Tufilayi Mukanda Wa Dimanya didi Difikisha Ku Muoyo Wa Kashidi

 ¹ Ndisanka kayipu dituvua nadi pakapatuka mukanda wa Dimanya didi difikisha ku muoyo wa kashidi! Mukand’eu mmuenza mu mushindu wa kuambuluisha bantu bua kupetabu pa lukasa dimanya dijalame dia bulelela. Mu Kabalashipu, netuufile mu teritware wetu. Tshitudi mua kuamba ntshinyi bua kusonsola dijinga dia kumanya bia bungi dia batuteleji?

 ² Dileja edi didi mua kukoka ntema ya bantu badi ne ditabuja diabu kudi Nzambi ditekete:

◼ “Bantu bavule bavua bakola ne ditabuja kudi Nzambi mbafike ku dimona se: ditabuja diabu kadiena kabidi dikole bu muvuadi kumpala nansha. Bua diebe dimona, kabingila kadi mua kuikala tshinyi? [Lekela muntu andamune.] Ditabuja dietu kudi Nzambi didi dikoleshibua patudi tuela meji ku bintu bia dikema bia mu bukua-mabulunge. [Bala Musambu wa 19:⁠1.] Eu muena mikenji idi ilombola mabulunge mu diulu udi kabidi utuludika bilenga. [Bala Musambu wa 19:⁠7-9.] Mvese eyi idi ileja ne: bidi bia mushinga bua kulonga bionso bitudi mua kumanya pa bidi bitangila Nzambi ne mapangadika ende. [Koka ntema pa tshimfuanyi tshia mu dibeji 4 ne 5, ne bala miaku idi mu kazubu.] Biwajinga kupetela masanka ku dimanya edi dia pa buadi, nensanke bua kukushila mukand’eu.”

 ³ Pa kuela meji ku bualu kampanda budi bukuatshisha buôwa buenzeke mu matuku mashale aa, udi mua kuamba ne:

◼ “Kakuyi mpata, uvua mumvue lumu lua [tela bualu]. Kutuku muanji kudiebeja bikala Nzambi uditatshisha bulelela pa kumona dipanga buakane ne ntatu bidi bitufikila anyi? [Lekela muntu andamune.] Bible udi utujadikila ne: Nzambi mmutunange ne neatuambuluishe mu bikondo bia ntatu.” Bala miaku misunguluke ya mu Musambu wa 72:​12-17. Bulula mukanda mu dibeji dia 70, ne umvuija ne: mukand’eu wa Dimanya didi difikisha ku muoyo wa kashidi, udi wandamuna ku lukonko elu ludi miliyo ya bantu badiela: Bua tshinyi Nzambi mmulekele dikenga? “Neujingulule se: diandamuna dia mu Bible ku lukonko elu didi dikolesha mutshima. Nensanke bua kukushila mukand’eu bua udimuenene diandamuna adi.”

 ⁴ Biwasangana tatu kampanda peshi mamu kansanga, wakule bua dîku:

◼ “Baledi bavule mbamanye se: bidi bikole bua kuikala ne nsombelu wa disanka mu dîku. Bua diebe dimona, mmalu kayi manene adi apumbisha bualu ebu? [Lekela muntu andamune.] Bavule ba kutudi badi benza muabu muonso mua kuenza, kadi tudi tujinga bonso kumanya tshidi mua kutuambuluisha bua kupeta bipeta bimpe. Bible udi ufila mibelu milenga mitambe. [Bala bitupa bisunguluke bia mu Kolosai 3:​12, 18-21.] Bible udi wamba malu mavule pa bidi bitangila bualu ebu, bu mudibi bileja mu nshapita wa 15 wa mukand’eu udi ne tshiena-bualu tshia: ‘Mushindu wa kuibaka dîku didi diambika Nzambi lumu.’ Udi ukonga mibelu ya mu Bible idi ileja mushindu wa kujikija bilumbu pankatshi pa bena dibaka ne kuambuluisha bana bua kuakamabu ntatu yabu. Ndi mujadike se: newanyishe dibala dia mukand’eu.”

 ⁵ Biwajinga kuakula mu tshikoso, udi mua kutuadija diyukidilangana mushindu’eu:

◼ “Kutuku muanji kudiebeja bua tshinyi tudi tukulakaja ne tufua anyi? Nshapita 6 wa mukand’eu udi umvuija tshidi tshituala lufu ne mushindu wikala Nzambi mua kulujikija. Bible udi utumanyisha ne: Nzambi mmulaye badi bamunange muoyo wa kashidi. [Bala Yone 17:⁠3.] Biwajinga kumanya bia bungi pa bualu ebu, newanyishe mukand’eu udi ne ngenyi ya mushinga mukole.”    

 ⁶ Bituikala badilongolole bimpe, netuikale mua kutumika ne mukand’eu bua ‘kujinguluila bantu netu Mifundu’ bua kusankabu bikole.​—⁠Luka 24:⁠32.

