PAUDI wakula ne bakuabu pa malu a Nzambi (panudi babidi anyi panudi mu bisangilu), muyuki wenu udi ne tshia kuimanyina pa tshidi mu Dîyi dia Nzambi. Misangu ya bungi bitu bilomba kubala mvese mu Bible, kumubala bu mudibi bikengela.

Kubala miaku ne tshikuma tshiakanyine kutu kulomba kuleja mushindu utudi tudiumvua munda. Mbimpe kubala Bible ne muoyo wa munda mujima. Tuangatabi bimue bilejilu. Paudi ubala Musambu wa 37:11 ne dîyi dikole, dîyi diebe didi ne bua kuleja muudi muindile ditalala didibu batulaye edi ne muoyo kuulu kuulu. Paudi ubala Buakabuluibua 21:4 pa bidi bitangila ndekelu wa makenga ne lufu, dîyi diebe didi ne bua kuikala ne musangelu bua kuleja muudi wanyisha bikole mudi malu mabi aa alua kujika. Bua Buakabuluibua 18:2, 4, 5 (udi utulomba bua kupatuka mu “Babulona Munene” udi muule ne mpekatu), bidi bikengela kumubala ne dîyi didi dileja ne: bidi bikengela kuenza malu ne mitalu katuyi tujingakana. Tshidibi, tudi ne bua kuleja anu mutudi tudiumvua munda, kadi katuyi tunekesha to. Mvese nkayende ne mushindu utudi tuenza nende mudimu ke bintu bidi bitufikisha ku didiumvua munda mushindu kampanda anyi kansanga.

Ubale ne tshikuma anu miaku idi miakanyine. Pikala malu audi wamba anyunguluka anu pa tshitupa kampanda tshia mvese, ushindike tshitupa atshi paudi utshibala. Tshilejilu, paudi ubala Matayo 6:33, kuakushindika anyi kuela tshikuma tshikole pa ‘buakane buende’ anyi kutshiela pa ‘bintu ebi bionso’ pawikala usua kuleja tshidi ‘kukeba diambedi bukalenge’ kumvuija to.

Paudi ukeba kubala Matayo 28:19 mu muyuki webe wa mu Tshisangilu tshia Mudimu, neushindike miaku kayi? Biwasua kuakula bua mudibi bikengela kutuadija kulonga Bible ne bantu, ela tshikuma pa ‘nuvuije’ ne pa ‘bayidi.’ Kadi wewe usua kuleja bujitu butudi nabu bua kuyisha bantu ba bisa bikuabu badi mu teritware wenu anyi ulomba bamue bantu bua kuya kuenzela mudimu muaba udibu dijinga ne bamanyishi bakuabu, udi mua kushindika “ba bisamba bionso.”

Pa tshibidilu, tutu tufila mvese bua kuandamuna lukonko anyi bua kujadika bualu butudi bambe kadi budi bakuabu babenga anyi bela mpata. Bituabala mpindieu miaku yonso ya mu mvese eu ne tshikuma tshimue, bantu kabakumvua bimpe tshitudi bamubadile to. Wewe udi mua kumvua, kadi pamu’apa buobu kabakumvua to.

Tshilejilu, paudi ubala Musambu wa 83:18 mu Bible udi ne dîna dia Nzambi, wewe muele tshikuma tshikole pa ‘Mutambe Bunene,’ muntu kêna mua kujingulula ne: Nzambi utu ne diende dîna to. Mbimpe kushindika “Yehowa.” Kadi mpindieu paudi usua kuakula bua bumfumu bua Yehowa, mbimpe kushindika “Mutambe Bunene.” Bia muomumue kabidi, paudi ubala Yakobo 2:24 bua kuleja dijinga dia kuikala ne ditabuja ne bienzedi bilenga, kushindika “ubingishibua” pamutu pa “kuenza,” nkupangila bualu, bumue badi bakuteleja kabakumvua tshiudi mumubadile to.

