Kostas udi wamba ne: “Tuvua baselangane ne Sophiaa kukavua bidimu bipite pa 39 pavua disama dia munenganenga diye nende. Balunda banyi bakankolesha bikole, ne mvua ne bia bungi bia kuenza. Kadi munkatshi mua tshidimu tshijima tshivua ndiumvua bu meme to. Tunyinganyinga tuvua tutua tualukila. Nansha mpindieu bidimu bitue ku bisatu katshia wafua, kutu misangu itu kanyinganyinga kakole kankuata, misangu ya bungi tshiyi ngumvua mudiku kalua to.”

Ukadi mufuishe muntu anyi? Biobi nanku, udi mua kuikala udiumvua pebe anu bu Kostas. Kakutu tshintu tshitu tshikebesha kanyinganyinga anyi tshisamisha muoyo bu kufuisha muena dibaka, mulela, anyi mulunda to. Nansha bamanyi batu balonga malu a tunyinganyinga tukebesha kudi lufu batu bamba pabu nanku. Tshikandakanda kampanda tshidi tshileja ne: “Dijimija muntu bua kashidi ke bualu butu butamba kulela kanyinganyinga kakole.” (Tshikandakanda tshia masama a mitu tshia mu Amerike, mu Anglais) Padi muntu kumpala kua kanyinganyinga kadi kakayi kuambangana naku kadi dijimija muntu dikebesha, udi mua kudiebeja ne: ‘Kanyinganyinga aka nekikalaku too ne dîba kayi? Nempetululaku kabidi disanka anyi? Ndi mua kupeta dikisha bishi?’

Tabulukayi! eu udi wandamuna nkonko eyi. Tshiena-bualu tshidi tshilonda netshileje tshiudi mua kutekemena wewe ufuma ku difuisha. Biena-bualu bialonda nebileje malu adi mua kukuambuluisha bua kukepesha kanyinganyinga.

Tudi batekemene ne muoyo mujima ne: malu adi alonda aa neasambe muntu yonso udi ne kanyinganyinga ka difuisha muntu, ne neamuambuluishe.

Nansha mudi bamue bamanyi bamba mudi malu adi aleja kanyinganyinga alondangana, muntu yonso utu uleja kanyinganyinga wende mushindu. Mishindu mishilashilangane idi bantu baleja kanyinganyinga idiku ileja ne: bamue batu banyingalala kakese padibu bafuisha anyi “badikanda” bua kuleja mudibu bumvua anyi? Kabitu anu nanku to. Nansha mudi kuleja kanyinganyinga patoke mua kusulakaja muntu, kakutu “mushindu muimpe” umue utubu bakaleja to. Bidi mua kutamba kulondeshila bilele bia muaba udi muntu mukolele, mutuye yeye muine, malu akadi mamufikile, ne mudi muntu udiye mufuishe mufue.

NEBIYE TOO NE KUEPI?

Bantu badi bafuishe badi mua kupanga bua kumanya tshia kutekemena panyima pa lufu lua wabu udi mufue. Kadi kudi amue malu ne imue ntatu bitu bitamba kufikilangana ne kudi mushindu wa kuikala kubidimukila. Tubikonkonone.

Kanyinganyinga kakupitshila mutu. Udi mua kudila, kujinga mufue, ne katantshi udiumvua bimpe, katantshi udiumvua bibi. Malu audi umuvulukila ne audi ulota bidi mua kukolesha kanyinganyinga aku. Kadi bangabanga, udi mua kuanji kupapuka, kuyi witaba tshidi tshienzeke to. Tiina udi uvuluka tshivua tshimuenzekele pavua bayende Timo mufue lufu lua tshikoso. Udi wamba ne: “Lungenyi luvua luanji kunjimina. Tshivua nansha mua kudila to. Biakampitshila mpanga ne mua kupuyakana imue misangu. Tshivua mua kuitaba tshivua tshienzeke to.”

