Tulejayi “bana ba nshiya” dinanga
1 Yehowa udi “tatu wa bana ba nshiya.” (Mus. 68:5) Dijinga diende dia kubamona bikale bimpe didi dimuenekela mu dîyi edi diakatuminaye tshisamba tshia Isalele tshia pa kale ne: ‘Kanukengeshi bakaji ba mu lufuila anyi bana ba nshiya. Biwabakengesha ne biadilabu kundi, meme nengumvuile muadi wabu.’ (Ekes. 22:22, 23) Mikenji ya Nzambi idi kabidi ne mêyi adi amba bua kuambuluisha bakaji ba mu lufuila peshi bana ba nshiya padibu dijinga ne bintu kampanda. (Dut. 24:19-21) Mu Buena-Kristo, mbapeshe batendeledi balelela mubelu udibu ne bua kulonda wa ‘kutangila bana ba nshiya ne bakaji ba mu lufuila mu dikenga diabu.’ (Yak. 1:27) Mmunyi mutudi mua kuidikija dinanga dia Yehowa didiye uleja bana badibu bakolesha kudi muledi umue anyi badi mu mêku adi kaayi mu buobumue mu malu a ntendelelu?
2 Dilongesha malu a mu nyuma: Biwikala muledi udi udikoleshila bana nkayebe ta muikale ne muena dibaka udi kayi mu bulelela, bidi mua kuikala lutatu lukole bua kuikala pa tshibidilu ulonga Bible ku nzubu ne bana bebe. Kadi dilonga dia Bible dimpe dia pa tshibidilu didi diambuluisha bikole bua bana kushindamabu mu nyuma, kukolabu kulua bantu ba busunguluji. (Nsu. 22:6) Kuyukila dituku dionso ne bana pa malu a mu nyuma kudi kabidi ne mushinga wa bungi. (Dut. 6:6-9) Imue misangu udi mua kudiumvua mutekete mu maboko, kadi kulekedi to. Lomba bukole kudi Yehowa ne buludiki paudi ‘ukolesha [bana bebe] bilenga, ubalengeja, kabidi ubabela ne meji a kudi [Yehowa].’—Ef. 6:4, MMM.
3 Biwikala dijinga ne diambuluisha bua kumona mua kukumbaja bujitu bûdi nabu bua kulongesha [bana bebe] malu a mu nyuma, manyisha bakulu bualu ebu. Badi mua kukupesha ngenyi miakanyine ta kukuambuluisha bua kulongolola ndongamu muimpe wa malu a mu nyuma a wewe kuikala ulonda mu dîku diebe.
4 Mushindu udi bakuabu mua kuambuluisha: Mu bidimu lukama bia kumpala, Timote wakalua musadidi wa Yehowa wa lukunukunu nansha muvuaye mukolele mu dîku divua kadiyi mu buobumue mu malu a ntendelelu. Kakuyi mpata, mushindu uvua mamuende ne kakuende mukaji badienzeje ne tshisumi bua kumulongesha mifundu minsantu mu bunsonga buende wakambuluisha bikole bua kufikaye ku tshivuaye atshi. (Bien. 16:1, 2; 2 Tim. 1:5; 3:15) Disangila dia Timote ne bena Kristo bakuabu ne mupostolo Paulo wakamutela bu ‘muanende munanga ne wa kueyemena mu Mukalenge’ diakamuambuluisha kabidi bikole.—1 Kol. 4:17.
5 Bia muomumue lelu’eu, bidi biambuluisha bikole padi bana betu ba balume ne ba bakaji bapie mu nyuma batabalela ne dinanga bana ba nshiya badi mu tshisumbu! Udiku mubamanye bonso muntu ne muntu ku dîna diende anyi? Utuku uyikila nabu mu bisangilu ne mu bikondo bikuabu anyi? Ubalombe bua kukufilabu mu mudimu wa buambi. Pamuapa udi mua kuikalaku misangu mikuabu ubabikila balua ne muledi wabu udi udikoleshilabu diboko dia bu-nkaya peshi eu udi muena Kristo bua kubuelabu mu dilonga dienu dia mu dîku anyi kusankabu pamue nenu dîba dinudi nujikijaku mukodi. Padi bansonga aba bakuangata bu mulunda wabu, badi pamuapa mua kulonda tshilejilu tshiebe ne kuitaba mêyi a dibakankamija audi ubambila.—Filip. 2:4.
6 Yehowa udi utabalela bikole bana ba nshiya, ne udi utubenesha patudi tudienzeja ne dinanga dionso bua kubambuluisha bua kulondabu njila wa bulelela. Bakakankamija nunku bana ba bungi badi bakolele mu mêku adi muledi umue peshi adi kaayi mu buobumue mu malu a ntendelelu ne mpindieu, badi basadila ne lulamatu bikale bampanda-njila, basadidi ba mudimu, bakulu, batangidi bena-ngendu, ba-misionere anyi bena ku Betele. Tuetu bonso tukebayiku mishindu ya ‘kunzulula mioyo’ yetu ne kunanga bana ba nshiya, bua kuidikija Tatu wetu wa mu diulu.—2 Kol. 6:11-13, MMM.