Tshikuabu tshilejilu tshilenga tshidi mu Lomo 15:7-13. Mmukanda uvua Paulo mufundile tshisumbu tshienza ne bantu ba bisamba bia bende ne bena Yuda. Muaba eu Paulo udi ushindika wamba ne: mudimu wa Yezu udi ne dikuatshisha ki ng’anu kudi bena Yuda batengula nkayabu to, kadi kudi kabidi bena bisamba bikuabu bua ‘ba bisamba bia bende batumbishe Nzambi bua luse luende.’ Pashishe Paulo udi utela mvese inayi bua kuleja tshintu etshi tshidi bisamba bikuabu ne bua kuenza. Mmunyi mpindieu muudi mua kubala mvese idiye utela eyi bua kushindika tshivua mu meji a Paulo? Mona miaku iudi mua kusungula bua kushindika: “bisamba bia bende” mu mvese wa 9, “nuenu, bisamba bia bende” mu mvese wa 10, “nuenu, bisamba bionso bia bende” ne “bantu bonso” mu mvese wa 11, ne “bisamba bia bende” mu mvese wa 12. Bala mpindieu Lomo 15:7-13 wenda wela tshikuma miaba eyi. Paudi wenza nanku, neumvue ne neukuate bimpe tshidi Paulo usua kuamba muaba eu.

Mishindu ya kubala miaku ne tshikuma. Kudi mishindu mivule ya kushindika miaku idi ne lungenyi luudi ukeba kupatula patoke. Mushindu wa kushindika nawu uudi usungula udi ne bua kuya mumue ne mvese ne muaba uudi wenzela muyuki. Imue mishindu nyoyi eyi:

Kushindika ne dîyi. Apa udi ushintulula dîyi bua miaku idi ne ngenyi kampanda yumvuike mishilangane ne mikuabu. Udi mua kubandisha anyi kupuekesha dîyi. Mu miakulu ya bungi, kushintulula tshivuma tshia dîyi nkushindika miaku. Kadi mu minga miakulu, kushintulula tshivuma tshia dîyi nkushintulula diumvuija dia miaku dionso. Kubala miaku ya mushinga bitekete bitekete, nkuyishindika. Mu miakulu mudi tshivuma tshishintulula diumvuija dia malu, tudi mua kuenza tshintu tshikuabu tshidi mua kuenza ne: malu umvuike bu mashindika.

Kupuwa. Tudi mua kuanji kupuwa kumpala peshi kunyima kua dibala miaku idi ne mushinga, anyi kuenza bionso bibidi. Kupuwa kumpala kua kubala miaku idi ne mushinga kudi kujula bantu mioyo kuulu; kupuwa panyima pa diyibala, kudi kubueja malu mu mitu yabu. Kadi patudi tupuwa miaba ya bungi, katuakupatula bualu nansha bumue patoke to.

Kuambulula. Udi mua kushindika tshintu kampanda paudi wanji kukosa dibala, wambulula muaku nansha tshiambilu kansanga. Tshidibi, mushindu utu bantu ba bungi basue ng’eu wa kuanji kubala kujikija mvese yonso, pashishe kuambulula miaku idi ne mushinga.

Jeste. Dinyungisha mubidi anyi dishintulula tshilunji tshia mpala didi mua kushindika muaku peshi tshiambilu kampanda.

Tshiona tshia dîyi. Mu minga miakulu, udi mua kushintulula tshiona tshia dîyi paudi ubala muaku kampanda bua kuupesha diumvuija dikuabu peshi kuenza bua ushilangane ne mikuabu miaku. Kadi apa mbimpe kuikala ne budimu, nangananga bua miaku ya nsenda.

Padi bakuabu babala mvese. Patudi tulomba muntu mu buambi bua kubalaye mvese, udi mua kushindika muaku wa tshianana, anyi mene kupanga kushindika muaku nansha umue. Newenze tshinyi? Pa tshibidilu, bitu bimpe kufila patoke diumvuija dia mvese patudi tuleja mushinga wende. Wewe mumane kuleja mushinga wa mvese, udi mua kushindika mpindieu miaku ivua ikengela kushindika.