Bantu batu kabidi imue misangu bapampakana, bumvua biji, ne badipisha. Ivan udi wamba ne: “Meme ne mukajanyi Yolanda tuvua ne biji bia dikema tshikondo kampanda tuetu bamane kufuisha Eric muanetu wa balume wa bidimu 24. Biakatukemesha, bualu katutu banji kudimona bu bantu bena biji to. Tuvua kabidi tudipisha, bualu tuvua tudiebeja bikalaku kuvua malu atuvua katuyi benze bua kuambuluisha muanetu.” Alejandro uvua mufuishe mukajende uvua ne disama dia munanunanu uvua udipisha pende. Udi wamba ne: “Kumpala mvua mmona ne: bikala Nzambi undekela nkenga bibi nunku, ndi ne bua kuikala muntu mubi. Pashishe ngakabanga kudipisha bualu bivua bienza anu bu ne: mvua ngela Nzambi tshilumbu pambidi bua tshivua tshienzeke.” Kostas utukadi batele mu tshiena-bualu tshishale udi wamba pende ne: “Kuvua misangu imvua mfikila too ne Sophia munda bua difua diende. Pashishe ngakabanga kudipisha bua biji abi. Nansha tuamba eku, tuela eku, katshivua tshilema tshiende to.”

Dipanga kuteka meji kaba kamue. Kudi mua kuikala bimue bikondo bidi meji a muntu kaatshiyi kaba kamue anyi wamba malu kaayi alondangana. Tshilejilu, muntu udi mufuishe udi mua kuela meji ne: udi umvua dîyi dia mufue au, umvua bu ne: udiku, anyi umumona. Anyi bidi mua kumukolela bua kushala mutume meji ku bualu kampanda anyi kuvuluka amue malu. Tiina udi wamba ne: “Imue misangu mvua mua kuikala nyukila ne muntu, kadi ndimona meji akadi maye kua tshianana! Avua enda alalakana, aya ku malu avua menzeke dîba divua Timo mufue. Dipanga kuteka meji kaba kamue adi divua dintonda padi.”

Dijinga dia kuikala nkaya. Muntu udi mufuishe udi mua kubanga kumvua biji anyi kudiumvua bibi padiye ne bantu bakuabu. Kostas udi wamba ne: “Pamvua munkatshi mua bantu bavua baselangane, mvua ndiumvua anu bu ndundu wa panyima pa mashinyi. Mvua ndiumvua kabidi nanku pamvua ne bajike.” Yolanda, mukaji wa Ivan udi uvuluka wamba pende ne: “Bivua binkolela bua kusomba ne bantu bavua badilakana bua ntatu ivua imueneka ya mukodi pa kuyifuanyikija ne yetu! Kadi kuvua kabidi bavua batuanyishila malu mimpe avua bana babu benza. Mvua nsanka nabu, kadi eku bintonda bua kubateleja. Meme ne bayanyi tuakamona ne: tuvua ne bua kutungunuka ne kuya kumpala, kadi katuvua ne dijinga anyi ne lutulu lua kuenza nanku to.”

Mubidi utatshisha. Dipanga kudia kua nsongo, tshinyanu, ne dipanga tulu bitu bifikilalanga kabidi. Aaron udi uvuluka tshidimu tshiakalonda lufu lua tatuende wamba ne: “Tshitshivua kabidi ndala bimpe to. Butuku buonso mvua ntabuluka mêba a muomumue ngela meji a lufu lua tatu.”

Alejandro udi uvuluka muvuaye ne masama avua kaayi umvuika wamba ne: “Misangu ya bungi mvua nya ku buanga kadi bangambila ne: tshivua nsama to. Ngakamona ne: kanyinganyinga ke kavua kakebesha bimvua ngumvua abi.” Kadi bivuaye umvua abi biakalua kujika. Nansha nanku, Alejandro uvua muenze bimpe bua kuya ku buanga. Kanyinganyinga kadi mua kutekesha bukole bua mubidi bua kuluisha masama, kukolesha akadi nawu muntu, anyi mene kukebesha makuabu.

