NSHAPITA WA 16
Nukandamene Diabolo ne mateyi ende
‘Nukandamene Diabolo ne yeye neanunyeme.’—Yakobo 4:7.
1, 2. Mbanganyi batu basanka dituku dia ntambu?
BIWIKALA wenzela Yehowa mudimu kukadi bidimu bia bungi, ukadi muteleje miyuki mipite bungi itubu benzela bantu badi batambula mu mpungilu ne mu mpuilu yetu. Kadi nansha muukadi muteleje miyuki eyi njila ne njila, bitu anu bikuenza disanka pautu umona bantu badi balue bua kutambula bimana kulu. Dîba adi, bantu bonso batu bumvua disanka ne batuadija kukuma bikashi. Pamuapa udi mua kupuekesha too ne binsonji bua disanka paudi umona tshisumbu tshia bantu badifila bua kuenzela Yehowa mudimu. Bushuwa, dituku dia ntambu ditu dituku dia disanka dia bungi.
2 Tuetu badi pa buloba tutu tumona mudi bantu batambula anu misangu mibala ku minu ku tshidimu, kadi banjelu bobu batu babamona misangu ne misangu. Elabi meji bungi bua ‘disanka didi mu diulu’ padibu bamona bantu binunu ne binunu badisangisha ku tshitupa tshia bulongolodi bua Yehowa tshidi pa buloba lumingu luonso elu! (Luka 15:7, 10) Kakuyi mpata, banjelu badi basanka bikole padibu bamona batendeledi ba Yehowa benda bavula.—Hagai 2:7.
DIABOLO “UDI WENDAKANA BU NYAMA WA NTAMBUE UDI UKUNGULA”
3. Bua tshinyi Satana udi wendakana “bu nyama wa ntambue udi ukungula”? Ntshinyi tshidiye ukeba?
3 Kadi nyuma mibi yoyi itu yumvua tshiji tshikole padi bantu batambula. Satana ne bademon badi banyingalala bikole padibu bamona bantu binunu ne binunu bela bulongolodi bubi ebu nyima. Bidi nunku bualu Satana uvua muambe ne: muntu nansha umue kena mua kuenzela Yehowa mudimu bualu mmumunange to. Uvua muambe kabidi ne: muntu nansha umue kena mua kushala mulamate Nzambi padiye mu dikenga to. (Yobo 2:4, 5) Misangu yonso idi muntu udilambula kudi Yehowa, udi uleja mudi Satana muena dishima. Mbienze anu bu ne: lumingu luonso elu badi babangula Satana mapi makole. Nunku kabiena bitukemesha bua mudiye ‘wendakana bu nyama wa ntambue udi ukungula, ukeba bantu ba kudiaye.’ (1 Petelo 5:8) Tshipatshila tshia “nyama wa ntambue” eu ntshia kutupangisha bua kuenzela Nzambi mudimu ne kutunyangila malanda mimpe atudi badie nende.—Musambu 7:1, 2; 2 Timote 3:12.
4, 5. (a) Mmalu kayi abidi adi Yehowa mulaye adi akepesha bukole budi nabu Satana? (b) Ntshinyi tshidi bena Kristo balelela bajadike?
4 Nansha mutudi ne muluishi udi ne bukole kutupita, katuena ne bua kumutshina to. Bua tshinyi? Bualu Yehowa mmulaye malu manene abidi adi aleja ne: bukole bua “nyama wa ntambue udi ukungula” eu budi bushikila muaba kampanda. Mmalu kayi au? Bua kumpala, Yehowa mmulaye ne: ‘musumba munene’ wa bena Kristo balelela neupanduke ku “dikenga dinene.” (Buakabuluibua 7:9, 14) Bionso bitu Yehowa ulaya bitu anu bikumbana. Nunku Satana mmumanye bimpe ne: kena mua kupambuisha batendeledi ba Nzambi bonso to.
