Tuvua bapete “dibue dia busanga dia mushinga mukole”

Winston, tuambila muuvua ukeba Nzambi.

Mvua mukolele mu dîku divua bantu kabayi batendelela Nzambi mu Queensland, mu ditunga dia Australie. Tuvua basombele kuitu kutuvua tudima ne tumuna. Bu mutuvua ku ntshiama, tshivua nangananga ntuilangana ne bantu bakuabu to; tuvua anu ne bena mu dîku dietu. Ngakatuadija kukeba Nzambi pamvua ne bidimu bitue ku 12. Ngakasambila, mmulomba bua kumanya bulelela budi bumutangila. Ngakalua kumbuka kuitu kutuvua aku, meme kupeta mudimu mu tshimenga tshia Adélaïde, ku sud kua Australie. Pangakakumbaja bidimu 21, ngakatuilangana ne Pam pamvua mu dikisha mu tshimenga tshia Sydney. Wakangambila malu a kasumbu ka bena anglo-israélisme batu bamba ne: bena mu Grande-Bretagne ndelanganyi ya bantu batubu bamba ne: mba mu bisa bijimine bia Isalele. Bena mu kasumbu aka batu bamba ne: bisa abi mbisa dikumi bia bukalenge bua ku nord bivuabu bakuate baye nabi miaba mikuabu mu bidimu bia 700 kumpala kua Yezu. Nunku pangakapingana ku Adélaïde, ngakayukila bualu abu ne muena mudimu nanyi ukavua ulonga Bible ne Bantemu ba Yehowa. Tuetu bamane kuyukila nende mêba makese patupu, nangananga bua malu atu Bantemu bitabuja, ngakajingulula ne: Nzambi uvua wenda wandamuna disambila dianyi dia ku buana. Bushuwa, mvua ngenda manya bulelela budi butangila Mufuki wanyi ne Bukalenge buende! Tshivua “dibue dia busanga dia mushinga mukole” dimvua mupete.​—Mat. 13:45, 46.

Pam, wewe pebe uvua mutuadije kukeba dibue dia bunsanga adi pautshivua muana. Tuambila muuvua mudipete.

Ndi mukolele mu dîku dia bantu bavua batendelela Nzambi mu tshimenga tshia Coffs Harbour, mu Nouvelle-Galles du Sud. Baledi banyi ne bakakuanyi (baledi ba mama) bakitaba malongesha a kasumbu ka bena anglo-israélisme. Mu dikola dietu, bavua batulongeshe meme ne yayanyi ne muakunyanyi wa balume pamue ne bana ba bana babu ne mama ne: Nzambi utu wanyisha bikole ndelanganyi ya bena mu Grande-Bretagne. Kadi tshivua anu mutuishibue to, ne mvua ndiumvua kule ne Nzambi. Pangakakumbaja bidimu 14, ngakabuela mu bitanda bishilashilangane, bu mudi tshia bena anglikan, tshia babatiste, ne tshia bena advantiste. Kadi kabavua bangambuluishe bua kumanya Nzambi to.

Pashishe tuakamuangala dîku dijima, kuya ku Sydney kungakatuilangana ne Winston dîba divuaye mu dikisha kuntu aku. Anu mudiye muleje, diyukila dietu nende dia malu a Nzambi diakalua kumufikisha ku dilonga Bible ne Bantemu. Pashishe mikanda ikavuaye umfundila ivua miuwule tente ne mvese! Nnuambile bulelela, kumpala biakanji kuntonda, bisua kumpesha ne tshiji. Kadi ku kakese ku kakese, ngakajingulula ne: bivuaye umfundila abi bivua bulelela budi butangila Nzambi.

Mu 1962, ngakaya ku Adélaïde bua ngikale pabuipi menemene ne Winston. Uvua mulongolole bua nsombe ne Thomas Sloman ne mukajende Janice bavua Bantemu. Kumpala bavua bamisionere mu Papouasie-Nouvelle-Guinée. Bavua bangenzela malu mimpe a dikema! Mvua ne bidimu 18 patupu; bavua bangambuluishe bua kumanya Yehowa bikole. Nunku ngakatuadija panyi kulonga Bible; mu matuku makese meme kutuishibua ne: mvua mupete bulelela. Patuakaselangana ne Winston, diakamue tuakabangisha mudimu wa ku dîba ne ku dîba. Nansha mudiku ntatu, mudimu wa Nzambi mmutupeteshe mabenesha a bungi adi mavudije dianyisha dietu bua dibue dia busanga dimpe dituvua bapete.