PATUDI tulongesha bakuabu, kubala mvese mu Bible tshianana ki nkumana muanda to. Paulo wakafundila muinende Timote ne: ‘Ukuate mudimu bimpe, bua bakuanyishe kudi [Nzambi], bu muena mudimu udi kayi ne bua kufua bundu bua mudimu wende, bualu udi umanyisha muaku wa [Nzambi] mu bulelela.’​—2 Tim. 2:15, MMV.

Bua kufika ku dienza nunku, bidi bikengela bua diumvuija dietu dia mvese dikale diumvuangana ne tshidi Bible ulongesha. Bidi bitulomba kutangila kabidi mvese idi pabuipi ne utudi nende bualu, pamutu pa kukeba miaku idi itusankisha ne kusakidila yetu ngenyi. Yehowa wakambila Yelemiya bua kudimuisha baprofete bavua bamba muvuabu bamba mêyi ende kadi bikale mu bulelela bamba ‘tshikena kumona tshiakafuma mu mitshima yabu.’ (Yel. 23:16) Mupostolo Paulo wakadimuisha bena Kristo bua kubenga kubuejakaja Dîyi dia Nzambi ne nkindi ya bantu. Wakafunda ne: ‘Tuakapidia malu masokome a bundu, katuena tuendakana ne budimu, katuena tudinga bantu ne dîyi dia Nzambi.’ Bapanyishi ba mvinyo ba mu tshikondo atshi bavua basambakaja mvinyo ne bintu bu mudi mâyi bua avulangane anu bua kumonabu mua kupeta mfranga ya bungi. Katunyangiku nansha kakese Dîyi dia Nzambi ne nkindi ya bantu nansha. Paulo wakamba ne: ‘Bualu bua tuetu katuena bu ba bungi badi banyanga dîyi dia Nzambi: kadi mu Kristo tudi tuamba dîyi ne mitshima mitoke bu mutudi ba kudi Nzambi ne ku mêsu kua Nzambi.’​—2 Kol. 2:17; 4:2.

Udi mua kutela imue misangu mvese bua kushindika mêyi kampanda. Bible mmuwule tente ne mêyi adi mua kutuludika biakane mu nsombelu kabukabu. (2 Tim. 3:16, 17) Kadi udi ne bua kujadika ne: mushindu uudi umvuija mvese mmuakane, kabidi ne: kuena wenza nende mudimu bibi, ukeba bua mvese ambe tshiudi wewe musue ne: ambe. (Mus. 91:11, 12; Mat. 4:5, 6) Diumvuija didi ne bua kuikala diumvuangana ne malu adi Nzambi mulongolole, diumvuangana kabidi ne Dîyi dia Nzambi mu ka-bujima kadi.

‘Kumanyisha dîyi dia Nzambi mu bulelela’ kudi kabidi kumvuija kumanya lungenyi lua nshindamenu lua tshidi Bible wamba. Ki “mmutshi” wa kututa nawu bakuabu to. Balongeshi ba mu bitendelelu bavua kabayi bumvuangana ne Yezu Kristo bavua pabu batela Mifundu Minsantu, kadi bavua bakanga mêsu abu pa malu manene avua Nzambi ulomba (avua atangila tshilejilu, buakane ne luse ne lulamatu). (Mat. 22:23, 24; 23:23, 24) Pavua Yezu ulongesha Dîyi dia Nzambi, uvua ne ngikadilu ya buena ya Tatuende. Nansha muvua Yezu ne tshisumi bua bulelela, uvua kabidi munange bantu bavuaye ulongesha. Tuditatshishayi bua kuidikija tshilejilu tshiende.​—Mat. 11:28.

