KANTU ka kusonga naku kreyon kenza bu mazuwa mu tshianza tshia Jordan kamueneka bu ka patupu. Pabi ntshimue tshia ku bintu biende bia mushinga mukole. Jordan udi wamba ne: “Russell, mulunda wa baledi banyi ukavua mukulakaje wakampeshaku pantshivua muana.” Panyima pa lufu lua Russell, Jordan wakamanya ne: Russell uvua muambuluishe bikole kakuende ne baledi bende, ubakuatshisha mu bikondo bia ntatu. Jordan udi wamba ne: “Bu mundi mpindieu mumanye malu a bungi adi atangila Russell, dipa dikese menemene edi didi ne mushinga wa bungi kupita tshintu kayi tshionso.”

Anu mudi tshilejilu tshia Jordan tshileja, dipa didi mua kuikala ne mushinga mukese anyi kadiyi nawu ku mêsu kua bamue bantu. Kadi bua muntu udi udiangata ne dianyisha, didi mua kuikala ne mushinga wa bungi. Bible udi umvuija dipa didi ne mushinga wa bungi mu mêyi adi mamanyike bikole aa: ‘Nzambi mmunange ba pa buloba bikole menemene, wakabapesha Muanende mulela umuepele bua muntu yonso udi uleja ditabuja kudiye kafu, kadi ikale ne muoyo wa tshiendelele.’​—Yone 3:16.

Edi ndipa didi mua kupetesha bantu muoyo wa tshiendelele! Kudiku mua kuikala dipa dikuabu dia mushinga mukole anyi? Nansha mudi bamue bantu kabayi bajingulula mushinga udi nawu dipa edi, bena Kristo balelela badi bobu badiangata ne “mushinga.” (Misambu 49:8; 1 Petelo 1:18, 19) Kadi bua tshinyi Nzambi wakafila muoyo wa Muanende bu dipa bua bantu?

Mupostolo Paulo udi umvuija bua tshinyi bidi nanku mu mêyi aa: “Bu muakalua bubi pa buloba bua muntu umue, ne lufu lulue bua bubi abu, nunku lufu luakakuata bantu bonso, bualu bantu bonso bakenza bubi.” (Lomo 5:12) Adama muntu wa kumpala wakenza mpekatu uvuaye mumanye ne: ndimbenga kutumikila Nzambi, ne wakapeta tshibawu tshia lufu. Ku butuangaji bua Adama, lufu luakakuata ndelanganyi yende yonso, mmumue ne: bantu ba pa buloba bujima.

“Difutu dia bubi ndufu, kadi dipa didi Nzambi ufila mmuoyo wa tshiendelele mu Kristo Yezu Mukalenge wetu.” (Lomo 6:23) Bua kumbusha bantu ku tshibawu tshia lufu, Nzambi wakatuma Muanende Yezu Kristo pa buloba bua kufila muoyo wende mupuangane bua bantu. Ku diambuluisha dia mulambu eu, udi mumanyike bu “tshia kupikula natshi” bantu, bonso badi baleja ditabuja kudi Yezu, nebapete muoyo wa tshiendelele.​—Lomo 3:24.

Bua mabenesha onso adi Nzambi upesha batendeledi bende ku butuanji bua Yezu Kristo, Paulo wakamba ne: “Tudi tuela Nzambi tuasakidila bua dipa diende difila tshianana didi kadiyi kuamba.” (2 Kolinto 9:15) Eyowa, tshia kupikula natshi bantu ntshimpe be, ne katuena tukumbana mua kutshiumvuija bimpe menemene to. Kadi mu mapa onso mimpe adi Nzambi mupeshe bantu, bua tshinyi tshia kupikula natshi bantu ke tshidi nangananga ne mushinga wa bungi? Mmu mushindu kayi muditshi tshitambe mapa makuabu onso a Nzambi?a Ntshinyi tshitudi petu mua kuenza bua dipa edi? Tudi tukulomba bua kubala mandamamuna adi Bible ufila bua nkonko eyi mu biena-bualu bibidi bidi bilonda.

NNGANYI UVUA MUKUPESHADI?

