Bivuaku bimpe bua Davidi kutekemenaye kudi Nzambi bua amutabalele anyi? Nzambi utuku ukutabalela anyi? Bantu ba bungi kabena bitaba ne: Nzambi wa bukole buonso udi ubatabalela. Bua tshinyi?

Bumue bua ku malu budi ne: Nzambi udi ku mutu kua bionso menemene kupita bantu. Bua muaba udiye, bisamba bionso ‘bidi bu dimata dia mâyi didi ditankuka ku luesu, yeye udi ubibala bu lupuishi lukese lua pa tshiamu tshia kuidikija natshi bujitu.’ (Yeshaya 40:15) Mufundi mukuabu wa matuku etu aa udi ne mpata uvua mufike too ne ku diamba ne: “kabiena bikumbana bua kuitaba ne: kudi Nzambi kampanda udi utabalela ne utangila malu audi wenza.”

Bamue bantu badi bobu bamona ne: malu adibu benza adi abavuija kabayi bakumbane bua Nzambi kubatabalela. Tshilejilu, tatu mukuabu wa bidimu 50 ne pa mutu diende Jim, udi wamba ne: “Mvua nsambila misangu ne misangu bua ditalala ne didikanda, kadi anu mu mutantshi mukese, mvua mfika munda misangu yonso. Ndekelu wa bionso, ngakafika ku dimona ne: mvua muntu mubi ne Nzambi kavua ukokesha bua kungambuluisha to.”

Nzambi udiku kule menemene ne bantu bua kubengaye kutumona anyi? Mmunyi mudiye udiumvua bulelela bua bifukibua biende bidi bipange bupuangane? Muntu yeye kayi ne dimanya dia Nzambi, kena mua kumvuija bimpe malu a Nzambi anyi kuandamuna nkonko eyi to. Kadi Bible, Dîyi dia Nzambi difundisha ku nyuma wende didiye mutumine bantu, udi utujadikila ne: Nzambi kena kule ne bantu ne udi ubatabalela. Bible udi wamba ne: ‘Kena kule ne yonso wa kutudi.’ (Bienzedi 17:27) Mu biena-bualu binayi bidi bilonda ebi, netumone tshidi Nzambi utuambila bua mushindu udiye utabalela bantu ne mudiye muleje bantu bu wewe ditabalela dilelela.

BUA TSHINYI BAMUE BADI BABENGA: Bilondeshile makebulula menze matuku adi panshi aa, tshikata tshia mitoto tshimue tshianana tshidi ne mabulunge makese miliyare 100. Padi bantu bamona bunene bua tshibuashibuashi, ba bungi badi badikonka ne: ‘Bua tshinyi Mufuki wa Bukole buonso udi utangila tshidi bantu bapuekele benze pa dibulunge dikese?’

TSHIDI DÎYI DIA NZAMBI DILONGESHA: Nzambi kena anu mutupeshe Bible patupu kayi ututabalela to. Yehowa udi utujadikila ne: ‘Nenkupeshe meji patshidi dîsu dianyi kuudi.’​—Musambu 32:8.

Tuangate tshilejilu tshia Hâga mukaji muena Ejipitu wa mu bidimu bia 1900 kumpaka kua bikondo bietu ebi. Hâga wakapanga kanemu kudi mfumuende Sala, nunku Sala wakamupuekesha milongo, Hâga kuya mu tshipela. Nansha muvua Hâga muenze tshilema, Nzambi uvuaku mulekele kumutabalela anyi? Bible udi wamba ne: ‘Muanjelu wa Yehowa wakamusangana.’ Muanjelu au wakajadikila Hâga umuambila ne: ‘Yehowa wakumvua dikenga diebe.’ Pashishe, Hâga wakambila Yehowa ne: “Wewe udi Nzambi udi utangila.”​—Genese 16:4-13.

“Nzambi udi utangila” udi ukumona pebe. Tuangate tshilejilu etshi: mamu wa dinanga udi utabalela nangananga bana bende batekete, kadi patshidi muana mupuekele bikole udi dijinga ne dimutabalela dia bungi dia muledi wende. Bia muomumue, Nzambi udi nangananga ututabalela patudi pa nkayetu ne patudi batekete. Yehowa udi wamba ne: ‘Ndi mushikame mu muaba udi mule ne udi wa tshijila, ndi mushikame kabidi ne muntu udi ne mutshima munyingalale ne mudipuekeshe bua kusangaja nyuma wa udi mudipuekeshe ne bua kusangaja mutshima wa muntu udi unyingalala bua bubi.’​—Yeshaya 57:15.

