Nkonko ya babadi

Muntu mulume ne muntu mukaji badi kabayi baselangane bobu bapitshishe butuku pamue kabayi ne kabingila kalelela ka kuenza nanku, ntshijadiki tshia ne: mbenze mpekatu, tshidi bakulu ne bua kuenzela komite wa dilumbuluisha anyi?

Eyowa, padi bantu badi kabayi baselangane bapitshisha butuku pamue kabayi ne kabingila kalelela ka kuenza nanku, bakulu badi ne bua kuenza komite wa dilumbuluisha bualu ntshijadiki tshinene tshia ne: mbende masandi.​—1 Kol. 6:18.

Bakulu nebakonkonone ne lubatshi luonso bualu ne bualu buonso bua kumanya bikalabi bikengela kuenza komite wa dilumbuluisha. Tshilejilu, muntu mulume ne muntu mukaji au batu batantshilangana anyi? Bakulu bavuaku bababele kumpala bua mushindu udibu benzelangana malu anyi? Tshivua tshienze bua bapitshishe butuku pamue ntshinyi? Bakavua balongolole bua kuenza nanku anyi? Bavuaku ne mushindu wa kubenga kupitshisha butuku pamue anyi? Bualu kampanda buvuabu kabayi batekemene anyi bua tshimpitshimpi buvuaku buenzeke badimona kabayi ne tshikuabu tshia kuenza ke bobu kupitshisha butuku pamue anyi? (Muam. 9:11) Bavua balongolole bua kulala penyi? Bu mudi nsombelu ishilangana, kudi mua kuikala malu makuabu adi bakulu mua kukonkonona.

Padi bakulu bakonkonona malu onso, badi ne bua kumona bikalabi bikengela kuenza komite wa dilumbuluisha.