TSHIBUTSHILU TSHIA MIKANDA TSHIA KU ENTERNETE tshia Watchtower
TSHIBUTSHILU TSHIA MIKANDA TSHIA KU ENTERNETE
tshia Watchtower
Tshiluba
  • BIBLE
  • MIKANDA
  • BISANGILU
  • Nsombelu wa dîku údí usankisha Nzambi
    Ntshinyi tshidi Nzambi utulomba?
    • Dilongesha dia 8

      Nsombelu wa dîku údí usankisha Nzambi

      Mmuaba kayi udi nawu mulume mu dîku? (1)

      Mmunyi mudi mulume ne bua kuangata mukajende? (2)

      Mmajitu kayi adi nawu tatu? (3)

      Mmudimu kayi udi nawu mukaji mu dîku? (4)

      Ntshinganyi tshidi Yehowa ulomba baledi ne bana? (5)

      Mmuenenu wa Bible pa diabulukangana ne dishipa dibaka udi tshinyi? (6, 7)

      1. Bible udi wamba ne: mulume udi mfumu wa dîku diende. (1 Kolinto 11:3) Mulume udi ne bua kuikala anu ne mukaji umuepele. Badi ne bua kuikala baselangane mu diumvuangana ne mikenji.​—1 Timote 3:2; Tito 3:1.

      2. Mulume udi ne bua kunanga mukajende anu bu mudiye mudinange. Udi ne bua kumuangata mushindu udi Yezu wangata balondi bende. (Efeso 5:25, 28, 29) Mu mushindu nansha umue kêna ne bua kututa mukajende peshi kumukengesha. Bishilangane, udi ne bua kumuambika lumu ne kanemu.​—Kolosai 3:19; 1 Petelo 3:7.

      3. Tatu udi ne bua kutumika bikole bua kutabalela dîku diende. Udi ne bua kupetesha mukajende ne bana bende biakudia, bilamba, ne muaba wa kulala. Tatu udi kabidi ne bua kupetesha dîku diende tshididi dikengela mu nyuma. (1 Timote 5:8) Udi ntunga-mulongo mu diambuluisha dîku diende bua kulonga pa bidi bitangila Nzambi ne malongolola Ende.​—Dutelonome 6:4-9; Efeso 6:4.

      4. Mukaji udi ne bua kuikala muambuluishi muimpe wa bayende. (Genese 2:18) Udi ne bua kukuatshisha bayende mu dilongesha ne dikela bana. (Nsumuinu 1:8) Yehowa udi ulomba mukaji bua kutabalelaye dîku diende ne dinanga. (Nsumuinu 31:10, 15, 26, 27; Tito 2:4, 5) Udi ne bua kuikala ne kanemu kondoke kudi bayende.​—Efeso 5:22, 23, 33.

      5. Nzambi udi ulomba bana bua kutumikilabu baledi babu. (Efeso 6:1-3) Mmutekemene bua baledi kushidimunabu ne kulongamijabu bana babu. Baledi badi ne bua kupitshishaku dîba ne bana babu ne kulonga nabu Bible, kutabalela makengela abu a mu nyuma ne a dinangibua. (Dutelonome 11:18, 19; Nsumuinu 22:6, 15) Baledi kabena ne bua kunyoka bana babu ne luonji peshi ne tshikisu nansha.​—Kolosai 3:21.

      6. Padi bena dibaka ne ntatu mu nsombelu wabu wa pamue, badi ne bua kuditatshisha bua kutumika ne mibelu ya mu Bible. Bible udi utukankamija bua kuleja dinanga ne kuikala babuikididianganyi. (Kolosai 3:12-14) Dîyi dia Nzambi kadiena dileja diabulukangana bu mushindu wa kujikija ntatu mikese. Kadi mukaji udi mua kusungula bua kumbuka kudi bayende bikala bayende (1) ubenga ne tshitunu bua kuambula bujitu bua dîku diende, (2) ne tshikisu tshikole tshidi tshiteka too ne makanda ende a mubidi peshi muoyo wende mu njiwu, anyi bikala (3) dimuluisha dinekesha dia bayende dimupangisha mua yeye kutendelela Yehowa.​—1 Kolinto 7:12, 13.