Amue mapa atu ne mushinga bualu bavua batupeshawu kudi muntu kampanda uvua ne bukokeshi anyi ututu tuangata ne mushinga wa bungi. Kadi tutu tuanyisha mapa makuabu a makuta makese bualu mbatupeshawu kudi muena mu dîku dietu utudi banange bikole anyi mulunda wa kueyemena. Ke muvuabi bua dipa divua Russell mupeshe Jordan, batuvua bakuile mu tshiena-bualu tshishale. Mmunyi mudi bualu ebu bupetangana ne dipa dia tshia kupikula natshi bantu?

Tshia kumpala, Bible udi wamba ne: “Nzambi wakatuma Muanende mulela umuepele pa buloba bua tupete muoyo ku butuangaji buende.” (1 Yone 4:9) Dipa edi didi ne mushinga wa bungi bualu Nzambi ke uvua mudifile. Kakuena muntu nansha umue udi ne bukokeshi bupite bua Nzambi to. Mufundi wa misambu muena Ebelu wakafunda bua Nzambi ne: ‘Wewe nkayebe, ngudi muidike dîna dia Yehowa, udi Mutambe Bunene wa pa mutu pa buloba bujima.’ (Misambu 83:18) Katuvua mua kupeta dipa kudi muntu mutambe bunene nunku to.

Tshibidi, Nzambi udi “Tatu wetu.” (Yeshaya 63:16) Mushindu kayi? Wakatupesha muoyo. Udi kabidi ututabalela ne dinanga dionso bu tatu wa dinanga udi utabalela bana bende. Pavua Nzambi wakula bua bamue ba ku batendeledi bende ba kale bu mudi Efelayima, wakebeja ne: ‘Efelayima udi muananyi munanga anyi? Udi muana undi nkongoluela anyi? Mutshima wanyi udi umujinga, nemmufuile luse bulelela.’ (Yelemiya 31:20) Ke mudi Nzambi umvua kabidi bua batendeledi bende lelu. Udi Mufuki wa bukole buonso ne n’Tatu wetu ne mulunda wetu wa lulamatu. Malu aa kaenaku avuija dipa dionso didiye ufila dipa dia mushinga wa bungi anyi?

BUA TSHINYI UVUA MUKUPESHADI?

Amue mapa adi ne mushiga bualu kabavua benzeje bavua baafile to, kadi mbua muvuabu ne dinanga dilelela. Muntu udi bushuwa ufila ne dinanga kena windila bua bamufute bua muoyo wende muimpe to.

Nzambi wakafila Muanende bua bualu buetu bualu uvua mutunange. Bible udi wamba ne: “Mu bualu ebu, dinanga dia Nzambi diakamueneka bua bualu buetu, bualu Nzambi wakatuma Muanende mulela umuepele.” Bua tshinyi? “Bua tupete muoyo ku butuangaji buende.” (1 Yone 4:9) Nzambi uvuaku muenzejibue bua kuenza nunku anyi? Tòo. “Dipikudibua ku diambuluisha dia tshia kupikula natshi tshivua Kristo Yezu mufile” didi dileja “ngasa” wa Nzambi.​—Lomo 3:24.

Bua tshinyi dipa dia Nzambi ntshienzedi tshia “ngasa”? Bible udi umvuija ne: “Nzambi wakaleja dinanga diende kutudi mu bualu ebu ne: patutshivua benji ba malu mabi Kristo wakafua bua bualu buetu.” (Lomo 5:8) Dinanga dilelela diakasaka Nzambi bua kuenzela bantu bena butekete, bavua kabayi ne diambuluisha ne bavua bena mibi malu. Katuvua bakumbanyine dinanga edi to, ne katuena ne tshitudi mua kumufuta to. Dipa diende ntshienzedi tshitambe bunene tshia dinanga dia katshia ne katshia.

NTSHINYI TSHIVUAYE MUDIPANGISHE?

Amue mapa adi ne mushinga bualu adi aleja mudi muntu uvua mutupeshawu mudipangishe amue malu. Padi muntu witaba bua kutupesha tshintu tshidi ne mushinga wa bungi kudiye, tutu nangananga tuangata dipa adi ne mushinga bua malu adiye mudipangishe.

