Tungunukayi ne kudiunda mu dimanya
“Nusakidile ku ditabuja dienu . . . dimanya.”—2 PETELO 1:5.
1, 2. (a) Ntshinyi tshiwudi mua kujingulula pawudi ubandila diulu? (Lomo 1:20) (b) Muntu mmufike ku divudija menemene dimanya diende anyi?
NTSHINYI tshiwudi ulonga pawudi ubandila ngondo ne mitoto bungi bukêna kubadika bidi bitokesha diulu kadiyi matutu mu mîdima butuku? Udi mua kulonga malu kabukabu pa bidi bitangila Eu wakafuka bionso ebi.—Misambu 19:1-6; 69:34.
2 Biwasua kuvudija dimanya edi, neubande pa musaka wa nzubu webe bua kutangidilapu anyi? Imue misangu kabiena nanku to. Albert Einstein, wakatumika dimue dituku ne tshidikijilu tshia mushindu’eu bua kuleja se: bena mianda ya science ki mbakoleshe bikole menemene dimanya diabu pa bidi bitangila bukua-mabulunge, ne kabidi kabena ne dimanya dijalame dia Eu wakaafuka.a Doktere Lewis Thomas wakafunda ne: “Ditshimuna dinene dia mianda ya science, mu siekele eyi idiye mitambe kulubuluka, ndia kujingulula se: tudi bapangi ba dilambu; tudi amu ne dimanya dikese pa bintu biakafukibua, ne tudi tujingulula amu bikese.”
3. Mmu ngumvuilu kayi mutudi mua kuamba se: eu udi uvudija dimanya udi ukolesha bisama?
3 Nansha bituapitshisha bidimu bionso bidi bishale bua muoyo wetu bua kukeba dimanya dia mushindu’eu, netufike imue misangu ku dijingulula buîpi bua muoyo, ne kumona patoke bua se: dimanya didi muntu utumika nadi didi ne mikalu bilondeshile dipanga bupuangane ne ngikadilu “mukonyangale” wa bulongolodi ebu. Solomo wakabileja pakafundaye ne: “Mu divulangana dia meji mudi divulangana dia dipanga kusankishibua, nenku, eu udi uvudija dimanya udi ukolesha bisama.” (Muambi 1:15, 18) Eyowa, meji ne dimanya bipeta kabiyi mu dimvuangana ne malongolola a Nzambi bidi pa tshibidilu bipetesha bisama ne dipanga kusankishibua.—Muambi 1:13, 14; 12:12; 1 Timote 6:20.
4. Ndimanya kayi ditudi ne bua kujinga bua kupeta?
4 Bible udi ututumina dîyi bua katuditatshishi bua kuvudija dimanya dietu anyi? Mupostolo Petelo wakafunda ne: “Tòo, kadi tungunukayi ne kudiunda mu buimpe bukêna-butuakanyine ne dimanya dia Mukalenge wetu ne Mupandishi Yezu Kristo. Butumbi buikale kudiye, mpindieu too ne ku dituku dia tshiendelele!” (2 Petelo 3:18) Tudi mua ne tudi ne bua kuanyisha dikankamija edi dia kudiunda mu dimanya. Kadi ndimanya dia mushindu kayi? Mmunyi mutudi mua kudivudija? Ne tudiku tuenza nunku menemene anyi?
5, 6. Mmunyi muvua Petelo uleja dikengedibua dietu dia kupeta dimanya?
