Utu ujinga bikole bua kusadila tshishiki anyi?

“MVUA mufiikile Yehowa munda,” ke mudi Laura wamba. “Ngakasambila ne kusambila bua ne: atuambuluisheku bua kujikija ntatu ya mfranga bua meme kumona mua kutungunuka ne kuenza bumpanda-njila​—kadi tshipeta nansha tshimue. Ndekelu wa bionso mvua ne bua kumbuka mu mulongo wa bampanda-njila. Ndi ne bua kuitaba kabidi ne: mvua ne mukawu bua aba bavua batungunuka.”

Kabidi, tangila tshilumbu tshia Michael, musadidi wa mudimu mu tshisumbu kampanda tshia Bantemu ba Yehowa. Uvua wipatshila mudimu wa mutangidi. (1 Timote 3:1) Pakabenga kukumbana dijinga diende edi mu bidimu bivule, wakapeta njiya mikole ne kakasua kabidi bua kupeshibua disanka kampanda dia mudimu. “Tshivua mua kukokesha kabidi dikenga dia dibungamijibua,” ke mudiye wamba.

Uvuaku mupete bualu bumona bua muomumue anyi? Uvuaku ne bua kulekela disanka kampanda dia mudimu wa teokrasi diuvua munange anyi? Tshilejilu, uvuaku ne bua kuimanyika disadila bu mpanda-njila, mumanyishi wa Bukalenge wa ku dîba ne ku dîba anyi? Peshi utu ujinga bikole amue majitu a tshisumbu mambika bakuabu? Bidi nansha mua kuikala ne: udi ne dijinga dikole dia kusadila ku Betele anyi bu misionere, kadi nsombelu yebe kayena ikupetesha mushindu.

“Ditekemena didibo balayidila didi disamisha mutshima,” ke mudi mukanda wa Nsumuinu ujadika. (Nsumuinu 13:12) Bidi mua kuikala nanku nangananga padi bakuabu bapeta masanka mine a midimu autu utekemena. Dîyi dia Nzambi didiku difila bujinguludi, busambi, ne ditekemena bua yonso udi upeta dibungamijibua dia nunku anyi? Eyowa. Bushuwa, Musambu wa 84 udi uleja nyanji ya musadidi wa Yehowa uvua ne majinga kaayi makumbaja a muomumue pa bidi bitangila mudimu wa Yehowa.

Dianyisha dia muena Lewi

Benji ba Musambu wa 84 bavua bana ba Kora, bena Lewi bakasadila mu ntempelo wa Yehowa ne bakangata masanka abu a mudimu ne mushinga mutumbuke. “Yehowa wa misumba, ke mudi muaba webe ûdi mushikame mulengele nunku!” ke mudi umue wa kudibu ukema. ‘[“Anyima,” NW] wanyi udi ujinga, e, udi mupange ne dijinga dia biendedi bia mu tshitendelelu tshia Yehowa. Mutshima wanyi ne mubidi wanyi bidi biela mbila bua Nzambi wa muoyo.’​—Musambu 84:1, 2.

Muena Lewi eu uvua ne dijinga dikole dia kusadila ku ntempelo wa Yehowa mu mushindu wa se: nansha tshimuenekelu tshia pa tshibidilu mu njila mutangile ku Yeruzaleme tshivua tshimueneka tshikoka ntema kudiye. ‘Papitshilabu mu tshibanda tshia Baka,’ ke mudiye wamba, ‘badi batshivuija muaba wa mishimi ya mâyi.’ (Musambu 84:6) Eyowa, tshijengu tshiume pa tshibidilu tshivua bu muaba mubolesha biakane ne mâyi.

