Nshapita 16
Mushindu uudi mua kusemena kudi Nzambi
MUBANDIDI kampanda uvua ukumbula dimue ditunga dia ku Azi wakakatshila bua bilele bia ntendelelu biakamonaye mu ntempelu kansanga wa bena Buddha. Nansha muvua bimfuanyi kabiyi ebi bia Mariya peshi bia Kristo, bivule bia ku bilele bivua bifuanangane ne ebi bia ekleziya wa mu ditunga dimulela. Tshilejilu, wakamona batumika ne minzadi ne benza mapunguluja a masambila mamba ku muoyo. Bantu bakuabo bakamona pabu bilele bia muomumue bifuanangane. Mu matunga a ku Est peshi a ku Ouest, mishindu idi bena kuitabuja bateta mua kusemena kudi Nzambi peshi kudi bintu bidibo batendelela mmifuanangane bikole.
2 Bavule badi bateta mua kusemena kudi Nzambi pa kutangija masambila kudiye. Disambila ndiumvuija bu “tshienzedi tshia diyukidilangana pankatshi pa muntu ne wa-tshijila peshi munsantu—Nzambi, banzambi, kalunga milabi, peshi makole akêna a panu.” (The New Encyclopædia Britannica) Kadi, padibo basemena kudi Nzambi, bamue batu anu ne lungenyi lutuma ku masanka adibo mua kupetela ku masambila abo. Tshilejilu, dimu’edi muntu kampanda wakebeja umue wa ku Bantemu ba Yehowa ne: “Biwasambila buanyi meme, ntatu yanyi ya mu dîku, ya ku mudimu, ne ya makanda anyi a mubidi neyijike anyi?” Mbimueneke se: ke tshivua ngeledi wa meji wa muntu eu, kadi bavule bàdì basambila badi bajingulula mudi ntatu yabu anu mitungunuke. Nunku, tudi ne bua kudiebeja: ‘Bua tshinyi tudi bushuwa ne bua kusemena kudi Nzambi?’
BUA TSHINYI KUSEMENA KUDI NZAMBI
3 Disambila ki ntshilele tshia patupu, peshi ki mmushindu patupu wa kupeta tshintu kampanda. Kabingila kanene ka kusemena kudi Nzambi nka kudia nende malanda masheme. Nunku, masambila etu adi ne bua kutumibua kudi Yehowa Nzambi. “Yehowa udi pabuipi ne aba badi bamubila,” ke muakamba mufundi wa misambu Davidi. (Musambu wa 145:18, NW) Yehowa udi utubikila bua tubuele nende mu malanda a ditalala. (Yeshaya 1:18) Aba badi bandamuna ku dibikila edi badi bitaba pamue ne mufundi wa misambu wakamba ne: “Kadi bidi bimpe bua meme kusemena pabuipi ne Nzambi.” Bua tshinyi? Bualu aba badi basemena pabuipi ne Yehowa Nzambi nebalabule disanka dia bushuwa ne ditalala dia mu tshieledi tshia lungenyi.—Musambu wa 73:28.
4 Bua tshinyi kusambila Nzambi bua atuambuluishe pende ‘mumanye bitudi tukengela bangabanga ne kumulomba’? (Matayo 6:8, NW; Musambu wa 139:4) Kusambila kudi kuleja se: tudi ne ditabuja kudi Nzambi ne tudi tumuangata bu Mpokolo wa “dipa dilenga dionso ne tshintu tshipuangane tshionso.” (Yakobo 1:17, NW; Ebelu 11:6) Yehowa udi usanka bua masambila etu. (Nsumuinu 15:8) Udi usanka bua kumvua mêyi etu masunguluke a dianyisha ne disamuna, anu mudi tatu usanka padiye uteleja muanende mutekete umuambila mêyi majalame a dimuela tuasakidila. (Musambu wa 119:108) Padiku malanda masheme pankatshi pa tatu ne muanende, kudi diyukidilangana dia dinanga. Muana udi munangibue mmusue kuakula ne tatuende. Mbia bushuwa kabidi pa bidi bitangila malanda etu ne Nzambi. Bituikala bushuwa tuangata ne mushinga malu atudi tulonga pa bidi bitangila Yehowa ne dinanga didiye mutuleje, netuikale ne dijinga dikole dia kumumanyisha ngenyi yetu mu masambila.—1 Yone 4:16-18.
