Tuyibale mu mushindu mujalame!

Ba bungi ba kutudi badi ne lutatu bua kubala Mifundu mudiyi mitela. Bakuabu pabu batu bayibala mu mushindu udi uteka bateleji mu ditanaja. Nenku, mmushindu kayi mujalame utudi mua kuyibala? Mukanda wa dilongesha dibala ne difunda wa Appliquez-vous à la lecture et à l’écriture udi umvuija bimpe bualu ebu. Tudienzeje bua kutumika ne ngenzelu eu udi mu dibeji 75: “Bituikala basue kumvuija tshidi anyima muikale, tudi mua kutangila mu Genese, nshapita muibidi, mvese wa muanda-mutekete. Nebafunde mushindu eu: Genese 2:7. . . . Bia muomumue, tudi mua kutangila mu nshapita muisambombo wa mukanda wa Matayo, mvese wa tshitema too ne wa dikumi ne muisatu. . . . Badi bafunda nunku: Matayo 6:9-13.” Bia muomumue, Matayo 6:9, 13, nebamubale ne: Matayo nshapita muisambombo, mvese wa tshitema ne wa dikumi ne muisatu, anyi kubala anu ne: Matayo isambombo, tshitema ne dikumi ne isatu. Tudi babambishe ne: tukoselu ne bitudilu mbipingana kudi “too,” “ne” anyi mbitupika mu dibala. Tshilejilu, kabena babala ne: “Matayo nshapita muisambombo, mvese wa tshitema, kakoselu wa dikumi ne muisatu!” Mu diakula mu mushindu mujalame, tudi tudileja bena mudimu ‘badi batumika bilenga ne dîyi dia bulelela’ bu mudi bana betu bakuabu bapiluke benza.​—2 Tim. 2:15, NW; 1 Kol. 1:10.