Difuanyikija dia mushinga mukole diutu katshia kuyi muanji kuenza

UTUKU udiangata bu muena Kristo anyi? Biobi nanku, udi munkatshi mua bantu bapite pa miliyare 2 badi pa buloba badi badiamba mudibu bayidi ba Kristo. Lelu eu, kudi bitendelelu binunu ne binunu bidibu babikila ne: mbia bena Kristo, kadi badi batapuluke bua dibenga kupetangana dia malongesha abu a nshindamenu ne bua dishilangana dia mmuenenu yabu. Malu audi witabuja adi mua kuikala mashilangane ne a bakuabu badi badiamba mudibu bena Kristo. Malu au adiku ne mushinga anyi? Eyowa, adi ne mushinga biwikala musue kuenza buena Kristo budi Bible ulongesha.

Bayidi ba Yezu Kristo ba kumpala bavua bamanyike bu “bena Kristo.” (Bienzedi 11:26) Kabavua dijinga ne mêna makuabu bua kubamanyabu to, bualu kuvua anu ntendelelu umuepele wa bena Kristo. Bena Kristo bonso bavua balonda malongesha ne mibelu ya Yezu Kristo udi Muenji wa buena Kristo. Kadi netuambe bishi bua tshitendelelu tshienu? Udiku witaba ne: tshitendelelu tshienu tshidi tshilongesha malu avua Kristo mulongeshe ne avua bayidi bende ba kumpala bitabe anyi? Ntshinyi tshidi mua kukujadikila bualu ebu? Kudi anu mushindu umuepele, tuambe ne: kuenza mudimu ne Bible bu tshipiminu.

Mona bualu ebu: Yezu Kristo uvua unemeka bikole Mifundu Minsantu bualu n’Dîyi dia Nzambi. Kavua wanyisha bantu bavua batekesha bukole budi nabu malongesha a mu Bible pa kutamba kuimanyina pa bilele bia bantu. (Mâko 7:9-13) Tudi mua kuambilamu ne: bayidi balelela ba Yezu badi bangatshila malongesha abu mu Bible. Nunku mbimpe bua muena Kristo yonso adiebeje ne: ‘Malongesha a mu tshitendelelu tshietu adiku umvuangana ne Bible anyi?’ Bua kuandamuna lukonko alu, kuenaku mua kufuanyikija malu adi tshitendelelu tshienu tshilongesha ne tshidi Bible wamba menemene anyi?

Yezu wakamba ne: ntendelelu wetu udi ne bua kuimanyina pa bulelela budi mu Bible. (Yone 4:24; 17:17) Ne mupostolo Paulo wakamba pende ne: bua kupeta lupandu tudi ne bua kufika “ku dimanya dijalame dia bulelela.” (1 Timote 2:4) Nanku mbia mushinga bua malongesha etu ikale mimanyine pa bulelela bujalame bua mu Bible. Ke bua tshinyi lupandu luetu ludi mu njiwu.

MUTUDI MUA KUFUANYIKIJA MALU ATUDI TUITABUJA NE BIBLE

Tudi tukulomba bua ubale nkonko isambombo idibu bele mu tshiena-bualu etshi ne utangile mandamuna adi Bible ufila ku nkonko ayi. Bala mêyi a mvese idibu bafile, ne elangana meji bua mandamuna au. Pashishe diebeja ne: ‘Malu adi Bible ulongesha adiku apetangana ne a mu tshitendelelu tshietu anyi?’

Nkonko mikese eyi idi mua kukuambuluisha bua kuenza difuanyikija dia mushinga mukole diutu katshia kuyi muanji kuenza. Udiku musue kufuanyikija malongesha makuabu a mu tshitendelelu tshienu ne tshidi Bible wamba anyi? Bantemu ba Yehowa nebikale ne disanka dia kukuambuluisha bua ukonkonone bimpe bulelela budi mu Bible. Kuenaku mua kulomba Ntemu kampanda bua akulongeshe Bible kuyi ufuta kantu anyi? Anyi udi mua kubuela mu site wetu wa Enternete wa jw.org.

1 LUKONKO: Nzambi nnganyi?

DIANDAMUNA: Yehowa, Tatuende wa Yezu, ke Nzambi wa tshiendelele, Wa bukole buonso ne Mufuki wa bintu bionso.