5 Patudi tusemena kudi Nzambi Mutambe Kutumbuka, tudi ne bua kuleja kanemu, ne kabiena ne dikuatshisha bua kutamba kutatshisha lungenyi bua kupeta miaku mijalame ya kuamba. (Ebelu 4:16) Tudi anu ne mushindu wa kusemena kudi Yehowa matuku wonso. Ne ndisanka kayipu edi dia ‘kupumuna mutshima wetu’ kudi Nzambi mu masambila! (Musambu wa 62:8) Kuikala ne dianyisha kudi Yehowa kudi kusaka ku didia nende malanda a dinanga, anu bu aa avua pankatshi pende ne muena lulamatu Abrahame, uvua mulunda wa Nzambi. (Yakobo 2:23) Kadi, patudi tusambila Mfumu Mutambe Bunene wa bukua-bifukibua, tudi ne bua kuakaja bienzedi bietu bilondeshile malu adiye utulomba bua kusemena kudiye.
MALU MALOMBA BUA KUSEMENA KUDI NZAMBI
6 Bidi bikengela mfranga bua kusemena kudi Nzambi anyi? Bantu bavule batu bafuta bamfumu ba bitendelelu bua kusambilabo bua bualu buabu. Bamue badi bitaba se: masambila abo neatelejibue bilondeshile bungi bua mfranga ya mapa ivuabo bafile. Kadi, Dîyi dia Nzambi kadiena diamba se: bidi bikengela mapa a mfranga bua tuetu kusemena kudi Yehowa mu masambila nansha. Bintu bidiye upeteshangana mu nyuma ne mabenesha adi afuma ku malanda madia nende mu masambila ke bidi bikengedibua, kabiyi kufuta mushinga kampanda.—Yeshaya 55:1, 2.
7 Kadi, mmalu kayi adi malombibue? Ngikadilu mujalame wa mutshima wa muntu pa nkayende mbumue bua ku malu malomba manene. (2 Kulondolola 6:29, 30; Nsumuinu 15:11) Mu mutshima wetu tudi ne bua kuikala ne ditabuja kudi Yehowa Nzambi bu “Muteleji wa masambila” ne “mufutshi wa aba badi bamukeba ne muoyo umue.” (Musambu wa 65:2; Ebelu 11:6, NW) Tudi ne bua kuikala kabidi ne mutshima mudipuekeshi. (2 Bakalenge 22:19; Musambu wa 51:17) Mu tshimue tshia ku bimfuanyi biende, Yezu Kristo wakaleja ne: mulambuishi wa bitadi kampanda wakasemena kudi Nzambi ne ngikadilu wa mutshima mudipuekeshi wakadileja muakane kutamba Mufarizeyi kansanga wa lutambishi. (Luka 18:10-14) Patudi tusemena kudi Nzambi mu masambila, tuvuluke ne: “eu yonso udi mudibandishi mu mutshima udi tshintu tshia kudiwula kudi Yehowa.”—Nsumuinu 16:5, NW.
8 Bituikala tujinga se: Nzambi andamune ku masambila etu, tudi ne bua kudisukula tuetu bine ku nsombelu wa mpekatu. Pavua mulongi Yakobo ukankamija bakuabo bua kusemenabo kudi Nzambi, wakasakidila ne: “Sukulayi bianza bienu, nuenu bena mpekatu, kezulayi mitshima yenu, nuenu belakanyi.” (Yakobo 4:8, NW) Nansha benji ba malu mabi badi mua kubuela mu malanda a ditalala ne Yehowa bianyingalalabo ne kulekela nsombelu wabu wa diambedi. (Nsumuinu 28:13) Yehowa kêna mua kututeleja bituikala tudikokola tuetu nkayetu mutudi badisukule. “Mesu a Yehowa mmatangile kudi bakane, ne matshi ende mmatume ku misengelelu yabo; kadi mpala wa Yehowa udi mutangile kukuabu bua benji ba malu mabi,” ke mudi Dîyi dia Nzambi diamba.—1 Petelo 3:12, NW.