5 Dikola mu dimanya dijalame dia Mufuki wa bukua-mabulunge ne dia Yezu kabidi divua tshiena-bualu tshinene mu ngenyi ivua Petelo mufunde mu mukanda wende muibidi. Mu mbangilu wa mukanda eu mmufunde ne: “Buimpe bukêna-butuakanyine ne ditalala bivudijibue kunudi ku dimanya dijalame dia Nzambi ne dia Yezu Mukalenge wetu, bualu, bukole buende bua bunzambi mbutupeshe ku budisuile bintu bionso bidi bitangila muoyo ne ditshina dia Nzambi, ku dimanya dijalame dia eu udi mutubikile ku butumbi ne ku buimpe.” (2 Petelo 1:2, 3) Nenku, mupostolo udi usuikakaja buimpe bukêna-butuakanyine ne ditalala ku dipeta dietu dia dimanya pa bidi bitangila Nzambi ne Muanende. Abi kabiena bikemesha to, bualu Mufuki, Yehowa, udi nsangilu wa dimanya dilelela. Eu udi utshina Nzambi udi mua kuikala ne mmuenenu mululame ne kufika ku difila nkomenu mikumbane.—Nsumuinu 1:7.
6 Petelo wakakankamija pashishe ne: “Nusakidile ku ditabuja dienu buimpe, ku buimpe buenu dimanya, ku dimanya dienu didikanda, ku didikanda dienu dinanukila, ku dinanukila dienu ditshina dia Nzambi, ku ditshina dienu dia Nzambi disuangana dia buena-muntu, ku disuangana dienu dia buena-muntu dinanga. Bualu, bikala bintu ebi munda muenu ne bivulangana, nebinukande bua kanushadi kanuyi ne tshinudi nuenza anyi baatuke bua bidi bitangila dimanya dijalame dia Mukalenge wetu Yezu Kristo.” (2 Petelo 1:5-8)b Mu nshapita udi ulonda, tudi tubala bua se: dipeta dimanya didi diambuluisha bantu bua kudiopoka mu buenzavi bua mu bulongolodi ebu. (2 Petelo 2:20) Nunku, Petelo uvua uleja patoke bua se: aba badi balua bena nkristo badi bakengela kuikala ne dimanya, mushindu wa muomume ne aba badi basadila Yehowa pa tshibidilu. Udiku pebe umue wa ku mishindu eyi ya bantu anyi?
Kulonga, kuambulula, kutumikila
7. Mmushindu kayi udi bavule bapeta dimanya dijalame dia malelela a mu Bible a nshindamenu?
7 Imue misangu udi ulonga Bible ne Bantemu ba Yehowa bualu udi umanya tshikuma tshia bulelela mu mukenji wabu. Musangu umue ku lumingu, pabuipi anyi dîba dijima, nudi nukonkonona tshiena-bualu kampanda tshia mu Bible ku diambuluisha dia mukanda kansanga bu mudi: Udi mua kuikala ne muoyo wa kashidi pa buloba bukudimuna mparadizu. Abi, mbimpe bitambe! Bavule badi benza dilonga dia mushindu’eu ne Bantemu ba Yehowa bakapeta dimanya dijalame. Kadi, ntshinyi tshiudi mua kuenza bua kulonga bipitshidile? Mona imue ngenyi.c
8. Mu didilongolola bua dilonga, ntshinyi tshidi mulongi wa Bible mua kuenza bua kuvudija dimanya diende?
8 Bangabanga, pawudi ulongolola dilonga diebe, wanji kutangila mu lupitapita malu awavua kukonkonona. Abi bidi biumvuija kubala tshiena-bualu tshia nshapita, tu-biena-bualu ne kubandila bimfuanyi kayi bionso bidi bitumika nabi bu biamu bia mudimu. Pashishe, pawudi ubala tshikoso anyi tshitupa tshia mukanda, ukebe mua kupatula ngenyi minene ne mvese ya mu Bible mitela bua kushindika ngenyi eyi, ne pamu’apa pa kuela kashonyi kuinshi kuayi. Bua kumanya né udi mulonge malelela adi makonkonona, utete mua kuandamuna ku nkonko ya bikoso bishilangane. Utete mua kuenza nunku pa kufila mandamuna mu yebe miaku. Ku ndekelu, wambulule dilongesha, pa kuteta mua kuvuluka ngenyi minene ne mumvuija adi ayishindika.