Lutatu lua kuenza amue malu a mushinga. Ivan udi uvuluka wamba ne: “Pavua Eric mufue, bivua bikengela tumanyishe balela ne balunda, kabidi ne bantu bakuabu bu mudi mfumuende wa mudimu ne tatuende wa lupangu. Kuvua kabidi mabeji a bungi a kuwuja. Bivua bitulomba kabidi kutangila bintu bia Eric bua kumona tshia kuenza nabi. Bionso ebi bivua bitulomba kuikala ne meji kaba kamue, kadi petu batshioke mu lungenyi, ku mubidi, eku meji asama.”

Kadi bua bamue bantu, lutatu lua menemene lutu lulua pashishe, padibi bikengela benze malu avuabu benza kumpala kudi udi mufue au. Ke tshivua tshifikile Tiina. Udi wamba ne: “Timo ke uvua utuyila ku banke ne wenza midimu mikuabu ya makuta. Mpindieu bikavua mudimu wanyi bintentekela anu bujitu ku bunkadi nabu. Mvua mua kubikumbaja bionso bimpe kakuyi bualu anyi?”

Ntatu itudi batele kuulu eyi idi ileja mudibi bikole menemene bua kupita ne kanyinganyinga. Bulelela budi ne: kanyinganyinga ka difuisha muntu katu kakole, kadi kudianjila kumanya bualu ebu kudi mua kuambuluisha batshidi bafuishilaku bua kumanya mua kupita naku. Tshia kumanya kabidi ntshia ne: ki mmuntu yonso utu upeta ntatu yonso idi kanyinganyinga mua kakebesha to. Bualu bukuabu, bantu badi bafuishe badi mua kukola ku muoyo bobu bamanye ne: bidibu bumvua bua kanyinganyinga bitu bienzekela bantu bonso, ke mutu malu.

NEMPETULULAKU KABIDI DISANKA ANYI?

Tshiudi mua kutekemena: Kanyinganyinga nansha koku kakole kakatu kashala bua kashidi to; katu kalua anu kukepa. Kabiena bisua kumvuija ne: kadi “kajika” konso anyi ne: muntu udi upua udiye mufuishe muoyo to. Kadi ku kakese ku kakese, bidiye umvua bua kanyinganyinga aku bidi bienda bituya. Udi mua kubiumvua kabidi anu padi malu adi amuvuluija mufue au amuluila mu lungenyi anyi mu bikondo kampanda bu mudi bia mifikilu. Kadi bantu ba bungi batu balua kudituija ne batuadija kuenza kabidi malu abu a buatshia buila. Bitu bitamba kuenzeka nunku padi bena mu dîku anyi balunda bambuluisha udi mufuishe ne padiye wenza malu makumbanyine bua kumanya mua kupita naku bimpe.

Nekashale too ne dîba kayi? Kudi bantu batu bumvua kanyinganyinga kakole anu ngondo mikese tshianana. Bua ba bungi, kadi mua kuenza tshidimu tshimue anyi bibidi kumpala kua bobu kudimona bakadi bimpe. Kadi bua bakuabu bobu, katu kanenga bikole.a Alejandro udi uvuluka wamba ne: “Ngakenza bidimu bitue ku bisatu ne kanyinganyinga kakole.”

Ikala ne lutulu. Kujingi bua kuenza malu onso musangu umue to, ikala wenza tshiudi mua kukokesha, ne manya ne: biudi umvua bua kanyinganyinga abi kabiakushala kashidi to. Nansha nanku, kudiku malu audi mua kuenza bua kukepesha kanyinganyinga mpindieu ne adi mene mua kukupangisha bua kushadi ne kanyinganyinga ka munenganenga ka tshianana anyi?

Wewe mukebe ngenyi ya mua kupita ne kanyinganyinga ka lufu, neuyipete ku bungi buayi, imue yambuluisha kupita mikuabu. Bidi nanku imue misangu bualu anu mutukavua baleje, muntu ne muntu utu uleja kanyinganyinga mu wende mushindu. Ngenyi ivua miambuluishe umue kayena pamuapa mua kuambuluisha mukuabu to.