9 Bible udi wamba ne: “Kakuena muntu muakane pa buloba udi wenza amu malu mempe kayi wenza bualu bubi.” (Ntoyi 7:20, MMM) Pa nanku, udi ne bua kudiebeja ne: ‘Kadi, mmunyi mutudi mua kusemena kudi Yehowa Nzambi?’ Bible udi wandamuna ne: “Kadi pikala muntu muenze bibi, tudi ne mutuakuidi wetu kudi Tatu; ke Yezu Kristo, Muena Buakane.” (1 Yowanese 2:1, MMM) Nunku, nansha mutudi bena mpekatu, tudi mua kusemena kudi Nzambi ne budikadidi bua ngakuilu ku butuangaji bua Yezu Kristo, wakafua bu tshia-bupikudi bua bualu buetu. (Matayo 20:28) Yeye udi mufikishi wa dîyi umuepele, anu ku butuangaji buende ke kutudi mua kusemena kudi Nzambi. (Yone 14:6) Katuena ne bua kuangata mushinga wa mulambu wa tshia-bupikudi wa Yezu bu ukadi mumane kubuikila mpekatu yetu yonso nansha bituikala tutungunuka ne kuenza mikuabu ku budisuile. (Ebelu 10:26) Kadi, bituenza madikolela ne muoyo umue bua kuela nkila ku malu mabi, eku tutupakana imue misangu, tudi mua kunyingalala ne kulomba dilekelela kudi Nzambi. Bituasemena kudiye ne mutshima mudipuekeshi, neatumvuile.—Luka 11:4.
BABIDILA MEBA A KUAKULA NE NZAMBI
10 Yezu Kristo wakangata malanda ende ne Yehowa ne mushinga mukole menemene. Pa nanku, mu programe wende, Yezu uvua wakaja dîba dia kuakula ne Nzambi mu masambila a pa nkayende. (Mâko 1:35; Luka 22:40-46) Netutambe kuenza bimpe pa kuidikija tshilejilu tshia Yezu ne kusambila Nzambi pa tshibidilu. (Lomo 12:12) Mbiakanyine bua kutuadija dituku ne miaku ya disambila, ne kumpala kua kulala, tudi bushuwa mua kuela Nzambi tuasakidila bua midimu mienza mu dituku dijima. Munya mujima, wangate dipangadika dia kusemena kudi Nzambi “diba dionso.” (Bena Efeze 6:18, Mukenji mulenga) Tudi nansha mua kusambila munda-munda, bamanye ne: Yehowa udi mua kutumvua. Diakula ne Nzambi dia pa nkayetu didi dituambuluisha bua kukolesha malanda etu nende, ne kusambila Yehowa ku dituku ne ku dituku kudi kutuambuluisha bua kusemena pabuipi nende menemene.
11 Yehowa utu kabidi uteleja masambila menza bua bisumbu bia bantu. (1 Bakelenge 8:22-53) Tudi mua kusemena kudi Nzambi dîku dijima popamue, ne mfumu wa dîku muikale ulombola bantu buonso mu disambila. Ebi bidi bikolesha malanda masuikakaji a bena dîku, ne ku mêsu kua bana, Yehowa udi ulua kampanda udiku bushuwa padibo bateleja mushindu udi baledi babo basambila Nzambi ne budipuekeshi. Netuenze tshinyi pikala muntu kampanda usambila bua musumba wa bantu bu muleji-mpala, imue misangu mu bisangilu bia Bantemu ba Yehowa? Bituikala munkatshi mua bateleji, tudi ne bua kuteleja ne ntema yonso, nunku ku ndekelu wa disambila, katuyi tuelakana tudi mua kuamba “Amen,” mbuena kuamba ne: “Bidi nanku.”—1 Kolinto 14:16.