Kadi tudi mua kujadika ne: tudi tuenza mudimu bilenga ne mvese munyi? Tshiakuenza, mbimpe kuikala ne tshibidilu tshia kubala Bible. Mbimpe kuikala kabidi ne dianyisha kudi Yehowa bua “mupika wa lulamatu ne wa budimu,” kasumbu ka bena Kristo bela manyi kadi Nzambi ukuata naku mudimu wa kupesha bena Kristo bonso biakudia bia mu nyuma. (Mat. 24:45, NW) Bua kasumbu aka kutuambuluisha, bidi bikengela tuetu kuikala tudilongela, tubuela ne tuandamuna mu bisangilu.

Wewe mulonge mua kuenza mudimu bilenga ne mukanda wa Comment raisonner à partir des Écritures, neumanye mua kumvuija biakane mvese ya bungi itutu tuyisha nayi misangu mivule. Wewe musue kulongesha Dîyi dia Nzambi biakane, ikala wanji kuenza makebulula ne budipuekeshi buonso kumpala kua kuenza mudimu ne mvese bua musangu wa kumpala.​—Nsu. 11:2.

Tokesha diumvuija dia mvese. Bidi bikengela bantu baudi ulongesha bikale bamona kakuyi lutatu diumvuangana didi pankatshi pa tshiena-bualu ne mvese yudi ufila. Paudi wela lukonko kumpala kua kubala mvese, mbimpe bantu bamone mudi mvese wandamuna lukonko alu. Paudi ufila mvese bua kujadika bualu kampanda, mbimpe muntu amone mudi mvese au ubujadika.

Kubala mvese nkayaku (nansha ne tshikuma) ki nkukumbane to. Wavuluka ne: bantu badi kabayi bibidilangane ne Bible kabena mua kumvua mvese bimpe paudi umubala musangu wa kumpala to. Ukoke ntema ya muntu ku tshitupa tshia mvese tshidi tshiumvuangana buludiludi ne malu anudi nuyikila.

Pa tshibidilu, bitu bilomba kusobola miaku minene, miaku idi yumvuangana buludiludi ne malu anudi nuyikila. Mushindu mupepele ng’wa kuambulula miaku ayi. Biwikala wakula ne muntu umue, udi mua kumuela nkonko idi mua kumufikisha ku dikeba miaku minene ayi. Biwikala wakula ne bantu ba bungi, udi mua kutela miaku mikuabu idi ne diumvuija dimue nayi peshi kuambulula lungenyi alu; ke mutu bamue bangamba-malu benza. Tshibi, wenza bua bantu kabapu muoyo diumvuangana didi pankatshi pa muyuki webe ne mvese.

Kusobola miaku minene nkuasa tshishimikidi tshimpe. Kadi mpindieu utungunuke. Ukavua muleje tshiuvua usua kufidila mvese kumpala kua kumufila anyi? Biwikale muenze nanku, leja patoke mpindieu mudi miaku yudi mushindike ileja tshiudi mufidile mvese. Uleje diumvuangana edi patoke. Nansha biwikale kuvua muleje kafidila ka mvese bangabanga, uleje diumvuangana didi pankatshi pende ne muyuki webe panyima pa dimubala.

Tshilejilu, Bafalese bakela Yezu lukonko luvuabu bela meji ne: nelumukolele. Bakamuebeja ne: “Bilondeshile mikenji yetu, mulume udi mua kuipata mukajende pa bualu buonso anyi?” Yezu wakabandamuna ne Genese 2:24. Wakashindamena anu pa katupa kamue ka mvese eu, e kukuata naku mudimu bimpe. Yezu wakaleja mudi mulume ne mukaji balua “muntu umue” peshi “mubidi umue.” E kuoyaye ngombo ne: “Nanku muntu kapanduludi tshidi [Nzambi] musange.”​—Mat. 19:3-6, MMV.

Mbimpe kuamba malu bungi kayi bua kumvuija mvese bimpe? Malu a kumanya adi abidi: tshidi bantu baudi wambila malu, ne mushinga wa bualu buudi nabu. Ikala wamba malu mapepele ne a buludiludi.

