Udi ukumbaja mudimu webe wonso menemene anyi?

1. Bantendeledi ba Nzambi bonso ba lulamatu mbasue kuenza tshinyi? Bua tshinyi? (Tangila tshimfuanyi tshia pa tshizubu.)

KRISTO YEZU wakatumina bayidi bende dîyi bua ‘kuya kuvuija bantu ba mu bisamba bionso bayidi.’ (Mat. 28:19) Mbapeshe bantendeledi ba Nzambi ba lulamatu bonso mudimu eu, ne mbasue kumanya tshia kuenza bua ‘kuwukumbaja wonso menemene.’ (2 Tim. 4:5) Mbasue kuenza nunku bualu mudimu eu mmudimu munene wa mushinga wa bungi wa kuenza ne lukasa kupita malu makuabu onso. Tudi mua kuikala ne dijinga dia kuyisha bikole kadi bikale ne malu adi atutatshisha.

2. Mmalu kayi atu atutatshisha bua kukumbaja mudimu wetu?

² Kudi malu makuabu a mushinga adi atulomba dîba ne makanda. Bidi mua kutulomba bua kuenza mudimu mêba a bungi ku dituku bua kukumbaja majinga etu ne a bena mu dîku dietu. Tudi mua kuikala tuluangana ne majitu makuabu a mu dîku, ne masama, ne ntatu ya bukulakaja, anyi bikale ne malu matutonde. Mmushindu kayi utudi mua kukumbaja mudimu wetu wonso menemene nansha malu a nunku atutatshisha?

3. Mêyi a Yezu adi mu Matayi 13:23 adi aleja tshinyi?

³ Malu atudi nawu owu atupangisha bua kuenza mêba a bungi mu mudimu wa Yehowa, katuteketshi mu maboko to. Yezu uvua mumanye ne: bantu bonso kabavua mua kupatula mamuma a Bukalenge bungi bua muomumue to. (Bala Matayi 13:23.) Yehowa udi wanyisha bikole malu onso atudi tuenza mu mudimu wende patudi tuenza malu au ne muetu muonso. (Eb. 6:10-12) Kadi tudi mua kumona ne: nsombelu wetu udi utupetesha mushindu wa kuenza bia bungi mu mudimu eu. Ke bualu kayi mu tshiena-bualu etshi, netumone tshia kuenza bua kuteka mudimu wa Nzambi pa muaba wa kumpala, bua kupepeja nsombelu wetu, ne bua kulengeja nyishilu wetu ne ndongeshilu wetu. Kadi tuanji tumone tshidi kukumbaja mudimu wetu wonso menemene kumvuija.

4. Kukumbaja mudimu wetu wonso menemene kudi kumvuija tshinyi?

⁴ Mu mêyi makese, bua kukumbaja mudimu wetu wonso menemene, tudi ne bua kudifila bikole mu mudimu wa kuyisha ne kulongesha. Kadi kabiena biumvuija anu kuenza mêba a bungi to. Tshidi tshitusaka bua kuyisha tshidi kabidi ne mushinga kudi Yehowa. Tuetu tuyisha bualu tudi banange Yehowa ne muntu netu, netudifile ne muoyo mujima mu mudimu wetu wa buena Kristo.b (Mâko 12:30, 31; Kolos. 3:23) Kuenzela Nzambi mudimu ne muoyo mujima kudi kumvuija kudifila ne bukole buetu buonso mu mudimu wende bilondeshile muonso mutudi mua kukokeshila. Tuetu tumona kuyisha lumu luimpe bu diakalenga, netudienzeje bua kuluambila bantu ba bungi menemene.

5-6. Fila tshilejilu tshia mudi muntu udi ne malu a bungi a kuenza mua kuteka mudimu wa kuyisha pa muaba wa kumpala.

⁵ Tuangate tshilejilu tshia nsongalume kampanda utu musue kuimba tshindanda bikole. Utu musue kutshimba dîba dionso didiye umvua mua kuimba. Dimue edi, yeye kupeta mudimu wa kuimba tshindanda mu tshinuinu tshia maluvu ku ndekelu kua lumingu luonso. Kadi makuta adibu bamufuta kaena akumbaja majinga ende to. Nunku udi utuadija kupanyishilangana bintu mu tshisalu mu Dimue too ne mu Ditanu. Nansha mudiye upitshisha mêba a bungi mu tshisalu, muoyo wende udi anu ku dimba tshindanda. Mmusue kushikuluja dimba diende ne kushala anu kangimba. Udi ne dîba dikese, kadi udi wimba nansha kakese misangu yonso idiye upeta mpunga.