Nansha nanku, kudi imue mibelu ya nshindamenu ikadi miambuluishe bantu ba bungi. Badi batamba kuyitela kudi bantu batu bapesha bena tunyinganyinga mibelu, ne idi ipetangana ne mêyi manene adi mu Bible, mukanda wa meji wa kale.

1: ITABA DIAMBULUISHA DIA KUDI BALELA NE BALUNDA

• 

  Kudi bamanyi badi bela meji ne: ke mushindu mutambe buimpe wa kupita ne kanyinganyinga ka lufu. Pabi imue misangu, udi mua kujinga bua kuikala pa nkayebe. Udi nansha mua kumvua bidi bantu badi bakeba kukuambuluisha benza bikutonda. Ke mutubi bienzekelangana.

• Kuedi meji ne: udi ne bua kuikala anu munkatshi mua bantu to, kadi kubepuki mu malu onso to, bualu udi mua kuikala nabu dijinga matuku adi kumpala. Ambila bakuabu ne dîyi dimpe tshiudi ujinga dîba kampanda ne tshiudi kuyi ujinga.

• Bilondeshile muudi udiumvua, manya dîba dia kuikala munkatshi mua bantu ne dia kudikadila nkayebe.

DÎYI DINENE: “Bantu babidi mbapite muntu umue . . . Bualu biadishinda umue wa kudibu, mukuabu neambuluishe muena diende bua kujuka.”​—Muambi 4:9, 10.

2: TABALELA BIUDI UDIA, NE IKALA WIBIDIJA MUBIDI

• Kumanya bintu bimpe bia kudia ne bungi bua kubidia nekukuambuluishe bua kupita ne ntatu ya kanyinganyinga ka lufu. Dienzeja bua kudia bimuma bishilashilangane, midioko ya kua Nzambi ne bisekiseki, ne bintu bidi ne bidishi bia mubidi (anyi proteyine) bikese.

• Ikala unua mâyi a bungi ne bia kunua bikuabu bidi biambuluisha mubidi.

• Wewe kuyi ne kudia kua nsongo, ikala udia tuntu tukese kadi misangu ya bungi. Udi kabidi mua kuebeja munganga buanga buudi mua kunua anyi bintu bimpe biudi mua kudia.a

• Luendu lua kutua musesu ne mishindu mikuabu ya kuibidija mubidi bidi mua kukupetesha ndambu wa disulakana. Dibidija mubidi didi mua kukupetesha dîba dia kuela meji bua muntu uudi mufuishe anyi kuanji kukupangisha bua kutumiku meji.

DÎYI DINENE: “Muntu kena mua kukina mubidi wende. Kadi udi uudisha, uulama bimpe.”​—Efeso 5:29, MUKANDA WA MVIDI MUKULU (Mishonyi).

3: IKALA ULALA BIKOLE

• 

  Tulu tutu anu ne mushinga, kadi nangananga bua bantu badi ne kanyinganyinga bualu katu katshiokeshangana kabidi bikole.

• Tabalela bungi bua kafe, bua tshiayi, ne bua maluvu makole buudi unua, bualu bidi mua kukupangisha tulu.

DÎYI DINENE: “Dianza dijima dia dikisha ndimpe kupita manza abidi majima a mudimu mukole ne dipata dia lupepele.”​—Muambi 4:6.

4: LONDA LUNGENYI LUDI MUA KUKUAMBULUISHA

• 

  Vuluka ne: muntu yonso utu uleja kanyinganyinga wende mushindu. Bualu bua mushinga mbua ne: nebikengele ukebe lungenyi ludi lutamba kukuambuluisha wewe.

• Bantu ba bungi batu bamona ne: kuleja bakuabu mudibu badiumvua kudi kubambuluisha, kadi bakuabu bobu batu basue kudilamina malu abu. Kudi bamanyi badi bamba ne: padi muntu uleja mudiye udiumvua bidi bimuambuluisha, kadi bua bakuabu kabiena anu ne mushinga to. Wewe musue kuleja muntu muudi udiumvua kadi welakana, bidi mua kulua bipepele wewe mubange kuleja mulunda webe munene ku kakese ku kakese muudi udiumvua.