Kuelangana meji pa Mifundu. Mukanda wa Bienzedi 17:2, 3 udi wakula bua mudimu wa Paulo mu Tesalonika wamba ne: ‘wakelangana meji pa Mikanda ya tshijila.’ Bidi bikengela muena mudimu wa Yehowa yonso ikale ne ngikadilu eu. Tshilejilu, Paulo wakambila bena Tesalonika malu a muoyo ne mudimu wa Yezu pa buloba, kubaleja ne: malu aa akavua mamba mu Mifundu ya tshiena-Ebelu. Wakalua kukoma ne: ‘Kristo, Musungidi wetu, ke Yezu undi nnumanyisha!’​—MMV.

Paulo wakatela misangu mivule Mifundu ya tshiena-Ebelu mu mukanda uvuaye mufundile bena Ebelu. Uvua usobola anyi usungula ne umvuija muaku umue anyi katupa kampanda ka tshiambilu bua kushindika peshi kutokesha muanda kansanga. (Eb. 12:26, 27) Tshilejilu, mu Ebelu nshapita 3, Paulo wakatela Musambu wa 95:7-11. Neumone se: udi wakula bikole pa bitupa bisatu: (1) mutshima (Eb. 3:8-12), (2) diumvuija dia “lelu eu” (Eb. 3:7, 13-15; 4:6-11) ne (3) diumvuija dia tshiambilu tshia ne: “Kabena babuela mu dikisha dianyi” (Eb. 3:11, 18, 19; 4:1-11). Paudi pebe ukuata mudimu ne mvese, udienzeje bua kulonda tshilejilu etshi.

Tangila mushindu muimpe udi Yezu welesha muntu meji mu Luka 10:25-37. Mumanyi mupiluke wa mikenji umue wakamuebeja ne: ‘Muyishi, nengenze tshinyi bua kupiana muoyo wa tshiendelele?’ Yezu wakanji kumuebeja tshivuaye pende wela meji, pashishe kuluaye kushindika mushinga wa kuenza tshivua Dîyi dia Nzambi diamba. Kadi pakamona Yezu ne: muntu eu kavua mumvue malu bimpe, wakajinga bua kuyikila nende pa muaku umu’epele wa mvese au: “mukuenu.” Kadi pamutu pa kumumvuijawu tshianana, wakafila mufuanu bua yeye nkayende kufikisha ku nkomenu muakane.

Nanku, bidi bimueneka ne: pavua Yezu wandamuna nkonko, kavua utela anu mvese ivua ifila diandamuna dia buludiludi anyi diakane to. Uvua wanji ukonkonona mvese kumpala kua kuandamuna nayi lukonko.

Tshilejilu tshikuabu, Yezu wakashindamena anu pa tshitupa tshimue tshia Ekesode 3:6 pavuaye uyikila ne Basadoke pa tshilumbu tshia dibika dia bafue. Kakapuwa kunyima kua ditela mvese eu to. Wakabelesha meji pa mvese eu bua kubaleja mudi dibika dia bafue dikale bualu budi Nzambi mulongolole bua kuenza.​—Mâko 12:24-27.

Wewe mumanye mua kuela meji biakane ne bu mudibi menemene pa mvese, neulue mulongeshi wa dilambu.

NANSHA wakula kumpala kua muntu umue anyi ba bungi, ki mbimpe kuela meji ne: bu muudi wewe wanyisha tshiena-bualu tshiebe, nanku au yeye anyi buobu pabu nebatshianyishe to. Eyowa, mukenji uudi nawu udi ne mushinga, kadi paudi kuyi uleja mudiwu wambuluisha bantu, bantu kabakukuteleja ne ntema mutantshi mule to.