MASAMBILA ADI YEHOWA UTELEJA
12 Bamue badi mua kumona se: Nzambi katu wandamuna ku masambila abo nansha mudibo bamusambila ku butuangaji bua Kristo. Pabi, mupostolo Yone wakamba ne: “Bitualomba tshintu kayi tshionso mu diumvuangana ne disua [dia Nzambi], yeye udi utumvuila.” (1 Yone 5:14, NW) Nunku, bidi bikengela bua tuetu kulomba mu diumvuangana ne disua dia Nzambi. Bu mudiye uditatshisha bua makanda etu a mu nyuma, tshintu tshionso tshidi tshilenga nsombelu wetu wa mu nyuma ntshiena-bualu tshikumbanyine tshia disambila. Tudi ne bua kutantamena ditetshibua dia kujamija ngenyi yetu yonso pa bintu bia ku mubidi bitudi tukengela. Tshilejilu, nansha mudibi bikumbanyine bua kusambila bua busunguluji ne makanda malenga a tshieledi tshia lungenyi bua kuakama disama, disumpakana bua makanda a mubidi kadiena ne bua kubuikila anyi kubambidika panshi majinga etu a mu nyuma nansha. (Musambu wa 41:1-3) Pakajingululaye muvuaye ulubakana bikole bua makanda ende a mubidi, muena nkristo kampanda mukaji wakalomba Yehowa bua amuambuluishe bua kuikala ne mmuenenu muakanyine pa disama diende. Bu tshipeta, ntatu ya disama diende yakalua muanda wa bujitu bukese, ne wakadiumvua bu uvua mupeshibue “bukole budi butambe bua ku tshileledi.” (2 Kolinto 4:7, NW) Dijinga diende dia kuikala muambuluishi wa bakuabo mu nyuma diakadiunda, ne wakalua mumanyishi wa ku dîba ne ku dîba wa Bukalenge.
13 Mmalu kayi atudi mua kubueja mu masambila etu adi mua kusankisha Yehowa bua kuatelejaye? Yezu Kristo wakalongesha balongi bende mua kusambila. Mu disambila dia tshitembelu difunda mu Matayo 6:9-13, wakafila tshilejilu tshia biena-bualu bitudi bushuwa ne bua kubueja mu disambila. Mu masambila etu, ntshinyi tshidi ne bua kuikala pa muaba wa kumpala? Dîna dia Yehowa Nzambi ne Bukalenge buende bidi ne bua kuangatshibua ne mushinga kupita bikuabu bionso. Mbikumbanyine bua kulomba bintu bia ku mubidi bitudi tukengela. Mbia mushinga kabidi bua kulomba bua dilekelela dia mpekatu yetu ne disungidibua ku matetshibua ne ku buenzeji bua mubi, Satana Diabolo. Yezu kavua musue bua tuetu kuikala tuimba disambila edi bu kasambu peshi tudiambulula ku musangu ne ku musangu, tuamba mêyi adi ku muoyo eku katuyi tuela meji pa diumvuija diadi. (Matayo 6:7) Pikala muana wambulula mêyi amue amue dîba dionso didiye wakula ne tatuende, malanda abu adi mua kuikala a mushindu kayi?
14 Kusakidila ku milombo ne misengelelu idi ifuma mu mushima, tudi ne bua kuenza masambila a disamuna ne dileja dianyisha. (Musambu wa 34:1; 92:1; 1 Tesalonike 5:18) Tudi mua kusambila kabidi bua bakuabo. Masambila menza bua bana betu ba mu nyuma padibo mu tshinyongopelu peshi padibo bakengeshibua adi aleja kuditatshisha kuetu bua bualu buabu, ne patudi tumuambila malu bu nunku, Yehowa udi usanka bua kututeleja. (Luka 22:32; Yone 17:20; 1 Tesalonike 5:25) Nunku, mupostolo Paulo wakafunda ne: “Kanusumpakanyi bua tshintu nansha tshimue, kadi, mu malu wonso, ku masambila ne misengelelu ne dianyisha, numanyishe Nzambi milombo yenu; ne ditalala dia Nzambi didi dipite lungenyi kayi luonso bulenga, nedilame mitshima yenu ne bieledi bienu bia lungenyi ku butuangaji bua Kristo Yezu.”—Filipoi 4:6, 7, NW.