5 Bualu buibidi budi bumueneka patoke mu mêyi avua Azaya, muprofete wa Nzambi muambe. Wakambila mukalenge Asa ne: ‘Yehowa udi nenu, panutshidi nende.’ (2 Kulondolola 15:2; 1 Kolinto 10:13) Bilejilu bia bungi bia mu Bible bidi bileja ne: Satana katu muanji kukokesha bua kudia mutendeledi wa Yehowa udi mumulamate nansha umue to. (Ebelu 11:4-40) Lelu eu muena Kristo udi ushala mulamate Nzambi udi mua kukandamena Diabolo, kufika too ku dimutshimuna. Dîyi dia Nzambi didi ditujadikila diamba ne: “Nukandamene Diabolo ne yeye neanunyeme.”—Yakobo 4:7.
‘TUDI TULUANGANA NE NYUMA MIBI’
6. Satana udi wela muena Kristo yonso mvita ya mushindu kayi?
6 Satana kena mua kutshimuna mvita idiye uluisha bantu ba Yehowa bonso to. Kadi mu mvita idiye wela muntu yonso pa nkayende, muntu yeye kayi mumudimukile, Satana udi mua kumutshimuna. Mmumanye ne: yeye mutekeshe malanda atudi badie ne Yehowa, udi utukuata. Ntshinyi tshidiye wenza bua bualu ebu? Udi wela yonso wa kutudi mvita mikole ya muinshimuinshi. Tukonkononayi mishindu isatu idiye utuluisha.
7. Bua tshinyi Satana udi wela batendeledi ba Yehowa mvita mikole?
7 Mvita mikole. Mupostolo Yone wakamba ne: “Buloba bujima budi mu bukokeshi bua Mubi.” (1 Yone 5:19, MML) Mu mvese eu mudi didimuija bua bena Kristo balelela bonso. Bu mukadi Satana mukuate ba pa buloba bonso, anu batendeledi ba Yehowa ke badi bashale bamukandamena. Nunku, bobu ke badiye wela mvita ya katshi ku dînu. (Mika 4:1; Yone 15:19; Buakabuluibua 12:12, 17) Udi ne tshiji tshikole bualu mmumanye ne: nkumushadile anu dîba dikese. Ke bualu kayi udi ubaluisha ne muende muonso. Lelu eu udi utuluisha ne tshikisu bua kunyanga malanda etu ne Nzambi. Nunku tudi ne bua kuenza muetu muonso bua ‘kumanya malu atudi ne bua kuenza’ kupita mutuvua tuenza kumpala.—1 Kulondolola 12:32.
8. Ntshinyi tshivua Paulo musue kuamba pakambaye ne: tudi ‘tuluangana mvita ya bibula’ ne nyuma mibi?
8 Mvita ya muntu pa nkayende. Mupostolo Paulo wakadimuija bena Kristo nende ubambila ne: ‘Diluangana dietu dia bibula ndia kufuilangana ne bisumbu bia nyuma mibi bidi mu miaba ya mu diulu.’ (Efeso 6:12) Bua tshinyi Paulo wakakula bua “diluangana dia bibula”? Bualu diluangana edi ki ndia pa bule to, kadi ndia kuelangana kankose. Nunku Paulo mmusue kuamba ne: muena Kristo yonso udi uluangana ne nyuma mibi. Nansha tuetu basombele mu ditunga didibu bitaba malu a nyuma mibi anyi kabayi bayitaba, tumanye ne: dituku dituvua badilambule kudi Yehowa, tuakabuela mu tshialu bua kuluangana ne nyuma mibi. Nunku, muena Kristo yonso udi ubuela mu mvita eyi anu padiye udilambula kudi Yehowa. Ke bualu kayi Paulo wakabela bena Kristo ba mu Efeso misangu isatu mijima bua “kuimana bakandamana.”—Efeso 6:11, 13, 14.