Bidi mushindu umue kabidi ne ku Nzubu wa Bukalenge. Bantu badi mua kukuteleja padibu bamona ne: ki mbamanye mufuanu peshi bualu buudi ulonda to. Kadi badi mua kubanga kuela meji ku malu makuabu bikalabu bakadi bamanye malu audi wamba, ne nangananga paudi kuyi wibakila muyuki pa malu au. Mbimpe kubaleja mushindu udi malu audi ubambila mua kubambuluisha ne bua tshinyi adi mua kubambuluisha.

Bible udi utulomba bua kuela meji mudi malu mua kutukuatshisha. (Nsu. 3:21) Yehowa wakatuma Yone Mubatiji bua kuludika bantu ku ‘meji a bakane [adi akuatshishangana].’ (Luka 1:17) Ke meji adi afumina ku ditshina dimpe dia Yehowa. (Mus. 111:10) Aba badi banyisha meji aa badi babambuluisha bua kuikala ne nsombelu muimpe mpindieu ne kabidi nebapete muoyo wa bushuwa anyi muoyo wa tshiendelele kumpala kua matuku eku.​—1 Tim. 4:8; 6:19.

Enza bua muyuki ukuatshishe bantu. Bua muyuki kuambuluishawu bantu, bidi bikengela kuela meji bimpe bua malu adimu ne bua bantu badi bakuteleja. Kubamonyi anu mu tshi-bungi to. Munkatshi muabu mudi mêku ne bantu ba pa nkaya. Mudi mua kuikala bana batekete, bansonga, bantu bakole, ne bakulakaje. Mudi mua kuikala bantu batshidi bapiabapia mu bulelela ne bakuabu bakabanga kutendelela Yehowa kumpala kua wewe kuledibua. Bamue badi mua kuikala bapie mu nyuma; banga batshidi ne imue ngikadilu mibi idi nayi bantu ba tshianana. Nanku mbimpe udiebeje ne: ‘Malu andi nawu neambuluishe bantu badi banteleja munyi? Ndi mua kubambuluisha bua kumona mushinga wawu bishi?’ Udi mua kusua kushindamena peshi kuakula anu bua kasumbu ka bantu kamue anyi tubidi ku tutudi batele etu. Nansha nanku, kupu bakuabu badi bashale muoyo kashidi to.

Kadi mpindieu newenze bishi pikaladi dilongesha dia nshindamenu dia mu Bible? Udi mua kuenza tshinyi bua kuambuluishadi bantu batu kuonso eku baditaba? Enza bua dibatuile bikole menemene. Mushindu kayi? Pa kuelangana nabu meji pa mvese idi iditua mpanda. Pa kubafikisha kabidi ku dianyisha dilongesha edi bikole. Udi mua kubaleja mudidi diumvuangana ne malongesha makuabu adi mu Bible, kabidi ne ngikadilu ya Yehowa. Fila bilejilu anyi londa malu malelela adi menzeke adi aleja mudi kumanya dilongesha edi kuambuluishe bantu ne kubafikishe ku dimona matuku atshilualua mushindu mukuabu.

Kuindidi bua kulejila dikuatshisha dia muyuki anu mu nkomenu to. Anu ku mbangilu kua muyuki, mbimpe muntu yonso adiambile mundamunda ne: “muyuki eu udi untangila meme.” Wewe mumane kuasa tshishimikidi etshi, utungunuke ne kubaleja mushinga mu bualu bunene buonso bua mu muyuki webe too ne ku nkomenu.

Paudi uleja mua kuenza malu, mbimpe bikale biumvuangane ne tshidi Bible ulongesha. Mbuena kuamba tshinyi? Mbuena kuamba ne: ikala wamba malu ne dinanga ku muoyo ne uditeka pa muaba wa bakuabu. (1 Pet. 3:8; 1 Yone 4:8) Tshilejilu, nansha pavua Paulo wakula bua malu mabi a mu Tesalonika, mupostolo Paulo wakanemenena pa malu mimpe a mu nyuma avua nawu bena Kristo bavuamu. Wakaleja kabidi muvuaye mutuishibue ne: bena Kristo aba bavua basue kuenza tshivua tshimpe. (1 Tes. 4:1-12) Ke tshilejilu tshimpe tshia kulonda etshi!

