“Mudimu eu udi munene”

DÎBA divua dikumbane dia kuenza tshisangilu tshia mushinga mukole mu Yelushalema. Mukalenge Davidi wakabikila banene, tupita ne bena bukitu bende bonso. Bavua ne disanka dia kuteleja dimanyisha dia pa buadi. Yehowa uvua mupeshe Solomo muana wa Davidi mudimu wa kuibaka muaba wa pa buawu wa kutendelela Nzambi mulelela. Nzambi uvua mupeshe mukalenge wa kale wa Isalele plan wa mua kuibaka muaba eu ne yeye kumupesha Solomo. Davidi kuambaye ne: “Mudimu eu udi munene; bualu bua mbalasa eu kena wa muntu, udi wa Yehowa Nzambi.”—1 Kul. 28:1, 2, 6, 11, 12; 29:1.

Pashishe, Davidi wakebeja ne: ‘Mbanganyi badi badifila lelu bua kulua ne dipa mu tshianza bua kupesha Yehowa?’ (1 Kul. 29:5, NWT) Bu wewe muikalapu, uvua mua kuenza tshinyi? Uvuaku mua kufila bintu bua kuambuluisha bua mudimu eu munene anyi? Bena Isalele bakaditua mu difila dia bintu. Bushuwa, ‘bakasanka bualu bua bobu bakadifidila bintu biabu; bualu bua bakafila bintu biabu ne mitshima mitoke kudi Yehowa.’—1 Kul. 29:9.

Bidimu nkama ya bungi pashishe, Yehowa wakenza tshintu kampanda tshinene tshipite ntempelo. Wakajadika ntempelo munene wa mu nyuma, mbuena kuamba ne: ndongoluelu udiye muenze bua bantu kusemena kudiye bua kumutendelela ku diambuluisha dia mulambu wa Yezu. (Eb. 9:11, 12) Mmunyi mudi Yehowa wambuluisha bantu bua kulengejanganabu nende lelu? Nku diambuluisha dia mudimu wetu wa kuvuija bantu bayidi. (Mat. 28:19, 20) Ku diambuluisha dia mudimu eu, tshidimu tshionso tudi tulonga Bible ne bantu miliyo ya bungi, bantu binunu bia bungi badi batambula ne tudi tuenza bisumbu bipiabipia nkama ya bungi.

Ke bualu kayi didiunda edi didi dilomba bua kupatula mikanda ya malu a mu Bible ya bungi, kuibaka Nzubu ya Bukalenge ne kuyilama bimpe, ne kusumba miaba ya kuenzela mpuilu ne mpungilu. Kuenaku witaba ne: mudimu wetu wa kuyisha lumu luimpe mmudimu munene udi ne difutu anyi?—Mat. 24:14.

Bu mudi bantu ba Nzambi banange Nzambi ne bantu nabu ne bu mudi mudimu wa kuyisha Bukalenge muikale wa kuenza ne mitalu, bidi bibasaka bua ‘kulua ne dipa mu tshianza bua kupesha Yehowa’ pa kufila mapa a budisuile. Bidi bienza disanka bua ‘kutumbisha Yehowa ne biuma’ bietu ne bua kumona mudibu benza mudimu ne biuma ebi bimpe ne meji bua kuenza mudimu munene wa katshia ne katshia.—Nsu. 3:9.

Mushindu udi bamue bafila mapa bua mudimu wa pa buloba bujima

Bantu ba bungi lelu batu ‘bateka tshintu ku luseke’ anyi makuta bua mudimu wa pa buloba bujima ne baela mu tushete tua mapa tua mu Nzubu yabu ya Bukalenge. (1 Kol. 16:2) Ku ngondo yonso, bisumbu bitu bituma makuta aa ku biro bia Bantemu ba Yehowa bidi bitangila mudimu wa ditunga diabu. Nudi mua kutuma kabidi makuta aa buludiludi ku biro bia Bantemu ba Yehowa bidi bitangila mudimu mu ditunga dienu. Bua kumanya bulongolodi budi Bantemu ba Yehowa benza nabu mudimu mu ditunga dienu, ebeja Betele wa Bantemu ba Yehowa wa muaba uudi. Udi mua kupeta adrese mu site wa www.jw.org. Mapa anudi mua kutuma buludiludi ngowu aa:

DIFILA BINTU BITUDI NABI

Mmapa adi muntu wela ku banke anyi ufila ku diambuluisha dia karte ka kuangata naku makuta ku banke. Mu amue matunga, batu kabidi bafila makuta aa ku diambuluisha dia site wa jw.org peshi dia site mukuabu.
Nudi mua kufila makuta, bilengejilu bu mudi mpeta ne bikanu bia or peshi bintu bikuabu bia mushinga mukole. Nutume makuta anyi bintu ebi ne mukanda muîpi udi uleja ne: nudi babitume bua kashidi.