9. (a) Bua tshinyi Satana ne bademon badi batuela “mateyi” mashilashilangane? (b) Bua tshinyi Satana udi ukeba kunyanga meji etu? Mmunyi mutudi mua kumukandamena? (Bala malu adi mu kazubu kadi kamba ne: “nudimukile mateyi a Diabolo.”) (c) Tela buteyi bua Satana butualonga mpindieu.
9 Mvita ya muinshimuinshi. Paulo wakambila bena Kristo bua kukandamena “mateyi” a Satana. (Efeso 6:11) Paulo kena wakula bua buteyi to, kadi udi wakula bua mateyi. Nyuma mibi idi ituela mateyi mashilashilangane; ne mmimanye tshidiyi yenzela nanku. Bitu bienzeka ne: muena Kristo udi mukandamene buteyi kampanda alue kukuluka mu bukuabu. Nunku, Satana ne bademon badi batangila yonso wa kutudi bimpe menemene bua kumona butekete budiye nabu. Pashishe badi babuelela pa butekete abu bua kunyanga malanda ende ne Nzambi. Diakalenga, tudi bamanye mateyi mavule a Diabolo bualu Bible udi utulejawu. (2 Kolinto 2:11) Ku ntuadijilu kua mukanda eu, tuvua bakule bua buteyi bua dinanga dia biuma, bua malunda mabi ne bua tshiendenda tshia masandi. Tuakulayi mpindieu bua mushindu udi Satana ututeya ne malu a mîdima.
KUENZA MALU A MÎDIMA NKUPANGA LULAMATU
10. (a) Malu a mîdima ntshinyi? (b) Yehowa udi uamona bishi? Wewe udi uamona bishi?
10 Padi muntu wenza malu a mîdima, udi ubuelakana ne nyuma mibi anyi bademon. Lubuku, buloji, dipongolangana ne diyukila ne bafue ngimue mishindu ya malu a mîdima. Anu mutudi bamanye, malu a mîdima ‘ntshintu tshibi’ tshitambe ku mêsu kua Yehowa. (Dutelonome 18:10-12; Buakabuluibua 21:8) Nunku, bu mutudi petu ne bua ‘kukina malu mabi,’ katuena mua kuitaba nansha kakese bua kudia bulunda ne nyuma mibi to. (Lomo 12:9) Tuetu badie nayi bulunda, tudi tulekela kulamata Tatu wetu wa mu diulu Yehowa ne tumunyingalaja bibi bitambe.
11. Bua tshinyi Satana udi usanka bikole padiye ufikisha muntu ku dibuela mu malu a mîdima? Fila tshilejilu.
11 Bu mudi Satana mumanye ne: padi muntu ubuelakana mu malu a mîdima udi ushipa malanda ende ne Yehowa, udi wenza muende muonso bua kusaka bamue ba kutudi bua kubuelakanamu. Satana udi usanka bikole misangu yonso idiye ufikisha muena Kristo ku dibuelakana mu malu a mîdima. Bua tshinyi? Fuanyikijabi bualu ebu: Bobu bafikishe musalayi ku diumbuka mu tshiluilu tshiabu bua kuya mu tshia baluishi, mfumu wa basalayi wa mu tshiluilu tshidiye muye udi usanka bikole. Udi mene nansha mua kumuleja kumpala kua bantu bua kufuisha mfumu wa tshiluilu tshia basalayi tshivuaye kumpala bundu. Bia muomumue, padi muena Kristo ubuelakana mu malu a mîdima, udi witaba bua kulekela Yehowa ne uya kudi Satana. Ela meji mudi Satana mua kuela muntu au mulu bua kuleja mudiye mutshimune! Nnganyi wa kutudi udi mua kuitaba bua kuela Diabolo diboko mulu mushindu eu? Nansha umue. Katuena basue kuela Yehowa mâyi ku makasa to.