UNANUKILE MU MASAMBILA
15 Nansha muudi wenda upeta dimanya dia Nzambi, udi mua kumona se: imue misangu masambila ebe kaatu andamunyibua. Bidi mua kuikala nanku, bualu pamu’apa dîba dia Nzambi kuandamuna ku disambila kampanda disunguluke ki ndianji kukumbana. (Muambi 3:1-9) Yehowa udi mua kulekelela nsombelu kampanda unenga lupolo luîpi, kadi utu wandamuna ku masambila ne mmumanye dîba dipite buimpe dia kuenza nunku.—2 Kolinto 12:7-9.
16 Dinanukila dietu mu masambila didi disokolola diteka dijima dia mutshima wetu ku muanda utudi tuambila Nzambi. (Luka 18:1-8) Tshilejilu, tudi mua kulomba Yehowa bua atuambuluishe bua kutshimuna butekete kampanda. Pa kunanukila mu masambila ne pa kuenza malu mu diumvuangana ne milombo yetu, tudi tuleja mutudi bena dîyi anu dimue. Tudi ne bua kuamba malu masunguluke ne muoyo mujima mu milombo yetu. Bidi bia mushinga bua kusambila bia bungi nangananga patudi tuakama ditetshibua. (Matayo 6:13) Bituatungunuka ne kusambila eku tuteta mua kutantamena bisonsodi bia mpekatu, netujingulule mushindu udi Yehowa utuambuluisha. Ebi nebidiundishe ditabuja dietu ne kukolesha kabidi malanda etu nende.—1 Kolinto 10:13; Filipoi 4:13.
17 Pa kudima tshibidilu tshia kusambila patudi tuenzela Yehowa Nzambi mudimu wende munsantu, netufike ku dijingulula se: katuena tumusadila ku bukole buetu nkayetu nansha. Yehowa ke udi utupesha bukole bua kumuenzela mudimu. (1 Kolinto 4:7) Kumanya muanda bu nunku nekutuambuluishe bua kuikala badipuekeshi ne nekulengeje malanda etu nende. (1 Petelo 5:5, 6) Eyowa, tudi ne tubingila tujalame bua kunanukila mu masambila. Masambila etu menza ne muoyo mujima ne dimanya dia mpatshi dia mushindu wa kusemena kudi Tatuetu wa dinanga udi mu diulu nekutupeteshe nsombelu wa disanka dia bushuwa.
DIYUKILA NE YEHOWA KADITU DIYA ANU LUSEKE LUMUE
18 Bituajinga se: Nzambi umvue masambila etu, tudi ne bua kuteleja bidiye wamba. (Zekâya 7:13) Katu utuma kabidi mikenji yende ku butuangaji bua baprofete bapuijila spiritu wa Nzambi ne bushuwa kêna utumika ne mishindu ya mu majimbu. (Dutelonome 18: 10-12) Kadi tudi mua kuteleja Nzambi pa kulonga Dîyi diende, Bible. (Lomo 15:4; 2 Timote 3:16, 17) Anu mutudi mua kujinga bua kudima lulabuilu bua biakudia bia ku mubidi bisheme ne biibaki bia mubidi, tudi balombibue bua “kujinga bikole mabele kaayi matuke a dîyi.” Udime lulabuilu bua biakudia bia mu nyuma pa kubala Dîyi dia Nzambi dituku dionso.—1 Petelo 2:2, 3, NW; Bienzedi 17:11.
19 Weleele meji pa biudi ubala mu Bible. (Musambu wa 1:1-3; 77:11, 12) Ebi bidi biumvuija kupima mushinga wabi ne kukeba mua kupetelaku masanka. Udi mua kufuanyikija mudimu eu ne dipueka dia biakudia ne mala. Udi mua kupuekesha biakudia bia mu nyuma pa kusuikakaja biudi ubala ku ebi biwukadi mamanye. Wele meji ne ntema pa buenzeji budi nabu mamanyisha [mapiamapia] pa nsombelu webe, peshi udijinguluile bidiwo asokolola pa ngikadilu milenga ya Yehowa ne malu adiye muenzele bantu. Nunku, pa kudilongela pa nkayebe, udi mua kudia bilenga menemene biakudia bia mu nyuma bidi Yehowa ufila. Ebi nebitambe kukusemeja pabuipi ne Nzambi ne kukuambuluisha mua kupita ne ntatu ya dituku dionso.