Kadi udi mua kudiebeja ne: ‘Mmunyi mudi Nzambi ummona? Udiku undumbuluisha bilondeshile tshimuenekelu tshianyi peshi udi umona tshidi munda muanyi ne mmumanye tshindi bimpe menemene?’

BUA TSHINYI BAMUE BADI BABENGA: Bantu ba bungi badi bela meji ne: Nzambi udi umona bantu anu bu benji ba mpekatu, kabayi bakezuke ne kabayi bakumbanyine dibatabalela diende. Kendra, uvua ne dibungama dikole, udipisha bualu kavua ukumbana bua kutumikila bimpe menemene mêyi a Nzambi. Bua bualu ebu, wakamba ne: “Ngakalekela kusambila Nzambi.”

TSHIDI DÎYI DIA NZAMBI DILONGESHA: Yehowa udi umona matekete ebe ne mmumanye tshiudi bimpe menemene. Bible udi wamba ne: ‘Udi mumanye buntu buetu, udi uvuluka ne: tudi dimfuenkenya.’ Bualu bukuabu, kena utuenzela malu “bu mudi mibi yetu,” kadi udi utufuila luse patudi tunyingalala.​—Musambu 103:10, 14.

Tuangate tshilejilu tshia Davidi mukalenge wa mu Isalele utuvua batele mu tshiena-bualu tshia kumpala tshia mu biena-bualu ebi. Davidi wakambila Nzambi wamba ne: “Mêsu ebe akammona pantshitshivua mukuji; bitupa biawu bionso bivua bifunde mu mukanda webe . . . Unkonkonone munda muanyi, Nzambi wanyi, ne umanye muoyo wanyi.” (Musambu 139:16, 23, NWT) Bulelela, Davidi uvua mutuishibue ne: nansha muvuaye muenze mpekatu munene tshikondo kampanda, Yehowa uvua mua kujingulula muvua muoyo wende munyingalale.

Yehowa mmumanye bimpe tshiudi kupita muntu yonso eu. Bible udi wamba ne: “Bantu badi batangila anu mubidi, kadi Yehowa udi utangila mu mutshima.” (1 Samuele 16:7) Nzambi mmumanye tshiudi, mbuena kuamba ne: ngikadilu iudi mupiane kudi baledi bebe, muudi mukole, muaba uudi ne bumuntu buebe buonso. Udi umona ne wangata ne mushinga muudi udienzeja bua kuikala muntu muimpe nansha muudi wenza bilema.

Mmunyi mudi Nzambi wenza mudimu ne mushindu udiye ‘mukumanye bimpe’ bua kukuambuluisha?

BUA TSHINYI BAMUE BADI BABENGA: Nansha padi bantu kabayi ne wa kubasamba, bamue badi bamona ne: ndidisankisha bua kulomba Nzambi bua ele dîyi ne abambuluishe bua kutantamenabu ntatu yabu. Raquel mamu mukuabu udi wamba ne: “Pandi ntangila bungi bua bantu badi pa buloba ne ntatu idibu batuilangana nayi, ntatu yanyi idi imueneka mikese ne binsaka bua kubenga kulomba Nzambi diambuluisha.”

TSHIDI DÎYI DIA NZAMBI DILONGESHA: Nzambi ukadi muambuluishe bantu ne mubasambe mu mishindu ya dikema. Bantu bonso pa buloba mbapiane mpekatu, dipanga kutumikila bimpe menemene mikenji ya Nzambi. Kadi Nzambi “wakatunanga, kutumaye Muanende [Yezu Kristo] bu mulambu wa kubuikidila nawu mibi yetu.” (1 Yone 4:10) Ku diambuluisha dia lufu lua Yezu lua mulambu, Nzambi mmuenze bua tuikale bakumbane bua kutubuikidilabu mibi, kuikala ne kondo ka muoyo kakezuke ne kutekemena muoyo wa kashidi mu buloba bupiabupia bua ditalala.a Kadi mulambu eu udiku wambuluisha anu bantu bonso mu tshibungi anyi udi uleja mudi Nzambi ukutabalela wewe pa nkayebe?

