Nkonko ya babadi

Bua tshinyi Bantemu ba Yehowa batu bazola mupostolo Paulo muikale ne dibala anyi ne nsuki mikese?

Mu bulelela, kakuena muntu udi mua kujadika lelu muvua tshimuenekelu tshia Paulo to. Mushindu udibu bazole Paulo mu mikanda yetu ki mmutentuila ku bintu bia kale biangula to, kadi mmufuanyikija kudi bazodi.

Nansha nanku, kudi amue malu adi aleja muvua tshimuenekelu tshia Paulo. Tshilejilu, Tshibumba tshia Nsentedi tshia Siona tshia dia 1/3/1902 tshiakaleja bumue bualu, tshiamba ne: “Bua tshimuenekelu tshia Paulo, . . . mukanda wa ‘Actes de Paul et de Thècle,’ . . . mufunda bu mu 150 panyima pa Yezu, udi umvuija muvua tshimuenekelu tshia Paulo. Diumvuija edi didi mua kuikala ditambe buimpe, didi bantu ba bungi bitaba konso eku. Badi bambamu bua Paulo ne: uvua ‘muntu wa tshitupa, muikale ne dibala ne mikolo bibenda, mupatakane, muikale ne makiki matuangane; kabidi ne diulu dile.’”

Mukanda kampanda udi wamba bua mukanda wa kale au ne: “Mbipepele bua kuitaba ne: mukanda wa ‘Actes de Paul et de Thècle’ eu udi ne amue malu adi ajadika muvua malu a kale malelela.” [The Oxford Dictionary of the Christian Church (1997 edition)] Dikalaku dia maniskri 80 a mu tshiena Greke a mukanda eu ne nkudimuinu yawu mu miakulu mikuabu bidi bijadika ne: mu nkama ya bidimu ya kumpala, bantu bavua banemeka mukanda wa Actes de Paul et de Thècle bikole. Nunku, mushindu udibu bazole Paulo mu mikanda yetu udi upetangana ne mudi mikanda ya kale yumvuija muvua tshimuenekelu tshiende.

Kadi manya ne: kudi malu makuabu adi ne mushinga wa bungi kupita tshimuenekelu tshia Paulo. Nansha pavua Paulo utungunuka ne mudimu wende wa diyisha, bamue bantu bavua bamuamba ne: ‘kumueneka kua mubidi wende kuvua kutekete, ne dîyi diende didi dia patupu.’ (2 Kol. 10:10, MNZ) Kadi katupu muoyo ne: wakalua muena Kristo pavua Yezu mumumuenekele mu tshishima. Tudi kabidi mua kuela meji bua malu avua Paulo mukumbaje bu ‘tshivuadi tshivua Kristo musungule bua kuya ne dîna dia Yezu kudi bisamba bikuabu.’ (Bien. 9:3-5, 15; 22:6-8) Tuele kabidi meji bua mushindu udi mikanda ya mu Bible ivua Yehowa muenzeje Paulo bua kufunda ku bukole bua nyuma mua kutuambuluisha.

Paulo kavua mudiuwuje bua malu avuaye muenze kumpala kua kuluaye muena Kristo, ne kavua mene mufunde bua muvua tshimuenekelu tshiende to. (Bien. 26:4, 5; Filip. 3:4-6) Wakamba ne: “Ndi mutambe [‘bupuekele,’ MNZ] ku bapostolo, ne tshiena mukumbane bua kubikidibua mupostolo.” (1 Kol. 15:9) Wakalua kabidi kufunda ne: “Bakampesha ngasa eu, meme muntu udi mushadile too ne kudi mutambe [‘bupuekele,’ MNZ] wa ku bansantu bonso, bua ngambile bisamba bikuabu lumu luimpe lua bubanji bua Kristo budibu kabayi mua kujingulula.” (Ef. 3:8) Mêyi ende aa adi bushuwa ne mushinga wa bungi kupita malu onso atudi mua kujinga kumanya bua muvua tshimuenekelu tshia Paulo mua kuikala.