UDI UJULA NKONKO IDI IKEBESHA DIELAKANA
12. Mbuteyi kayi butu Satana ukeba kunyanga nabu mushindu utudi tumona malu a mîdima?
12 Tuetu bakine malu a mîdima ne muoyo mujima, Satana kakutubuejakajamu to. Nunku udi umona ne: mbimpe anyange lungenyi luetu. Mushindu kayi? Udi ukeba mishindu ya kufikisha bena Kristo ku dimona ‘bualu bubi ne: Mbualu buakane, ne bualu buakane ne: Mbubi.’ (Yeshaya 5:20) Bua kufika ku bualu ebu, utu unyemena ku buteyi buende bukatuye mukuate nabu bantu ba bungi ebu: kujula nkonko idi ikebesha dielakana.
13. Leja muvua Satana mujule nkonko ivua ikebesha dielakana.
13 Tangila muvua Satana muteye bantu ne buteyi ebu kale. Mu budimi bua Edene, wakebeja Eva ne: ‘Ntshia bushuwa se: Nzambi wakamba ne: Kanudi mamuma a mitshi yonso idi mu budimi anyi?’ Mu tshikondo tshia Yobo, pavua Satana muye mu tshisangilu tshivua Yehowa wenza ne banjelu mu diulu, wakebeja Yehowa ne: ‘Yobo udi utshina Nzambi patupu anyi?’ Patshivua Yezu utuadijilaku mudimu wende pa buloba, Satana wakamuambila ne: ‘Biwikala Muana wa Nzambi, amba mabue aa andamuke mitanda ya bidia.’ Mu tshilumbu tshia Yezu, Satana wakafika too ne ku diela mpata mêyi avua Yehowa nkayende muambe mbingu mitue ku isambombo kumpala a ne: “Eu udi Muana wanyi munanga, yeye udi unsankisha bimpe.”—Genese 3:1, NW; Yobo 1:9; Matayo 3:17; 4:3.
14. (a) Mmushindu kayi udi Satana ufikisha bantu ku dielakana bua malu a mîdima? (b) Ntshinyi tshituakonkonona mpindieu?
14 Ke tshidi Satana wenza kabidi lelu bua kufikisha bantu ku dielakana ne kumona malu a mîdima bu mimpe. Diakabi, mmufikishe bamue bena Kristo ku dibuejakaja malu mu lungenyi luabu. Mbafike ku diela meji ne: imue mishindu ya malu a mîdima kayena anu mibi menemene to. Mu kuamba kuimpe, badi anu bu badi bebeja ne: Ntshia bushuwa anyi? (2 Kolinto 11:3) Mmushindu kayi utudi mua kuambuluisha bantu ba mushindu eu bua kuakaja lungenyi luabu? Ntshinyi tshitudi mua kuenza bua katukuluki mu mateyi a Satana? Bua kuandamuna nkonko eyi, tukonkononayi bintu bibidi bidi Satana munyange ne malu a mîdima ne budimu buonso. Bintu abi ke dijikija lutetuku ne didiondapisha.
UDI UBUELELA PA MAJINGA A MUBIDI WETU
15. (a) Mmushindu kayi udi bantu ba bungi ba mu matunga a ku Mputu bamona malu a mîdima? (b) Mmunyi mudi mushindu udi bena panu bamona malu a mîdima munyange lungenyi lua bamue bena Kristo?
