ‘Abalahama mumane kuitabuja Yehowa’ ke ‘pakamubikilabu ne: mulunda wa Yehowa.’ (Yakobo 2:23) Yezu Kristo wakashindika kabidi dijinga dia ‘kuleja ditabuja kudi Nzambi’ tuetu basue bua atubeneshe. (Yone 14:1) Nunku, mmunyi muudi mua kupeta ditabuja didi Nzambi utekemena kudi bantu badi basue kusemena pabuipi nende? Udi mua kutuadija pa kuikala ne tshibidilu tshia kulonga Bible Dîyi dia Nzambi. Paudi wenza nunku, neupete “dimanya dijalame dia disua diende” ne nunku neulonge mua “kumusankisha mu malu onso.” Pashishe, paudi wenda uvudija dimanya dijalame dia Yehowa ne utumikila biudi ulonga bua mikenji yende miakane, ditabuja diebe kudiye nedikole ne neusemene bikole pabuipi nende.​—Kolosayi 1:9, 10.

Ntshinyi tshiudi mua kuenza bua kusemena pabuipi ne Nzambi? Tudi bakonkonone malu adi alonda aa audi mua kukumbaja bua kuikala mu malanda mimpe nende:

1. Kumanya dîna dia Nzambi, Yehowa ne kuditela.

2. Kuikala kuyukila nende mu disambila ne dilonga Bible Dîyi diende.

3. Kutungunuka ne kuenza malu adi asankisha Yehowa.

Wewe wenza malu aa, udiku mua kuamba ne: udi wenza tshidi tshikengela bua kusemena pabuipi ne Nzambi anyi? Kudiku bualu buudi umona ne: udi mua kuakaja anyi? Kakuyi mpata bidi bikengela kudienzeja, kadi tangila bipeta biudi mua kupatula.

Jennifer wa mu ditunga dia États-Unis udi wamba ne: “kudienzeja bua kukolesha malanda ne Nzambi kudi ne mushinga wa bungi. Malanda aa adi ambuluisha muntu bua kueyemena Nzambi bikole, kumanya bimpe menemene bumuntu buende ne ndekelu wa bionso, kumunanga bikole. Kakuena nsombelu mutambe buimpe mupite eu!”

Wewe musue kuikala mu malanda mimpe ne Nzambi, Bantemu ba Yehowa nebikale ne disanka dia kukuambuluisha. Badi mua kudilongolola bua kulonga nebe Bible kuyi ufuta makuta. Tudi kabidi tukubikila bua kubuela mu bisangilu bietu bia malu a mu Bible mu Nzubu wa Bukalenge wa muaba uudi, neusanke bikole bua kudisangisha ne bantu badi bangata malanda abu ne Nzambi ne mushinga.a Paudi wenza nunku, neudiumvue pebe anu bu mufundi wa misambu wakamba ne: “Kundi meme, kusemena pabuipi ne Nzambi nkuimpe buanyi meme.”​—Musambu 73:28.