Tutumbishayi Yehowa ne Mapa Etu A Budisuile
1 ‘Mulawu wikale kudi udi udinga, udi ne mulume wa mikoko mu bimuna biende, udi ulaya bua kumufila, pashishe udi ufila mukuabu udi mulema kudi Yehowa. Yehowa wa misumba udi wamba ne: Meme ndi Mukalenge munene.’ (Malaki 1:14) Bidi bitukemesha bua kumona bantu bakena bapuangane bapesha Mufuki bintu anyi? Kakuena tshintu mu bukua-mabulunge tshidi katshiyi tshiende nansha. Nzambi nkayende udi wamba mu Dîyi diende ne: ‘Bintu bia argent mbianyi, bintu bia or mbianyi.’ (Hagai 2:8) Nzambi kena dijinga ne mapa etu nansha, bualu bua Yeye muine mmudikumbaje. Mukalenge Davidi uvua mumanye bualu bua ne: tuetu bantu katuena mua kuvuija Wa-Bukole-Buonso mubanji nansha. Nenku, patudi tumupesha tshintu kayi tshionso, tshitudi tuenza nkumupingajila amu kantu kakese tshianana ku bintu bidiye mutupeshe, Yeye udi mpokolo wa “dipa dilenga dionso ne tshintu tshiakane tshionso.” Bua nunku tudi mua kukomesha ne: mapa etu menza bua ntendelelu wa Yehowa kaena ne mushinga nansha mukese ku mêsu kuende anyi? Nzambi udi upetula mapa etu a budisuile anyi? Mufundi wa misambu udi wandamuna ne: ‘Luayi ne mulambu kudiye, nubuele mu biendedi bia tshitendelelu tshiende.’—Mus. wa 96:8.
2 Mmushindu kayi udi bumanyishi bua lumu luimpe lua Bukalenge bukuatshishibue ne mfranga mu ditunga dietu? Nku diambuluisha dia mapa a budisuile mafila kudi basadidi ba Yehowa ne bantu bena mitshima mitoke. Ku diambuluisha dia mapa aa bulongolodi bua Yehowa budi bukuba bampanda-njila ba pa buabu, ba-misionere ne batangidi bena ngendu, kabidi ne dîku dia Betele. Tuelayiku meji ku bungi buvule bua mfranga mitula bua kufutshila dituma dia mikanda ne bibejibeji mu bisumbu bipite pa 2 200 bia mu Burundi, mu Congo ne mu Zaïre. Tutuku tumona mu lungenyi luetu bungi bua mfranga mitula, tshilejilu, bua dilongolola dia mpuilu ya distrike anyi? Netuambe tshinyi kabidi bua difunda ne ditapa dia mikanda yetu ku biamu? Mfranga eyi itu ifumina penyi? Netuambe ne: too ne ku mpindieu, mfranga ìdì itudibua, pabuipi ne yonso, idi ifuma ku diambuluisha dia mapa a budisuile a bana betu ba mu matunga bu mudi Belgique, France, ne makuabu kabidi. Aba badi bafila mapa mu matunga aa kabena anu bantu babanji nansha. Tòo mbatendeledi ba Yehowa badi baleja dianyisha diabu bua bintu bia mu nyuma. Badi bavuluka ntendelelu wa Yehowa pa kulongolola pa tshibidilu dipa bua Nzubu wa Yehowa. (Tangila 1 Kol. 16:2.) Mbantu balume ne bakaji, bana, bansonga ne bakulakaje, anu mudibi muetu munu.
3 Mu siekele wa kumpala wa bikondo bietu, mupostolo Paulo wakela tshisumbu tshia bena ku Filipe ka-lumbandi mu miaku eyi: ‘Apo nuakenza bimpe pa kuikala pamue nanyi mu dikenga dianyi . . . bualu, nansha ku Tesalonike, nuakantumina bua musangu wa kumpala, pashishe bua musangu muibidi, bintu bimvua nabi dijinga.’ (Fil. 4:14, 16, NW) Tudiku mua kuamba mêyi aa bua teritware wetu anyi? Netulejeku ngikadilu mulengele eu anyi? Yonso wa kutudi, udiku mua kujinga kuleja dianyisha diende bua bintu bia mu nyuma pa kufila mapa a budisuile anyi? Tshilejilu, ngondo mishale eyi, muayene wa mapa mafila kudi Zaïre uvua wa 180 NZ ku mumanyishi. Pabi, bua kuakama ditula dietu dionso dia mfranga pa bidi bitangila bumanyishi bua lumu luimpe mu ditunga, muayene wa mapa a budisuile ku ngondo wonso udi ne bua kuikala wa 4,45 dolare ku mumanyishi.