15 Mu matunga a bungi a ku Mputu, bantu bakadi balengulula malu a mîdima bu mudi malu a bilengulengu, a dikayangana manga ne buloji. Bakadi baleja malu a bademon mu filme ku televizion, mu mikanda ne mu manaya a ku ordinatere bu malu mimpe a kusekeshangana nawu, adi kaayi mua kuenzela bantu bualu. Imue filme ne mikanda idi ne malu aa mmimuangalake mu bantu bikole, ne bantu badi bayinange mbenze tusumbu bua kutua benji ba filme ne bafundi ba mikanda eyi nyama ku mikolo. Nunku, bademon mbafikishe bantu ku dipepeja bukole budi nabu malu a mîdima. Kudiku bena Kristo badi bafike pabu ku dipepeja malu a mîdima anyi? Eyowa, meji a bamue ba kudibu mmanyanguke. Mushindu kayi? Tshilejilu, muena Kristo mukuabu uvua ufuma ku ditangila filme wa malu aa wakamba ne: “Tshindi meme mutangile mfilme, tshiena muenze malu a mîdima to.” Bua tshinyi kuela meji nunku nkubi?
16. Bua tshinyi ki mbimpe kusungula mishindu ya dijikija lutetuku idi ne malu a mîdima?
16 Nansha mudi kuenza malu a mîdima kushilangane ne kuatangila, kabiena biumvuija ne: kutangila malu a mîdima ki nkubi to. Bua tshinyi? Tuvuluke ne: Dîyi dia Nzambi didi diamba mudi Satana ne bademon bende kabayi ne bukole bua kumona malu adi mu lungenyi luetu.a Nunku, anu mutukadi bambe, bua nyuma mibi kumanyayi tshidi mu meji etu ne kumona butekete buetu, idi itutangila bimpe bua kumona malu atudi tuenza bu mudi mishindu ya kujikija lutetuku itudi tusungula. Padi muena Kristo munange kutangila filme anyi kubala mikanda idi ne malu a bademon, bena majimbu, bena mupongo anyi bintu bikuabu bia buena ebi, amanye ne: udi utumina bademon mukenji kampanda. Udi ubaleja butekete budiye nabu. Nunku bademon badi babuelela pa butekete abu ne bamusaka ku dienza malu adi mua kubafikisha ku dimukuata mu buteyi buabu. Ke bualu kayi bena Kristo bavua basue kutangila malu a mîdima bakafika ku dienza.—Galatia 6:7.
17. Mbuteyi kayi budi Satana mua kuela muntu udi usama?
17 Satana udi kabidi ututeta ku diambuluisha dia mishindu ya diondapangana. Mushindu kayi? Padi muena Kristo wenza muende muonso bua kujikija disama didiye nadi kadi udimona anu dienda dikola, udi mua kuteketa mu maboko. (Mâko 5:25, 26) Satana ne bademon badi mua kubuelelapu bua kunyanga lungenyi luende. Mbamanye bimpe ne: Dîyi dia Nzambi didi ditukandika bua kukeba ‘dikuatshisha kudi benji ba malu mabi.’ (Yeshaya 31:2) Bua kufikisha muena Kristo udi mutekete mu mikolo ku dishipa mukenji eu, bademon badi mua kumufikisha ku ditaba mushindu kampanda wa diondapangana udi ne “malu mabi” anyi malu a mîdima. Bobu bamufikishe ku dienza nunku, badi banyanga malanda ende ne Nzambi. Mushindu kayi?
18. Mmishindu kayi ya dienza mateta anyi diondapangana idi muena Kristo ne bua kubenga? Bua tshinyi?
18 Yehowa uvua muambile bena Isalele bavua babuelakana mu “malu mabi” anyi malu a mîdima ne: ‘Panuolola bianza bienu kundi, nensokoke mêsu anyi kunudi; panuantendelela ne mitendelelu ya bungi mene, tshiena nnumvuila.’ (Yeshaya 1:13, 15) Katuena basue kuenza bualu budi mua kufikisha Yehowa ku dibenga kuteleja masambila etu anyi ku dibenga kutuambuluisha nangananga patudi tusama to. (Musambu 41:3) Nunku, muena Kristo mulelela kena mua kuitaba mushindu kampanda wa dienza mateta bua kumanya disama anyi wa diondapangana udi umueneka ne bualu kampanda bua mîdima to.b (Matayo 6:13) Dîba adi, ikale mushindike ne: Yehowa neamuambuluishe.—Bala malu adi mu kazubu kadi kamba ne: “Mmalu a mîdima bushuwa anyi?”