Muyuki webe ng’wa kukankamija nawu bantu bua kuyishabu lumu luimpe anyi? Enza ne: bantu bikale ne disanka ne dianyisha bua kuenza mudimu eu. Kadi paudi ubakankamija, kupu muoyo ne: bilondeshile Bible, bantu bonso kabena mua kuwenza mushindu umue to. (Mat. 13:23) Kuenji bua bantu badiumvue bu badi bapile nansha. Ebelu 10:24 udi utulomba bua ‘kukoleshangana mu dinanga ne ngenzelu mimpe.’ (MMM) Patudi tukoleshangana mu dinanga, ngenzelu milenga idi ifumina mu mutshima muimpe idi ibanga kudiluila. Pamutu pa kulomba bantu bua kuikala mumue, uvuluke ne: tshidi Yehowa ukeba, ‘nditumikila mu ditabuja.’ (Lomo 16:26) Nanku, netukebe bua kukolesha ditabuja dietu ne dia bana betu.

Ambuluisha bakuabu bua bamone mudi muyuki mua kubakuatshisha. Paudi uyisha, kupu muoyo bua kuleja bantu bulenga bua lumu luimpe to. Kadi bua kuenza nunku, bidi bilomba kumanya tshidi mu mutu mua bantu ba mu teritware wenu. Kadi mpindieu neumanye tshidi mu mutu muabu mushindu kayi? Londa ngumu ku tshisanji anyi ku televizion. Bala malu adi pa bizubu bia bikandakanda. Enza muebe muonso bua kufikisha bantu ku diakula, ubalekela bakula ne ubateleja. Neumone mudibu baluangana ne malu adi abatatshisha bu mudi: bulofua, difutshila nzubu, masama, lufu lua muena dîku diabu, buivi, dibakengesha kudi muntu kampanda udi ne bumfumu, bilumbu munda mua mabaka, ntatu ya mua kukolesha bana batshidi bapuekele, ne makuabu malu. Bible udi mua kubambuluisha anyi? Kamuyi mpata!

Paudi utuadija kuyukila, udi mua kuikala ne tshiena-bualu kampanda mu mutu. Kadi padi muntu wela bualu budi bumutonda panshi, kuelakanyi bua kushintulula tshiena-bualu ne kuakula pa bualu abu biwikala ne mushindu to, anyi mulomba bua kulua kuakula pa bualu abu dituku dikuabu. Nansha mutudi katuyi ‘tubuelakana mu malu a bakuabu,’ tudi tubapesha mibelu milenga idi Bible ufila. (2 Tes. 3:11, MMV) Tshiambuluisha bantu menemene, mmibelu idi Bible ufila pa nsombelu wabu.

Padi bantu kabayi bamona mudi mukenji wetu ubatangila, badi mua kukosesha diyuki ne kubenga bua kututeleja. Patudi katuyi tuleja bantu mudi tshiena-bualu tshietu mua kubakuatshisha, bidi bileja ne: mukenji wetu kawena ubatangila to. Kadi tuetu baleje mushinga wa tshiena-bualu tshietu, muyuki udi mua kushintulula malu mu nsombelu wa bantu.

Paudi ulonga Bible ne muntu, wikale umuleja mudi binudi nulonga mua kumukuatshisha. (Nsu. 4:7) Ambuluisha mulongi bua kumvua mibelu ne mikenji ne bilejilu bia mu Bible bidi bileja mua kuendela mu njila ya Yehowa. Shindamena bikole pa bulenga bua kuendela mu njila eyi. (Yesh. 48:17, 18) Ke tshiambuluisha mulongi bua kushintulula nsombelu wende. Kolesha dinanga diende dia Yehowa ne dijinga diende dia kusankisha Yehowa Nzambi. Enza ne: mulongi ikale ne dijinga dia kulonda mibelu idi mu Diyi dia Nzambi mu mutshima wende.