Tukonkonone bualu bua mupostolo Paulo. Bualu bua mulambu wa Yezu buvua bumutue ku muoyo ne kumusakabu bua kufundaye ne: “Ndi ne muoyo bua ditabuja kudi Muana wa Nzambi uvua munnange ne mudifile bua bualu buanyi.” (Galatiya 2:20) Bushuwa, Yezu uvua mufue kumpala kua Paulo kuluaye muena Kristo. Kadi Paulo uvua umona mulambu eu bu dipa didi Nzambi mumupeshe yeye nkayende.

Lufu lua Yezu lua mulambu ndipa didi Nzambi mukuenzele pebe. Dipa edi didi dileja muudi ne mushinga ku mêsu kua Nzambi. Didi mua kukupesha “busambi bua tshiendelele ne ditekemena dimpe,” ne ‘kukukolesha mu malu mimpe onso ne mu dîyi dimpe dionso.’​—2 Tesalonike 2:16, 17.

Kadi Yezu uvua mufile muoyo wende bu mulambu kukadi kupite bidimu 2 000. Ntshijadiki kayi tshidi tshileja ne: Nzambi mmukoluele tshianza too ne lelu?

BUA TSHINYI BAMUE BADI BABENGA: Bantu ba bungi badi bitabuja Nzambi badi badiumvua muikale kule nabu. Christina mamu wa mu ditunga dia Irlande uvua uya mu Nzambi lumingu luonso, udi wamba ne: “Mvua mmona Nzambi bu Mufuki wa bintu bionso. Kadi tshivua mumumanye to. Tshivua muanji kudiumvua meme pabuipi nende to.”

TSHIDI DÎYI DIA NZAMBI DILONGESHA: Patudi tudiumvua bajimine, Yehowa kena ulekela kutuambuluisha to. Yezu wakaleja mudi Nzambi ututabalela mu tshilejilu etshi: “Muntu yeye muikale ne mikoko lukama, kadi mukoko umue mujimine, kakushiya mikoko 99 pa mikuna bua kuya kukeba udi mujimine anyi?” Bualu ebu budi ne dilongesha kayi? “Bia muomumue, Tatu wanyi udi mu diulu ki mmusue bua umue wa ku bana bakese aba ajimine to.”​—Matayi 18:12-14.

“Umue wa ku bana bakese aba” udi ne mushinga wa bungi ku mêsu kua Nzambi. Mmunyi mudi Nzambi “ukeba udi mujimine”? Bilondeshile mvese utudi batele ku ntuadijilu, Yehowa udi ukoka bantu kudiye.

Tukonkonone mudi Nzambi wenza bua kukoka bantu bimpe kudiye. Mu bidimu lukama bia kumpala, Nzambi wakatuma muyidi muena Kristo Filipo bua kuimanyika ditempu dia muena Etshiopi uvua ne muanzu munene bua kumumvuija mulayi wa mu Bible uvuaye wenda ubala. (Bienzedi 8:26-39) Pashishe, Nzambi wakatuma mupostolo Petelo bua kuya ku nzubu kua Kôneliyo, mfumu wa basalayi wa bena Lomo uvua usambila ne udienzeja bua kutendelela Nzambi. (Bienzedi 10:1-48) Nzambi wakalombola kabidi mupostolo Paulo ne bena diende ku musulu mu tshimenga tshia Filipoyi. Mu tshimenga amu bakatuilangana ne Ludiya “mutendeledi wa Nzambi,” ne “Yehowa wakunzulula muoyo wende bua kumvuaye.”​—Bienzedi 16:9-15.

Mu malu aa onso, Yehowa mmuenze bua ne: bantu bavua bamukeba bapete mushindu wa kumumanya. Mbanganyi batu baya kutangila bantu lelu ku nzubu yabu ne mu miaba idi bantu ba bungi bua kubambila mukenji wa Nzambi wa mu Bible? Ba bungi badi bandamuna ne: “Mbantemu ba Yehowa.” Diebeja ne: ‘Pamuapa ki Nzambi udi muenze nabu mudimu bua kumbikilabu anyi?’ Tudi tukulomba bua ulombe Nzambi bua akuambuluishe bua witabe mushindu udiye udienzeja bua usemene pabuipi nende.a