PADIBU BAKULA BIKOLE BUA MALU A BADEMON
19. (a) Satana mmusue bua bantu bitabe ne: udi ne bukole bua mushindu kayi? (b) Mmiyuki ya mushindu kayi idi bena Kristo balelela kabayi mua kulondelangana?
19 Nansha mudi bantu ba bungi ba mu matunga a ku Mputu bapepeja bukole budi nabu Satana, mu matunga makuabu bantu badi bamutshina bikole. Mu matunga au, Diabolo mmufikishe bantu ku ditaba ne: kakuena muntu udi ne bukole bupite buende to. Kudi bantu badi batshina nyuma mibi mu malu onso atubu benza. Bantu badi bakula bikole bua malu a kukema adi bademon benza. Batu balonda malu aa ne disanka ne bantu batu baateleja ne ntema yonso. Tudi petu ne bua kulondelangana malu a mushindu eu anyi? Tòo. Katuena ne bua kuenza nunku bua malu abidi.
20. Leja mudi muntu mua kumuangalaja malongesha a Satana pamuapa kayi mumanye.
20 Tshia kumpala, patudi tulondelangana malu adi bademon benza, tudi tuambuluisha Satana mu midimu yende. Mushindu kayi? Bible udi utujadikila ne: Satana udi ne bukole bua kuenza malu a kukema, kadi udi utudimuija kabidi ne: utu wenza “malu a kukema a mashimi” ne ‘udinga’ bantu. (2 Tesalonike 2:9, 10) Bu mudi Satana muikale tatu wa mashimi, mmumanye mua kunaya ne lungenyi lua bantu badi basue malu a mîdima ne kubafikisha ku ditaba malu adi kaayi malelela. Bantu aba badi bitaba ne muoyo mujima ne: mbamone malu kampanda anyi mbaumvue ne badi mua kualondela bantu, babajadikila mudiwu malelela. Padi bantu batamba kualondelangana, adi angata luidi lukuabu. Muena Kristo yeye ulondelangana pende malu a mushindu eu, udi wenza disua dia Diabolo, ‘tatu wa mashimi.’ Udi wenda umuangalaja malongesha a Satana.—Yone 8:44; 2 Timote 2:16.
21. Mmalu kayi atudi ne bua kulondelangana?
21 Bualu buibidi, nansha bikala muena Kristo uvua upetangana ne nyuma mibi ku kale, ki mbimpe atungunuke ne kulondela bena Kristo nende malu au to. Bua tshinyi? Bible udi utubela bua ‘kutangila kudi Yezu, mubangi ne mushikiji wa ditabuja dietu.’ (Ebelu 12:2) Eyowa, tudi ne bua kutangija meji etu anu kudi Kristo, ki nkudi Satana to. Tumanye ne: pavua Yezu pa buloba, kavua ulondela bayidi bende malu atu nyuma mibi yenza to, pende uvua mumanye Satana bimpe, mumanye kabidi malu adiye mua kuenza. Kadi Yezu uvua wakula anu bua Bukalenge bua Nzambi. Nunku, tuidikijayi Yezu ne bapostolo bende, tulondelangane anu malu a “mianda minene ya Nzambi.”—Bienzedi 2:11; Luka 8:1; Lomo 1:11, 12.
22. Ntshinyi tshitudi ne bua kuenza bua ‘disanka didi mu diulu’ kutungunukadi?
22 Satana udi utuela mateyi a bungi bu mudi buteyi bua malu a mîdima bua kunyanga malanda etu ne Yehowa. Kadi tuetu bakine malu mabi ne balamate ku adi mimpe, katuakushila Diabolo mpunga bua kunyangaye lungenyi luetu ne kutufikisha ku dienza malu a mîdima to. (Efeso 4:27) Ela meji bungi bua ‘disanka didi mu diulu’ patudi tutungunuka ne ‘kuimana bakandamana kumpala kua mateyi a Diabolo’ too ne pamubutulabu!—Efeso 6:11.