Winston, tuambila muvua malu mu bidimu biebe bia ntuadijilu mu mudimu wa Yehowa.

Matuku makese tuetu bamane kuselangana ne Pam, Yehowa wakatuadija kutunzuluila ‘biibi binene’ bua kuvudija mudimu. (1 Kol. 16:9) Muanetu Jack Porter ke wakatuleja tshiibi tshia kumpala. Uvua mutangidi wa tshijengu uvua ukumbula tshisumbu tshietu tshivua ne bantu bakese. (Lelu tudi nende mu Komite wa Filiale wa Australasie.) Jack ne mukajende Roslyn bavua batukankamije bua kuangata bumpanda-njila bua pa tshibidilu, mudimu muimpe utuvua benze munda mua bidimu bitanu. Pangakakumbaja bidimu 29, bakatulomba meme ne Pam bua kuenza mudimu wa butangidi bua tshijengu mu bidiila bia Pacifique sud bivuabu batangila kudi Betele wa mu Fidji. Bidiila abi mbiobi ebi: Samoa américaines, Samoa, Kiribati, Nauru, Niue, Tokelau, Tonga, Tuvalu, ne Vanuatu.

Tshikondo atshi, bantu ba mu bimue bidiila bia kule menemene bavua bamona Bantemu ba Yehowa mu mushindu mubi, ke bualu kayi bivua bikengela tuikale ne budimu, katuyi tutamba kudimanyisha kudi bantu to. (Mat. 10:16) Bisumbu bia mu tshijengu tshietu bivua ne bantu bakese, ne bikuabu kabivua ne mushindu wa kutupesha muaba wa kulala to. Nunku tuvua tulomba bantu ba mu misoko ya mu bidiila abi muaba wa kulala, ne bavua anu batuakidila bimpe.

Winston, utu munange mudimu wa dikudimuna bikole. Ntshinyi tshidi tshikufikishe ku diwunanga nanku?

Tshikondo atshi, bana betu ba mu tshidiila tshia Tonga bavua ne trakte mikese ne tukanda tukese mu tshiena Tonga. Bavua balonga Bible ne bantu ku diambuluisha dia mukanda wa mu Anglais wa Bulelela budi bufikisha ku muoyo wa kashidi. Nunku mu kalasa kampanda ka bakulu kavua kenze mbingu inayi, bakulu basatu bavua kabayi batambe kumanya Anglais bakitaba bua kukudimuna mukanda eu mu tshiena Tonga. Pam wakafunda malu avuabu bakudimune au ku mashinyi a mikanda, pashishe tuetu kuwutuma ku Betele wa mu États-Unis bua bawupatule. Mudimu wa dikudimuna mukanda au ne diwupatula wakangata mbingu 8. Nansha muvuawu ne bilema bia dikudimuna, uvua muambuluishe bantu ba bungi bavua bakula tshiena Tonga bua kumanya bulelela. Meme ne Pam katuena bakudimunyi to, kadi bualu buvua benzeke abu buakatusaka bua kunanga mudimu wa dikudimuna bikole.

Pam, paudi ufuanyikija nsombelu wa mu bidiila ne wa mu Australie, udi umona bishi?

Kuvua dishilangana dinene be! Miaba mikuabu ituvua tuya ivua ne tumua tupite, luya ne mutalele bia katshia, mpuku katuambi, masama bitukuata, ne imue misangu katuyi ne tshiakudia tshia nsongo. Kadi dilolo patuvua mu kazubu ketu, tumona muvua mâyi a mbuu mualabale, tuvua tutukija meji. Kazubu aku kavua ka musaka wa nsona kakayi ne bimanu to. Batu babikila tuzubu tua mu Polynésie etu ne: fale. Butuku pavua ngondo ukenka, tuvua tumona mabue a koko ne muvua ngondo ukenkesha pa mâyi a mbuu mualabale. Bikondo bimpe ebi bivua bitusaka bua kuelangana meji ne kusambila, bituambuluisha bua kumbusha meji ku ntatu, kuatuma ku malu mimpe atuvua tupeta.

Bana ba mu bidiila bavua benza tumalu tuimpe tua tusekeshangana, ne bu mutuvua batoke, bavua bazuka bua kulua kutudi bua kutumona. Tuakafika ku dibananga bikole. Patuvua mu Niue, kana ka balume kakuabu kakalaba bianza pa maboko a Winston atu ne boya bua bungi, kamuambila ne: “Ndi mmunange masala ebe aa bikole.” Bivua bimueneka patoke ne: katshia kakavua kanji kumona maboko a muntu ne boya bungi nunku to, ne kakavua kamanye mua kububikila to!