      7. Bena dibaka badi ne bua kuikala ne lulamatu umue kudi mukuabu. Masandi mmpekatu muenzela Nzambi ne muena dibaka netu. (Ebelu 13:4) Diangatangana ne ukêna muena dibaka netu ke kabingila kamuepele ka mu Mifundu bua kushipa dibaka ne kuikala ne bukenji bua kusela peshi kusedibua kabidi. (Matayo 19:6-9; Lomo 7:2, 3) Yehowa katu munange patu bantu bashipa dibaka kabayi ne tubingila tuashila pa Mifundu ne pashishe basela peshi basedibua kudi mukuabu muntu.​—Malaki 2:14-16.

      [Bimfuanyi mu mabeji 16, 17]

      Nzambi mmutekemene se: baledi bashidimune bana babu ne babalongamije

      [Tshimfuanyi mu dibeji 17]

      Tatu wa dinanga udi upetesha dîku diende bintu bia ku mubidi ne bia mu nyuma

  • Basadidi ba Nzambi badi ne bua kuikala bakezuke
    Ntshinyi tshidi Nzambi utulomba?
    • Dilongesha dia 9

      Basadidi ba Nzambi badi ne bua kuikala bakezuke

      Bua tshinyi tudi ne bua kuikala bakezuke mu malu onso? (1)

      Kuikala mukezuke mu nyuma kudi kumvuija tshinyi? (2) mukezuke mu bikadilu? (3) mukezuke mu lungenyi? (4) mukezuke ku mubidi? (5)

      Nngakuilu wa mushindu kayi ukena mukezuke utudi ne bua kuepuka? (6)

      1. Yehowa Nzambi mmukezuke ne kabidi mmunsantu. Mmutekemene bua bamutendeledi kushalabu bakezuke​—mu nyuma, mu bikadilu, mu lungenyi, ne ku mubidi. (1 Petelo 1:16) Bidi bikengela madikolela malelela bua kushala bakezuke ku mêsu kua Nzambi. Tudi mu bulongolodi bukena bukezuke. Tudi kabidi ne bua kuluangana ne minyikibua etu nkayetu atu atusaka bua kuenza bibi. Kadi katuena ne bua kuteketa nansha.

      2. Bukezuke bua mu nyuma: Bituikala basue kusadila Yehowa, katuena mua kulamata ku malongesha peshi bilele kayi bionso bia tshitendelelu tshia dishima. Tudi ne bua kupatuka mu tshitendelelu tshia dishima ne kubenga kutshitua nyama ku mikolo mu mushindu kayi wonso. (2 Kolinto 6:14-18; Buakabuluibua 18:4) Kunyima kua tuetu bamane kulonga bulelela pa bidi bitangila Nzambi, tudi ne bua kuikala batabale bua kubenga kupambuishibua kudi bantu badi balongesha mafi.​—2 Yone 10, 11.

      3. Bukezuke bua mu bikadilu: Yehowa mmusue ne: bamutendeledi bikale ne nsombelu wa bena nkristo balelela dîba dionso. (1 Petelo 2:12) Udi umona bualu buonso butudi tuenza, nansha mu musokoko. (Ebelu 4:13) Tudi ne bua kuepuka tshiendenda ne mikuabu ngenzelu ikena mikezuke ya mu bulongolodi ebu.​—1 Kolinto 6:9-11.

      4. Bukezuke bua mu lungenyi: Bituikala tuuja bieledi bietu bia meji ne ngenyi mikezuke ne mipeluke, nsombelu wetu neikale kabidi mukezuke. (Filipoi 4:8) Kadi bituapamina ku malu akena makezuke, nebitufikishe ku bienzedi bibi. (Matayo 15:18-20) Tudi ne bua kuepuka dijikija lutetuku didi mua kunyanga bieledi bietu bia meji. Tudi mua kuuja bieledi bietu bia meji ne ngenyi mikezuke pa kulonga Dîyi dia Nzambi.

