Tuidikijayi Yehowa pa kubenga kuikala ne kansungasunga

¹ Yehowa utu uditatshisha bua bantu. Utu wanyisha kakuyi kansungasunga muntu yonso udi wenza disua diende. (Bien. 10:34, 35) Yezu kavua pende ne kansungasunga pavuaye uyisha bantu to. (Luka 20:21) Tudi ne bua kuidikija tshilejilu tshiabu, bu muakenza Paulo. Wakafunda ne: ‘Bualu bua umue udi Mukalenge wa bonso, udi ne bubanji bua luse kudi bonso badi bamutendekena.’​—Lomo 10:12.

² Kumanyisha bantu bonso batudi tupetangana nabu lumu luimpe lua Bukalenge bua Nzambi kudi kutumbisha Nzambi. Tudi ne bua kutungunuka ne kumanyisha bantu bakuabu mukenji mulenga eu, katuyi tutangila tshisa tshia muntu, nsombelu wende, tulasa tudiye mulonge, anyi lupetu ludiye nalu. (Lomo 10:11-13) Mmumue ne: tudi ne bua kuyisha bantu bikala mua kututeleja​—bantu balume, bantu bakaji, bansonga ne bakulakaje. Tudi ne bua kuya ku nzubu ne ku nzubu bua muntu yonso apete mushindu wa kumvua bulelela.

³ Sankidila muntu yonso: Tshipatshila tshietu ntshia kuyikila ne muntu yonso utudi mua kumona. Bu muvuabu ne tshipatshila etshi mu lungenyi, bamue bamanyishi bakapeta bipeta bimpe mu diyisha miaba idi bantu bindila baminganga bua kubatangilabu, mu mpitadi, mu nzubu ya dilamina bakengi, mu biro bidi bitangila malu a nsombelu muimpe, miaba ya diondapila anyi itubu babelela bantu, biro bia mbulamatadi bia mu tshimenga ne miaba ya midimu ya bampulushi. Batu bayisha kabidi balombodi ba malu a dijiikangana, baludiki ne bapeshanganyi ba mibelu ba mu tulasa, ne banzuji. Patudi tuyikila ne banene, mbimpe kubaleja ne: tudi tuanyisha bikole mudimu udibu benza wa diambuluisha bantu. Tuikale ne kanemu ne tusungule biena-bualu biakanyine bidi ne malu adi atangila midimu idibu benza ne ntatu itu imuenekamu.

⁴ Umue musangu muanetu wa bakaji kampanda wakayisha nzuji kansanga mu biro biende. Bamane kuyikila ne disanka dionso, nzuji wakamuebeja ne: “Udi mumanye tshintu musuile Bantemu ba Yehowa anyi? Badi ne mêyi mashindame bimpe adibu kabayi basesuka.” Bakafikisha lumu luimpe kudi muntu munene eu.

⁵ Katuena mua kumona tshidi munda mua muntu to. Kadi, patudi tuakula ne bantu bonso batudi tupetangana nabu, tudi tuleja mutudi tuitabuja ne: Nzambi ke udi ulombola mudimu wetu. Kabidi, bantu badi bapeta mushindu wa kuteleja ne kuitaba mukenji wa ditekemena. (1 Tim. 2:3, 4) Tuikalayi ne meji patudi tukuata mudimu ne dîba dietu ne tudienzejayi bua kuidikija Yehowa pa kupanga kansungasunga patudi tutuadila bantu bonso batudi tupeta lumu luimpe.​—Lomo 2:11; Ef. 5:1, 2.