4 Pa kumona bionso ebi, tudi ne bua kudikonkonona bua kusunguluja bidi teritware wetu mukumbane bushuwa bua kuenza, bua kumona mua kuakama ditula dia mfranga bua mudimu wa Bukalenge. Dîyi-diludiki dilengele didi mu mukanda muibidi wa Paulo mufundila bena Kolinto, mu nshapita wa muanda-mukulu, didi ne bua kukoka ntema yetu. Bituikala tuanyisha disanka dietu dia kusadila Yehowa, netufile mapa ‘bilondeshile kumona kuetu.’ (mvese 3, NW) Muntu yonso udi ne bua kudikonkonona pa nkayende, “Bualu, diambedi bikala dipangadika dimpe koku, nditambe bulenga nangananga bilondeshile tshidi muntu natshi, kadi ki mpa tshidiye kayi natshi.”
5 Tudiku mua kumbusha ku “bikese bitudi nabi,” bua kufila mapa bua ntendelelu mukezuke anyi? Kampanda udi mua kuamba ne: “Meme, ndi muanyishe kufila kadi tshiena ne tshintu.” Imue misangu nebikale bikole bua bamue kadi ki mbua bakuabu nansha. Bansonga ne bakulakaje, balume ne bakaji, bana ne bakulumpe, bonso tudi mua kudikonkonona ne lubatshi bua kumona tshitudi mua kufila pa tshibidilu mu mushindu mutshintshikila. Katufu bundu bualu tudi amu ne bikese bia kufila bu mapa. (Tangila Luka 21:2-4.) Biafila muntu yonso mapa ku budisuile, ne mutshima wende mujima ne disanka kabidi, ne biafilabu mapa mavule kudi aba badi ne mushindu, neakumbaje pa aa adi apangika.—2 Kol. 8: 13, 14; 9:7.
6 Kasumbu ka bakulu ba mu tshisumbu kadi mua kuenza bia bungi bua dianyisha edi kudiundadi ne kukoladi mu tshisumbu. [Tangila kabidi ngenyi ya mu Tshibumba tshia Nsentedi tshia Tshisua-munene 1992 (wSH 12/92), mabeji 2 ne 3, bikoso bia 8 ne 10 ne dibeji dia 10, bikoso bia 16 ne 17, pa tshia dikumi.] Bakulu, nenusankeku bua kufikisha tshisumbu ku diangata mapangadika bua kutuma pa tshibidilu ne ku ngondo wonso dipa dia budisuile ku filiale anyi? (Anyishayi nutangile mu Mudimu wetu wa Bukalenge wa Tshimungu 1994 pa ngenzelu wa kulonda bua kufikisha tshisumbu ku diangata mapangadika). Bungi bua mfranga budi mua kushilangana ku ngondo ne ku mukuabu, bilondeshile dilubuluka dia mu nyuma dia tshisumbu ne mudi Yehowa ubenesha madikolela atshi mimpe.—Nsum. 10:22.
7 Bituafila ne disanka ne kalolo ne tshipatshila tshia kukuatshisha ntendelelu mulelela, netulubuluke. Tuteyayi ditshi ku dikankamija edi dia mu Nsumuinu 3:9, 10: ‘Tumbisha Yehowa ne biûma biebe ne mamuma a kumudilu a mu madimi ebe. Nunku mayeba ebe neuule tente ne bintu bia bungi.’ Pa kuenza nenku netuikale mua kuleja dianyisha dietu bua disanka ditupesha kudi Yehowa dia kumusadila mu mudimu wa tshijila. Ku diambuluisha dia mapa a budisuile enzabu kudi yonso wa kutudi, netukumbaje tshietu tshitupa mu dilubuluja ntendelelu mukezuke mu teritware wetu. Tuvulukayi nangananga se: pa kuenza nanku, tudi tutumbisha Yehowa ne bintu bietu bia mushinga.