Nzambi ‘wakafila muanende mulela umuepele.’ (Yone 3:16) Kavua mua kuikala mutupesha muntu uvuaye munange bikole nunku to. Munkatshi mua bidimu bia bungi menemene bivua Nzambi ufuka diulu ne buloba, Yezu uvua wenza nende mudimu pamue, ne wakalua eu “uvuaye mutambe kunanga.” (Nsumuinu 8:30, NWT) Yezu udi “Muana wa dinanga” dia Nzambi ne “tshimfuanyi tshia Nzambi udi kayi umueneka.” (Kolosayi 1:13-15) Katshia kakutu kuanji kuikala dinanga dikole dia mushindu eu pankatshi pa bantu babidi to.

Kadi Nzambi ‘kavua nansha muepule Muanende.’ to (Lomo 8:32) Yehowa wakatupesha tshintu tshimpe tshivuaye natshi. Katu muanji kufila dipa dia mushindu eu to.

DIKUMBAJA DIJINGA DIVUA KADIYI DITEKEMENA

Amue mapa adi ne mushinga bualu adi akumbaja dijinga dinene, nansha mene dia lukasa lukasa. Tshilejilu, udi mua kuleja dianyisha kudi muntu udi mukusumbile ku budisuile manga auvua kuyi ne mushindu wa kusumba bua kusungila muoyo webe. Bushuwa, dipa adi didi ne bua kuikala ne mushinga wa bungi, ki muomu anyi?

“Anu bu mudi bantu bonso bafua mu Adama, nunku kabidi mu Kristo bonso nebapete muoyo.” (1 Kolinto 15:22) Bu mutudi ndelanganyi ya Adama, tuetu bonso tutu ‘tufua’ katuyi ne mushindu wa kuepuka tunyinganyinga tua masama ne lufu anyi wa kupunga ne Nzambi ne kupatuka mu bupika bua didipisha kumpala kuende. Bu mutudi bantu bapuekele, katuena mua kudipesha anyi kupesha bantu bakuabu “muoyo” to. Bible udi wamba ne: ‘Bulelela, kakuena muntu udi mua kupikula muanabu ku tshintu tshiende tshimue, anyi kufila mushinga wa kumupikula nawu kudi Nzambi, udi upanga kukumbana tshiendelele.’ (Misambu 49:7, 8) Tudi dijinga dikole ne diambuluisha bualu katuena ne mushindu wa kufuta mushinga wa tshia kupikula natshi to. Tuetu nkayetu katuena mua kukumbana to.

Bua dinanga diende, Yehowa wakitaba bua kusungila muoyo, tuambe ne: buanga butuvua nabu dijinga, bua ne: ku diambuluisha dia Yezu ‘bonso bapete muoyo.’ Mmunyi mudi tshia kupikula natshi bantu tshikumbaja bualu ebu? “Mashi a Muanende Yezu adi atulengeja ku bubi buonso.” Bushuwa, kuleja ditabuja mu mashi avua Yezu mupuekeshe kudi kuambuluisha bua tufuidibue luse ku mibi yetu ne tupete muoyo wa tshiendelele. (1 Yone 1:7; 5:13) Tshia kupikula natshi bantu netshienzele bantu batudi bafuishe tshinyi? “Bu muvua lufu lufume kudi muntu umue, dibishibua dia bantu ku lufu didi difuma padi kudi muntu umue [Yezu].”​—1 Kolinto 15:21.a

Kakutu kuanji kuikala dipa difila kudi muntu mutambe bunene anyi difila ne dinanga dionso kupita mulambu wa Yezu to. Kakutu muntu ukadi mutupeshe tshintu tshimpe bu Yehowa Nzambi to. Kakuena dipa didi dikumbaja dijinga dietu dinene kupita mulambu udi utupikula ku bubi ne ku lufu to. Eyowa, kakuena dipa didi mua kukumbanangana ne mushinga udi nawu tshia kupikula natshi bantu to.