      5. Bukezuke bua ku mubidi: Bu mudibu baleji-mpala ba Nzambi, bena nkristo badi ne bua kulama mibidi yabu ne bilamba biabu bikezuke. Tudi ne bua kuowa mâyi ku bianza kunyima kua dipengama, ne tudi ne bua kuowa bianza kumpala kua kudia peshi kulenga biakudia. Panudi kanuyi ne nkumba milongolola bimpe, bunyawu budi ne bua kujiikibua. (Dutelonome 23:12, 13) Kulama bukezuke bua ku mubidi kudi kuambuluisha bua kuikala ne makanda mimpe a mubidi. Kua muena nkristo kudi ne bua kuikala ne mankenda ne bukezuke munda ne pambelu. Kudi ne bua kumueneka bu tshilejilu tshimpe mu tshinsanga.

      6. Ngakuilu mukezuke: Basadidi ba Nzambi badi ne bua kuamba amu bulelela. Bena dishima kabakubuela mu Bukalenge bua Nzambi. (Efeso 4:25; Buakabuluibua 21:8) Bena nkristo kabena batumika ne ngakuilu mubi. Kabena bamba anyi bateleja anyi bakula mineku ya bundu peshi miyuki ikena mikezuke. Bua ngakuilu wabu mukezuke, badi bamueneka bashilangane ne bakuabu ku mudimu peshi mu tulasa ne ku mitumba yabu.​—Efeso 4:29, 31; 5:3.

      [Bimfuanyi mu mabeji 18, 19]

      Basadidi ba Nzambi badi ne bua kuikala bakezuke mu malu onso

  • Ngenzelu idi Nzambi ukina
    Ntshinyi tshidi Nzambi utulomba?
    • Dilongesha dia 10

      Ngenzelu idi Nzambi ukina

      Mmuenenu kayi uudi ne bua kuikala nende pa bidi bitangila malu adi Nzambi wamba ne: mmabi? (1)

      Mmishindu kayi ya ditumika ne bitupa bia lulelu idi mibi? (2)

      Mmunyi mudi muena nkristo ne bua kumona dishimangana? (3) manaya a mfranga? (3) buivi? (3) tshikisu? (4) spiritisme? (5) bukuatshiki bua maluvu? (6)

      Mmunyi mudi muntu mua kudilamuna ku bibidilu ne ngenzelu bia mushindu’eu? (7)

      1. Basadidi ba Nzambi mbanange tshidi tshimpe. Kadi badi kabidi ne bua kulonga mua kukina tshidi tshibi. (Musambu wa 97:10) Abi bidi biumvuija kuepuka ngenzelu kampanda idi Nzambi ukina. Imue ya kudiyi nngenzelu kayi?

      2. Tshiendenda: Diangatangana kumpala kua kubuela mu dibaka, masandi, diangatangana ne nyama, tshibindi, diangatangana dia mulume ne mulume peshi mukaji ne mukaji bionso ebi mmpekatu minene mienzela Nzambi. (Lewitiki 18:6; Lomo 1:26, 27; 1 Kolinto 6:9, 10) Bikala mulume ne mukaji kabayi baselangane eku basombe pamue, badi ne bua kuabulukangana anyi kuselangana bilondeshile mikenji ya mbulamatadi.​—Ebelu 13:4.

      3. Dishimangana, manaya a mfranga, buivi: Yehowa Nzambi kêna mua kushima to. (Tito 1:2) Bantu badi basue kuanyishibua kudiye badi ne bua kuepuka dishimangana. (Nsumuinu 6:16-19; Kolosai 3:9, 10) Dinaya dionso dia mfranga didi ne ditoba dia lukuka. Nunku bena nkristo kabena banaya dinaya kayi dionso dia mfranga bu mudi loteri, lubilu lua tubalu, ne bingo. (Efeso 5:3-5) Kabidi bena nkristo kabena biba nansha. Kabena basumba bintu bidibu bamanye se: mbiba anyi bangata bintu kabayi ne dianyisha.​—Ekesode 20:15; Efeso 4:28.

      4. Bu-mfiika-munda, Tshikisu: Tshiji katshiyi tshikontolola tshidi mua kufikisha ku bienzedi bia tshikisu. (Genese 4:5-8) Muntu muena tshikisu kêna mua kuikala mulunda wa Nzambi. (Musambu wa 11:5; Nsumuinu 22:24, 25) Ki mbimpe bua kudisombuela anyi peshi kupingaja bubi ku malu mabi adi bakuabu mua kuikala batuenzele.​—Nsumuinu 24:29; Lomo 12:17-21.