TSHIDI BIBLE WAMBA:

“Tudi tuela Nzambi Tatu wa Mukalenge wetu Yezu Kristo tuasakidila misangu yonso patudi tusambila bua bualu buenu.”—Kolosayi 1:3.

“Wewe, Yehowa Nzambi wetu, udi mukumbane bua kuangata butumbi ne bunême ne bukole, bualu wakafuka bintu bionso.”—Buakabuluibua 4:11.

Bala kabidi Lomo 10:13; 1 Timote 1:17.

2 LUKONKO: Yezu Kristo nnganyi?

DIANDAMUNA: Yezu mmuanabute wa Nzambi. Bavua bafuke Yezu, mmumue ne: uvua ne mbangilu. Yezu utu ukokela Nzambi ne umutumikila.

TSHIDI BIBLE WAMBA:

“Tatu mmumpite meme bunene.”—Yone 14:28.

“[Yezu] udi tshimfuanyi tshia Nzambi udi kayi umueneka, muanabute wa bifukibua bionso.”—Kolosayi 1:15.

Bala kabidi Matayi 26:39; 1 Kolinto 15:28.

3 LUKONKO: Nyuma muimpe ntshinyi?

DIANDAMUNA: Nyuma muimpe mbukole budi Nzambi wenza nabu mudimu bua kukumbaja disua diende. Ki mmuntu to. Bantu badi mua kuujibua ne nyuma muimpe ne udi mua kubapesha bukole.

TSHIDI BIBLE WAMBA:

“Pakumvua Elizabeta muoyo wa Mariya, muana uvua mu difu diende wakasalakana, Elizabeta wakuwula tente ne nyuma muimpe.”—Luka 1:41.

“Nenupete bukole panupuekela nyuma muimpe.”—Bienzedi 1:8.

Bala kabidi Genese 1:2; Bienzedi 2:1-4; 10:38.

4 LUKONKO: Bukalenge bua Nzambi ntshinyi?

DIANDAMUNA: Bukalenge bua Nzambi mbulamatadi wa mu diulu. Yezu ke Mukalenge wa Bukalenge bua Nzambi. Mu katupa kîpi emu, Bukalenge bua Nzambi nebuenze bua disua dia Nzambi dienzeke pa buloba bujima.

TSHIDI BIBLE WAMBA:

“Muanjelu wa muanda mutekete wakela mpungi wende. Mêyi makole akumvuika mu diulu amba ne: ‘Bukalenge bua pa buloba mbulue Bukalenge bua Mukalenge wetu ne bua Kristo wende, neakokeshe bu mukalenge kashidi ne tshiendelele.’”—Buakabuluibua 11:15.

Bala kabidi Danyele 2:44; Matayi 6:9, 10.

5 LUKONKO: Bantu bimpe bonso batu baya mu diulu anyi?

DIANDAMUNA: Tòo. Anu bantu bakese ba lulamatu badibu babikila ne: “kasumbu kakese,” ke badi Nzambi musungule bua kuya mu diulu. Bobu ne Yezu nebakokeshe bantu bu bakalenge.

TSHIDI BIBLE WAMBA:

“Kanutshinyi, kasumbu kakese ka mikoko, bualu Tatu wenu mmuanyishe bua kunupesha Bukalenge.”—Luka 12:32.

“Nebikale bakuidi ba Nzambi ne ba Kristo, ne nebakokeshe nende bu bakalenge.”—Buakabuluibua 20:6.

Bala kabidi Buakabuluibua 14:1, 3.

6 LUKONKO: Nzambi mmulongolole tshinyi bua buloba ne bua bantu?

DIANDAMUNA: Mu Bukelenge bua Nzambi, buloba nebulue mparadizu ne bantu bena lulamatu nebapete makanda a mubidi mimpe, ditalala dia kashidi ne muoyo wa tshiendelele.

TSHIDI BIBLE WAMBA:

‘Badi ne mitshima mipuekele nebapiane buloba, mioyo yabu neyisanke mu ditalala dikumbane.’—Musambu 37:10, 11.

“Yeye neakupule tshinsonji tshionso ku mêsu kuabu, ne lufu kaluakuikalaku kabidi, nansha madilu, nansha miadi, nansha bisama kabiakuikalaku kabidi. Malu a kale ajiminyi.”—Buakabuluibua 21:3, 4.

Bala kabidi Musambu 37:29; 2 Petelo 3:13.