Ikala misangu yonso uupuila Yehowa bujitu buebe

BA BUNGI lelu’eu badi badiumvua baboza kudi majitu. Ntatu ya mfranga, bilumbu bia mu dîku bidi bibungamija, masama, ntatu ne makenga bikebesha kudi dikengeshibua ne dinyawudibua, ne mulongolongo wa mabungama makuabu mbilembelele bu mabue a mpelu ku nshingu yabu. Pa kumbusha bifimpakaji bidi bimueneka ebi, bamue badi kabidi badiumvua mu lungenyi luabu nkayabu buomeka bujitu bupite bua didiangata bu bantu badi kabayi ne mushinga ne bapangile bua dipanga bupuangane diabu. Ba bungi mbatete mua kulekela mene mvita yonso eyi. Mmunyi muudi mua kukolela ntatu padi bujitu bumueneke bunême ne kabuyi kuambula?

Tshikondo kampanda Mfumu Davidi muena mu Izalele wakumvua se: difimpakajibua kadivua kukolela. Bilondeshile Musambu wa 55, uvua musakibue ku ditanaji pa kuikala ne disumpakana bua difimpakajibua ne lukuna lua kudi baluishi bende. Wakumvua dibungama dikole ne buôwa. Uvua amu udiabakena ne tshinyongopelu tshiende. (Musambu wa 55:2, 5, 17) Pabi, nansha muvuaye ne dibungama, wakapeta mushindu wa kudikolela. Munyi? Wakakudimuka kudi Nzambi wende bua dikuatshisha. Mubelu wende kudi bakuabu badi mua kudiumvua muvuaye mudiumvue uvua ne: ‘Upuilayi Yehowa yeye nkayende bujitu buenu.’​—Musambu wa 55:22, NW.

Tshivuaye umvuija ntshinyi pa kuamba ne: ‘upuilayi Yehowa yeye nkayende bujitu buenu’? Mmumue ne: nkudila patupu kudi Nzambi mu disambila ne kumumanyisha kanyinganyinga ketu anyi? Peshi tudiku mua kuenza bualu kampanda tuetu nkayetu bua kupeta disulakana? Kadi bituadiumvua katuyi bakanyine bua kusemena kudi Yehowa? Tudi mua kusunguluja tshivua Davidi umvuija pa kutangila amue malu mamonamona avuaye muvuluke bikole pakafundaye mêyi aa.

Enza malu ku bukole bua Yehowa

Udi uvuluka muvua Goliata mukuatshishe mitshima ya bena tshiluilu bena Izalele buôwa anyi? Muntu wa mpolondo eu, wa bule bupite pa metre 2,7 uvua ubakuatshisha buôwa. (1 Samuele 17:4-11, 24) Kadi Davidi kakatshina nansha. Bua tshinyi? Bualu kakateta kuluangana ne Goliata ku bukole buende nkayende nansha. Katshia ku tshikondo tshiakedibuaye manyi bu mfumu wa Izalele wa matuku avua ne bua kulua, wakalekela spiritu wa Nzambi umulombola ne umukolesha mu bionso bivuaye wenza. (1 Samuele 16:13) Nenku wakambila Goliata ne: ‘Meme ndualua kuudi mu dîna dia Yehowa, Nzambi wa bena mvita bena Izalele uwakafunyina bulobo kumpala kuende. Yehowa neakufile mu tshianza tshianyi lelu’eu.’ (1 Samuele 17:45, 46) Davidi uvua muzanzamuke anu bu ndundu wa nyunyu, kadi tudi mua kujadika se: spiritu munsantu wa Yehowa wakalombola dibue diakasaye Goliata ne kudivuija ne bukole bua kushipa.​—1 Samuele 17:48-51.

Davidi wakakolela lutatu lunene elu ne kutshimunaye bualu uvua ne dieyemena dia se: Nzambi neamukuatshishe ne neamukoleshe. Wakadima malanda mimpe, a dieyemena kudi Nzambi. Kakuyi mpata, avua makoleshibue kudi mushindu uvua Yehowa mumusungile kumpala. (1 Samuele 17:34-37) Anu bu Davidi, udi mua kulama malanda mashême ne Yehowa ne kuikala ne dieyemena dijima mu bukokeshi ne muoyo muimpe wende bua kukukolesha ne kukukuatshisha mu nsombelu yonso.​—Musambu wa 34:7, 8.

