Mona bukole budi nabu Bible!

Mmunyi? Pa kutangila filme anyi bande wa video wa: La Bible: une force dans votre vie. Mbande wa video muisatu wa ku eyi idi ne tshiena-bualu tshia ne: La Bible: un récit historique exact, des prophéties dignes de foi.

Udi musue kuenza dibaka dilenga anyi? Udi ujinga bua bakuambuluishe bua umone mua kutshimuna ntatu anyi? Mmunyi mudi bansonga mua kulua bantu bakulumpe badi mua kuambula majitu? Bible udi mua kuambuluisha, anu mudi bande eu uleja. Teleja mudi bantu balonda mudi Bible mubambuluishe mu nsombelu wabu. Umvua mudibu bumvuija mushindu udi mêyi-maludiki ende mabambuluishe bua kutshimuna ntatu idi mu nsombelu wa matuku a lelu.

Bande wa video eu ntshiamu tshia mushinga tshia kuambuluisha natshi bapiabapia bua bamone mudibi ne dikuatshisha bua kulekela Dîyi dia Nzambi dibalombola mu nsombelu wabu. Société udi ne bande eyi ya La Bible: une force dans votre vie mu stoke. Udi mua kuyilomba ku butuangaji bua musadidi wa ku mikanda wa mu tshisumbu tshienu.

Mandamuna ku nkonko yenu

▪ Nnganyi udi ne bujitu bua kukomba Nzubu wa Bukalenge?

Nzubu wa Bukalenge mulengele ne wa mankenda udi wambika mukenji utudi tuyisha lumu. (Tangila 1 Petelo 2:12.) Bidi ne mushinga bua kulama nzubu ne mankenda ne kumulongolola bimpe. Muntu yonso udi mua kukuatshisha bua nzubu eu kuikalaye amu ne mankenda. Katutekemenyi anu bua bantu bakese kuambulabu bujitu buonso to. Pa tshibidilu, mudimu wa dikomba anyi dikolopa Nzubu wa Bukalenge batu baupesha tusumbu tua dilonga dia mukanda, ne mulombodi wa dilonga anyi tshindondi tshiende ke batu balombola mudimu eu. Mu nzubu itu bisumbu bibidi anyi bia bungi bisangila, bakulu nebalongolole bua ne: bisumbu bionso bidifile mu mudimu wa dimulama ne mankenda.

Mmunyi mutudi mua kuambula bujitu ebu bimpe menemene? Tudi ne bua kulongolola Nzubu wa Bukalenge pa kulonda ndongamu wa pa tshibidilu. Bia dikomba nabi bidi ne bua kuikalaku pabuipi. Nudi ne bua kufunda pa dibeji malu onso adi akengela kuenza ne kudilamika muaba udi aba badi bakomba mua kuabala ne kualonda. Kudi mua kuikala mabeji mafunda abidi, dimue didi dileja dikomba patupu kunyima kua tshisangilu tshionso ne dikuabu didi dileja dikomba bimpebimpe nzubu ku lumingu luonso. Mulombodi wa dilonga dia mukanda udi ne bua kulongolola dituku dia dikomba bimpebimpe pa dîba didi bantu bonso badi ne bua kuenza mudimu eu mua kuikalaku. Badi kabidi ne bua kutangila pa tshibidilu mashinde, bilongo ne mitshi mu lupangu. Badi ne bua kukomba bisosa bionso mu njila ne miaba idibu bimanyikila mashinyi anyi makalu. Tshidimu tshionso dilongolola Nzubu wa Bukalenge dikuabu dinene didi ne bua kuenzeka, pamu’apa matuku makese kumpala kua Tshivulukilu. Mudimu eu udi mua kukonga disukula dia madidishi, bimanu, disukula tapi ne manga ne mâyi, disukula rido.

Eyowa, tuetu bonso tudi mua kuambuluisha bua kupepeja bujitu ebu pa kubenga kuimansha bazoka ne bintu bikuabu mu nzubu anyi pambelu. Tudi mua kuela mâyi mu nkumba ne kumushiya ne mankenda misangu yonso itudi tubuelamu, bua kuambuluisha mukuetu mukuabu walua kubuelamu. Tutabalelayi bintu bua kubenga kubitshibula, kubishipa anyi kubinyangakaja. Tutangile bualu bua tapi idi ne manyanu, nkuasa anyi bibasa bitshibuke, milonda ya mâyi mitubuke, minda idi kayiyi itema ne bikuabu, ne tumanyishe bionso ebi kudi muanetu udi ne bujitu bua kutangila dilongolola dia bintu bia Nzubu wa Bukalenge.

Muntu ne muntu enze tshiende tshidiye mua kuenza. Ebi bidi biambuluisha bua kuikala ne muaba wa kutendelela udi usankisha ne bidi bitusunguluja bu bantu balelela badi batumbisha Yehowa Nzambi.​—1 Pet. 1:16.