⁶ Bia muomumue, malu audi nawu adi mua kukupangisha bua kuyisha mêba bungi buudi musue. Kadi wewe udi musue kuyisha bikole. Udi udienzeja bua kuvudija dimanya dia mua kulenga mioyo ya bantu baudi uyisha. Kadi bu muudi ne malu a bungi a kuenza, udi mua kuikala udiebeja tshiudi mua kuenza bua kuteka mudimu wa kuyisha pa muaba wa kumpala.

MUA KUTEKA MUDIMU WA KUYISHA PA MUABA WA KUMPALA

7-8. Mmunyi mutudi mua kuidikija Yezu mu mudimu wa kuyisha?

⁷ Yezu udi tshilejilu tshitambe buimpe bua muvuaye umona mudimu wa kuyisha. Kuyisha bantu malu a Bukalenge bua Nzambi ke kuvua bualu bua mushinga mukole mu nsombelu wende. (Yone 4:34, 35) Uvua wenza ngendu kilometre ne kilometre bua kuyisha bantu ba bungi menemene. Uvua ukeba mishindu ya kuyisha bantu ku mbanza yabu anyi miaba yonso ivuaye ubapeta. Malu onso avua Yezu wenza avua anu bua mudimu wa kuyisha.

⁸ Tudi mua kuidikija Kristo patudi tukeba mishindu ya kuambila bantu lumu luimpe dîba kayi dionso ne muaba kayi wonso kuoku mushindu. Tudi tuitaba bua kudipangisha amue malu anu bua kuyisha. (Mâko 6:31-34; 1 Pet. 2:21) Bamue bana betu mu tshisumbu badi ne mushindu wa kuikala bampanda-njila ba pa buabu, ba pa tshibidilu, anyi bambuluishi. Bakuabu mbalonge muakulu mukuabu anyi mbaye muaba udibu dijinga ne bamanyishi ba bungi. Kadi kudi bamanyishi ba Bukalenge ba bungi badi bayisha ne muabu muonso badi kabayi mua kuenza malu aa. Bobu aba ke badi benza bia bungi mu mudimu wa kuyisha. Nansha tuetu ne mushindu wa kuyisha bikole anyi katuyi nawu, Yehowa kena utulomba tshitudi katuyi mua kukumbaja to. Mmusue tuetu bonso tuikale ne disanka mu mudimu wetu wa tshijila patudi tumanyisha “lumu luimpe lua butumbi lua Nzambi wa disanka.”​—1 Tim. 1:11; Dut. 30:11.

9. (a) Nansha muvua Paulo ne bua kuenza mudimu wa bianza, tshinyi tshivuaye wenza bua mudimu wa kuyisha wikale anu pa muaba wa kumpala? (b) Bilondeshile Bienzedi 28:16, 30, 31, mmunyi muvua Paulo umona mudimu wa kuyisha?

⁹ Mupostolo Paulo udi pende tshilejilu tshimpe bua muvuaye muteke mudimu wa kuyisha pa muaba wa kumpala. Pavuaye mu Kolinto mu luendu luende luibidi lua bumisionere, uvua mushale ne tukuta tukese, kumonaye ne: bivua bikengela atuadije kuenza ntenta. Kadi mudimu wa dienza ntenta kawuvua pa muaba wa kumpala mu nsombelu wende to. Uvua umuambuluisha anu bua kukumbaja majinga ende bua amone mua kuyisha bena Kolinto lumu luimpe ‘kabayi bafuta tshintu’ to. (2 Kol. 11:7) Nansha muvua Paulo ne bua kuenza mudimu wa bianza, uvua utungunuka ne kuteka mudimu wa kuyisha pa muaba wa kumpala, uyisha dituku dionso dia Nsabatu. Pavua nsombelu wende mulongoloke, wakapeta mushindu wa kuyisha bikole. “Wakatuadija kudifila bikole mu mudimu wa dîyi, ufila bumanyishi kudi bena Yuda bua kubajadikila ne: Yezu udi Kristo.” (Bien. 18:3-5; 2 Kol. 11:9) Pashishe pavuabu bamukuate, bamulame mu nzubu muende mu Lomo bua bidimu bibidi, uvua uyisha bantu bavua balua kumumona ne ufundilangana mikanda. (Bala Bienzedi 28:16, 30, 31.) Paulo uvua mudisuike bua tshintu nansha tshimue katshiangatshi muaba wa mudimu wende wa kuyisha to. Wakafunda ne: “Bu mutudi ne mudimu eu . . . , katuena tuwulekela to.” (2 Kol. 4:1) Anu bu Paulo, nansha tuetu tupitshisha mêba a bungi ku midimu yetu ya bianza, kudi anu mushindu wa tuetu kuteka mudimu wa Bukalenge pa muaba wa kumpala.