9. Ndiambuluisha kayi didi nadi eu udi utumikila mibelu bua kupeta dimanya?
9 Udi mua kutekemena bua kukola mu dimanya biwatumikila ngenyi eyi. Nenku, mbua tshinyi? Kamue kabingila nka se: neuditue mu dilonga ne dijinga dikole dia kumanya malu, pa kulongolola tshialu bua kuyukidilangana. Pa kuanji kuangata mmuenenu wa mu tshi-bungi, pashishe, kukeba ngenyi minene ne mumvuija mimpe, neumone mushindu wa kusuikakaja lungenyi lumue ku lumue ku tshiena-bualu anyi ku nkomenu. Diambulula dia ndekelu nedikuambuluishe bua kuvuluka biuvua mulonge. Kadi, ntshinyi tshiakuambuluisha ku shòò, mu dilonga diebe dia Bible?
10. (a) Bua tshinyi diambulula malu amue amue anyi mapiamapia didi ne mushinga mukese? (b) “Diambulula dia ku kakese ku kakese” ntshinyi? (c) Mmunyi muvua bana ba bena Izalele bababidila ku diambulula?
10 Bamanyi bapiluke ba mianda ya ndongeshilu mbamanye mushinga wa diambulula dienza mu tshikondo tshiakanyine ne bua tshipatshila tshisunguluke. Ki nkuambulula miaku imue imue to, tshiuvua pamu’apa muenze pawutshivua mu kalasa, pawuvua ulonga kabiyi ku budisuile mêna, malu mamonamona anyi ngenyi kampanda. Udiku mumone bua se: udi upua muoyo kunyima kua katupa kîpi biwuvua wamba ku muoyo, bijimina ne lukasa luonso mu lungenyi luebe anyi? Mbua tshinyi? Diambulula dia muaku umue umue anyi dia muanda kampanda mupiamupia didi mua kutondesha, ne bipeta mene kabiena binenga. Ntshinyi tshidi mua kubishintulula? Dijinga diebe dia kulonga ne muoyo umue. Mukuabu muanda munene nkuambulula ne tshipatshila. Minute mikese kunyima kua wewe mumane kulonga bualu kampanda, teta mua kubuleja bangabanga ne kujiminabu mu lungenyi. Ngenzelu eu udi ubikidibua ne: “diambulula dia ku kakese ku kakese.” Ku disanguluja lungenyi luebe pa kuvuluka biwuvua mulonge bangabanga ne kujiminabi, udi ukolesha dishala diabi bua mutantshi mule mu lungenyi luebe. Mu Izalele, ba-tatu bavua babueja mêyi-matuma a Nzambi mu ngenyi ya bana babu balela. (Dutelonome 6:6, 7) “Kubueja mu lungenyi” kudi kumvuija kulongesha ku diambulula. Pamu’apa, bavule ba ku ba-tatu aba bavua banji kumanyisha mikenji kudi bana babu balela; pashishe, bavua bambulula dilongesha; ku ndekelu bavua bela bana babu tukonko pa bivuabo balonge.
11. Ntshinyi tshidi ne bua kuenjibua mu dilonga dia Bible, bua kuvudija dimanya?
11 Bikala Ntemu kampanda mulume anyi mukaji ke udi ukulombola mu dilonga dia Bible, udi mua kukuambuluisha bua kupeta dimanya pa kukuenzela tshikepeshilu tshia ku kakese ku kakese, mu mutantshi udi dilonga dinenga. Ngenzelu eu wa mudimu ki ng’wa buana butekete nansha. Apo, mmushindu kampanda wa kuakaja makole ebe a mu lungenyi a kulonga, nenku udifile pa tshibidilu ku budisuile mu mambulula a mushindu’eu. Pashishe, ku ndekelu kua dilonga, mu diambulula dia bionso, wandamune [ku nkonko] ku muoyo. Udi mua kumvuija malu mu yebe miaku amu bu udi ulongesha muntu mukuabu. (1 Petelo 3:15) Ku diambuluisha dia ngenzelu eu, biwuvua mulonge nebishindame mutantshi mule mu lungenyi luebe.—Fuanyikija ne Musambu wa 119:1, 2, 125; 2 Petelo 3:1.
