“Mushindu unudi eu ke udi Nzambi musue bua tuetu kuikala”
BENA KRISTO badi mua kutekemena bua ‘babatumbishe [bu] benji ba malu mimpe’ padibu bumvuangana ne bakokeshi ba panu bua ‘bualu bua Mukalenge.’ (1 Petelo 2:13-15) Bantemu ba Yehowa ba mu ditunga dia Afrique du Sud bakamona bualu ebu kukadi kupite matuku ndambu mu mpungilu wa distrike uvuabu benzele mu nzubu munene wa université kampanda.
Dituku dia kumpala dia mpungilu, bampulushi bakubi ba université eu bakadilongolola bua bungi bua pa tshibidilu bua bantu bafiike munda ne badi kabayi kumvuangana nabu, bu aba bavuabu bamona mu mpungilu mikuabu. Kadi muvuabu kabayi banji kupetangana ne Bantemu ba Yehowa, bakakema bikole bua bivuabu bamone!
Bampulushi bavua bakontolola ku biibi dibuela ne dipatuka dionso dia mashinyi mu lupangu bu mutubu benza pa tshibidilu. Bavua bakema pa kumona babela muoyo wa bulunda, ne lutulu ne kanemu nansha muvua dikontolola edi dijingakaja bantu. Kakuvua dikandamana ditubu bamona pa tshibidilu, nansha matandu anyi mêyi mabi kabidi. Munene kampanda wa bampulushi wakamba ne: “Bishilangane ne bakuabu batu balua muaba eu, nuenu nudi ne lungenyi lua bupuekele ne lua didinemeka lutudi tumona tuetu bonso.”
Diakamue pakamona mfumu wa bampulushi ngikadilu wa diumvuangana wa Bantemu ba Yehowa, wakapangadija ne: kabivua ne mushinga bua kukontololabu mashinyi to, ne kusakidilaye ne: “bualu nudi batambe kumanya malu.” Nenku, bavua babueja mashinyi avua malamika tshimanyinu tshia “JW” (mmumue ne: Bantemu ba Yehowa) kakuyi diakontolola.
Ku ndekelu kua mpungilu, mfumu wa bampulushi wakamba ne: uvua mutekemene bua Bantemu kupinganabu kabidi mu katupa kîpi. Wakamba ne: “Katutu banji kumona bantu ba tshikadilu tshimpe nunku to. Mushindu unudi eu ke udi Nzambi musue bua tuetu kuikala.” Kalumbandi ka mushindu’eu mbualu bukuabu budi busaka bena Kristo balelela ku dikala ne ‘bienzedi bimpe,’ bua se: bantu ‘batumbishe Nzambi bua midimu yabu mimpe idibu bamona.’—1 Petelo 2:12.