[Mêyi adi kuinshi]
a Badi babikila Satana ne: Muluishi, Mushiminyinyanganyi, Muena mashimi, Mutetshianganyi. Mêna aa adi aleja ne: kena ne bukole bua kumona malu adi munda muetu anyi mu lungenyi luetu to. Kadi Bible udi wamba ne: Yehowa udi “uteta mitshima,” mbuena kuamba ne: udi umona malu adi munda muetu. Yezu pende udi ‘uteta meji ne mitshima.’—Nsumuinu 17:3; Buakabuluibua 2:23.
b Bua kumanya malu makuabu, bala tshiena-bualu tshidi tshiamba ne: “Ditetesha mubidi ndikukumbanyine anyi?” tshidi mu Tshibumba tshia Nsentedi tshia dia 15 Tshisua-munene 1994, dibeji dia 19-22, ne tshia ne: “D’après la Bible. . . Vos choix en matière de traitement médical : ont-ils de l’importance?” mu Réveillez-vous ! wa dia 8 Tshiongo 2001.
[Kazubu kadi mu dibeji 194]
MMALU A MÎDIMA BUSHUWA ANYI?
Dîyi dia kulonda: ‘Malu mabi adi mubidi wenza adi amueneka ne: ditendelela dia mpingu, kutapuluka, mpata. Bantu batu benza malu aa kabena bapiana bukalenge bua Nzambi.’—Galatia 5:19-21.
Imue nkonko iudi ne bua kudiela
▪ Kudiku tshilele tshintu ngenza tshidi tshipetangana ne malongesha a mu bitendelelu bia dishima anyi?—2 Kolinto 6:16, 17.
▪ Ndiku ne tshintu tshidi tshipetangana ne malu a nyuma mibi anyi?—Bienzedi 19:19.
▪ Mushindu undi nkeba bua bangondape, udiku ukengela bua banyemene ku malu a mîdima nansha a majimbu anyi?—Lewitiki 19:26.
[Kazubu mu dibeji 192, ne 193]
NUDIMUKILE MATEYI A DIABOLO
Satana tatu wa mashimi ‘mmufofomije mêsu a meji a badi kabayi ne ditabuja’ kukadi bidimu binunu ne binunu. (2 Kolinto 4:4) Udi wenza kabidi muende muonso bua kunyanga meji a basadidi ba Nzambi. Bua tshinyi? Satana mmumanye ne: malu atudi tuela meji ke atudi tuenza. Mmumanye ne: yeye munyange lungenyi luetu, neatufikishe ku dienza malu mabi.—Yakobo 1:14, 15.
Vuluka tshivuaye muenze bua kushima Eva. Mupostolo Paulo wakamba ne: ‘Ndi ntshina ne: Bu muakadi nyoka mudinge Eva ne budimu buende, bumue meji enu neapambuishibue kudi Kristo.’ (2 Kolinto 11:3) Satana wakakuila mukana mua nyoka ne kufikishaye Eva ku dienza bualu buakamukebela ntatu ya bungi. Wakakeba bua kunyanga lungenyi luende ne mushindu uvuaye umona malu. Ke tshiakenzeka. Bu muvua Eva mumuteleje, wakashintulula lungenyi luende, kumonaye bualu buvuabu bamukandike bulue buimpe. Bu muvua lungenyi luende lumane kunyanguka, bivua bitekete bua kuenzaye bubi.—Genese 3:1-6; Buakabuluibua 12:9.