12. Ntshinyi tshidi mulongi wa Bible mua kuenza yeye nkayende bua kuakaja makole ende a kukuata malu ku muoyo?
12 Kuyukidila muntu mukuabu bu mudi: mulunda wa mu kalasa, muena mudimu nebe wa ku mubidi anyi muena mutumba nebe pa biwudi mulonge matuku abidi anyi asatu kunyima, ndikuabu diambuluisha. Udi mua kumanyisha tshiena-bualu ne kuleja bua se: udi ujinga patupu bua kumona né udi mua kuvuluka mumvuija manene anyi mvese ya mu Bible mitela bua kubishindika. Abi bidi mua kujula kudi muntu mukuabu dijinga dia kumanya bia bungi. Nansha kabiyi nanku, kuambulula ngenyi mipiamipia kunyima kua dituku dimue anyi abidi nekuyishindamije mu lungenyi luebe. Nenku, neulonge bualu kampanda menemene pa kulonda mubelu udi mu 2 Petelo 3:18.
Tulongayi bimpe
13, 14. Bua tshinyi tudi ne bua kuikala ne dijinga dia kupita tshitupa tshia kupeta ne kukuata mianda ku muoyo patupu?
13 Kulonga nkupite kunguija malu mu lungenyi anyi kuikala mukumbane bua kuvuluka malu kampanda. Mu matuku atshivua Yezu pa buloba, ke tshivua bamfumu ba malu a Nzambi bavua bambulula masambila amue amue benza. (Matayi 6:5-7) Kadi mmunyi muvua dimanya diabu ne buenzeji kudibu? Bavuaku bapatule mamuma avua mu diumvuangana ne buakane anyi? Nansha kakese. (Matayi 7:15-17; Luka 3:7, 8) Tshilema tshinene tshivuabu natshi ntshia se: dimanya kadivua dibuela mu mitshima yabu ne kadivua ne buenzeji buimpe kudibu nansha.
14 Bilondeshile Petelo, bidi ne bua kushilangana ne bena nkristo ba mu tshikondo tshia kale ne ba lelu’eu kabidi. Udi utukankamija bua kusakidila ku ditabuja dietu dimanya diatuambuluisha bua kuepuka dibenga kushala katuyi ne tshitudi tuenza anyi baatuke. (2 Petelo 1:5, 8) Bua abi kujadikibuabi kutudi, tudi ne bua kujinga mua kudiunda mu dimanya edi, ne kujinga bua kuikaladi ne buenzeji buondoke munda muetu. Kadi, ebi kabiena bienzeka nanku pa tshibidilu to.
15. Ndutatu kayi luvua bamue bena nkristo bena Ebelu bapete?
15 Mu tshikondo tshia Paulo, bena Ebelu bakalua bena nkristo bavua ne ntatu mu muanda eu. Bu muvuabo bena Yuda, bavua ne dimanya kampanda dia Mifundu. Bavua bamanye malu avua atangila Yehowa ne amue avuaye ulomba bua kukumbajabu. Pashishe, bakasakidila dimanya pa bidi bitangila Masiya, bakenza midimu ya ditabuja ne bakatambushibua bu bena nkristo. (Bienzedi 2:22, 37-41; 8:26-36) Mu kupita kua ngondo ne bidimu, bakabuela mu bisangilu bia bena nkristo, muakabalabu ne kumvuija mvese ya mu Mifundu. Kadi, bamue kabakadiunda mu dimanya to. Paulo wakafunda ne: “Pabi, katshia kuonso aku nuvua mua kuikala bamane kuvua balongeshi, kadi nutshidi nukengela tshiakabidi bua muntu kampanda anulongeshe, biangatshile ku ntuadijilu, malu a diambedi a mêyi mansantu a Nzambi; kabidi nuafiki too ne ku dikengela mabele, pamutu pa biakudia bikole.” (Ebelu 5:12) Mmunyi muvuabi bienzeka nanku? Bidi mua kutuenzekela petu anyi?