Bu muvua mufundi wa misambu kayi muena Lewi wa mulongo wa bakuidi, uvua usadila ku ntempelo anu bua lumingu lumue patupu ku ngondo yonso isambombo. (1 Kulondolola 24:1-19; 2 Kulondolola 23:8; Luka 1:5, 8, 9) Matuku makuabu ende onso àdì ashala uvua uapitshishila ku nzubu mu tshimue tshia ku bimenga bia bena Lewi. Nunku wakimba ne: ‘E, mushamusha wakudisanganyina nzubu, ne kandindi kakadisanganyina disua dia kutekamu bana baku; bidi pepi ne bioshelu biebe, Yehowa wa misumba, Mukalenge wanyi ne Nzambi wanyi.’ (Musambu 84:3) Ndisanka kayipu divua muena Lewi mua kuikala nadi bu yeye muikale bu nyunyu ivua ne miaba ya disombela pa tshibidilu ku ntempelo!

Bivua mua kuikala bipepele bua muena Lewi kunyingalalaye bualu kavua mua kusadila ku ntempelo misangu yonso. Kadi, uvua usanka bua kusadila bu muvuaye mua kuenza, ne bushuwa wakajadika ne: bulamate bua mutshima umue kudi Yehowa mbuakanyine madikolela. Ntshinyi tshiakambuluisha muena Lewi eu wa lulamatu bua kushala musangale mu masanka ende a mudimu?

Longa bua kuikala musangale

‘Dituku dimue mu biendedi bia mu tshitendelelu tshiebe didi dipita matuku tshinunu a kukuabu buimpe,’ ke mudi muena Lewi wamba. ‘Mvua mua kusungula bua kuimana kumbelu kua nzubu wa Nzambi wanyi kumpala kua kushikama mu ntenta ya malu mabi.’ (Musambu 84:10) Wakajingulula bimpe ne: dipitshisha nansha dituku dimue ku nzubu wa Yehowa ndisanka dia mudimu dikena kutua mushinga. Ne muena Lewi uvua ne matuku mapite pa dimuepele bua kusadila ku ntempelo. Musangelu wende bua masanka ende a mudimu wakamuimbishisha ne disanka.

Bidi munyi buetu tuetu? Tutu tuanyisha mabenesha etu, peshi tutu tujinga kupua muoyo bitukadi nabi mu mudimu wa Yehowa? Bua bulamate buabu kudiye, Yehowa mmuambike bantu bende mulongolongo wa masanka a mudimu ne majitu. Ebi bidi bikonga majitu manême a butangidi, bulami, dilongesha, ne mishindu kabukabu ya mudimu wa ku dîba ne ku dîba. Kadi bidi bikonga kabidi malu makuabu a mushinga mukole adi atangila ntendelelu wa Yehowa.

Tshilejilu, tangila mudimu wa Buena-nkristo. Mupostolo Paulo udi ufuanyikija disanka dietu dia kuyisha lumu luimpe ne diambula dietu dia ‘tshiuma mu ngesu ya dibumba.’ (2 Bena Korente 4:7, MMM) Utu wangata mudimu bu nunku bu tshintu tshikena kutua mushinga anyi? Yezu Kristo, uvua ntunga-mulongo mu mudimu wa diyisha Bukalenge, wakawangata mushindu au, ufila tshitembelu. (Matayo 4:17) “Bu mutudi ne mudimu eu . . . , katuena tulekela to,” ke muakamba Paulo.​—2 Kolinto 4:1, NW.

Bisangilu bia bena nkristo bidi kabidi ndongoluelu wa tshijila udi kayi mua kuangatshibua ne kalèngù. Mu bisangilu bietu, tudi tupeta dishidimunyibua dia mushinga mukole ne tusankidila bulunda budi bukengedibua. Mu bisangilu tudi kabidi mua kuenza dijikula dia patoke dia ditabuja dietu ne ditekemena dietu pa kufila pa tshibidilu mandamuna ne pa kuabanyangana programe mu mishindu mikuabu. (Ebelu 10:23-25) Bushuwa bisangilu bietu bidi ndongoluelu utudi ne bua kuengeleka!