DIPA ditambe buimpe didi ne bua kutuenzeja bua kuleja dianyisha. Yezu wakaleja dilongesha edi yeye mumane kuondopa bantu balume dikumi bavua ne disama dibi divua dienda ditekesha mubidi divua kadiyi ne buanga tshikondo atshi. Umue wa ku bantu balume dikumi “wakapingana utumbisha Nzambi ne dîyi dikole.” Yezu wakamba ne: “Bantu bonso dikumi bavua balengejibue, ki mmuomu anyi? Kadi bakuabu tshitema badi penyi?” (Luka 17:12-17) Ndilongesha kayi ditudi tupeta? Tudi mua kupua muoyo ne lukasa luonso malu mimpe adi bakuabu batuenzela.

Tshia kupikula natshi bantu ndipa ditambe mapa makuabu. Ndipa ditambe bunene dia katshia ne katshia didibu batupeshe. Kadi mpindieu ntshinyi tshiudi ne bua kuenza bua tshidi Nzambi mukuenzele etshi?

• Fika ku dimanya Udi mudifile. Tshia kupikula natshi bantu katshiena anu tshipetesha bantu bonso muoyo wa tshiendelele to. Kadi Yezu wakambila Nzambi mu disambila ne: “Bualu ebu budi bumvuija muoyo wa tshiendelele: bafike ku dikumanya wewe, Nzambi umuepele mulelela, ne yeye uuvua mutume, Yezu Kristo.” (Yone 17:3) Muntu yeye mukuambile ne: muntu kampanda uvua musungile muoyo webe pautshivua muana, kuakujingaku bua kumanya malu a bungi adi atangila muntu au ne kumanya bua tshinyi uvua mukusungile anyi? Yehowa Nzambi uvua mufile dipa dia tshia kupikula natshi bantu bua kubasungila, mmusue bua umanye bimpe tshidiye ne udie nende malanda makole. Bible udi wamba ne: “Semenayi pabuipi ne Nzambi ne yeye neasemene pabuipi nenu.”​—Yakobo 4:8.

• 

  Leja ditabuja mu tshia kupikula natshi bantu. “Muntu udi uleja ditabuja kudi Muana udi ne muoyo wa tshiendelele.” (Yone 3:36) Kuleja ditabuja kudi kumvuija tshinyi? Kuleja ditabuja mu tshia kupikula natshi kudi kumvuija kuenza bualu kampanda. (Yakobo 2:17) Bualu bua mushindu kayi? Dipa kampanda didi dilua diebe anu paudi udipatshila ne uditaba. Udi ne bua kuipatshila tshia kupikula natshi bantu ne kutshitaba. Mushindu kayi? Manya mudi Nzambi musue bua wikale, ne enza malu bilondeshile disua diende.a Sambila Nzambi bua akufuile luse ne akupesha kondo ka muoyo kimpe. Semena kudi Nzambi mutuishibue ne muoyo mujima ne: tshia kupikula natshi bantu netshipeteshe bantu bonso badi baleja ditabuja ku ditshi ditalala, bukubi ne masanka a bungi mu matuku atshilualua bua kashidi.​—Ebelu 11:1.

• 

  Buela mu Tshivulukilu tshia lufu lua Yezu. Yezu wakabanjija tshibilu tshia ku tshidimu bua kutuvuluija tshia kupikula natshi bantu. Wakamba bua disekelela dia tshibilu etshi ne: “Tungunukayi ne kuenza nunku bua kumvuluka.” (Luka 22:19) Bantemu ba Yehowa nebenze tshibilu tshia kuvuluka lufu lua Yezu mu Dibidi dia 11/4/2017, dîba dimane kubuela. Tshibilu etshi netshienzeke mu dîba dimue, nebenzamu muyuki udi umvuija mushinga udi nawu lufu lua Yezu ne muatuadilalu bantu masanka mpindieu ne mu matuku kumpala. Tshidimu tshishale etshi bantu batue ku miliyo 20 ba pa buloba bujima bavua babuele mu Tshivulukilu. Tudi tukubikila ne muoyo mujima bua ulue kuenza netu tshibilu etshi bua tuleje Nzambi dianyisha bua dipa diende ditambe bunene edi.