      5. Dilowangana ne spiritisme: Bamue bantu batu babila bukole bua ba-spiritu bua kuteta bua kuondapa masama. Bakuabu batu balowa bena lukuna babu bua kubasa disama anyi mene bua kubashipa. Bukole budi panyima pa ngenzelu yonso eyi n’Satana. Nunku bena nkristo kabena ne bua kubuelakana mu ngenzelu kayi yonso wa kudiyi nansha. (Dutelonome 18:9-13) Kushala pabuipi ne Yehowa ke dikubibua ditambe bulenga ku ditulowa kudi bakuabu.​—Nsumuinu 18:10.

      6. Bukuatshiki bua maluvu: Ki mbibi bua kunua mvinyo mukese, malà, anyi maluvu makole makuabu. (Musambu wa 104:15; 1 Timote 5:23) Kadi bunuavi ne bukuatshiki bua maluvu mbibi ku mêsu kua Nzambi. (1 Kolinto 5:11-13; 1 Timote 3:8) Kunua kupitshisha kudi mua kunyanga makanda ebe a mubidi ne kujudija matata mu dîku diebe peshi dienu. Kudi kabidi mua kukuponesha ne lukasa mu makuabu matetshibua.​—Nsumuinu 23:20, 21, 29-35.

      7. Bantu bàdì benza malu adi Nzambi wamba ne: mmabi, ‘kabakupiana bukalenge bua Nzambi.’ (Galatia 5:19-21) Biwikala munange bushuwa Nzambi ne musue kumusankisha, udi mua kudilamuna ku ngenzelu eyi. (1 Yone 5:3) Longa mua kukina tshidi Nzambi wamba ne: ntshibi. (Lomo 12:9) Disangishe ne bantu badi ne bibidilu bia buena-Nzambi. (Nsumuinu 13:20) Ba-nyânà bena nkristo bapie badi mua kuikala mpokolo wa diambuluisha. (Yakobo 5:14) Kupita bionso, eyemena diambuluisha dia Nzambi ku butuangaji bua disambila.​—Filipoi 4:6, 7, 13.

      [Bimfuanyi mu mabeji 20, 21]

      Nzambi udi ukina bukuatshiki bua maluvu, buivi, manaya a mfranga, ne bienzedi bia tshikisu

  • Mitabuja ne bilele bikena bisankisha Nzambi
    Ntshinyi tshidi Nzambi utulomba?
    • Dilongesha dia 11

      Mitabuja ne bilele bikena bisankisha Nzambi

      Mmitabuja ne bilele bia mushindu kayi bidi bibi? (1)

      Bena nkristo badi ne tshia kuitabuja ne: Nzambi m’Busatu Bunsantu anyi? (2)

      Bua tshinyi bena nkristo balelela kabena basekelela Nowele, Paska, ne mifikilu ya diledibua? (3, 4)

      Bafue badi mua kuenzela ba-muoyo bibi anyi? (5)

      Yezu wakafuila pa nkuruse anyi? (6)

      Kusankisha Nzambi kudi ne mushinga kayi? (7)

      1. Mitabuja ne bilele bionso ki mbibi nansha. Kadi Nzambi kêna ubianyisha pikalabi bifumina ku tshitendelelu tshia dishima anyi bibengangane ne malongesha a mu Bible.​—Matayo 15:6.

      2. Busatu Bunsantu: Yehowa udi Busatu Bunsantu​—bantu basatu mu Nzambi umue anyi? Tòo! Yehowa, Tatu, udi ‘Nzambi umuepele mulelela.’ (Yone 17:3; Mâko 12:29) Yezu m’Muan’a bute wende, ne udi ukokela Nzambi. (1 Kolinto 11:3) Tatu mmutambe Muana bunene. (Yone 14:28) Spiritu munsantu ki mmuntu nansha; mbukole buenzeji bua Nzambi.​—Genese 1:2; Bienzedi 2:18.

