Bantemu ba Yehowa pa buloba bujima: Nouvelle-Zélande

BIDIILA bidi mua kusamuna Yehowa anyi? Eyowa, bilondeshile Yeshaya 42:10 (MMM): “Imbilayi [Yehowa, NW] musambo mupiamupia, numutumbishe too ne ku ndekelu kua buloba. . . . nuenu bidi[i]la ne bantu bonso badi basemu, numutumbishe!” Bidiila bìdì bienza Nouvelle-Zélande bidi bushuwa bisamuna Yehowa. Muende lumu pa buloba bujima bua majiba, mâpa a mâyi a mbuu, mikuna milemile, mabue manene a mashika, mielelu ya mâyi idi ne lusenga, metu a miaba ya luya malengeja kudi mishilushilu, ne miaba ya mpatshi ya mpata, Nouvelle-Zélande udi ujadika mu mushindu wa tshishiki bunene ne bunême bia Mufuki wa diulu ne buloba.

Diakamue kunyima kua dituadija dia siekele eu wa 20, bena Nouvelle-Zélande bavule mbasakidile mêyi abu bua kusamuna Yehowa pa kukudimuka kudiye mu ntendelelu mukezuke ne kuabanyangana lumu luimpe lua Bukalenge bua Nzambi ne bakuabu. Mu matuku adi panshi aa, Ntemu kampanda wakumvua bualu kansanga buimpe bumona pa bidi bitangila difila bumanyishi kudi bena mu dîku wakapangadika bua kuenza madikolela ne bena mu diende dîku. Wakaleja kakuyi dilomba mfranga kopi ya mukanda wa Udi mua kuikala ne muoyo wa kashidi pa buloba bukudimuna mparadizu kudi bena mu dîku diende bavule. Mbipeta kayi biakapetaye pashishe? Udi umanyisha ne: muanabu umue wa bakaji ne umue wa balume badi mpindieu balonga Bible, muîpu wende kampanda wafumi ku dibatijibua bu Ntemu wa Yehowa, ne bakuabu badi mpindieu badiakaja bua kuteleja bulelela bua Dîyi dia Nzambi. Udi kabidi ne budimi bunene bua kutumika nabu; pa kumbusha baledi bende, udi ne bana babu ba balume basambombo ne ba bakaji tshitema!

Disamuna Yehowa didi kabidi dienzeka padi Bantemu bateka pamue madikolela abu bua kuibaka Nzubu ya Bukalenge. Tshilejilu, kamona-kamba Roy Perkins wakafunda mu tshikandakanda tshia Opotiki News tshia mu dia 17 Lumungulu 1994 ne: “Bu mumvua tshiyi muena kuitabuja, ngakalengibua bikole ku mutshima kudi midimu ne madikolela bia bena mudimu buonso baditshipe bakenza mêba ne madikolela mavule ku mudimu bua dinanga dia Nzambi wabu.

“Munkatshi mua mêba wonso aa a mudimu mapitshisha ku ndekelu kua lumingu tshiakumvua anyi kumona matandu munkatshi mua tshisumbu tshia bena mudimu . . . Bakaji bavua babande pa biimanyinu benda batumika pamue ne bena mudimu nabu balume, pa kulaba siman mu mpunga, babandisha, bambula bintu bia luibaku, bionso ebi mu nsombelu wa bupole ne disanka.

“Ne kakuvua muena mudimu nansha umue uvua ujimija dîba bua makanya. Bua bantu buonso aba bavua benza mudimu mu muanzu kayi wonso kapepe kavua kakezuke pa kumbusha mupuya wa mukubu ne lupuishi lua matafuadi.”

Kasumbu ka bakulu ba tshisumbu tshia Opotiki bakafunda ne: “Mudimu eu mujima mmulenge bikole mitshima ya bena tshimenga. Mbimueneke se: bantu buonso badi bayukidilangana pa bualu ebu. Malonga mavule a Bible mmatuadijibue. Dimue disunguluke diakatulenga bikole ku mutshima mbena dibaka babidi bavua badifile ne kasuki mu malu abu a Nzambi bavua munkatshi mua bidimu bivule balomba bua katubakumbudi. Bavua balue ku muaba wa luibaku dituku dionso ne pashishe bakabuela mu tshisangilu. Mulume wakamba pashishe ne: ‘Ndi mmona se: nudi tshisamba tshia Nzambi. Mundamunda, mvua njinga ne luzuku bua kushemesha malanda ne bantu ba mushindu’eu mu nsombelu wanyi.’”

Tshidimu tshishale, kamona-kamba kampanda wa tshikandakanda tshia Otago Daily Times wakamba tshidi tshilonda etshi pa bidi bitangila luibaku lua lukasa lukasa lua Nzubu wa Bukalenge mu Dunedin: “Uvua mudimu wa pa buawu, tshilejilu tshia pa buatshi tshia disakibua ne difila diambuluisha ku budisuile.” Tshikandakanda tshimue tshimue etshi tshiakamba ne: “Bena tshimenga bavua babandila ne dikatshila pavua nzubu munene wenda wibakibua mu mêsu abu, ne bavule bavua bafuanyikija mashintuluka ne midimu mikuabu mimpe bidi mua kuenjibua bikalaku mudimu mualabale wa ku budisuile wa muomumue ne dijinga dinene dia kueleshangana diboko. Nzubu wa Bukalenge udi tshimanyinu tshia kuendela ntunku tshia madikolela adi apatula bipeta menza bua kuibaka.”

Ku nkama ya bantu bakalua bua kukumbula muaba wa luibaku, mulume kampanda wakaleja ne: Bantemu bavua bibaka “nzubu ya Nzambi” eku wende ekleziya uvua wenda uyisumbisha bua dikepela dia bungi bua batendeledi. “Bu nuenu bindile ngondo mitue ku dikumi ne ibidi, nuvua mua kusumba umue wa kudiyi,” ke muakelaye nseka. “Tudi ne bua kupanyisha umue bualu katuena ne mushindu wa kutungunuka ne mafutu. Kadi, bushuwa, nuenu kanuena ne bamfumu ba malu a Nzambi badi bafutshibua. . . . Ne pashishe nzubu yenu mmipepele bua kukuba, kayena nzubu milemile ya tuleya idi mikole bua kukuba.”

Biamueneki patoke se: bidiila bidi bushuwa mua kusamuna Nzambi. Disamunyibua dia Yehowa nditungunuke ne kumvuika tshivuma mu tshidiila etshi tshilengele tshia mbuu wa Pasifike​—ne pa buloba bujima!

[Kazubu mu dibeji 9]

NSOMBELU WA DITUNGA:

Tshidimu tshia mudimu 1994

BUNGI BUBANDILE BUA BAMANYISHI: 12 867

MUAYENE: Ntemu 1 bua bantu 271

BUNGI BUA BAVUA MU TSHIVULUKILU: 24 436

MUAYENE WA BAMPANDA-NJILA: 1 386

MUAYENE WA MALONGA A BIBLE: 7 519

BUNGI BUA BATAMBULE: 568

BUNGI BUA BISUMBU: 158

BIRO BIA FILIALE: MANUREWA

[Tshimfuanyi mu dibeji 9]

Bampanda-njila bapatuka mu budimi bu mu 1930

[Tshimfuanyi mu dibeji 9]

Nzubu ya filiale mu Manurewa

[Tshimfuanyi mu dibeji 9]

Diyisha mukenji wa Bukalenge mu Devonport, Auckland