10-11. Tuetu ne masama atutatshisha, ntshinyi tshitudi mua kuenza bua kukumbaja mudimu wetu wonso menemene?

¹⁰ Tuetu katuyi mua kuyisha ku nzubu ne ku nzubu bua bukulakaja anyi bua masama, tudi mua kuyisha mu mishindu mikuabu. Bena Kristo ba kumpala bavua baya miaba yonso ivua bantu bua kubayisha. Bavua bayisha bantu dîba kayi dionso ne muaba kayi wonso uvuabu ‘bapetangana nabu,’ ku nzubu yabu anyi miaba mikuabu. (Bien. 17:17; 20:20) Tuetu katuyi ne makanda a kuenda, tudi mua kusomba muaba utu bantu ba bungi bapitshila bua kubayisha. Tudi nansha mua kuyishila bantu mu mikanda itudi tubafundila anyi ku telefone, peshi kubabidila mpunga yonso idi imueneka bua kuyisha patudi tuenza malu etu a buatshia buila. Bamanyishi ba bungi badi kabayi ne makanda a kuyisha ku nzubu ne ku nzubu batu ne disanka padibu bayisha mu mishindu mikuabu eyi.

¹¹ Nansha masama akutatshisha, udi mua kukumbaja mudimu webe wonso menemene. Tuangate kabidi tshilejilu tshia mupostolo Paulo. Wakamba ne: “Bua malu onso ndi ne bukole ku diambuluisha dia yeye udi umpesha bukole.” (Filip. 4:13) Paulo uvua dijinga ne bukole abu pavuaye musame mu lumue lua ku ngendu yende ya bumisionere. Wakambila bena Galatiya ne: “Disama dia mubidi wanyi ke divua dimpeteshe mushindu wa kunuambila lumu luimpe musangu wa kumpala.” (Gal. 4:13) Bia muomumue, masama ebe adi mua kukupetesha mpunga ya kuambila bantu bakuabu lumu luimpe bu mudi badoktere, baminganga, ne bantu bakuabu badi bakulama bua kukuambuluisha. Ba bungi ba kudibu batu ku midimu padi bamanyishi ba lumu luimpe bapita ku mabu.

MUA KUIKALA NE NSOMBELU MUPEPELE

12. Kuikala ne dîsu didi “dimona bimpe” kudi kumvuija tshinyi?

¹² Yezu wakamba ne: “Muendu wa mubidi ndîsu. Nunku, bikala dîsu diebe dimona bimpe [anyi “dipepele,” dim.], mubidi webe mujima newikale bukenke.” (Mat. 6:22) Uvua musue kuamba tshinyi? Uvua musue kuamba ne: mbimpe tuikale ne nsombelu mupepele anyi tutuishile mêsu etu ku bualu bumue, katuyi tulekela tshintu nansha tshimue tshitubueja mu ditanaji. Yezu muine mmutushile tshilejilu tshimpe bualu nsombelu wende uvua muimanyine anu pa mudimu wa kuyisha, ne wakalongesha bayidi bende bua batungunuke ne kudifila bikole mu mudimu wa Yehowa ne ku Bukalenge buende. Tudi tuidikija Yezu patudi tuteka mudimu wa kuyisha pa muaba wa kumpala, ‘tukeba tshia kumpala Bukalenge bua Nzambi ne buakane buende.’​—Mat. 6:33.

13. Ntshinyi tshidi mua kutuambuluisha bua kudifila mu mudimu wetu bikole?

¹³ Tudi mua kuleja ne: tudi tudifila mu mudimu wetu patudi tupepeja nsombelu wetu bua kupeta dîba dia bungi dia kuambuluisha bantu bakuabu bua bafike ku dimanya Yehowa ne ku dimunanga.c Tshilejilu, tudi mua kutangilula mêba atudi tupitshisha mu midimu yetu ya bianza bua kupeta dîba dia bungi dia kuyisha munkatshi mua lumingu. Tudi kabidi mua kukepesha malu atudi tujikija nawu lutetuku adi mua kuikala atuangata mêba a bungi.