16. Pergélisol ntshinyi, ne mmunyi mudibu ne buenzeji pa mitshi?
16 Tuangate tshilejilu tshia pergélisol anyi bitupa bia buloba budi bubuikila dîba dionso kudi mabue a mashika, bia ku Pôle Nord ne mu rejon mikuabu ya dibulunge buloba mudi mashika makole matambe. Buloba, bibuebue ne mâyi a muinshi mua buloba bidi bikudimuka dibue dikole ku buenzeji bua mashika makole, bienza mushiki wa dibue mukolakane udi buondoke bufika imue misangu too ne ku metre 900. Mu muvu wa été, kudi mua kuenzeka dienguluka mu tshitupa tshia pergélisol tshia ku mutu. Kadi, tshipeyapeya tshia tshitupa etshi tshitu tshienguluka tshilua pa tshibidilu bitotshi bualu mâyi kaêna mua kubuela mu tshitupa tshia pergélisol tshidi pa mutu. Mitshi idi itoloka pa tshitupa etshi tshia pa mutu pa buloba itu misangu mivule mîpi peshi mishawuke; miji yayi kayena mua kubuela mu pergélisol to. Kadi, pamu’apa udi mua kudiebeja ne: ‘Ndiumvuangana kayi didi pankatshi pa pergélisol ne muanda wa kumanya né ndi ndiunda mu dimanya dia bulelela bua mu Bible?’
17, 18. Mmunyi mutudi mua kutumika ne pergélisol ne tshitupa tshiende tshia muinshi bua kuidikija tshivua tshipitakane kudi bamue bena nkristo bena Ebelu?
17 Pergélisol udi uleja bimpe tshidi tshipitakana kudi eu udi makole a mu lungenyi kaayi adifila mu dilonga, dikuata malu ku muoyo ne ditumika ne dimanya dijalame. (Fuanyikija ne Matayi 13:5, 20, 21.) Imue misangu, muntu udi ne makole a mu lungenyi bua kulonga malu kabukabu, bu mudi bulelela bua mu Bible. Wakalonga “malu a ku ntuadijilu a mêyi mansantu a Nzambi” ne imue misangu mmukumbaje malu malomba bua kutambushibua, bu muenzele bena nkristo bena Ebelu. Kadi, kêna “uya ne lukasa luonso ku dikulumpa dia mu nyuma,” ne ushala mulamate amu ku “malongesha a ntuadijilu adi atangila Kristo.”—Ebelu 5:12; 6:1.
18 Tuanji kufuanyikija bamue ba ku bena nkristo ba mu siekele wa kumpala mu bisangilu. Bavuamu ne kabidi batabale, kadi ngenyi yabu ivuaku kaba kamue ne tshipatshila tshia kulonga tshintu kampanda anyi? Imue misangu kabivua nanku to. Tshitupa tshivua aba bavua kabayi bakulumpe mu nyuma bakumbaja mu bisangilu tshivua amu tshikese, bualu tshikuabu tshijima mu buondoke buatshi buonso tshivua bu dibue dia mashika. Miji mikole ya bulelela kayivua mua kubuela mu rejon eu wa pergélisol wa mu lungenyi nansha.—Fuanyikija ne Yeshayi 40:24.
19. Lelu’eu, mmushindu kayi udi muena nkristo ukadi muenze bidimu bivule mu bulelela mua kulua bu bena nkristo bena Ebelu?
