Disambibua ne dikankamijibua​—Mabue a mushinga a nseke mivule

BAVULE ba kutudi bakaadi bapetangane ne bikondo bivuabu badiumvue bapele ba kalanda musenga​—ki ng’anu bapele mu malu a biuma kadi mu mitshima. Mioyo ivua mitushikile munda, peshi tuvua ne dibungama diondoke. Pabi, mu bikondo bia mushindu’eu tuvua mua kupeta tshintu kampanda tshia mushinga mukole tshivua mua kutuenzela buimpe buvulavulayi. “Dibue” adi dia mushinga ndikankamijibua.

Mu Bible muaku umue umue wa tshiena-Greke eu mbatumike nawu bua “kukankamija” ne “kusamba.” Miaku eyi yonso ibidi idi ne ngumvuilu wa dipetesha dikima, dikanda, anyi ditekemena. Nunku, mbimueneke patoke ne: patudi tudiumvua bateketangane anyi bashikile muoyo wa munda, disambibua ne dikankamijibua ke bitudi tukengela menemene. Nkuepi kudibi mua kupetshibua?

Bible udi utujadikila ne: Yehowa udi “Nzambi wa disambibua dionso.” (2 Kolinto 1:3, NW) Udi kabidi utuambila se: “kena kule ne yonso wa kutudi.” (Malu Menza 17:27, MMM) Nunku disambibua ne dikankamijibua bidi mua kupetshibua. Tuanjibi kukonkonona malu manene anayi mudi Yehowa upeteshila dikankamijibua.

Ku butuangaji bua malanda a muntu pa nkayende ne Nzambi

Mpokolo mutambe bunene wa disambibua udi malanda a muntu pa nkayende ne Yehowa Nzambi. Dimanya se: kudi mene mushindu wa kudia malanda bu nunku didi dikankamija. Ndekelu wa bionso, mmulombodi kayi wa pa buloba udi mua kuitaba dibikila dietu ku nshinga anyi kusua kumanya bivule pa bidi bitangila ntatu yetu? Yehowa mmupite ne kule bantu ba mushindu’eu bukole. Pabi, udi mudipuekeshi​—mutambe kudiakaja bua kuikala ne malanda ne bantu bapuekele, bakena bapuangane. (Musambu wa 18:35) Yehowa mmudianjile mene kuela tshiidia mu dituleja dinanga. Yowanese wa kumudilu 4:10 (MMM) udi wamba ne: “Dinanga diende didi nunku: ki ntuetu bavua banange [Nzambi, NW], apo yeye ke uvua mutunange, kutumaye Muanende bua adifile bu mulambo bua kutujimijila mibi yetu.” Kupita’apu, Yehowa udi ne dinanga dionso utukoka kudi Muanende.​—Yone 6:44.

Udiku muandamune ne mukebe disambibua mu bulunda ne Nzambi anyi? (Fuanyikija ne Yakobo 2:23.) Tshilejilu, biwikala ne mulunda musuibue, wa pa muoyo, kabienaku bia disanka bua kupitshisha tshikondo kampanda nende pa nkayebe, pa kuakula ne budikadidi buonso pa tunyinganyinga tuebe ne maditatshisha, matekemena ebe ne masanka anyi? Yehowa udi ukulomba bua kuenza nende bia muomumue. Kêna uteka mikalu pa bule bua dîba diudi mua kuakula nende mu masambila​—ne udi bulelela uteleja. (Musambu wa 65:2; 1 Tesalonike 5:17) Yezu uvua usambila pa tshibidilu ne disuminyina. Bushuwa, kumpala kua kusungulaye bapostolo bende 12, wakapitshisha butuku bujima mu masambila.​—Luka 6:12-16; Ebelu 5:7.

Ku musangu ne ku musangu, yonso wa kutudi udi mua kudiakaja bua kuikala nkayende ne Yehowa. Kusomba patupu mupuwe ku dididishi anyi diendakana dia ditalala bidi mua kupetesha mushindu muimpe bua kunzuluila Yehowa mutshima wetu mu masambila. Kuenza nunku kudi mua kuikala mpokolo wa disulakana dinenanenayi ne disambibua. Bituikala ne bimue bintu bia mu bufuki bua Yehowa bia kubandila patudi tueleela meji​—pamu’apa tshitupa kampanda tshia diulu, imue mitshi anyi nyunyu—​tudi mua kusokololamu bimue bivuluiji bidi bisamba bia dinanga dia Yehowa ne diditatshisha diende buetu.​—Lomo 1:20.