Enza tshiudi mua kuenza bua kujikija lutatu

Kadi, ki mbuena kuamba ne: kakuakuikala tshikondo tshia dibungama dikole, tshia kanyinganyinga ne nansha buôwa, bu mudi Musambu wa 55 uleja patoke. Tshilejilu, bidimu bungi kampanda panyima pa dileja diende edi dia dieyemena kudi Yehowa kakuyi buôwa, Davidi wakumvua buôwa bukole kumpala kua baluishi bende. Wakajimija dianyishibua diende ku mêsu kua Mfumu Shaula ne uvua ne bua kunyema bua kukuba muoyo wende. Tetabi kuela meji pa dilubakana divua bualu ebu mua kukebela Davidi, nkonko ivuabi mua kujula mu lungenyi luende pa bidi bitangila dikumbana dia dilongolola dia Yehowa. Ndekelu wa bionso, wakedibua manyi bua kuluaye mfumu mu Izalele mu matuku avua ne bua kulua, too ne ku dîba adi uvua ne bua kupandisha muoyo wende pa kunyema mu tshipela, muipata anu bu nyama wa muitu. Pakatetaye kusokomena mu musoko wa Gath, muaba uvua Goliata mukolele, wakasokolodibua. Ne tshipeta kayi? Dilonda mianda didi diamba ne: “wakatamba kutshina.”​—1 Samuele 21:10-12.

Kadi kakalekela buôwa buende ne disumpakana diondoke bimupangisha bua kukudimuka kudi Yehowa bua diambuluisha nansha. Bilondeshile Musambu wa 34 (mufunda bu tshipeta tshia dimonamona malu edi), Davidi wakamba ne: ‘Ngakakeba Yehowa, ne yeye wakitaba kundi, wakansungila ku malu onso angakatshina. Muena dikenga eu wakadila kudiye, ne Yehowa wakamumvuila, wakamusungila ku makenga ende onso.’​—Musambu wa 34:4, 6.

Yehowa wakamukuatshisha bulelela. Ubambishe kabidi ne: Davidi kavua musombe patupu ne windila ne: Yehowa amusungile nansha. Wakasunguluja dikengedibua dia kuenza muende muonso mu bikondo kabukabu bua kupatukaye mu nsombelu wa lutatu. Wakasunguluja tshianza tshia Yehowa mu dimusungila diende, kadi yeye nkayende wakela tshidia tshia kumpala, wakadienza mupale bua se: mfumu wa mu Gate kamushipi. (1 Samuele 21:14-22:1) Tudi tukengela petu kuenza muetu muonso bua kumona mua kupita ne majitu etu, pamutu pa kuindila amu ne: Yehowa atusungile.​—Yakobo 1:5, 6; 2:26.

Kusakididi bujitu bukuabu ku majitu ebe nansha

Davidi wakalonga bualu bukuabu, bualu bua dibungama, kunyima mu nsombelu wende. Mbualu kayi? Mbua se: imue misangu tudi tusakidila bujitu bukuabu ku majitu etu mene. Panyima pa ditshimuna bena Filisti, malu akanyangukila Davidi pakapangadijaye bua kuya ne mushete wa tshiovo ku Yeruzaleme. Dilonda mianda didi diumvuija ne: ‘Davidi wakajuka ku Bâle-yuda ne bantu bonso bavua nende, bakaya kupingaja mushete wa Nzambi . . . Bakateka mushete wa Nzambi pa [ditempu dipiadipia, NW], . . . Uza ne Ahio, bana balume ba Abinadaba, bavua bendesha [ditempu, NW].’​—2 Samuele 6:2, 3.

Ditumika ne ditempu bua kuambula Mushete divua kushipa mêyi-mashidimunyi avua Yehowa mufile pa bualu ebu. Bivua bifundibue patoke se: bambudi bapeshibue bukenji ebu ng’anu bana balume ba Kohata bena Lewi, bavua ne bua kuambula Mushete pa makaya abu, ku diambuluisha dia mitshi mipitshisha mu masoso a bikanu bienzela ku Mushete. (Ekesode 25:13, 14; Nomba 4:15, 19; 7:7-9) Dipanga kulonda dîyi-dishidimunyi edi diakafikisha ku tshipupu. Pavua ngombe ivua ikoka ditempu miambe kuponesha mushete, Uza, úvuá muena Lewi kadi kayi muakuidi, wakolola tshianza bua kusombesha mushete ne wakashipibua kudi Yehowa bua dikamakama diende.​—2 Samuele 6:6, 7.

