‘Vualayi bumuntu bupiabupia’
1 Bena Kristo badi banyisha dimanya dia bulelela! Mbutupeshe butoke pa nsombelu udi utuepula ku dilonda njila wa bena panu. Bu mudibu “kule ne muoyo wa kudi Nzambi,” badi “mu mîdima ya mu lungenyi.” (Ef. 4:18, NW) Mbatulongeshe mua kukudimuna lungenyi luetu kumbusha ngelelu wa meji wa bena panu pa kuvuula bumuntu bukulukulu ne kuvuala bupiabupia.—Ef. 4:22-24, NW.
2 Bumuntu bukulukulu budi bufikisha ku dibipa dia bikadilu bia tshitembu, ku dinyanguka ne ku lufu. Pa nanku, tudi tulomba bantu badi bateleja mukenji wa Bukalenge bua balekele tshiji tshionso, bumfiika-munda, bubi, bipendu ne ngakuilu wa bundu. Aba badi bajinga kupeta dianyisha dia Nzambi badi ne bua kuvuula bumuntu bukulukulu buonso ne dipangadika dikole, mushindu utubu bavuula tshilamba tshia manyanu.—Kolos. 3:8, 9.
3 Bukole bupiabupia budi buenzeja lungenyi: Kuvuala bumuntu bupiabupia kudi kulomba kulua bapiabapia mu bukole budi ne buenzeji pa lungenyi luetu. (Ef. 4:23) Mmunyi mudi muntu uvuija bukole abu, peshi ngikadilu wa lungenyi, bupiabupia bua kuikalaye munemenene luseke luimpe? Udi wenza nanku ku dilonga Dîyi dia Nzambi pa tshibidilu ne tshisumi ne ku dieleela meji pa tshididi diumvuija. Nenku, ngelelu mupiamupia wa meji udi udiunda, ne muntu udi umona malu bilondeshile mmuenenu wa Nzambi ne wa Kristo. Nsombelu wende udi ushintuluka padiye uvuala ngikadilu mivule mifuane ya Kristo bu mudi luse, bulenga, budipuekeshi bua mu lungenyi, bupole-malu, muoyo-mule ne dinanga.—Kolos. 3:10, 12-14.
4 Mu divuala bumuntu bupiabupia, tudi tuditapulula kudi bena panu. Nsombelu wetu udi utuvuija bashilangane nabu. Tudi tuambilangana bulelela ne tupatula mêyi malenga adi mua kukuatshisha bakuabu. Tudi tukanda tshiji tshietu ne tupingaja ngikadilu miakane ya buena Nzambi pa muaba wa kanyinganyinga, matandu, bipendu ne malu makuabu onso mabi. Tudi tuenza bivule kupita bidibu batulomba pa tshibidilu pa kuikala bafuidianganyi ba luse. Bionso ebi mbienza ku budisuile ne mutshima wetu mujima.—Ef. 4:25-32.
5 Katuvuudi nansha kakese bumuntu bupiabupia. Katuena mua kusadila Yehowa mu mushindu muanyishibue bituikala katuyi nabu. Tubulekele buambuluishe bua kukoka bantu ku bulelela, ne butumbishe Yehowa, Mufuki wa bumuntu buetu bupiabupia bua bena Kristo bua dikema.—Ef. 4:24.