Michael, mumana kutela, wakapesha mabenesha aa mushinga mutumbuke ne wakaanyisha mu buondoke buawu. Kadi dibungamijibua diende bua dibenga kusadila bu mukulu diakakepesha dianyisha diende dia mabenesha au bua musangu muipi. Pa kushindamenapu kabidi, wakafika ku dipetulula nkatshinkatshi wende ne kuindila Yehowa ne lutulu luonso.

Pamutu pa kudiumvua mubungame bua dibenga kuikala ne disanka kampanda dia mudimu, mbimpe tukonkonone tshiakabidi mishindu idi Yehowa utubenesha, bu muakenza mufundi wa misambu.a Bituapangila kumona bia bungi, tudi tukengela bua kutangila kabidi, tulomba Yehowa bua kunzulula mêsu etu bua tuetu kumona masanka etu a mudimu pamue ne mishindu idiye utubenesha ne utumika netu ku butumbi buende.​—Nsumuinu 10:22.

Bidi kabidi bia mushinga bua kumanya se: masanka a mudimu a pa buawu, bu mudi mudimu wa mutangidi, udi ulomba ngikadilu misunguluke. (1 Timote 3:1-7; Tito 1:5-9) Nunku tudi ne bua kudikonkonona, pa kukeba muaba kayi wonso udi diakaja dikengedibua ne pashishe kuenza madikolela ne muoyo umue bua kuakaja.​—1 Timote 4:12-15.

Kutekeshibu mu maboko

Bituikala katuyi bapete disanka dia mudimu kampanda, katuena tukengela kukomesha ne: Yehowa udi ne dinanga divule bua aba badi nadi peshi ne: udi utupala tshintu tshimpe. Bushuwa, katuena ne bua kufuikakaja ne lukuka luonso ne: bakuabu aba mbapete masanka abu a mudimu aa mu mushindu ukena mubakanyine ku diambuluisha dia kansungasunga ka bantu pamutu pa ditekibua dia teokrasi. Dielangana meji pa ngenyi ya nunku didi mua kufikisha ku mukawu, difuilakana, ne nansha ku dilekela dietu dia bionso.​—1 Kolinto 3:3; Yakobo 3:14-16.

Laura, mutela ku ntuadijilu, kavua mulekele to. Ndekelu wa bionso wakajikija nyanji yende ya tshiji ne mukawu. Laura wakalomba misangu mivule diambuluisha kudi Nzambi bua kujikija ngelelu wende wa meji mubi ku dibenga kuikala mukumbane bua kuenza bumpanda-njila. Wakakeba kabidi diambuluisha kudi balume bakumbane tshishiki mu tshisumbu ne kupetaye dishindika dia dinanga dia Nzambi. “Yehowa wakampesha ditalala dia tshieledi tshia lungenyi,” ke muakambaye. “Nansha mudi bayanyi ne meme katuyi mua kuenza bumpanda-njila mpindieu, tudi tuanyisha tshikondo tshituakenza nanku ne tupetela bukole ku malu mamonamona atuvua nawu. Tudi kabidi tuambuluisha muanetu wa balume mukulumpe mu bumpanda-njila buende.” Muikala musangale, Laura udi mpindieu ne mushindu wa ‘kusanka ne badi basanka’ mu mudimu wabu wa bumpanda-njila.​—Lomo 12:15.

Difundila bipatshila biudi mua kukumbaja

Dikala dietu ne musangelu bua masanka etu a mudimu a mpindieu kadiena diumvuija ne: tulekele kudifundila bipatshila bikuabu bia teokrasi nansha. Mu diyukidilangana pa dibiishibua dia mu diulu, Paulo wakakula bua ‘diya muluijakane muende muonso bua kukuata bidi kumpala.’ Wakamba kabidi ne: “Ne mpenyi ne mpenyi patukadi, tulonde amu njila wa muomumue.” (Bena Filipi 3:13-16, MMM) Bipatshila bia teokrasi bidi mua kutuambuluisha bua kuya batangile kumpala. Kadi, lutatu ndua kubilama bia bushuwa.