Davidi, bu muvuaye mfumu ùvua ne bua kupishibua mu bualabale kampanda bua muanda eu. Ngandamuinu wende udi uleja ne: nansha aba badi ne malanda mashême ne Yehowa badi imue misangu mua kuandamuna bibi mu mateta kampanda a mu nsombelu. Tshia kumpala Davidi wakafiika munda. Pashishe wakatshina. (2 Samuele 6:8, 9) Malanda ende a dieyemena kudi Yehowa avua matetshibue bikole. Apa bivua tshikondo tshiakamuenekaye mupangile kuupuila Yehowa bujitu buende, pavuaye kayi mulonde mêyi-matuma ende. Ebi bidi mua kuikala imue misangu nsombelu wetu anyi? Tutuku tudiwula Yehowa bua malu adi atufikila bualu tudi bapange kulonda mêyi-maludiki ende anyi?​—Nsumuinu 19:3.

Dikolela bujitu bua dibunda tshilumbu

Panyima pa matuku, Davidi wakadikebela bujitu bunene bua dibunda tshilumbu pa kuenza mpekatu munene pa kutupa ku mêyi-makulu a mu nsombelu a Yehowa. Apa Davidi wakalekela bujitu buende bua kulombola bantu bende mu mvita. Wakashala ku Yeruzaleme pakayabu ku diluangana. Ebi biakafikisha ku dilubakana dinene.​—2 Samuele 11:1.

Mfumu Davidi wakamona mulengele Bath-sheba wowa mâyi. Wakamuangata ne kuendaye nende, ne wakimita difu. (2 Samuele 11:2-5) Bua kuteta kusokoka tshilema tshiende etshi, wakalongolola malu bua bayende, Uriya kualukilaye ku Yeruzaleme kumbukila ku muaba wa mvita. Uriya wakabenga kuangatangana ne mukajende patshivua Izalele muditue mu mvita. (2 Samuele 11:6-11) Mpindieu Davidi wakatumika ne mishindu mibi ne ikena mu njila bua kusokoka mpekatu wende. Wakalongolola malu bua kutumabu Uriya kudi basalayi nende mu muaba wa njiwu mu mvita bua kushipibuaye. Mmpekatu wa tshikisu ne wa dibungama kayipu!​—2 Samuele 11:12-17.

Eyowa, ndekelu wa bionso mpekatu wa Davidi wakamulamata, ne Davidi wakedibua patoke. (2 Samuele 12:7-12) Tetabi kuela meji pa bujitu bua dibungama ne bua dibunda tshilumbu buvua Davidi ne bua kuikala mumvue pakasungulujaye bunene bua bienzedi biende bisonsola kudi lukuka luende. Uvua ne bua kuikala muimikidibue bujitu bua didiumvua mupangile yeye nkayende, nangananga bualu uvua imue misangu muntu wa lupampu ne wa butekete bua muoyo. Uvua ne bua kuikala mudiumvue kayi muakanyine nansha kakese!

Kadi, Davidi wakatonda bubi buende ne lukasa, utonda kudi muprofete Natana ne: ‘Ngakenzela Yehowa bibi!’ (2 Samuele 12:13) Musambu wa 51 udi utuambila muakadiumvuaye ne muakasengelelaye Yehowa Nzambi bua kumukezula ne kumulekelela bilema. Wakalomba ne: “Ungoweshe menemene ku tshilema tshianyi, ne unkezule ku mpekatu wanyi. Bualu, meme ndi mumanye bilema bianyi, ne mpekatu wanyi udi kumpala kuanyi dîba dionso.” (Musambu wa 51:2, 3, NW) Bualu wakalomba luse mu bulelela, uvua mua kuibakulula malanda ende makole, mashême ne Yehowa. Davidi kakashala mulame nyanji ya diumvua dinyingalala ne didiumvua kayi muakanyine nansha. Wakuupuila Yehowa bujitu buende pa kuitaba ne didipuekesha dipiila diende, kuleja dinyingalala dilelela bua mibi, ne kulomba bikole bua dilekelela bilema kudi Yehowa. Wakanyishibua tshiakabidi ku mêsu kua Nzambi.​—Musambu wa 51:7-12, 15-19.

Dikolela bupàngidi

Ebi bidi bitufila ku bualu buakasaka Davidi bua kufundaye Musambu wa 55. Uvua mu disumpakana dikole. “Mutshima wanyi udi unyingalala munda muanyi”, ke muakafundaye, “buowa bua lufu budi bunkuate.” (Musambu wa 55:4) Ntshinyi tshiakakeba kanyinganyinga aku? Absalome, muana wa balume wa Davidi, wakakeba mushindu wa kunyenga bumfumu kudi Davidi. (2 Samuele 15:1-6) Bupàngidi ebu bua kudi muanende wa balume buvua bukole butambe bua kubukolelaye, kadi tshiakabipisha kabidi malu bikole mmufidi wa ngenyi mueyemena wa Davidi, uvua mubikidibue Ahitofele, wakadisangisha pende mu mulongo wa batungidi bua kuluisha Davidi. Ahitofele ke udi Davidi muakula bualu buende mu Musambu wa 55:12-14. Bu tshipeta tshia tshitungu etshi ne bupàngidi, Davidi uvua ne bua kunyema Yeruzaleme. (2 Samuele 15:13, 14) Mbuôwa kayipu buvuabi bimukuatshishe!