DILAMISHA MAKUTA

Muntu udi mua kufila bintu biende nansha makuta bua balue kumupingajila pikalaye nawu dijinga.
Muntu udi mua kufunda mukanda udi uleja ne: bintu ebi mbia kupingaja.

MISHINDU MIKUABU YA KUFILA MAPA

Mbaleje kuinshi eku mishindu mikuabu ya kufila mapa bua kutua mudimu wa diyisha udi wenzeka pa buloba bujima nyama ku mikolo. Kumpala kua wewe kufila mapa aa, suaku wanji kuebeja Betele udi utangila midimu ya mu ditunga dienu bua kumanya mishindu idiku idibu bakuata nayi mudimu mu ditunga dienu. Bu mutu mikenji ne bitadi bishintuluka, mbimpe kuebeja bantu badi bamanye bimpe malu a bitadi ne mikenji kumpala kua wewe kusungula mushindu muimpe wa kufila mapa.

Makuta a tshieya: Mmapa adi muntu mua kupesha bumue bua ku malongolodi adi Bantemu ba Yehowa benza nawu mudimu ne kuleja mudi bulongolodi ebu ne bukenji bua kuangata makuta ende a tshieya anyi a pansio.

Konte ya ku banke: Bilondeshile mikenji ya banke ya muaba uudi, muntu udi mua kufundisha konte yende ya ku banke, mikanda ya makuta matekesha ku banke anyi konte yende ya makuta a pansio. Udi kabidi mua kuleja ne: bumue bua ku malongolodi adi Bantemu ba Yehowa benza nawu mudimu nebuangate makuta ende padiye ufua.

Bukenji bua kupeta bintu ne makuta masombesha: Muntu udi mua kupesha bumue bua ku malongolodi adi Bantemu ba Yehowa benza nawu mudimu bintu biende. Udi kabidi mua kufunda bua kuleja ne: bulongolodi nebuangate bintu biende ebi padiye ufua.

Mpangu ne nzubu: Muntu udi mua kufila lupangu anyi nzubu wende kudi bumue bua ku malongolodi adi Bantemu ba Yehowa benza nawu mudimu bua kashidi, kadi bikalaye musombele mu lupangu elu, udi mua kutungunuka ne kusombelamu too ne muafuaye.

Dipa dia kufuta ku tshidimu: Mmakuta anyi mikanda bidibu bapesha bumue bua ku malongolodi adi Bantemu ba Yehowa benza nawu mudimu, bumvuangana ne muntu udi ubifila anyi muntu udiye musungule bua kutuadija kupeta makuta bungi kampanda tshidimu tshionso patshidiye ne muoyo. Tshidimu tshidi muntu ufila dipa edi badi bamupuekeshila mushinga wa bitadi bituye ufuta.

Testama ne bintu bilamisha: Muntu udi mua kushila bumue bua ku malongolodi adi Bantemu ba Yehowa benza nawu mudimu bintu anyi makuta ende padiye ufua, peshi kubupa bukenji bua kuangata bintu bidiye mulamishe. Kuenza nunku kudi mua kukepeshisha mushinga wa bitadi.

Bua kumanya malu a bungi a mushindu wa kufila mapa malongolola bua mudimu wa Bantemu ba Yehowa wa pa buloba bujima, mbapatule broshire wa mu Anglais ne mu tshiena Espagne udi ne tshiena-bualu tshia ne: Charitable Planning to Benefit Kingdom Service Worldwide (Mapa malongolola bua kukuatshisha mudimu wa Bukalenge wa pa buloba bujima). Mbenze broshire eu bua kuleja mishindu mishilashilangane idi bantu mua kufila mapa. Malu adibu baleje mu broshire eu kaena anu mua kuikala akutangila wewe bilondeshile bitadi ne mikenji idi mu ditunga dienu to. Bantu ba bungi badi benze mudimu ne mishindu ya difila mapa eyi mbafike ku diambuluisha mudimu wetu wa pa buloba bujima, ne mbabakepeshile bungi bua makuta a bitadi avuabu bafuta. Bikala broshire eu mu ditunga dienu, udi mua kumulombesha kudi sekretere wa mu tshisumbu tshienu.

Bua kumanya malu makuabu, tuaku muaba udibu bafunde ne: “Difila mapa bua mudimu wetu wa pa buloba bujima” udi mu dibeji dia mbangilu dia site wetu wa jw.org, anyi fundila Betele udi utangila mudimu mu ditunga dienu.