Utu wenza muebe muonso mua kuenza anyi?

“NENNGENZE muanyi muonso mua kuenza.” Mmisangu bungi kayipu itu miaku eyi ilondibua mu nyima kudi muaku “kadi” ne mulongolongo wa malu a kukeba pa kudingila bua kubenga kuenza madikolela! Netuambe tshinyi bua mulambu wa bumuntu buetu kudi Yehowa? Tutu tukumbaja dilaya dietu dia kumuenzela muetu muonso mutudi mua kuenza anyi?

Padi muntu udilambula, ‘udi uditshipa mujima ku mudimu peshi ku ntendelelu wa Nzambi.’ Yezu wakambuluisha bikole bua kuleja tshidi kuditshipa kudi Yehowa kumvuija. Wakamba ne: “Biasua muntu kampanda kundonda, adibenge yeye muine, ne angate mutshi wende wa tshinyongopelu ne andonde amu kundonda.” (Matayi 16:24) Bua eu udi mudibenge yeye muine ne udi muditshipe kudi Nzambi, kukumbaja disua dia Nzambi kudi kuvua mudimu wa mushinga mukole mutambe mu nsombelu wende.

Tuetu badi baditshipe kudi Nzambi, tudi ne bua kudikonkonona bua kumona né tudi ne nsombelu udi mu diumvuangana ne mutshipu wetu. Pakakankamijaye bena nkristo bela manyi, Petelo wakaleja bua tshinyi tudi ne bua kudikonkonona: “Suminyinayi bua kushindika dibiikidibua dienu ne disungudibua dienu; bualu, binuatungunuka ne kuenza malu aa, tòo, kanuakulenduka nansha kakese.” (2 Petelo 1:10) Eyowa, bituenza muetu muonso mua kuenza, katuakulenduka mu nyuma to.

Tudi mua kukolesha “muetu muonso”

Badi batekemena pa tshibidilu bua se: basadidi baditshipe kudi Nzambi kuenzabo muabo muonso mua kuenza, peshi kuenza madikolela, bua kulengelela Yehowa. Kadi, tudi mua kudiundisha mikalu ya ngenzelu wetu wa “muetu muonso” bua pa bidi bitangila kuenza disua dia Nzambi. Bua muana wa balume wa bidimu bisatu, tshidiye mua kuenza mpindieu nkuambuluisha mamuende ne tudimu-dimu kampanda ku nzubu, kadi, padiye wenda ukola, neakumbane bua kuenza bivule kupita apu. Bidi bia muomumue kabidi bua dikola dietu dia mu nyuma​—etshi tshionso tshituvua mua kuenza ku ntuadijilu, katshitshiena nanku lelu’eu to. Tudi tudiumvua basakibue bua kuenza bivule bipitshidile bua Yehowa.

Dianyisha dietu, didi dienda divula bua Yehowa, didi dikolesha dijinga dietu dia kuenza bivule bipitshidile. Kudilongela kuetu kua Dîyi diende, Bible, kudi kukolesha dianyisha dietu bua bidiye mutuenzele. Tshilejilu: patudi tukonkonona ne ntema bidi Yehowa muenze​—wakatuma Muanende bua kufila anyima wende bua kupikula bukua-bantu ku mpekatu—​ne patudi tueleela meji pa malu aa, tudi tusakibua bua kusadila Eu uvua mulongolole bua tshia-bupikudi etshi kufidibuatshi. (Yone 3:16, 17; 1 Yone 4:9-11) Patudi tutamba ‘kulabula ne tumona se: Yehowa udi muimpe,’ mutshima wetu udi pawu utamba kusakibua bua kumusadila.​—Musambu wa 34:8.

Jetter, mukaji muena nkristo udi ku mudimu wa ku dîba ne ku dîba, wakajingulula muanda eu. Bua kumbula mu buondoke bivuaye ulonga, wakadilamina kazubu kampanda mu nzubu wende. Wakakalongolola mu mushindu wa kudifilaye mu makebulula. Uvua muteke mikanda yende ya Index des publications de la Société Watch Tower, pamue ne volumes ya Tshibumba tshia Nsentedi ne ya Réveillez-vous! pa katanda pavuaye mua kuyipeta ne lukasa luonso. Udi wamba ne: “Pandi mpeta bualu kampanda budi busankisha mu makebulula anyi, tshitu njingakana to bua kubuyukidila bakuabo.”

