Udi ujinga kumuangala anyi?

Padi diandamuna ku lukonko elu dikale ne: eyo, kudi malu a bungi audi wewe ne bakuabu ne bua kuenza. Pa kulonda malu manene maleja kuinshi eku, newikale mua kuibidilangana pa lukasa ne tshisumbu tshienu tshipiatshipia.

(1) Diakamue paudi ujadika tshisumbu tshiwikala, sekretere wa mu tshisumbu muudi umbuka udi mua kukeba adrese wa Nzubu wa Bukalenge wa tshisumbu tshipiatshipia muwikala. Paudi ufika mu tshitupa atshi, ukebe diakamue bua kumanya muaba udi Nzubu wa Bukalenge ne mêba a bisangilu. Pikala Nzubu wa Bukalenge eu wakidila bisumbu bivule, ukonke bakulu bua bakuambile tshisumbu tshiena teritware uudi musombele. Kunengakanyi bua kutuadija kuya mu bisangilu ne kumanyangana ne bakulu ba mu tshisumbu atshi to.

(2) Ba-sekretere ba bisumbu bibidi ebi nebambuluishangane bua kutuma fishi yenu ya mudimu wa mumanyishi wa tshisumbu buebe wewe ne dîku diebe. Kabidi nebafundile bakulu ba mu tshisumbu tshienu tshipiatshipia mukanda wa dinumanyisha nawu. (Tangila mukanda mufundila tusumbu tuonso tua bakulu wa dia 1 Kabalashipu 1999 ne Mandamuna ku nkonko yenu mu Mudimu wetu wa Bukalenge wa Kashipu 1991.) Komite wa Mudimu wa Tshisumbu atshi udi ne bua kumanyisha difika diebe kudi mulombodi wa dilonga dia mukanda muwikala bua amonangane nebe ne akuambuluishe bua ujadike muaba udi kasumbu kenu kapiakapia ka dilonga dia mukanda.​—Lomo 15:7.

(3) Bamanyishi bonso ba mu tshisumbu tshienu tshipiatshipia badi ne buabu bujitu bua kukumbaja ne disanka​—mbua kumanyangana nebe ne kukuakidila ne disanka. (Tangila 3 Yone 8.) Eyowa, bidi biumvuija ne: udi ne bua kuikalaku mu bisangilu bua usankidile dikankamijangana ne dikoleshangana ne bana betu bonso.

(4) Kuena ne bua kuindila too ne padi dimuangala diebe dijika bua kushisha kupatuka mu buambi ne bena mu tshisumbu tshienu tshipiatshipia to. Paudi utuma malu adi atangila Bukalenge kumpala, nebakukumbajile malu makuabu, ne neudiumvue bimpe bitambe muaba webe mupiamupia eu. (Mat. 6:33) Paudi ubuela mu nzubu webe mupiamupia, mbimpe kubikila bena mu tshisumbu bakuabu bua balue kukutangila kumbelu bua nuenu kumanyangana bimpe.​—Lomo 12:13b.

Kumuangala ndipangadika dinene. Kadi, padi muntu yonso udi bualu ebu butangila wenza tshidi tshilombibue, kakuakuikala dishadila panyima dia mu nyuma to. Bonso nebasanke bua buena-muntu buetu bua bena Kristo bua dinanga.