Ntshinyi tshiwambila muntu udi wamba ne: Nzambi katuku to?
1 Muntu mukaji kampanda mulongeshi wa mu ditunga dia Pologne wakambila misionere kansanga mu Afrike ne: “Tshitu ngitaba ne: Nzambi utuku to.” Kadi, muanetu wa bakaji eu wakapeta mushindu wa kuyikila nende ne wakamupesha mukanda wa La vie: comment est-elle apparue? Évolution ou création? Pakapingana misionere lumingu luvua lulonda, mulongeshi au wakamuambila ne: “Ndi ngitaba mpindieu ne: Nzambi utuku!” Uvua mubale mukanda wa Création wonso mujima ne uvua ukeba mpindieu kulonga Bible. Ntshinyi tshiudi mua kuenza bua kupatula bipeta bimpe paudi uyisha bantu badi bamba mudibu kabayi bitabuja ne: Nzambi utuku? Tshia kumpala, anji manya malu adi afikisha bantu ku diamba nanku.
2 Malu adi afikisha bantu ku dibenga kuitabuja: Bantu bonso badi bamba ne: Nzambi katuku to kabatu baledibue ne meji au to. Ba bungi kumpala bavua mu tshitendelelu kampanda ne tshikondo atshi bavua bitabuja Nzambi. Kadi, masama makole anyi ntatu ya mu dîku peshi kabidi kansungasunga biakatekesha ditabuja diabu. Bua bakuabu, malu avuabu babalongeshe mu tulasa tua bikadilu ke adi manyange lungenyi luvuabu nalu bua Nzambi. Konkonona bilejilu bidi bilonda ebi bia bantu bavua kumpala bikale kabayi bitaba ne: Nzambi udiku, pashishe kutuadijabu kuitabuja bikole Yehowa Nzambi ne ndekelu wa bionso kuluabu Bantemu bende.
3 Muntu mukaji mukuabu wa ku Paris (mu France) uvua muledibue ne disama ditu ditekesha mifuba. Nansha muakangataye batismo mu bena Katolike, uvua udiamba mudiye kayi witabuja ne: Nzambi udiku. Pakakonkaye bamansere ne: bua tshinyi Nzambi uvua muanyishe bua aledibue ne disama adi, bakamuandamuna ne: “Bualu mmukunange.” Kakitaba lungenyi elu ludi kaluyi lumvuika to. Tangila kabidi bualu bua nsonga eu wa mu ditunga dia Finlande wakapetabu ne disama dia mifungu didi kadiyi ne buanga ne uvua wendela mu dikalu diende dia balema. Mamuende wakaya nende kudi muena Mpentekoste kampanda uvua wamba ne: utu wondapa babedi. Kadi kakuondapa disama edi to. Nenku nsongalume eu wakalekela kuitabuja Nzambi e kutuadijaye kuela meji ne: Nzambi katuku to.
4 Bunga bualu mbua muntu mukuabu mu ditunga dia Honduras uvua mukolele mu dîku dia bena Katolike ne pashishe kuluaye kulonga nkindi ya bena Sosialisme ne ya bavidi ba dikalaku dia Nzambi. Bu muakatuishibuaye kudi malongesha akalongaye mu iniversite a ne: bantu mbafumine ku bikuabu bintu, wakalekela kuitabuja Nzambi. Bia muomumue kabidi, muntu mukaji kampanda wa ku États-Unis uvua yeye mukolele mu dîku dia bena Mishonyi. Pakabuelaye mu tulasa tubandile, wakalonga malu a bibidilu bia bantu. Mmushindu kayi wakashintululabi ditabuja diende? Wakamba ne: “Mu muvu wa été [wa tshidimu kampanda], bakashimbula ditabuja dionso dimvua nadi mu malu a Nzambi.”
5 Tulengayi mitshima ya bantu ba muoyo muimpe: Bantu ba bungi batu bamba mutubu kabayi bitabuja Nzambi badi mua kujinga bua kumanya bikalaku mushindu wa kujikija masama, ditandangana mu mêku, kansungasunga ne bikuabu. Badi basanka menemene padibu bapeta mandamuna ku nkonko bu mudi: ‘Bua tshinyi kudi bubi?’ ‘Bua tshinyi malu mabi atu afikila bantu ba malu mimpe?’ ne ‘Bua tshinyi tudi ne muoyo?’
6 Muntu kampanda ne mukajende badi basombele mu ditunga dia Suisse kabavua bitaba ne: Nzambi udiku to katshianu ku buana buabu. Bakabenga pakabayishabu bulelela musangu wa kumpala. Kadi bua ntatu mikole ivua mu dîku, bakavua bamba kushipa dibaka diabu. Pakalua Bantemu kubatangila tshiakabidi, bakabaleja mushindu wa kujikija ntatu yabu ku diambuluisha dia Bible. Muntu au ne muena kuende bakakema bikole pa kumona mibelu miakanyine idi mu Mifundu. Bakitaba bua kulonga Bible. Bakalengeja dibaka diabu, kudiunda mu nyuma ne pashishe kutambulabu.
7 Tshiudi mua kuambila eu udi kayi witabuja ne: Nzambi udiku: Padi muntu ukuambila ne: kêna witaba ne: Nzambi utuku, keba bua kumanya tshidiye wambidila nanku. Mbua tulasa tudiye mulonge anyi, mbua ntatu idiye mupete anyi, peshi mbua lubombo lua bena malu a Nzambi ne malongesha a dishima bidiye mumone? Udi mua kumukonka ne: “Ndîba kayi diwakatuadija kupeta lungenyi elu?” peshi “Ntshinyi tshidi tshikufikishe ku diela meji mushindu’eu?” Diandamuna diende nedikuambuluishe bua umanye tshiudi mua kuamba. Padibi bikengela kuya kule ne ngenyi eyi, udi mua kukuata mudimu ne mukanda wa Y a-t-il un Créateur qui se soucie de vous?
8 Udi mua kutungunuka ne kuyikila ne muntu wa nunku pa kumukonka ne:
▪ “Ukadiku mudiebeje ne: ‘Bikala Nzambi udiku, bua tshinyi kudi kansungasunga ne makenga a bungi pa buloba?’ [Lekela muntu andamune.] Ndiku mua kukuleja tshidi Bible wamba pa bualu ebu anyi?” Bala Yelemiya 10:23. Paudi ujikija kubala, umulombe bua umvuije mvese eu. Pashishe umuleje dibeji dia 16 ne dia 17 mu broshire wa Connaîtrons-nous un jour un monde sans guerre? Peshi, udi mua kumuleja nshapita wa 10 wa mukanda wa Créateur. Muambila angata mukanda eu ne abale malu adimu.—Bua kupeta ngenyi mikuabu, tangila mukanda wa Comment raisonner, mabeji 111-112.
9 Bushuwa, bantu bonso badi kabayi bela meji ne: Nzambi utuku, kabakuitaba bulelela to. Kadi ba bungi batu bajinga bua kumanya ngenyi ya bakuabu. Kuata mudimu ne meji majalame, dimanya kutuisha ne nangananga Dîyi dia Nzambi bua kubambuluisha bafike ku dimanya bulelela.—Bien. 28:23, 24; Eb. 4:12.