14. Mmalu kayi avua muanetu kampanda ne mukajende bashintulule bua kupetabu dîba dia kudifila bikole mu mudimu wa kuyisha?

¹⁴ Muanetu kampanda udi mukulu diende Elias ne mukajende bakenza nanku. Udi wamba ne: “Kakuvua mushindu wa tuetu kulua bampanda-njila tshikondo atshi to, kadi kuvua tumalu tukese tutuvua mua kuenza bua kuyisha mêba a bungi. Nunku tuakatuadija kutuenza. Tshilejilu, tuakakepesha bungi bua makuta atuvua tutula. Tuakakepesha kabidi malu atuvua tujikija nawu lutetuku; mpindieu tukadi tumona ne: tuvua tunekesha mu dijikija dietu dia lutetuku. Tuakalomba kabidi bamfumu betu ba mudimu bua kushintulula mêba etu a mudimu. Patuakenza malu au, tuakapeta mushindu wa kuyisha ku dilolo, kulonga Bible ne bantu ba bungi, ne kuyisha too ne munkatshi mua lumingu misangu ibidi ku ngondo. Tuakapeta disanka dia dikema!”

MUA KULENGEJA NYISHILU WEBE NE NDONGESHILU WEBE

15-16. Mu diumvuangana ne 1 Timote 4:13, 15, ntshinyi tshitudi mua kuenza bua kutungunuka ne kulengeja nyishilu wetu? (Tangila kabidi kazubu ka “Bipatshila bidi mua kungambuluisha bua kukumbaja mudimu wanyi wonso menemene.”)

¹⁵ Tudi kabidi mua kuleja ne: tudi tukumbaja mudimu wetu wonso menemene patudi tulengeja nyishilu wetu. Batu balomba bantu badi benza midimu kampanda ya bianza bua bikale anu balonga bua kuvudija dimanya diabu ne kulengeja mudimu wabu. Ke mudibi kabidi bua bamanyishi ba Bukalenge. Mbimpe tutungunuke ne kulonga bua kumanya tshitudi mua kuenza bua kulengeja nyishilu wetu.​—Nsu. 1:5; bala 1 Timote 4:13, 15.

¹⁶ Kadi ntshinyi tshitudi mua kuenza bua kutungunuka ne kuya kumpala mu mudimu wetu wa kuyisha? Tuikale tuteya ntema bikole ku mibelu itudi tupeta mu Tshisangilu tshia Nsombelu ne mudimu wetu. Mu tshisangilu etshi tudi tulonga malu a mushinga mukole adi atuambuluisha bua kulengeja nyishilu wetu ku kakese ku kakese. Tshilejilu, padi mulombodi ubela bantu badi bafuma ku dienza midimu ya balongi, tudi mua kusobola mibelu idi mua kutuambuluisha bua kulengeja nyishilu wetu. Tudi mua kuyitumikila patuikala mua kuyisha muntu. Tudi mua kulomba mutangidi wa kasumbu ketu ka buambi diambuluisha anyi kuyisha nende peshi kuyisha ne mumanyishi mukuabu mupiluke, ne mpanda-njila, anyi ne mutangidi wa tshijengu. Patudi tumanya kuyisha bikole ne tshintu tshionso tshia mu Bintu bietu bia kuyisha nabi, mudimu wetu wa diyisha ne wa dilongesha newutusankishe bikole.

17. Ntshinyi tshiwapeta wewe ukumbaja mudimu webe wonso menemene?

¹⁷ Tudi ne diakalenga dinene dia mudi Yehowa mutuanyishile bua kuikala “benzejanganyi [nende] ba mudimu”! (1 Kol. 3:9) Wewe ‘ukeba mua kumanya malu adi ne mushinga wa bungi’ ne udifila bikole mu mudimu wa kuyisha, ‘newenzele Yehowa mudimu ne disanka.’ (Filip. 1:10; Mis. 100:2) Bu muudi muena mudimu wa Nzambi, ikala mushindike ne: neakupeshe bukole budi bukengedibua bua kukumbaja mudimu wende nansha wewe ne malu akutatshisha. (2 Kol. 4:1, 7; 6:4) Wewe uyisha ne muoyo mujima ‘neupete tshiudi mua kusankila,’ nansha wewe ne mushindu wa kuyisha bikole anyi kuyi nawu. (Gal. 6:4) Paudi ukumbaja mudimu webe wonso menemene, udi uleja muudi munange Yehowa ne muntu nebe. “Paudi wenza nanku neudipandishe wewe muine ne bantu badi bakuteleja.”​—1 Tim. 4:16.