Udi “musue” kuambuluisha bakuebe anyi?
1 Yezu uvua bushuwa utabalela bantu. Dimue edi pakamusengelela muena nsudi mukuabu bua amuambuluishe, Yezu wakolola tshianza tshiende, kumulenga ne kuambaye ne: ‘Ndi musue. Wikale mulengejibue.’ (Mâko 1:40-42) Mmu mishindu kayi mutudi mua kuidikija lungenyi elu lua Yezu lua kuambuluisha bakuabu?
2 Bantu badi basankidila bulelela: Muena mu tshisumbu yonso udi ne tshiende tshidiye wenza mu mudimu wa diambuluisha dia bantu badi basankidila bulelela bua kuluabu batendeledi ba Yehowa. Padi bantu bapiabapia balua mu bisangilu, mbimpe kubela muoyo ne kuteta bua kumanyangana nabu. Keba mishindu iwudi mua kubakankamija. Bela kalumbandi bua mandamuna adibu bafila mu bisangilu. Leja dianyisha bua bionso bidibu benza bua kutumikila mikenji ya mu Bible mu nsombelu wabu. Bambuluisha bua bamanye ne: badi mua kupeta balunda balelela mu tshisumbu.
3 Bena kuitabuja netu: ‘Bena dîku dia bena kuitabuja’ ke batudi nangananga ne bua kuanji kuambuluisha mu mishindu ya bungi. (Gal. 6:10) Bamue badi baluangana ne masama. Wewe muye kubatangila ne kubakankamija, udi mua kubapetesha bulunda budibu nabu dijinga ne pamu’apa kubambuluisha mu mishindu ya bungi. Banga badi mua kuikala ne ntatu mikuabu mu nsombelu wabu. Leja muudi uditatshisha bua bualu buabu pa kubatelejaku ne kubakolesha ku muoyo. (1 Tes. 5:14) Bakulu pabu badi bajinga ne: tubeleshe diboko mu dikumbaja diabu dia majitu abu. (Eb. 13:17) Patudi tuambuluisha bakuetu ku budisuile, tudi mua ‘kuikala basambi’ kudi bena kuitabuja netu.—Kolos. 4:11.
4 Bena dîku dietu: Tudi kabidi ne bua kuenza muetu muonso bua kuidikija Yezu pa kuditatshisha bua bena mu dîku dietu. Diditatshisha bikole bua bakuabu didi disaka baledi bua ‘kudiundisha bimpe [bana babu] ne dibela ne didimuija bia Mukalenge.’ (Ef. 6:4) Bana badi pabu mua kuelesha baledi diboko pa kudiakaja padi dîba dia dilonga dia mu dîku dikumbana, ne bua kuya mu bisangilu bia tshisumbu, anyi mu mudimu wa budimi. Bana bakadi bakulumpe badi mua kuleja luse lua buena lua Yezu pa kuambuluishaku baledi babu bua kutantamena ntatu idibu nayi bua bukulakaje. Mu mishindu eyi ne mikuabu, tuetu bonso tudi mua ‘kuyila mua kunemeka ba mu dîku [dietu].’—1 Tim. 5:4.
5 Patudi tuidikija Yezu ne tuambuluisha bakuabu, imue ntatu idi ikepela ne kabidi tusemeja dîku dietu ne tshisumbu pabuipi. Tshidi ne mushinga menemene kupita bionso, tudi tutumbisha Yehowa, ‘Tatu wa luse.’—2 Kol. 1:3.