      3. Nowele ne Paska: Yezu kavua muledibue mu dia 25 Tshisua-munene to. Wakaledibua pamue ne dituku dia 1 Kasuamansense, mu tshikondo tshia tshidimu tshivua balami balama bimuna biabu mu mpata butuku. (Luka 2:8-12) Yezu kakatumina bena nkristo dîyi musangu nansha umue bua kusekelelabu diledibua diende. Bishilangane, wakambila bayidi bende bua kututshila lufu luende muoyo peshi kuluvuluka. (Luka 22:19, 20) Nowele ne bilele bisuikakajaku mbifumine ku bitendelelu bia dishima bia kale. Mbia mmuomumue ne bua bilele bia Paska, bu mudi ditumika ne mayi ne tululu. Bena nkristo ba kumpala kabavua basekelela Nowele peshi Paska nansha, ke mudi kabidi bena nkristo balelela ba lelu benza.

      4. Mifikilu ya diledibua: Masekelela abidi a mifikilu ya diledibua matela mu Bible avua menza kudi bantu bavua kabayi batendelela Yehowa. (Genese 40:20-22; Mâko 6:21, 22, 24-27) Bena nkristo ba kumpala kabavua basekelela mifikilu ya diledibua. Tshilele tshia disekelela mifikilu ya diledibua ntshifumine ku bitendelelu bia dishima bia kale. Bena nkristo balelela batu bafila mapa ne basanka pamue mu bikondo bikuabu munkatshi mua tshidimu.

      5. Ditshina bafue: Bafue kabena mua kuenza peshi kumvua tshintu nansha tshimue. Katuena mua kubambuluisha, ne kabena mua kutuenzela bibi. (Musambu wa 146:4; Muambi 9:5, 10) Anyima utu ufua; katu utungunuka ne muoyo kunyima kua lufu. (Yehezekele 18:4) Kadi imue misangu banjelu babi, bàdì babikidibua se: ba-demon, batu badileja bu spiritu ya bafue. Bilele bionso bidi bikuatakaja ku ditshina bafue peshi dibatendelela mbibi.​—Yeshaya 8:19.

      6. Nkuruse: Yezu kavua mufuile pa nkuruse to. Wakafuila pa dikunji, peshi mutshi. Muaku wa tshiena-Greke mukudimuna “nkuruse” mu Bible mivule uvua umvuija anu mukamba umuepele. Tshifuanyikiji tshia nkuruse ntshifumine ku bitendelelu bia dishima bia kale. Nkuruse kavua mutumika nende anyi mutendelela kudi bena nkristo ba kumpala to. Pa nanku, udiku wela meji ne: mbiakane bua kutumika ne nkuruse mu ditendelela diebe anyi?​—Dutelonome 7:26; 1 Kolinto 10:14.

      7. Bidi mua kuikala bikole bua kulekela amue a ku mitabuja ne bilele ebi. Balela ne balunda badi mua kudienzeja bua kukutuishisha bua ubenge kushintulula mitabuja ebe. Kadi kusankisha Nzambi kudi ne mushinga wa bungi kupita kusankisha bantu.​—Nsumuinu 29:25; Matayo 10:36, 37.

      [Tshimfuanyi mu dibeji 22]

      Nzambi kêna Busatu Bunsantu nansha

      [Tshimfuanyi mu dibeji 23]

      Nowele ne Paska mbifumine ku bitendelelu bia dishima bia kale

      [Tshimfuanyi mu dibeji 23]

      Kakuena kabingila ka kutendelela bafue peshi kubatshina

  • Dileja kanemu bua muoyo ne mashi
    Ntshinyi tshidi Nzambi utulomba?
    • Dilongesha dia 12

      Dileja kanemu bua muoyo ne mashi

      Mmunyi mutudi ne bua kumona muoyo? (1) ditula mafu? (1)

      Mmunyi mudi bena nkristo baleja ne: badi baditatshisha bua dikubibua? (2)

      Mbibi bua kushipa nyama anyi? (3)

      Ng’imue ngenzelu kayi idi kayiyi ileja kanemu bua muoyo? (4)

      Mukenji wa Nzambi pa mashi udi tshinyi? (5)

      Tudi mua kusakidilaku diedibua mashi anyi? (6)

      1. Yehowa ke Mpokolo wa muoyo. Bintu bionso bìdì ne muoyo mbiwupetele kudi Nzambi. (Musambu wa 36:9) Muoyo udi wa tshijila kudi Nzambi. Nansha muoyo wa muana utshidi munda mua mamuende udi ne mushinga kudi Yehowa. Kushipa ku bukole katoto katshidi kakola bu aka nkubi ku mêsu kua Nzambi.​—Ekesode 21:22, 23; Musambu wa 127:3.