Kadi, kakalekelela lupampu luende lukole ne dibungama kutalajabi ditekemena diende ne dieyemena kudi Yehowa nansha. Wakalomba Yehowa bua kulubakajaye malongolola a batungidi. (2 Samuele 15:30, 31) Tudi tumona kabidi ne: Davidi kavua windila ne ndengama bua Yehowa kuenzaye mudimu wonso nansha. Musangu wonso uvua mushindu umueneka, uvua wenza muende muonso bua kuluisha tshitungu tshienza bua kumuluisha. Wakatuma mukuabu wa ku bafidi bende ba ngenyi Hushai, bua kualukilaye ku Yeruzaleme bua kudingakaja kudisakidila ku mulongo wa batungidi, bualu wakaya bua kunyanga malongolola au. (2 Samuele 15:32-34) Ku diambuluisha dia Yehowa, lungenyi elu luakapatula bipeta bimpe. Hushai wakapetesha Davidi dîba dia bungi dia kudilongololaye bua kudiluila.​—2 Samuele 17:14.

Mmushindu kayipu uvua Davidi ne bua kuikala muanyishe bukubi bua Yehowa mu nsombelu wende mujima, ne lutulu luende ne mutshima muimpe wa kufuilangana luse! (Misambu 34:18, 19; 51:17) Mu nsombelu eu ke mudi Davidi utukankamija ne dieyemena mu bikondo bitudi ebi bia kanyinganyinga bua tuetu kukudimuka kudi Yehowa bua diambuluisha, ‘kuupuila Yehowa bujitu buetu.’​—Fuanyikija ne 1 Petelo 5:6, 7.

Wibake ne ulame malanda makole ne a dieyemena ne Yehowa

Mmunyi mutudi mua kushemesha malanda ne Yehowa bu Davidi, malanda akamukuatshisha mu bikondo bia matetshibua makole ne dikenga? Tudi tuibaka malanda a mushindu’eu pa kuikala balongi basuminyine ba Dîyi dia Nzambi, Bible. Tudi tumulekela bua atulongeshe pa bidi bitangila mikenji yende, mêyi-maludiki ende ne bumuntu buende. (Musambu wa 19:7-11) Patudi tuelangana meji pa Dîyi dia Nzambi, tudi tudiumvua balamate bikole kudiye ne tulonga bua kumueyemena muetu muonso. (Musambu wa 143:1-5) Tudi tuondoja ne tukolesha malanda aa patudi tusangila ne batendeledi netu bua kulongeshibua bia bungi kudi Yehowa. (Musambu wa 122:1-4) Tudi tudiundisha malanda etu ne Yehowa ku butuangaji bua masambila menza ne mutshima mujima.​—Musambu wa 55:1.

Bushuwa, Davidi uvua umvua, anu bu tuetu, dibungama pavua malanda ende ne Yehowa mapangile kuikala mashême muvuabi bikengedibue. Dikengeshibua didi mua ‘kutuandamuna bapote.’ (Muambi 7:7) Kadi Yehowa udi umona bualu buonso budi buenzeka, ne mmumanye tshidi mu mutshima wetu. (Muambi 4:1; 5:8) Tudi tukengela kuenza madikolela bua kulama malanda etu mashême ne Yehowa. Nenku, bua bujitu kayi buonso butuikala ne bua kuambula, tudi mua kutekemena se: Yehowa neatusansamune peshi neatupeshe bukole bua kumona mua kupita ne nsombelu wetu. (Filipoi 4:6, 7, 13) Mbisuikakaja ku bualu bua kushala balamate kudi Yehowa. Pakenza Davidi nunku, wakakubibua mu malu onso.

Nenku, mu nsombelu webe kayi yonso, ke mudi Davidi wamba, ikala misangu yonso uupuila Yehowa bujitu buebe. Apu netumone bulelela bua dilaya edi: “Yeye neakukoleshe. Kakulekela nansha kakese bua muakane kutetukaye.”​—Musambu wa 55:22, NW.