19 Bidi mua kuikala bia muomumue bua muena nkristo lelu’eu. Nansha muikale mu bisangilu, udi anyi kêna mua kubabidila bikondo ebi bua kudiunda mu dimanya. Netuambe tshinyi bua bidi bitangila difilamu mumvuija? Bua muntu kampanda mupiamupia peshi nsonga kansanga udi udifila ku budisuile bua kubala mvese kankenga wa mu Mifundu anyi kufila diumvuija mu miaku idi mifunda mu tshikoso udi pamu’apa wenza madikolela manene, ne, wibidija bimpe makole ende a mu lungenyi. Kadi, Paulo wakaleja bua se: bakuabu badi bena nkristo katshia ku kale, badi ne bua kuya kumpala ne kupitshisha ne pa mushindu wabu wa ntuadijilu udibu bafila mumvuija mu bisangilu, bikalabu basue kutungunuka ne kudiunda mu dimanya.—Ebelu 5:14.
20. Ndidikonkonona kayi didi yonso wa kutudi ne bua kuenza?
20 Bikala muena nkristo ukadi ne bidimu bivule mu bulelela kayi ulubuluka mu muanda eu ne usanka amu bua kubala patupu mvese wa mu Bible anyi kufila diumvuija dia nanku nanku mu miaku mikese amu mudidi difunda mu tshikoso, dikumbaja dia tshiende tshitupa nedilue pamu’apa bu tshitupa tshia buloba tshia “pergélisol tshidi mâyi kaayi abuela,” mu tshieledi tshiende tshia lungenyi. Bua kutungunuka ne tshilejilu tshietu tshia pergélisol, mu dilondangana dia bisangilu, malu muondoke a mu tshieledi tshia lungenyi neashale amu bu dibue dia mashika. Tudi ne bua kudiebeja ne: ‘Ke mudibi buanyi meme anyi? Ndiku mulekele mushindu kampanda wa pergélisol wa mu lungenyi ujama munda muanyi anyi? Mmunyi mundi ndeja dijinga dikole dia kulonga, kakuyi njingakanyi?’ Nansha bikala mandamuna etu mafila ne bululame atutondesha, tudi ne bua kutuadija kuangata mapangadika bua kudiunda mu dimanya.
21. Mmibelu kayi mifila kuulu eku iwudi mua kutumikila pawudi ulongolola anyi ubuela mu bisangilu?
21 Muntu pa nkayende, tudi mua kulonda ngenyi idi mu tshikoso tshia 8. Nansha tuetu bikala mu tshisumbu kukadi bidimu bivule anyi bapiabapia, tudi mua kuangata dipangadika bua kuya ne lukasa luonso ku dikulumpa dia mu nyuma ne kudiunda menemene mu dimanya. Bua bamue, abi nebiumvuije kulongolola bisangilu biabu ne tshisumi, pamu’apa, pa kuenza muvuabu benza kukadi bidimu bivule, kadi bikadibu benda balekela ku kakese ku kakese. Pawudi udilongolola, teta mua kumona ngenyi minene ne kumvua mvese ya mu Mifundu iwudi kuyi mutambe kuibidilangana nayi, mitela bua kushindika diumvuija. Ukebe bua kumanya muanda kampanda mupiamupia udi mu malonga. Bia muomumue, mu tshisangilu, utete mua kutumikila wewe nkayebe ngenyi idi mu tshikoso tshia 10 ne tshia 11. Wenze madikolela bua kuikala ne lungenyi lukatamuke, mbuena kuamba ne: kujingulula makokeshi ebe a mu lungenyi. Nenku, udi mua kuakaja dijinga kayi dionso didi mua kufikisha ku dienjibua dia “pergélisol wa mu lungenyi”; kabidi madikolela aa mimpe neengulule “zone ya dibue dia mashika” idi yenda idiunda—Nsumuinu 8:12, 32-34.
