Muanda Wa Mushinga Mukole wa Mu Miyuki Ya Bantu

¹ Yezu wakalua pa buloba, mulombola kudi Tatuende, bua kufila bumanyishi pa bulelela budi mua kutufikisha ku muoyo wa kashidi. (Yone 18:37) Pa kushala ne lulamatu too ne ku lufu, wakanemekela Yehowa, wakasantuisha Dîna diende ne wakafila tshia-bupikudi. (Yone 17:​4, 6) Bionso ebi bidi bivuija lufu lua Yezu muanda wa mushinga mukole wa mu miyuki ya bantu.

² Ku bantu bavua ne muoyo pa buloba katshia ku difukibua dia Adama, anu babidi ke bavua bapuangane. Adama uvua mua kupetesha ndelanganyi yende mushindu wa kuikala ne masanka malenga matambe. Pamutu pa nanku, wakatomboka ne budisui, ne kubafundila nsombelu wa dikenga uvua ne bua kushikila ne lufu. Pakalua Yezu pa buloba, wakadileja muena lulamatu wa tshishiki ne muena butumike, upetesha mushindu wa kuikala ne muoyo wa kashidi kudi aba bonso bavua ne bua kuleja ditabuja.​—⁠Yone 3:16; Lomo 5:⁠12.

³ Kakuena muanda mukuabu udi mua kufuanyikijibua ne lufu lua mulambu lua Yezu. Ndukudimuna malu a mu miyuki ya bantu. Ku diambuluisha dialu, miliyare ya bantu neyikale mua kujudibua ku bafue. Nduteke nshindamenu wa Bukalenge bua kashidi buashikija bubi ne kukudimuna buloba mparadizu. Ndekelu wa bionso nelupandishe bukua-bantu ku dikengeshibua ne bupika bia mishindu yonso.​—⁠Mus. wa 37:11; Bienz. 24:15; Lomo 8:​21, 22.

⁴ Bionso ebi bidi bituambuluisha bua kumvua bua tshinyi Yezu wakatumina bayidi bende dîyi bua kuvulukabu lufu luende mu disekelela dia ku tshidimu dia Tshivulukilu. (Luka 22:19) Bajingulule mushinga watshi, tudi tuindila ne luzuku bua kudisangisha bu muenza bisumbu bia Bantemu ba Yehowa ba pa buloba bujima, mu Dibidi dia 2 Tshisanga, panyima pa dibuela dia dîba. Bangabanga, nebikale bimpe bua kubala mu dîku dilonda malu dia mu Bible dia pa matuku a ndekelu a nsombelu wa Yezu pa buloba ne dimanyina diende ne bukitu ku bulelela. (Bitupa bifila bia mifundu ya kubala bidi mu Calendrier 1996, biangatshile ku dia 28 Luabanya too ne ku dia 2 Tshisanga.) Yezu mmutushile tshitembelu pa bidi bitangila dikukuila Mufuki. (1 Pet. 2:21) Tuenze muetu muonso bua kubikila, mu tshisangilu etshi tshinene, bantu bamanya ne dîku dietu kabidi, pamue ne balongi ba Bible ne bantu bakuabu badi banyishe. Tudianjile kubumvuija mushindu wenzeka malu ne diumvuija dia mampa ne mvinyo.​—⁠1 Kol. 11:​23-26.

⁵ Bakulu nebadianjile kudilongolola bua kuikala bajadike se: Nzubu wa Bukalenge neikale ne mankenda ne mubotakane. Nebikengedibue kusungula muntu wafila mampa ne mvinyo. Dipita dia mampa ne mvinyo didi ne bua kulongolodibua bimpe. Mibelu pa bidi bitangila mushindu wa kunemeka Didia dia Mukalenge idi isanganyibua mu Tshibumba tshia Nsentedi (mu Mfualanse) tshia mu dia 15 Luishi 1985, dibeji dia 17. Nebikale bimpe bua tshisumbu kulongololatshi bua kuenza mudimu wa buambi muvule mu matuku makese a kumpala ne adi alonda Tshivulukilu.

⁶ Tshidimu tshishale, bantu 13 147 201 bakatantshila tshivulukilu tshia muanda eu wa mushinga mukole. Bu mudidi dituku dia mushinga mutambe onso mu tshidimu, tudi ne bua kuikalaku bonso.