Kadi, anu bu mudi kudia biakudia bivule mu mpukapuka kakuyi kukandika muntu dikengedibua diende dia kudidiisha ku dituku ne ku dituku, ke mudi dikonkonona diondoke dia Bible dia mu mpukapuka kadiyi dishipa dikengedibua dia kudidiisha mu nyuma ku dituku ne ku dituku. Ruth mmumanye muanda eu biakane, bualu, utshidi muvuluke malu a kale a se: dinda dionso ne dilolo dionso kunyima kua didia, dîku diende dijima divua didisangisha bua kubala Bible. Mpindieu, ne bidimu 81, kunyima kua mumane kupitshisha bidimu 60 mu mudimu wa ku dîba ne ku dîba, udi’amu ubala Bible pa tshibidilu, pa dîba 6, padiye ujuuka ku tulu. Patshidiye upetelaku bibejibeji bia Tshibumba tshia Nsentedi ne Réveillez-vous!, Ruth udi udisumbila tshikondo tshia kubibala. Utu ukonkonona biena-bualu misangu isatu anyi inayi kumpala kua kubilongabo mu tshisumbu. Udi wamba ne: “Bua kushala bakole mu ditabuja, tudi ne bua kulonga Dîyi dia Nzambi.” Ke tshivua tshimuambuluishe kabidi bua kusuminyina mu mudimu wa ku dîba ne ku dîba munkatshi mua bidimu bivule.

Tuenzayi muetu muonso bua kuambuluisha bakuabo

Dilonga diondoke ne dia pa tshibidilu dia Dîyi dia Nzambi didi dikolesha mitalu yetu bua kumusadila, ne didi didima munda muetu tshintu kampanda tshidi tshitusaka bua kuenza bivule bipitshidile. (Fuanyikija ne Yelemiya 20:9.) Mitalu ya mushindu’eu ke yakasaka Hirohisa bua kukumbaja menemene mudimu wende. (2 Timote 4:5) Uvua mu dîku muvua amu muledi umu’epele wa bakaji, ne bakunyi banayi ba balume ne ba bakaji batshivua bapuekele. Nansha mutshivuaye nsongalume, Hirohisa uvua wambuluisha dîku diende ne mfranga pa kujuka pa dîba 3 wa dinda bua kuabanya bibejibeji. Uvua ujinga kutamba kuambila bakuabo malu adi atangila Yehowa, ke bua tshinyi wakuwuja dibeji dia dilomba nadi mudimu wa bumpanda-njila (ke mushindu utubu babikila Bantemu ba Yehowa ba-ministre benji ba mudimu wa ku dîba ne ku dîba). Nansha mutshivuaye mupuekele, uvua ne disanka dia kuambuluisha bantu bakuabo bua kuenza pabu muabo muonso bua kusamuna Yehowa, amu bu yeye.

Bituikala basue kuambuluisha bakuabo muetu muonso, tudi ne bua kuikala bazanzamuke mu mudimu wetu wa Nzambi. Dituku kampanda, Yezu wakakankamija balongi bende ne: “Binuamanya malu aa, nudi bena disanka binuikala nueenza!” (Yone 13:17) Naomi udi tshilejilu tshilenga tshia muntu udi utumikila mibelu mifila kudi bulongolodi bua Yehowa bua kulongolola mudimu wetu. Mu mudimu wa ku nzubu ne ku nzubu, uvua ne lutatu bua kuakula ne bantu bavuaye kayi mumanye: kavua mumanye tshia kuamba pavuaye ufika ku mbelu ya bantu. Bakulu ba mu tshisumbu tshiende bakamukankamija bua kutumikila mibelu ya mu mukanda wa Comment raisonner à partir des Écritures, mifila ku nshapita udi ne tshiena-bualu tshia “Entrées en matière pour la prédication.”a Wakalonga mbuelelu idi muinshi mua ka-tshiena-bualu ka “Famille/​Enfants” ne kutumika nayi misangu mivule. Wakafika ku ditungunuka ne diyukidilangana ne ina-banza kampanda wa bidimu bipite pa makumi asatu. Diambedi Naomi kayi muanji kupingana bua kumumona tshiakabidi, ina-banza eu wakalua ku Nzubu wa Bukalenge. Mapangadika akangatshibua bua kulonga nende Bible pamue. Yeye ne bayende bakadi mpindieu batambule, ne badi ne disanka mu nsombelu wabo pamue ne bana babo balela.