Bivua bitusama ku muoyo patuvua tumona muvua bantu bakenga, bikale mu bupele bukole. Bavua basombele muaba mulenga kadi kabayi ne mpitadi ya nsongo nansha mâyi a kunua. Nansha nanku, bana betu kabavua anu badilakana to. Buabu bobu, bakavua bibidile. Bavua ne disanka bua muvuabu pamue ne bena mu mêku abu, bikale ne muaba wa kudisangishila bua kutendelela, ne diakalenga dia kutumbisha Yehowa. Tshilejilu tshiabu tshiakatuambuluisha bua kuimanyina pa malu adi ne mushinga wa bungi ne kuikala anu ne nsombelu mupepele.

Pam, kuvua misangu iuvua ne bua kudikebela mâyi ne kulamba biakudia, bishilangane ne muuvua wenza konso eku. Uvua wenza bishi?

Ndi ne dianyisha dia bungi kudi papa. Uvua mundongeshe malu a bungi a mushinga, bu mudi mua kutemesha kapia ka nkunyi ne kulambilapu, ne tshia kuenza nansha meme ne bintu bikese. Musangu kampanda patuakaya kukumbula bana betu ba mu Kiribati, tuakasombela mu kazubu ka musaka wa nsona, kenza ne bimanu bia nshiba (mitete), panshi pela koraye (bintu bikolakane bia mu mbuu bienze bu mabue). Mvua mumbule katshina mu kazubu amu bua kuikala kutemeshilamu kapia ne mvua ndamba ne bizubu bia koko. Bua kupeta mâyi, tuvua tuela mulongo ku tshina tshia mâyi ne bantu bakaji ba muaba au. Bua kukoka mâyi, bavua bangata mutshi wa metre matue ku abidi ne nshinga musuikila ku mutu, bienze anu bu mutshi wa kuloba nawu. Kadi pamutu pa kusuikabu ndobo ku nshinga aku, bavua basuikaku kapanza. Pavua dîba dia muntu ne muntu dikumbana, uvua upuekesha mutshi, windila katantshi, ne pavuabi bikumbana, unyungusha tshianza. Kapanza kavua kakudimuka, ne pashishe kuwula ne mâyi. Mvua ngela meji ne: mbipepele, too ne pakakumbana dianyi dîba. Ngakapuekesha mutshi misangu ya bungi, kadi kapanza kavua katuta pa mâyi, kalelema anu kulelema! Bantu bonso kutalalabu ne tuseku. Pakalekelabu kuseka, mamu mukuabu wakangambila bua kungambuluisha. Bantu bavua batuambuluisha bikole ne batuenzela malu mimpe.

Buonso buenu nuakalua kunanga mudimu unuvua nuenza mu bidiila. Nudi mua kutuambila malu a pa buawu anudi kanuyi mua kupua muoyo anyi?

Winston: Biakatulomba ndambu wa matuku bua kuibidilangana ne bilele kampanda. Tshilejilu, pavua bana betu batupesha biakudia, bavua ne tshibidilu tshia kutupesha bionso bivuabu nabi. Kumpala katuvua bamanye ne: bivua bikengela kudia kubashila to. Tuetu tuvua tudia bionso, tumana! Kadi patuakamanya muvua malu, tuakabanga kubashila. Nansha mutuvua tuenza bilema, bana betu bavua anu batumvuila. Bavua basanka pavuabu batumona panyima pa ngondo mitue ku isambombo patuvua tuya kubakumbula. Anu tuetu ke Bantemu ba muaba mukuabu bavua bana betu ba mu bidiila bamona tshikondo atshi.

Patuvua tukumbula bana betu, bivua kabidi bifila bumanyishi buimpe kudi bena mu bidiila. Benamu ba bungi bavua bela meji ne: tshitendelelu tshia bana betu tshivua tshintu tshidienzela. Kadi pavuabu bamona muntu wa mu tshitendelelu atshi ne mukajende ba ku babende balua kukumbula bana betu, bavua bakema, bafika ku dimona ne: tshivua tshitendelelu tshia bushuwa.