Ku butuangaji bua dilonga dia muntu pa nkayende dia Dîyi dia Nzambi

Kadi, ku butuangaji bua dilonga dia muntu pa nkayende dia Bible ke kudi ngikadilu ya Yehowa idisokolola bushuwa kutudi. Bible utu pa tshibidilu usokolola Yehowa bu “Nzambi mulekeledianganyi wa bilema ne mulenga, ukena ukuata tshiji lubilu ne muwule tente ne bulenga-bunangi.” (Ekesode 34:6, NW; Nehemiya 9:17; Musambu wa 86:15) Dijinga dia kusamba basadidi bende ba pa buloba ntshitupa tshia mushinga tshia bumuntu bua Yehowa.

Tshilejilu, anjibi kutangila mêyi a Yehowa mu Yeshaya 66:13: ‘Bu mudi muntu udi mamuende usamba, nennusambe bia muomumue.’ Yehowa wakenza bua dinanga dia mamu bua bana bende dikale dia didipua muoyo ne dia lulamatu. Biwikala mumane kumona mudi mamu wa dinanga usamba muanende udi mujiwuke, udi mumanye tshidi Yehowa usua kumvuija padiye wamba ne: neasambe bantu bende.

Miyuki mivule ya mu Bible idi ileja disambibua dia mushindu’eu ditumika. Pavuabu bafunyina muprofete Eliya lufu kudi Mukalenge-mukaji mubi Yezabele, wakajimija dikima diende ne kunyema bua kupandisha muoyo wende. Uvua mushikile muoyo wa munda bikole ne kumufikishabi too ne ku dienda munkatshi mua dituku dijima mu tshipela, kabiyi mpata kayi muangate mâyi anyi biakudia. Bua buôwa, Eliya wakambila Yehowa ne: uvua ujinga kufua. (1 Bakelenge 19:1-4) Yehowa wakenza tshinyi bua kusamba ne kukankamija muprofete wende?

Yehowa kakatobolola Eliya bua diumvua bunkaya, dipanga kuakanyina, ne buôwa. Bishilangane, muprofete wakumvua “dî dikese ditekete.” (1 Bakelenge 19:12) Biwabala 1 Bakelenge nshapita wa 19, neumone mushindu uvua Yehowa musambe Eliya, mumupoleshe, ne muibake ditabuja diende. Disambibua edi kadivua dia pa mutu pa mutu nansha. Diakabuela buludiludi mu mutshima musaluke wa Eliya, pa kukankamija muprofete eu bua kutungunuka. (Fuanyikija ne Yeshaya 40:1, 2.) Katupa kîpi panyima, wakatuadijilula mudimu wende.

Mu mushindu wa muomumue Yezu udi usamba ne ukankamija bamulondi bena lulamatu. Bushuwa, Yeshaya wakadianjila kumanyisha pa bidi bitangila Masiya ne: “Mfumu Munene Yehowa . . . mmuntume bua kupolesha badi ne mitshima mizengele . . . bua kusamba buonso badi mu madilu.” (Yeshaya 61:1-3, NW) Mu bule bua matuku ende a muoyo, Yezu wakaleja patoke ne: mêyi aa avua amutangila. (Luka 4:17-21) Biwumvua ne: udi ukengela disambibua, eleela meji pa malanda malenga, a dinanga a Yezu ne bantu bavua batapike ku mitshima ne bakengi. Bushuwa, dilonga dia Bible dienza ne ntema didi mpokolo munene wa disambibua ne dikankamijibua.

Ku butuangaji bua tshisumbu

Mu tshisumbu tshia bena nkristo, mabue a mushinga a nseke mivule a disambibua ne dikankamijibua adi abalakana. Mupostolo Paulo uvua muenzeja kudi spiritu bua kufunda ne: ‘Nunku nusambangane, nuibakangane muntu ne muntu.’ (1 Tesalonike 5:11) Mmunyi mudi disambibua ne dikankamijibua mua kupetshibua mu bisangilu bia tshisumbu?

Bushuwa, tudi diambedi tubuela mu bisangilu bia bena nkristo bua tuikale “balongeshibue kudi Yehowa,” bua kupeta dishidimunyibua pa bidi bimutangila yeye ne njila yende. (Yone 6:45, NW) Dishidimunyibua dia mushindu’eu ndienza bua kuikaladi dikankamija ne disambangana. Mu Bienzedi 15:32, tudi tubala ne: “Yuda ne Sila . . . bakambila [bana babu, NW] mei a bungi, bakakolesha mitshima yabo.”