Bipatshila bia bushuwa mbia butshintshikidi ne bidi mua kukumbajibua. (Filipoi 4:5) Ebi kabiena biumvuija ne: tshipatshila kampanda tshidi tshilomba bidimu bivule bia mudimu mukole katshiena tshia bushuwa nansha. Tshipatshila tshia tshikondo tshile bu nunku tshidi mua kuujibua ku kakese ku kakese pa kuditekela mulongolongo wa bipatshila biambuluishi, peshi bidia. Ebi bidi mua kuambuluisha bu bimanyinu bua dilubuluka dia mu nyuma. Dikumbaja tshishiki tshitupa tshionso nedifile ngumvuilu wa disankishibua misangu mikuabu pamutu pa dibungamijibua.

Mmuenenu muimpe

Kadi, mbia mushinga bua kumanya se: bua nsombelu yetu pamue ne mikalu yetu, katuena mua kupeta amue masanka a mudimu. Didifundilawu bu bipatshila didi difikisha anu ku dibungamijibua ne ku difiika dia munda patupu. Bipatshila bu nunku bidi ne bua kusemejibua kule, nangananga bua tshikondo etshi. Dienza nanku kadiakuikala dikole bituasambila bua disankishibua dia kudi Nzambi ne kuvuija dienza dia disua dia Yehowa diditatshisha dietu dinene. Patudi tuipatshila masanka a mudimu, butumbi bua Yehowa​—ki ndianyisha dia makumbaja etu nkayetu—​budi ne mushinga. (Musambu 16:5, 6; Matayo 6:33) Bible udi utuambila mu mushindu muakanyine se: ‘Teka mudimu webe mu bianza bia Yehowa, ne malu awakapangidija nealubuluke.’​—Nsumuinu 16:3.

Mu dikonkonona Musambu wa 84, tudi mua kumona se: mufundi wa misambu wakaleja mmuenenu bu nunku bua masanka a mudimu, ne Yehowa wakamubenesha bia bungi. Kusakidila apu, musambu eu udi utungunuka ne kupetesha bantu ba Yehowa masanka too ne lelu’eu.

Ne dieyemena dia muoyo mujima kudi Yehowa, udi mua kuakaja dijinga diebe dikole bua masanka a mudimu masakidila pamue ne musangelu bua aa aukadi nawu. Kulekedi dijinga dia kuenza bipitshidile dikupangisha bua kuangata ne mushinga biudi nabi mpindieu ne disanka dia kusadila Yehowa kashidi. Eyemena Yehowa, bualu bidi bifikisha ku diakalenga, bu mudibi bileja mu miaku ya muena Lewi ne: “Yehowa wa misumba, disanka didi kudi muntu udi ukueyemena!”​—Musambu 84:12.

[Mêyi adi kuinshi]

[Kazubu mu dibeji 11]

Bipatshila bitudi ne bua kudifundila

Kubala Bible dituku dionso.​—Yoshua 1:8; Matayo 4:4

Kuakaja makokeshi etu a diumvua nawu ku diambuluisha dia didibidija dia mu Mifundu.​—Ebelu 5:14

Kulubuluja malanda makole ne Nzambi.​—Musambu 73:28

Kudima dionso dia ku mamuma a spiritu.​—Galatia 5:22, 23

Kuakaja ngikadilu wa masambila etu.​—Filipoi 4:6, 7

Kulua mupatudi wa bipeta bivule mu diyisha ne dilongesha.​—1 Timote 4:15, 16

Kubala ne kueleela meji pa nimero yonso wa bibejibeji bia Tshibumba tshia Nsentedi ne Réveillez-vous!​—Musambu 49:3

[Bimfuanyi mu dibeji 9]

Mu didifundila bipatshila bia pa nkayebe, teka dienza dia disua dia Nzambi pa muaba wa kumpala