Tualukilayi Bua Kutangila Bantu Bavua Baleje Dijinga Dia Kumanya Bia Bungi

 ¹ Pakapatuka mukanda wa Dimanya didi difikisha ku muoyo wa kashidi, ngamba-malu wakumvuija ne: “padibu bajikija mukand’eu, bantu badi ne dijinga dia kumanya nebikale balonge bia bungi ne badiakaje bua kuditeka ku luseke lua Yehowa ne kutambuishibua.” Mukand’eu mmulongolola mu mushindu wa kulongesha bulelela lukasa. Udi ufila mamanyisha majalame adi mua kusaka bantu bua kulubulukabu mu nyuma. Udi uleja bulelela mu mushindu muakane, kakuyi dijimija dîba pa malongesha a dishima. Bua kutumika ne tshiamu etshi mu mushindu muakanyine bidi bikengela kualukila bua kukumbula aba bavua baleje dijinga dia kumanya bia bungi.

 ² Bituikala bakule ne muntu uvua kayi ne ditabuja kudi Nzambi kadi muikale ne dijinga kampanda dia kumanya bia bungi, netuikale mua kutuadija diyukidilangana pa kubulula mukanda pa tshimfuanyi tshia mu dibeji 4 ne 5 ne kuamba ne:

◼ “Musangu mushale pamvua mulue, tuvua batangile pamue tshimfuanyi etshi tshilengele tshidi tshileja nsombelu mulenga. Mu kazubu mudi lukonko elu: ‘Ntshinyi tshiudi ne bua kuenza bua kuubabidila?’ Udi wela meji kayi pa bualu ebu? [Lekela muntu andamune.] Bible udi ufunkuna patoke bumue bua ku malu malomba a nshindamenu. [Bala Yone 17:⁠3.] Dimanya didi dikengedibua bua kuikala ne ditabuja kudi Nzambi. Mushindu mutambe buimpe wa kulonga bitudi ne bua kumanya ng’wa kudifila ku dilonga dia Bible mu mushindu mulongame.” Bulula mukanda mu nshapita wa kumpala ne zangika imue ya ku ngenyi mikankamiji idi isanganyibua mu bikoso 1-5. Umvuija mushindu ututu tulombola dilonga dia Bible ne upangadike bua kualukila bua kutungunuka ne diyukidilangana dienu.

 ³ Biwalukila ne dijinga dia kuambulula diyukidilangana dia musangu mushale pa bidi bitangila dilekeela dia Nzambi malu mabi, udi mua kuamba ne:

◼ “Musangu mushale pamvua mulue, tuvua bakule bua [vuluija bualu buuvua mutele]. Ebi bivua bitufikishe ku didiebeja bua tshinyi Nzambi mmulekele ntatu mivule nunku pa buloba. Udi mufike ku nkomenu kayi? [Lekela mukuyukidishi andamune.] Bidi bikankamija bua kumanya se: ki nNzambi udi ukebesha nsombelu eyi idi ikengesha bantu nansha.” Bulula mukanda wa Dimanya didi difikisha ku muoyo wa kashidi mu mabeji 71-2 ne nuyukidilangane ngenyi ya mu Bible mileja mu bikoso 3-5. Ulombe bua kualukila bua kumvuija bua tshinyi tudi mua kuikala bashindike se: dilekela dia ntatu kudi Nzambi nedijike mu matuku makese aa.

 ⁴ Bikala muntu uudi ukumbula muikale ne bana ne uteya ntema ku nkonko idi itangila dîku, udi mua kuamba ne:

◼ “Ndi ngela meji se: bu muudi tatu (peshi mamu) wa dîku, udi ujingila bana bebe malu adi matambe buimpe. Bu mudibi bikole bua kubakuba ku bionso bidi bibi, bidi bikengela kubalongesha mushindu wa kuakama ntatu ya mu nsombelu. Mmunyi muudi mua kufika ku dienza nunku? [Lekela muntu andamune.] Tshimue tshia ku bintu bia mushinga bidi baledi mua kupesha bana babu, nkoleshilu mulenga.” Bulula mukanda wa Dimanya mu mabeji a 145-6 ne ela kashonyi pa mibelu miakanyine ya mu Bible; uzangike mushinga wayi ne masanka adi afumina ku diyilonda. Ulombe bua kualukila ne kuleja mushindu wa kutumika ne mukand’eu bua kuikala ne nsombelu wa disanka mu dîku.

 ⁵ Biwakumbula muntu uuvua mumanyishe mukenji mu tshikoso, udi mua kuamba ne:

◼ “Dikulakaja ne difua kabivua bipangadijibue mu dilongolola dia Nzambi nansha. Uvua musue bua tuikale ne muoyo wa kashidi mu Mparadizu pa buloba.” Umvuija tshimfuanyi tshidi mu mabeji a 188-9. Bala tshikoso tshia 11 mu dibeji dia 184. Pungayi dîyi bua dikumbula dikuabu.

 ⁶ Mukand’eu ntshiamu tshisakidila tshidi Yehowa utumika natshi bua ‘kuambuluja’ mudimu wa disangisha bantu udi ukumbajibua mu matuku aa a ku nshikidilu. (Yesh. 60:22) Bituatumika nawu mu mushindu muakane, netupeteshe bantu dimanya dikale mua kuambuluisha muntu bua kupetaye muoyo wa kashidi.