Kuenaku muanji kuya mu tshisangilu tshia bena nkristo pavua mutshima mukushikile munda ne kupingana ku mbelu mumvue biakane anyi? Pamu’apa tshintu kampanda tshiamba mu muyuki, mu diandamuna, anyi mu disambila tshiakalenga mutshima webe ne kukupetesha disambibua ne dikankamijibua bivua bikengedibua. Nunku kupumbishi bisangilu bia bena nkristo nansha.​—Ebelu 10:24, 25.

Kudisangisha ne bana betu mu mudimu wa buambi ne bikondo bikuabu kudi mua kuikala ne buenzeji bua muomumue. Mu tshiena-Ebelu miaku mivule ya pa muanda idi yumvuija “kusuika pamue” idi kabidi ifunkuna “bukole” anyi “kukolesha”​—lungenyi ludi lumueneka patoke ludi lua se: bintu bitu bitamba kukolakana padibi bisuika pamue. Bualu ebu mbulelela mu tshisumbu. Tudi tusambibua, tukankamijibua, eyowa, tukoleshibua, pa kudisangisha pamue. Ne tudi basuika pamue kudi dinanga, tshisuikidi tshipite bionso bukole.​—Kolosai 3:14.

Ku misangu lulamatu lua bana betu ba mu nyuma ke ludi lutukankamija. (1 Tesalonike 3:7, 8) Imue misangu ndinanga didibu baleja. (Filemona 7) Ne imue misangu bidi anu mua kuikala kutumika pamue, dikaya ku dikaya, eku tuakula ne bakuabu pa bidi bitangila Bukalenge bua Nzambi. Biwadiumvua mutekete mu mikolo ne ukengela dikankamijibua pa bidi bitangila mudimu wa buambi, bua tshinyi kubenga kudilongolola bua kutumika ne mumanyishi kampanda mukulakaje anyi udi ne dimanya-kuenza divule? Pamu’apa neupetele disambibua divule ku dienza nunku.​—Muambi 4:9-12; Filipoi 1:27.

Ku butuangaji bua “mupika wa lulamatu ne wa budimu”

Nnganyi udi ulongolola mishindu ya disambibua ya ntendelelu wetu? Yezu wakateka kasumbu kampanda kakabikilaye bu “mupika wa lulamatu ne wa budimu” bua kufila “biakudia [bia mu nyuma] pa tshikondo tshiakane.” (Matayo 24:45, NW) Mu siekele wa kumpala B.B., kasumbu aka ka bena nkristo bela manyi kakavua kenza mudimu. Kasumbu kaludiki ka bakulu mu Yeruzaleme kakatumina bisumbu mikanda ya kushidimuna ne kuludika nayi. Ne tshipeta kayi? Bible udi ulonda muakandamuna bisumbu ku umue wa ku mikanda eyi: ‘Pakaubalabu, mitshima yabu yakasanka bua disamba diakabasambabu nadi.’​—Bienzedi 15:23-31.

Bia muomumue, mu matuku aa makole a ku nshikidilu, mupika wa lulamatu ne wa budimu udi ufila biakudia bia mu nyuma bidi bipetesha disambibua dinene ne dikankamijibua bua tshisamba tshia Yehowa. Udiku udia biakudia abi anyi? Mbiakaja bua kupetshibua ne lukasa mu mikanda mifunda idi kasumbu ka mupika kapetesha pa buloba bujima. Bibejibeji bia Tshibumba tshia Nsentedi ne Réveillez-vous! pamue ne mikanda, broshire, ne trakte bidi Société Watch Tower upatula mbipeteshe disambibua kudi babadi bakena kubadika.

Mutangidi kampanda muena ngendu wakafunda ne: “Bavule ba ku bana betu mbasue kuenza tshidi tshiakane, kadi badi pa tshibidilu bakama ditekeshibua mu mikolo, buôwa, ne nyanji ya se: kabena ne bukokeshi bua kudiambuluisha buobu bine. Biena-bualu mu bibejibeji bietu bidi biambuluisha bavule bua kupetulula bukokeshi bua kuludika nsombelu yabu ne kukanda mpampakenu yabu. Biena-bualu ebi bidi kabidi bipetesha bakulu tshintu kampanda tshia kufila tshipite ne kule dikankamijibua dia pa mutu pa mutu.”

