Tudi tuyisha lumu luimpe
1 Ndisanka bulengapu kayi ditudi nadi bualu tudi batuadi ba “lumu luimpe lua malu mimpe.” (Lomo 10:15) Tudi ne mukenji udi ukankamija bantu badi munkatshi mua ndululu ne kabayi ditekemena. Mmunyi mutudi mua kubambuluisha bua bamanye ne: tudi tumanyisha “ngumu mimpe ya tshintu tshitambe bulenga”?—Yesh. 52:7, NW.
2 Longolola mukenji udi muimpe: Bitudi tuyikila ne bantu mu buambi nebibambuluishe bituikala tushindamena pa malu adi akoleshangana ku mutshima. Nanku patudi tulongolola diyuki ne tukonkonona malu adi mu mukanda utuafila, mbimpe tusunguluje malu malenga atudi mua kumanyisha muntu. Tuetu tumanyisha malu a mu Bible atudi batekemene ne dishindika kabidi ne musangelu, tudi mua kupatula bipeta bimpe.—Nsu. 25:11.
3 Nansha tuetu tumvuila bantu luse padibu bumvuija mushindu udibu bakenga bua nsombelu idi yenda ibipa pa buloba bujima, tudi ne bua kubaleja tshintu menemene tshialua kujikija ntatu ya bantu: Bukalenge bua Nzambi. Nansha patudi tuyikila ne bantu bua “dituku dia disombuela” dia Yehowa didi dilua, tudi ne bua kuleja mudi mukenji eu muikale menemene ‘lumu luimpe kudi [badipuekeshi].’ (Yesh. 61:1, 2) Tudi mua kujadikila batuteleji ne: bualu buonso budi Yehowa wenza nebutuadile bantu disanka ditambe bunene ne kubenzela malu mimpe menemene.
4 Tuikalayi ne disanka patudi tumanyisha bulelela: Padi bantu bamona ne: tudi ne disanka, kabidi tuakula ne dishindika, bidi bibafikisha ku dituteleja bimpe. Bituikale ne mmuenenu muimpe wa malu, batuteleji nebumvue ne: tudi ‘tusanka mu ditekemena.’ (Lomo 12:12) Kabidi badi mua kulua kunanga bikole lumu luimpe. Tuikale dîba dionso ne mmuenenu muimpe ne disanka patudi tuenza mudimu wetu wa buambi.
5 Patudi tumanyisha bantu lumu luimpe, tudi tuenza malu a bungi. Kuyisha kuetu kudi kupesha bantu ditekemena dilelela dia nsombelu mulenga mpindieu ne mu matuku adi kumpala. (1 Tim. 4:8) Patudi tuyikila ne muntu yonso, mmuenenu wetu mulenga neamuenekele ku bitudi tuamba ne neamuambuluishe bua kuitaba lumu luimpe. Tusakayi bantu ba muoyo umue bua kuitababu lumu luimpe lutudi tuyisha ludi lusangulujangana, pa kutabalela malu atudi tuamba ne mushindu utudi tuamba.