• Kudi bantu badi bamona ne: kudila kudi kubambuluisha bua kupita ne kanyinganyinga kabu, kadi bakuabu bobu nansha kabayi badile bikole kakuena bualu to.

DÎYI DINENE: “Muntu nkayende ngudi mumanye dikenga didi mu muoyo wende.”​—Nsumuinu 14:10, MUKANDA WA MVIDI MUKULU (Katolike).

5: EPUKA BIBIDILU BIDI MUA KUKUENZELA BIBI

• 

  Bantu bakuabu badi bafuishe batu bakeba kukepesha kanyinganyinga kabu pa kunua maluvu makole a bungi anyi manga adi anyungulula mutu a bungi. Kuenza nunku nkudibutula. Disulakana dia nunku didi muntu mua kumvua ndia tshitupa tshîpi, ne batu anu badilonda kudi ntatu minene. Keba mishindu ya kupeta disulakana idi kayiyi mua kukuenzela bibi.

DÎYI DINENE: “Tudilengeje ku dinyanguka dionso.”​—2 Kolinto 7:1.

6: MANYA BIA KUENZA NE DÎBA DIEBE

• Bantu ba bungi batu bamona bibambuluisha padibu imue misangu benza malu adi abapangisha bua kutamba kutuma meji ku lutatu luabu.

• Udi mua kuanji kupeta disulakana wewe mudifile mu dikeba balunda anyi mu dikolesha bulunda buebe ne bakuabu, ulonga mua kuenza malu mapiamapia, anyi upitshisha kapepe.

• Padi matuku enda apita, malu adi mua kushintuluka. Udi mua kumona ne: kutshiena utamba kutuma meji ku lutatu luebe bu kumpala to; bualu ebu budi buleja ne: ukadi wenda umvua bimpe.

DÎYI DINENE: “Kudi tshikondo tshisungula bua tshintu tshionso, . . . tshikondo tshia kudila ne tshikondo tshia kuseka; tshikondo tshia kuela kabobo ka muadi ne tshikondo tshia kuja maja.”​—Muambi 3:1, 4.

7: IKALA WENZA MALU AUTU WENZA PA TSHIBIDILU

• 

  Diakamue paudi upeta mushindu, tuadija kuenza malu autu wenza pa tshibidilu.

• Wewe mulame tshibidilu tshia kulala, kuenza midimu ne malu makuabu, udi mua kubanga kudiumvua kabidi muutu pa tshibidilu.

• Kuikala kuenza malu adi akuambuluisha wewe anyi bantu bakuabu kudi mua kukepesha kanyinganyinga.

DÎYI DINENE: “Kakutamba kumona mudi matuku a muoyo wende apita, bualu Nzambi mulelela udi utuma lungenyi luende ku disanka dia mu muoyo wende.”​—Muambi 5:20.

8: EPUKA KUANGATA MAPANGADIKA MANENE NE LUKASA

• Bantu ba bungi batu bangata mapangadika manene diakamue padibu bafuisha batu balua kunyingalala.

• Kuoku mushindu, anji pitshishaku tshikondo kampanda kumpala kua kumuangala, kushintulula mudimu, anyi kumbusha bintu bia mufue.

DÎYI DINENE: “Malu adi bantu badi benza mudimu ne muoyo mujima balongolola adi bushuwa afika ku dikumbana, kadi bantu bonso badi balubakana mbatangile bushuwa ku bupele.”​—Nsumuinu 21:5.

9: IKALA UVULUKA MUNTU UUDI MUFUISHE

• 

  Bantu ba bungi badi bafuishe batu bamona ne: mbimpe kuenza malu adi abavuluija muntu udibu bafuishe au.