Pam: Bumue bua ku malu andi tshiyi mua kupua muoyo buvua buenzekele mu Kiribati. Muvua tshisumbu kampanda tshivua ne bana betu babala ku minu. Tshivua anu ne mukulu umue, diende Itinikai Matera. Muanetu eu uvua uditatshisha bikole bua bualu buetu. Dimue dituku wakalua ne diyi dia nzolo mu katunga, kungambilaye ne: “Ndienu.” Tshikondo atshi, diyi dia nzolo kadivua dimueneka tshianana tshianana to. Tshienzedi tshikese tshivua tshileja muoyo wende wa kupa atshi tshiakatulenga bikole!

Pam, bidimu ndambu pashishe, uvua ne difu kadi dilue kutuka. Tshivua tshikuambuluishe bua kutantamena lutatu alu ntshinyi?

Mvua mupete difu mu 1973 patuvua ne Winston mu Pacifique sud. Tuakapingana mu Australie, ngondo inayi pashishe difu diakatuka. Ngakanyingalala bikole, nansha Winston pende. Kanyinganyinga kanyi kakakepela mu kupita kua matuku, kadi kakajika konso patuakapeta Tshibumba tshia Nsentedi tshia dia 15/4/2009. Mu tshiena-bualu tshia “Nkonko ya babadi,” bavua bebeje ne: “Muana yeye mufuile munda mua mamuende, neabishibue ku lufu anyi?” Tshiakatujadikila ne: bualu ebu mbutangile anu Yehowa utu wenza anu malu makane. Neatujikijile tunyinganyinga tuonso tutudi natu mu tshikondo tshibi etshi pambilaye Muanende bua ‘kubutula midimu ya Satana.’ (1 Yone 3:8) Tshiena-bualu atshi tshiakatuambuluisha kabidi bua kutamba kuanyisha “dibue dia busanga” dia mushinga mukole ditudi tuetu batendeledi ba Yehowa nadi! Bu tuetu katuyi ne ditekemena dia Bukalenge, tuvua mua kuikala bajimine.

Tuetu bamane kujimija muanetu au, tuakangatulula mudimu wa ku dîba ne ku dîba. Tuakenzela Nzambi mudimu ngondo ndambu ku Betele wa mu Australie, pashishe bakalua kututuma kabidi mu mudimu wa butangidi bua tshijengu. Mu 1981, tuetu bamane kuenza bidimu binayi mu mudimu au mu Nouvelle-Galles du Sud ne mu Sydney, bakatubikila ku Betele wa mu Australie (ke muvuabu babikila Betele wa Australasie tshikondo atshi); ke mututshidi too ne lelu.

Winston, malu auvua mupete mu bidiila bia Pacifique sud mmakuambuluishe mu mudimu uudi wenza bu muena mu Komite wa Filiale wa Australasie anyi?

Eyowa, mmangambuluishe mu mishindu ya bungi. Tshia kumpala, bavua balombe Betele wa mu Australie bua kutangila tshidiila tshia Samoa américaines ne tshia Samoa. Pashishe bakasangisha Betele wa mu Nouvelle-Zélande ne wa mu Australie pamue, bobu kutuadija kumubikila ne: Betele wa Australasie. Lelu, mu teritware udi Betele wa Australasie utangila mudi: Australie, Samoa américaines ne Samoa, bidiila bia Cook, Nouvelle-Zélande, Niue, Timor oriental, Tokelau, ne Tonga. Mvua mupete diakalenga dia kuntumabu bu muleji mpala wa Betele miaba ya bungi ya mu teritware eu. Malu amvua mupete pamvua ngenza mudimu mu bidiila pamue ne bana betu ba balume ne ba bakaji ba lulamatu adi angambuluisha lelu undi mbakuatshila mudimu ku Betele.

Bua kujikija ndi mua kuamba ne: kukadi bidimu bia bungi bitudi bajingulule meme ne Pam ne: ki mbantu bakole nkayabu batu bakeba Nzambi to. Bana pabu batu basue kupeta “dibue dia busanga dia mushinga mukole” adi nansha bena mu mêku abu kabayi basue. (2 Bak. 5:2, 3; 2 Kul. 34:1-3) Mu bulelela, Yehowa nNzambi wa dinanga; mmusue bua bantu bonso, bana ne bakole, bapete muoyo!

Kukadi bidimu bipite pa 50 bituvua babange kukeba Nzambi meme ne Pam; katuvua bamanye kuvua dikeba adi mua kutufikisha to. Kakuyi mpata, bulelela bua Bukalenge ndibue dia busanga dia mushinga mukole menemene! Tudi badisuike bua kubenga kudilekela!