Satana ki mmushintuluke to. Tshipatshila tshiende tshitu anu tshia kunyanga lungenyi lua bantu bua bafike ku dienza malu mabi. Udi unyanga lungenyi lua bantu ku diambuluisha dia makalenge a pa buloba, bitendelelu bia dishima, bangenda mushinga ne mishindu ya dijikija lutetuku mibi. (Yone 14:30) Mmufike ku dinyanga lungenyi lua bantu bapite bungi, mushintulule ngelelu wabu wa meji ne ngenzelu wabu wa malu. Malu avua bantu bamona mabi bu mudi disangila dia mulume ne mulume anyi dia mukaji ne mukaji, dibanjijangana ne dilela bana ba panshi mbilue bintu bidi bantu bitaba ne basue kuenza. Mbantu bungi kayi badi Satana mufike ku dipambuisha? Bible udi wamba ne: ‘Ba pa buloba bonso badi balala mu bubi.’—1 Yone 5:19.
Satana udi mua kutukulula nansha tuetu bena Kristo. (1 Kolinto 10:12) Bu mudiye mumanye ne: nkumushadile anu matuku makese, udi ukeba kujikijila basadidi ba Nzambi ‘tshiji tshikole’ tshidiye natshi, ukeba kubapambuisha. (Buakabuluibua 12:12) Tuetu katuyi badimuke, mishindu yende misokome idiye upambuisha nayi bantu ne “bena mashimi” ba bungi badiye usaka bua kunyanga lungenyi luetu ne kutupambuisha nebatufikishe ku dienza bubi.—Tito 1:10.
Tshilejilu, bena panu badi bamona dibaka bishi? Bible udi utulongesha ne: dibaka ntshintu tshia tshijila tshidi ne bua kushala kashidi. (Matayo 19:5, 6, 9) Filme ya lelu ne malu adibu baleja ku televizion bidi bileja dibaka bu tshintu tshia matuku makese tshidi bantu mua kushipa padibu basue. Tuetu bena Kristo, katuitabi bua lungenyi lubi lua Satana elu lunyange meji etu to. Tuetu katuyi badimuke, lungenyi elu ludi mua kushintulula mushindu utudi tumona dibaka ne kufika ku dipepeja mitshipu yetu ya dibaka. Dîba adi, padi bilumbu bijuka mu dibaka, tudi mua kutuadija kukeba muntu mukuabu udi mua kututeleja bimpe ne kutuambuluisha. Diakamue, tudi mua kutuadija kunanga muntu mukuabu, pamuapa muena mudimu netu anyi muena Kristo netu. Tuetu balekele dinanga adi dienda anu didiunda, tudi mua kupapuka tukadi benze bualu bubi.
Tshilejilu tshikuabu ntshia lungenyi lua didienzela malu ludi lutangalake mu bulongolodi bua Satana ebu. Bantu ba bungi ‘mbadisui, buujibue ne diambu.’ (2 Timote 3:4) Lungenyi lua mushindu eu luolu lunyange meji etu, katuakuitaba kabidi bua kukokela muntu anyi kumutumikila to. Muanetu wa balume udi ne lungenyi elu udi mua kufika munda padi bakulu bamupesha mibelu. (Ebelu 12:5) Muanetu wa bakaji udi mua kutuadija kupepeja bantu badi Nzambi muteke ku mutu kuende.—1 Kolinto 11:3.
Tudi tuela Yehowa tuasakidila bua mudiye mutuleje mateyi a Satana onso patoke. (2 Kolinto 2:11) Katuitabi bua ngenyi mibi ya Satana ipete muaba mu lungenyi luetu nansha. Bua tuetu kushala mu dinanga dia Nzambi, tudi ne bua ‘kuteka meji etu ku malu a mu diulu.’—Kolosai 3:2.
[Tshimfuanyi mu dibeji 184]
Misangu yonso idi muntu udilambula kudi Yehowa ne utambula, udi uleja mudi Satana muena dishima
[Tshimfuanyi mu dibeji 191]
Paudi usama, lomba Yehowa bua akuambuluishe