• Bidi mua kukusulakaja wewe musangishe foto, anyi bintu bia kuvulukila mufue, anyi mufunde malu ende audi musue kuvuluka.

• Lama bintu bidi bikuvuluija malu mimpe, ne bitangilula pashishe pawadiumvua mukumbane bua ubitangila.

DÎYI DINENE: “Uvuluke matuku a kale.”​—Dutelonome 32:7.

10: ANGATA DIKISHA

• Udi nansha mua kuangata dikisha.

• Kuoku kakuyi mushindu wa kuangata dikisha dia matuku a bungi, udi nansha mua kuenza tshintu tshidi tshikusankisha bua dituku dimue anyi abidi, bu mudi kuya kuendakana lua makasa, kuya kumona bintu kampanda, anyi kuangata mashinyi kuya muaba kampanda.

• Nansha kuenza malu mashilangane ne autu wenza bua mutantshi mukese tshianana kudi mua kuambuluisha.

DÎYI DINENE: “Luayi, nuenu nkayenu, ku luseke muaba udi kawuyi bantu, nuikishe ndambu.”​—Mâko 6:31.

11: AMBULUISHA BAKUABU

• 

  Manya ne: dîba dionso diudi upitshisha wenda wambuluisha bantu bakuabu didi mua kukuambuluisha wewe bua kudiumvua bimpe.

• Udi mua kutuadija kuambuluisha bantu bakuabu badi lufu lua muntu au lulenge kabidi, bu mudi balunda anyi balela badi mua kuikala dijinga ne muntu udi mua kudiumvua mudibu badiumvua.

• Kuambuluisha bantu bakuabu ne kubasamba bidi mua kukupeshilula disanka ne kupeshilula nsombelu webe kipatshila kaudi mua kuikala naku dijinga.

DÎYI DINENE: “Disanka dia kufila ndipite dia kuangata.”​—Bienzedi 20:35.

12: TANGILULA MALU AUDI WANGATA NE MUSHINGA

• Kanyinganyinga kadi mua kutamba kukuambuluisha bua kumona malu adi ne mushinga menemene.

• Babidila tshikondo atshi bua kukonkonona nsombelu webe.

• Biobi bikengela, teka malu ebe bilondeshile mushinga wawu.

DÎYI DINENE: “Mbimpe kuya mu nzubu wa madilu pamutu pa kuya mu nzubu mudi tshibilu tshia disanka, bualu eu ke nshikidilu wa muntu yonso, ne badi ne muoyo badi ne bua kulama bualu ebu mu muoyo wabu.”​—Muambi 7:2.

Mu bulelela, kakuena tshintu tshidi mua kujikija kanyinganyinga kebe konso to. Kadi bantu ba bungi bakadi bafuishe badi mua kujadika pabu ne: kuenza malu adi ambuluisha bu mudi atudi batele mu tshiena-bualu etshi nkubapeteshe disulakana. Kadi katuena batele mishindu yonso idi mua kupetesha muntu disulakana to. Tshidibi, wewe mulonde amue a ku malu aa, udi mua kumona ne: neakupeteshe ndambu wa disulakana.

BIDIMU BISHALE EBI, BAMANYI MBENZE MAKEBULULA A BUNGI BUA KANYINGANYINGA KADI MUNTU UMVUA PADIYE UFUISHA. Anu mutukadi baleje, mibelu mitambe buimpe ya kudi bafidi ba mibelu itu itamba kupetangana ne mibelu ya meji ivuabu bafunde kale idi mu Bible. Bualu ebu budi buleja mudi mibelu ya mu Bible anu ne mushinga bikondo bionso. Kadi mu Bible kamuena anu mibelu ya kueyemena to. Mudi kabidi malu atudi katuyi mua kupeta muaba mukuabu adi mua kukankamija bantu badi bafuishe mu mushindu wa dikema.

• Dishindika dia ne: bantu batudi bafuishe kabena bakenga to

  Bible udi wamba mu Muambi 9:5 ne: “Bafue ki mbamanye bualu nansha bumue.” ‘Meji adibu bela adi ajimina.’ (Misambu 146:4) Mu diumvuangana ne bualu ebu, Bible udi ufuanyikija lufu ne tulu tukole.​—Yone 11:11.

