Tumanyishayi mukenji wa Bukalenge
1 ‘Bundi nabu mbua kumanyisha lumu luimpe lua Bukalenge bua Nzambi; buakantuminabu mbualu ebu.’ (Luka 4:43) Pakambaye mêyi aa, Yezu wakaleja tshivua tshiena-bualu tshia mudimu wende: Bukalenge bua Nzambi. Mukenji utudi tumanyisha lelu mmuashila pawu pa Bukalenge, anu mudibu baleje mu Matayo 24:14, ne: ‘Nebambile bantu bonso ba pa buloba lumu luimpe elu lua Bukalenge buanyi, neluikale tshimanyishilu ku bisamba bionso, pashishe, nshikidilu nealue.’ Mmalu kayi a bulelela budi butangila Bukalenge bua Nzambi adi bantu ne bua kuteleja?
2 Bukalenge bua Nzambi budi bukokesha mpindieu mu diulu ne mu katupa kîpi emu nebupingane pa muaba wa makalenge a bantu onso. Bakadi bipate Diabolo mu diulu ne ndongoluelu mubi wa malu eu ukadi mu matuku ende a ku nshikidilu. (Buak. 12:10, 12) Ndongoluelu mubi wa Satana neabutudibue butubutu, kadi Bukalenge bua Nzambi kabakubunyungisha to. Nebushale kashidi ne tshiendelele.—Dan. 2:44; Eb. 12:28.
3 Bukalenge nebukumbajile bantu bonso ba butumike majinga abu mimpe. Nebajikijile bantu makenga onso adi mvita, dibunda bilumbu, dikengeshangana ne bupele bikebeshe. (Mus. 46:8, 9; 72:12-14) Nekuikale biakudia bua bantu bonso. (Mus. 72:16; Yesh. 25:6) Masama ne bulema nebilue malu a kale. (Yesh. 33:24; 35:5, 6) Pikala bantu benda baya batangile ku bupuangane, buloba nebukudimuke mparadizu, ne bantu bonso nebasombe pamue mu diumvuangana.—Yesh. 11:6-9.
4 Tudi tuleja ne: tudi basue kuikala bantu bikala Bukalenge bua Nzambi ne bua kulombola ku nsombelu utudi nende mpindieu. Mukenji wa Bukalenge udi ne bua kutusaka bua kushintulula nsombelu wetu mujima, malu atudi tuipatshila ne makuabu atudi tumona ne: adi ne mushinga. Tshilejilu, nansha mutudi ne bujitu bua kudisha ne kuvuadika bena mu dîku dietu, katuena ne bua kulekela meji a dikeba bintu alua kutshiamakana kumpala kua malu a Bukalenge to. (Mat. 13:22; 1 Tim. 5:8) Kadi tudi ne bua kulonda mubelu wa Yezu wa ne: ‘Diambedi kebayi bukalenge buende ne buakane buende, nunku nebanupe bintu ebi bionso [bintu bitudi nabi dijinga].’—Mat. 6:33.
5 Bidi ne mushinga wa bungi bua bantu kumvuabu mukenji wa Bukalenge ne kuenzabu tshidi tshikengela patshidiku dîba apa. Tubambuluishayiku bua kuenzabu nanku pa ‘kubitabujija malu a bukalenge bua Nzambi.’—Bien. 19:8.