20 Udi kabidi mua kusemena kudi Nzambi pa kuteleja mumvuija pa Dîyi diende mu bisangilu bia bena nkristo, anu muvua bena Izalele bateleje ne ntema pavuabo badisangishe bua kuteleja dibala dia patoke dia Mikenji ya Nzambi. Balongeshi ba tshikondo atshi bakafila mumvuija pa bivuabo babala mu Mikenji, nunku bakambuluisha babateleji babo bua kujingulula ne kusakibua ku ditumikila malu akatelejabo. Ebi biakatuala disanka dinene. (Nehemiya 8:8, 12) Nunku, suaku ukune tshibidilu tshia kubuela mu bisangilu bia Bantemu ba Yehowa. (Ebelu 10:24, 25) Ebi nebikuambuluishe bua kumvua bimpe dimanya dia Nzambi ne kuditumikila mu nsombelu webe, kabidi nebikutuadile diakalenga. Kuikala mu buena muntu bua bena nkristo pa buloba bujima nekukuambuluishe bua kushala pabuipi ne Yehowa. Kabidi, anu mutuabimona, udi mua kupeta dikubibua dia bushuwa munkatshi mua tshisamba tshia Nzambi.
TETA DIMANYA DIEBE
Bua tshinyi udi ne bua kusemena kudi Yehowa?
Ng’amue malu kayi adi malombibue bua kusemena kudi Nzambi?
Mbintu kayi biudi mua kulomba mu masambila ebe?
Bua tshinyi udi ne bua kunanukila mu masambila?
Mmunyi muudi mua kuteleja Yehowa lelu’eu?
[Nkonko ya dilonga]
1. Mmafuanangana kayi adi asanganyibua mu bitendelelu bivule?
2. Mmunyi mudibo bumvuija disambila, ne bua tshinyi bantu bavule batu basambila?
3. Masambila etu adi ne bua kutumibua kudi nganyi, ne mbua tshinyi?
4, 5. (a) Bua tshinyi mbia mushinga bua kutuma masambila kudi Nzambi? (b) Mmalanda a mushindu kayi atudi mua kuibaka ne Nzambi ku masambila?
6, 7. Nansha mudi Nzambi kayi ulomba difutu bua kuteleja masambila etu, udi utulomba tshinyi patudi tusambila?
8. Bituikala tujinga bua Nzambi andamune ku masambila etu, tudi ne bua kudisukula ku tshinyi?
9. Tudi ne bua kusemena kudi Yehowa ku butuangaji bua nganyi, ne mbua tshinyi?
10. Mu masambila etu, mmunyi mutudi mua kuidikija Yezu, ne ng’amue mêba kayi masunguluke atudi mua kusambila pa nkayetu?
11. (a) Bua tshinyi mêku adi ne bua kusambila pamue? (b) Paudi wamba “Amen” ku ndekelu wa disambila, bidi biumvuija tshinyi?
12. (a) Bua tshinyi Nzambi kêna wandamuna ku amue masambila? (b) Patudi tusambila, bua tshinyi katuena ne bua kushindamena anu pa majinga etu nkayetu?
13. Anu mudibi bileja mu Matayo 6:9-13, mbimue bintu kayi bidi mua kuikala biena-bualu bikumbanyine bia masambila etu?
14. Pa kumbusha milombo, mmasambila a mushindu kayi atudi mua kuenza?
15. Tudi ne bua kuvuluka tshinyi pikala masambila etu amueneka kaayi andamunyibua?
16. Bua tshinyi tudi ne bua kunanukila mu masambila, ne kuenza nunku kudi mua kuikala ne buenzeji kayi pa malanda etu ne Nzambi?
17. Mmasanka kayi atuapetela ku tshibidilu tshia kusambila mu mudimu wetu bua Nzambi?
18. Mmunyi mutudi mua kuteleja Nzambi?
19. Mmasanka kayi audi usuna ku dielangana meji pa biudi ubala mu Bible?
20. Mmunyi mudi kubuela mu bisangilu bia bena nkristo kutuambuluisha bua kusemena kudi Nzambi?
[Tshimfuanyi dibeji dijima mu dibeji 157]