Dimanya didi dituambuluisha bua kukuama mamuma
22. Bituenza mudimu bua kuvudija dimanya dietu, mbipeta kayi bimpe bituapetelaku?
22 Bituenza mudimu bua kudiunda mu buimpe bukêna-butuakanyine ne mu dimanya dia Mukalenge wetu ne Mupandishi Yezu Kristo, mbipeta kayi bimpe bituapetelaku, muntu ku muntu? Ku diambuluisha dia madikolela etu mimpe bua kushala batabale mu lungenyi, badiakaje bua kupeta mamanya mapiamapia, ntete ya malelela mapiamapia a mu Bible idi mua kuela miji munda muetu, bujinguludi buetu nebuvule ne katuakupua muoyo nansha kakese bituikala balonge. Abi nebifuanangane ne bivua Yezu muambe mu tshimfuanyi tshishilangane pa bidi bitangila mitshima. (Luka 8:5-12) Maminu adi apona pa buloba buimpe butambe adi mua kuela miji mikole bua kumona mua kudiisha mitshi ne kukuamisha bimuma.—Matayi 13:8, 23.
23. Patudi tuangata 2 Petelo 3:18 ne mushinga, mbipeta kayi bidi mua kupeteka? (Kolosai 1:9-12)
23 Tshimfuanyi tshifila kudi Yezu ntshishilangane kakese, kadi bipeta bimpe bivua bifumaku mbifuanangane ne bivua Petelo mulaye: “Bua kiine kabingila aka, ku luenu luseke, nuenze madikolela wonso, nusakidile ku ditabuja dienu buimpe, ku buimpe buenu dimanya . . . Bualu, biashala bintu ebi munda muenu ne bivulanganamu, nebinukande bua kanushadi kanuyi ne tshinudi nuenza anyi baatuke bilondeshile dimanya dijalame dia Mukalenge wetu Yezu Kristo.” (2 Petelo 1:5-8) Eyowa, didiunda dietu mu dimanya nedituambuluishe bua kukuama mamuma. Netujingulule mudibi bilenga bua kupeta dimanya. (Nsumuinu 2:2-5) Biwudi ulonga nebishale bimpe mu lungenyi luebe ne udi mua kutumika nabi pawudi ulongesha bantu bakuabu mua kulua balongi. Nenku, mushindu’eu, neukuame mamuma mavule ne neutumbishe Nzambi ne Muanende kabidi. Petelo udi ujikija mukanda wende muibidi ne miaku eyi: “Tungunukayi ne kudiunda mu buimpe bukêna-butuakanyine ne dimanya dia Mukalenge wetu ne Mupandishi Yezu Kristo. Butumbi buikale kudiye, mpindieu too ne ku dituku dia tshiendelele!”—2 Petelo 3:18.
[Mêyi adi kuinshi]
a Einstein “wakafuanyikija mamanya mapiamapia atudi tupeta ku dimanya didi muntu kampanda udi udifila ne kasuki mu dilonga malu adi atangila ngondo upeta padiye ubanda pa musaka wende wa nzubu bua kutangila bimpe tshitokeshi etshi.”
b Ditabuja ne buimpe, bikadilu bibidi bia kumpala bidi bitela mu mvese eu, mbimana kukonkonona mu Tshibumba tshia Nsentedi tshia dia 15 Juillet 1993.
c Ngenyi eyi idi kabidi mua kuambuluisha bena nkristo ba mutantshi mule bua kupeta bivule ku didilongela diabu ne didilongolola bua bisangilu.
Utshidi muvuluke anyi?
◻ Bua tshinyi udi ne bua kukeba bua kuvudija dimanya diebe?
◻ Mmunyi mudi mulongi kampanda wa Bible mupiamupia mua kubabidila bipitshidile ku dilonga diende?
◻ Njiwu kayi iwudi ukengela kuepuka, bu mudibi bilejibue ku tshilejilu tshia pergélisol?
◻ Bua tshinyi tudi ne bua kuangata dipangadika dikole dia kuakaja makokeshi etu a kuvudija dimanya?
[Tshimfuanyi mu dibeji 15]
Ndiku ne lutatu lua pergélisol wa mu lungenyi anyi?