      2. Bena nkristo balelela badi baditatshisha bua dikubibua. Badi batabalela bua se: mashinyi abu ne ku mbelu yabu bikale kabiyi ne njiwu. (Dutelonome 22:8) Basadidi ba Nzambi kabena bateka mioyo yabu mu njiwu ya tshianana anu bua didisankisha peshi bua dikuatshika milowo. Nunku kabena banaya manaya a tshikisu adi enzela bakuabu bibi ku budisuile. Badi bepuka dijikija lutetuku didi dikankamija tshikisu.​—Musambu wa 11:5; Yone 13:35.

      3. Muoyo wa nyama ng’wa tshijila pawu kudi Mufuki. Muena nkristo udi mua kushipa nyama bua kupeta biakudia ne bilamba anyi bua kudikuba ku masama ne njiwu. (Genese 3:21; 9:3; Ekesode 21:28) Kadi kukengesha nyama peshi kuyishipa anu bua manaya anyi didisankisha patupu nkubi.​—Nsumuinu 12:10.

      4. Bena nkristo kabena ne bua kunua makanya ne diamba, kutafunya misa ya betel, ne kuangata bintu bia lulengu bua didisankisha patupu. Ngenzelu eyi mmibi bualu (1) idi ituvuija bapika bàyì, (2) idi inyanga mubidi wetu, ne (3) kayena mikezuke. (Lomo 6:19; 12:1; 2 Kolinto 7:1) Bidi mua kuikala bikole bitambe bua kulekela bibidilu ebi. Kadi tudi ne bua kubilekela bua kusankisha Yehowa.

      5. Mashi pawu adi a tshijila ku mêsu kua Nzambi. Nzambi udi wamba ne: anyima, peshi muoyo, udi mu mashi. Nunku kudia mashi nkubi. Kudia munyinyi wa nyama údí kayi mukosa muminu biakane nkubi paku. Bikala nyama mufiekela mu nshingu peshi mufuile mu buteyi, katuena ne bua kumudia nansha. Bikalaye muasa difuma anyi tshingoma, udi ne bua kukoshibua muminu ne lukasa pikalaye wa kudia.​—Genese 9:3, 4; Lewitiki 17:13, 14; Bienzedi 15:28, 29.

      6. Kuanyisha diedibua mashi nkubi anyi? Wavuluka, Yehowa udi utulomba ne: tudilame ku mashi. Ebi bidi biumvuija se: katuena ne bua kuela mashi a mukuabu muntu peshi mashi etu malama muaba kampanda mu mibidi yetu mu mushindu kayi wonso. (Bienzedi 21:25) Nunku bena nkristo balelela kabakuanyisha diedibua mashi to. Nebanyishe ngondapilu mikuabu kayi yonso, bu mudi diedibua mu mubidi dia bintu bikena bienza ne mashi. Mbasue kuikala ne muoyo, kadi kabakuteta kupandisha muoyo wabu pa kutupa ku mikenji ya Nzambi.​—Matayo 16:25.

      [Bimfuanyi mu dibeji 25]

      Bua kusankisha Nzambi, tudi ne bua kuepuka diedibua mashi, bibidilu bikena bikezuke, ne njiwu ya tshianana

Mikanda ya mu Tshiluba (1982-2024)
Patuka
Buela
  • Tshiluba
  • Tumina bakuabu
  • Biudi musue
  • Copyright © 2025 Watch Tower Bible and Tract Society of Pennsylvania
  • Malu a kulonda
  • Mikenji ya mua kulama malu masokoka
  • Biudi witaba bua kuenzekabi mu tshiamu
  • JW.ORG
  • Buela
Tumina bakuabu