Tumanyishayi bulelela pa bidi bitangila Yezu
1 Bena Kristo bela manyi, bambuluisha kudi balunda babu mikoko mikuabu, ‘badi ne [mudimu] wa bumanyishi bua Yezu.’ (Buak. 12:17) Eu mmudimu wa mushinga mukole bualu bantu nebapetele lupandu kudiye.—Yone 17:3; Bien. 4:12.
2 ‘Njila, bulelela ne muoyo’: Yezu wakamba ne: ‘Meme ndi njila ne bulelela ne muoyo; kakuena muntu udi ulua kudi tatu, kayi muanji kulua kundi diambedi.’ (Yone 14:6) Tudi mua kusambila Nzambi ne kudia nende malanda adiye wanyisha anu ku butuangaji bua Yezu, yeye udi muikale “njila.” (Yone 15:16) Yezu udi “bulelela” bualu milayi ne bimfuanyi bidi mu Mifundu ya tshiena-Ebelu biakakumbanyina mu yeye. (Yone 1:17; Kolos. 2:16, 17) Bushuwa, tshipatshila menemene tshia mulayi mulelela ntshia kutokesha bimpe menemene mudimu wende munene wa dikumbaja dia dijinga dia Nzambi. (Buak. 19:10) Kabidi, Yezu udi “muoyo.” Bua kupeta dipa dia muoyo wa tshiendelele, bantu bonso badi ne bua kuleja ditabuja bua mulambu wende wa tshia-bupikudi wakafilaye.—Yone 3:16, 36; Eb. 2:9.
3 Mutu wa tshisumbu ne Mukalenge udi ukokesha: Bantu badi kabidi ne bua kumanya bukokeshi bualabale budi Yehowa mupeshe Muanende bua kufikisha bantu ku dinemeka mikenji yende. Bakadi bamane kuteka Yezu Mukalenge wa Bukalenge bua Nzambi, udi ‘bantu bonso bakukuila.’ (Gen. 49:10) Kabidi, Yehowa mmumuteke Mutu wa tshisumbu. (Ef. 1:22, 23) Tudi ne bua kuambuluisha balongi betu ba Bible bua bajingulule mushindu udi Yezu ulombola tshisumbu ne ukuata mudimu ne “mupika wa lulamatu ne wa budimu” bua kufila ‘biakudia [bia mu nyuma] mu tshikondo tshiakanyine.’—Mat. 24:45-47, NW.
4 Muakuidi Munene wa luse: Bu muvuaye mupete mateta ne mumone makenga patshivuaye muntu bu bantu bonso panu, mpindieu Yezu ‘udi mua kuambuluisha badi pabu mu matetshibua.’ (Eb. 2:17, 18, Mukanda wa Mvidi Mukulu [Katolike, MMM]) Mmunyipu mudibi bitukolesha ku muoyo tuetu bantu bapange bupuangane aba patudi tumanya ne: Yezu udi utumvuila bua mateketa etu ne utuakuila ne dinanga dionso! (Lomo 8:34) Bua mulambu wa Yezu ne mudimu wende wa Muakuidi Munene, tudi mua kusemena kudi Yehowa “ne muoyo mukole” bua kumona mua kupeta “diambuluisha dîba diakane.”—Eb. 4:15, 16, MMM.
5 Tuenzayi bua bionso bitudi tuenza bua kumanyisha bakuetu bulelela pa bidi bitangila Yezu bibasake ne bibafikishe ku ditumikila ne ku dimusadila popamue netu.—Yone 14:15, 21.