Tuenzayi muetu muonso bua kutabalela muntu yonso

Tudi kabidi mua kuidikija mupostolo Paulo wakamba ne: “Ndi nngenza bionso anu bua lumu luimpe, bua kuluabanyangana ne bakuabo.”​—1 Kolinto 9:22, 23.

Hatsumi wakangata mmuenenu eu. Mu mudimu wa ku nzubu ne ku nzubu, ne bukalanga buonso, mukaji kampanda wakamuambidila pa masoso matubuila pa tshiibi tshia nzubu ne: kavua ne dîba bua kuyukila nende to. Bu muvuaye ne dîyi dia bulunda, Hatsumi wakatungunuka ne kumukumbula. Misangu yonso, mukaji eu muena nzubu uvua umuandamuina amu pa masoso awu, kayi upatuka musangu nansha umue bua kumonangana ne Hatsumi. Biakatungunuka nenku mukantshi mua bidimu bibidi ne tshitupa.

Dituku kampanda, Hatsumi wakashintulula dîba dia dikumbula diende, e kuya kumona muntu’eu kunyima kua midi, kadi, kavuaku nansha. Nenku, pakavuaye upingana, wakumvua dîyi dikadiye muibidilangane nadi dimuebeja mu nyima ne: “Wewe udi nnganyi?” Mukaji uvua utshialukilaku. Pakumvuaye dîna dia Hatsumi, wakandamuna diakamue ne: “Akiah! Nng’wewe utu ulua pa tshibidilu bua kunkumbula. Tuasakidila bua muutu untabalela kukadi tshikondo tshile.” Kavua uteta kunzuluila Hatsumi tshiibi nansha kakese, bualu, mu muaba mukuabo, wakakosa pankatshi dilonga diende dia Bible pamue ne Bantemu ba Yehowa. Bakatuadija dilonga Bible, ne mukaji eu udi wela biidia bilenga. Tutuku tutabalela mushindu’eu aba batutu tupetangana nabo mu mudimu wetu wa ku nzubu ne ku nzubu anyi?

Enza muebe muonso

Madikolela atudi tuenza bua kusadila Yehowa muetu muonso adi amusankisha. Udi’amu bu tatu kampanda muena muana udi ulua kumulubuila kadó. Ne kupita kua bidimu, pamu’apa kadó katu kashintuluka bilondeshile bidimu bia muana peshi biuma biende. Amu bu mutu tatu umvua disanka bua kuangata bidi muanende umulubuila, nansha bikale bia munyi, bimupesha ne muoyo umue, ke mudi Yehowa pende wanyisha ku budisuile mudimu utudi tumuenzela ne muoyo mujima, mu diumvuangana ne dikola dietu dia mu nyuma.

Bushuwa, ki mbimpe kufuanyikija tshitudi mua kuenza muetu muonso ku makokeshi a bakuabo nansha. Amu bu muambile Paulo, netupete mushindu wa kusanka amu mu diumvuangana ne [mudimu] wetu nkayetu, ki ‘mmu diwufuanyikija ne wa muntu mukuabo nansha.’ (Galatia 6:4) Tudiku mua kutungunuka ne kuangata ne mushinga didimuija edi dia mupostolo Petelo, dia se: “Enzayi muenu muonso bua se: ndekelu wa bionso, nusanganyibue kudiye kanuyi katoba nansha tshilema, kadi mu ditalala.”​—2 Petelo 3:14.

[Mêyi adi kuinshi]

[Tshimfuanyi mu dibeji 29]

Utu wenza muebe muonso bua kutumikila mibelu mifila bua mudimu wa buambi anyi?