Mbualu bulenga kayipu bua kuikala misangu yonso mu bisangilu!

¹ Munkatshi mua makumi a bidimu ku Mputu wa ku Est, bavule ba ku bana betu basuibue bavua mu dikandika dia kuenza bisangilu patoke. Elayibi meji bua disanka diakumvuabu pakajika dikandika edi ne kupetabu mushindu wa kudisangisha pamue mu budikadidi!

² Mutangidi wa tshijengu kampanda wakafunda bua dikumbula diende mu tshisumbu kansanga tshivua tshipitshile mu nsombelu bu eu wamba ne: “Mu Dibidi dilolo, anu ne tshifikidi tshianyi bua kutuadija dikumbula, tshiamu tshitu tshifila luya mu nzubu kunyangukatshi. Pambelu, pavua mashika makole amba kukuatakaja mâyi, ne mu nzubu muvua degré 5. Bana betu bavua bavuale bizaku bia mashika, bitambala bijinga mu nshingu, gant ku bianza, bifulu ne bisabata bia mvula. Kakuvua muntu uvua mua kulondesha dibala mu Bible, bualu kakuvua mushindu wa kubulula mabeji. Mumvua muimane ku tshiakuidi mu kostime wanyi, mvua mufue ne mashika avua mandenge ne mu mifuba, ne musangu wonso umvua ngakula, mvua mmona lubungibungi lua mueyelu wanyi. Kadi bualu buakandenga ku muoyo mbua se: tshivuaku mumvue muaku nansha umue wa didilakana. Bana betu bonso bakamba muvuabi bilenga ne bia disanka dia bungi bua muvuabu badisangishe!” Bana betu abu kabavuaku nansha bele meji bua kupumbisha tshisangilu to!

³ Ke mututu tumvua anyi? Tudiku banange muabi wa kusangila mu budikadidi mu bisangilu bietu bia ku lumingu luonso anyi? Anyi tudi tuangata bisangilu anu ne mushinga mukese padi malu onso enda bimpe? Dibuela mu bisangilu pa tshibidilu didi mua kuikala bualu bukole, ne bidi mua kuenzeka imue misangu bua tupange kuikalamu bua kabingila kampanda kajalame. Kadi katupu muoyo nansha kakese ne: kudi bakuabu munkatshi muetu badi bamanye mushinga wa bisangilu ne batu misangu bu yonso babuelamu nansha mukadibu ne bidimu bia bungi, ne masama abatatshisha, ne bulema, ne midimu idi yangata mêba a bungi ne itshiokesha, ne majitu makuabu manene. Mbilejilu kayipu bilenga bitudi ne bua kulonda!​—Fuanyikija ne Luka 2:37.

⁴ Tuikalayi ne tshibidilu tshia kutua ntendelelu mulelela nyama ku mikolo mu dibuela mu bisangilu bietu bionso bia bena nkristo, biangatshile ku dilonga dia mukanda dia bantu bakese too ne ku mpungilu wa bantu ba bungi. Bua tshinyi tudi ne bua kumona dibuela mu masangila aa bu bualu bua mushinga mukole? Bualu kudisangisha pamue ndîyi-dituma dia Nzambi. Kadi kudi tubingila tukuabu tua mushinga. Buonso buetu tudi dijinga ne bipeta bimpe bipetela mu bisangilu bidi bifumina ku dishidimuna dia Nzambi ne diambuluisha dia spiritu munsantu. (Mat. 18:20) Tudi bakolesha ne dikankamijangana patudi tupetangana ne binetu badi ne ditabuja dia mushinga mukole.​—Eb. 10:24, 25.

⁵ Pakakudimuka Yezu mpala, Petelo wakamba ne: “Mulongeshi, mbilenga tusombe apa.” (Luka 9:33, Mukanda wa Mvidi Mukulu) Tudi ne bua kumvua bia muomumue bua bisangilu bietu bionso bia bena nkristo. Eyowa, mbualu bulenga kayipu bua kuikala misangu yonso mu bisangilu!