Tumika biakane ne mikanda ya kudi kasumbu ka mupika wa lulamatu. Bibejibeji ebi bifunda mu tshikondo tshiakane, ne mikanda mikuabu bidi mua kutuambuluisha bua kupeta disambibua padi bikondo bikale bikole. Ku luseke lukuabu, biwikala pa muaba wa difila dikankamijibua kudi muena dibungama, tumika ne mamanyisha a mu Mifundu adi mu bibejibeji ebi. Biena-bualu ebi mbifundibue ne lubatshi, pa tshibidilu kunyima kua mbingu anyi ngondo ya makebulula mavule, dilonga, ne masambila. Mibelu eyi mmiashila pa Bible, mitetshibue ne milelela. Bamue mbamone se: bidi bia mushinga bua kubala tshiena-bualu kampanda peshi bibidi ne eu udi udiumvua mutekeshibue mu mikolo. Ebi bidi mua kupetesha disambibua divule ne dikankamijibua.

Biwasokolola mabue a mushinga, neualame anu buebe, peshi newabanyangane ne kalolo kuonso ndambu wa bubanji ebu ne bakuabu? Difundila tshipatshila tshia kuikala mpokolo wa disambibua ne dikankamijibua bua bana benu mu tshisumbu. Biwibaka pamutu pa kushimbula, kuela ka-lumbandi pamutu pa kujana, kuakula ne “ludimi lua bantu balongesha” pamutu pa kuamba ‘mêyi a biakulakula adi atapa bu muele wa mvita,’ udi mua kubueja dishintuluka mu nsombelu wa bakuabu. (Yeshaya 50:4, NW; Nsumuinu 12:18) Bushuwa, udi pamu’apa mua kuangatshibua bu dibue dia mushinga wewe muine​—mpokolo wa disambibua ne dikankamijibua dilelela!

[Kazubu mu dibeji 20]

Disambibua bua badi bakenga

BAVULE mbele nseka pa mushindu udi bimue biena-bualu bia Tshibumba tshia Nsentedi ne Réveillez-vous! biondoje malanda abu a muntu pa nkayende ne Yehowa. Umue wakamba ne: “Panyima pa dibala tshiena-bualu etshi, ngakumvua ne: Yehowa ne bukole buende buonso ne bunême uvua nanyi muaba umvua. Ngakumvua ne: udi muntu mulelela.” Mukanda mukuabu wakamba ne: “Mitshima yetu ne bieledi bia lungenyi mbishintuluke bikole pa bidi bitangila mmuenenu wetu wa Yehowa ne tudi kabidi balue bantu ba mushindu mukuabu. Mbifuane muntu udi mukupule ntalatala yetu ya mêsu, ne mpindieu tudi tumona bintu bionso bimpe bitambe.”

Bamue badi bafunda bua kumanyisha mushindu udi bibejibeji ebi bibambuluishe bua kuakama ntatu misunguluke anyi mitobo, nunku bibajadikila dibatabalela dia kudi Yehowa yeye muine. Mubadi kampanda udi umvuija ne: “Tuasakidila wa bungi bua musangu eu kabidi pa kutuleja mushindu udi Yehowa utabalela ne unanga tshisamba tshiende.” Mukaji kampanda mu Japon wakajimija muanende mu lufu wakamba tshidi tshilonda etshi pa tshiena-bualu tshia mu Réveillez-vous! atshi: “Buondoke bua luse lua Nzambi buvua bupongoloka kumbukila ku mabeji aa, ne mvua mudile mudile mudile. Ndi muteke biena-bualu ebi muaba undi mua kubibala diakamue dîba kayi dionso dindi ngumvua dibungama ne bunkaya.” Mukaji mukuabu muena tshinyongopelu wakafunda ne: “Biena-bualu bia Tshibumba tshia Nsentedi ne Réveillez-vous! ne broshire wa “Quand la mort frappe un être aimé” mbimpeteshe bukole bua kunanukila bikondo bianyi bia dibungama.”

Mifundu Minsantu ke mpokolo wa kumpala wa disambibua. (Lomo 15:4) Tshibumba tshia Nsentedi ntshilamate Bible bu tshieyemenu tshiatshi, ne ke tshidi Réveillez-vous!, nyanatshi wenza kabidi. Bua nunku, bibejibeji ebi mbidijadike mudibi mpokolo wa disambibua ne dikankamijibua kudi babadi.

[Tshimfuanyi mu dibeji 23]

Nzambi wa disambibua dionso udi kabidi Muteleji wa masambila