• Kuitabuja Nzambi wa dinanga ne muoyo umue kudi kufila busambi

  Bible udi wamba mu Misambu 34:15 ne: “Mêsu a Yehowaa adi kudi bantu bakane, ne matshi ende adi ateleja muadi wabu wa dilomba diambuluisha.” Kusambila Nzambi tumuambila mutudi tudiumvua nkupite busambi butudi mua kupeta patudi tukuatshila muntu bualu buetu anyi tshitudi mua kuenza bua kukanda meji etu. Mu bulelela, kudi kutuambuluisha bua kudia malanda a nsungansunga ne Mufuki wetu udi mua kutukolesha ne bukole buende.

• Ditekemena dia matuku atshilualua mimpe

  Difuanyikijila tshikondo tshikalabu ne bua kubisha bantu badi bafue bua kusombabu pa buloba apa! Bible udi wakula bikole bua tshikondo atshi. Udi umvuija muikala malu pa buloba tshikondo atshi wamba ne: Nzambi “neakupule tshinsonji tshionso ku mêsu [kuetu], ne lufu kaluakuikalaku kabidi, nansha madilu, nansha mbila ya miadi, nansha bintu bidi bisama kabiakuikalaku kabidi.”​—Buakabuluibua 21:3, 4.

Bantu ba bungi badi bitabuja Yehowa (Nzambi udi mufundishe Bible) badi bapeta bukole bua bungi bua mua kupita ne kanyinganyinga kabu bualu mbitabe ditekemena dia ne: nebamonangane kabidi ne bafue babu. Tshilejilu, Ann uvua mufuishe bayende wa bidimu 65 udi wamba ne: “Bible udi unjadikila ne: bafue betu kabena bakenga to, kabidi ne: Nzambi neabishe bantu bonso badi mu meji ende. Ntu mvuluka malu aa pantu ntuma meji ku lufu lua bayanyi, ke bualu kayi ntu mpeta mushindu wa kutantamena lutatu lukole lutu kaluyi luanji kumfikila elu!”

Tiina utudi batele mu biena-bualu bishale udi wamba ne: “Katshia Timo wafua, ndi mmona mudi Nzambi ungambuluisha. Ndi mumone mudi tshianza tshia Yehowa tshingambuluishe bikole mu lutatu luanyi elu. Kabidi, mulayi wa mu Bible wa dibishibua dia bantu ku lufu mbualu bulelela kundi menemene. Udi unkolesha bua kuya anu kumpala too ne patuamonangana kabidi ne Timo.”

Mushindu udi bantu aba badiumvua udi upetangana ne mudi bantu bungi tshianana badi bitaba mudi Bible wa kueyemena badiumvua pabu. Nansha wewe mumone ne: malu adi Bible wamba ki mmalelela anyi ne: mbilota tshianana, dienzeja bua kukonkonona bijadiki bidimu bidi bileja ne: mibelu idimu ne malu adiye ulaya mbilelela. Neudimuene mudi Bible wambuluisha bushuwa bantu badi bafuishe.

MANYA MALU MAKUABU BUA DITEKEMENA DIDIKU BUA BAFUE

Tangila filme idi yakula bua malu aa mu site wetu wa jw.org

NTSHINYI TSHITU TSHIENZEKELA MUNTU PADIYE UFUA?

Ntshinyi tshitu tshituenzekela patudi tufua? Diandamuna ditoke didi Bible ufila didi ditukankamija ne ditukolesha ku muoyo

Tangila mu TSHITEKELU TSHIA MIKANDA > FILME (BIBLE)

UDI MUSUE KUMVUA LUMU LUIMPE ANYI?

Lelu kudi ngumu mibi mipite bungi, kadi nkuepi kutudi mua kupetela lumu luimpe?

Tangila mu MALONGESHA A MU BIBLE > DITALALA NE DISANKA