Tulongeshayi bakuabu muakulu mukezuke
1 Nansha mudibu bafumine mu bantu ba mu “bisamba bionso, ba bisa bionso, matunga ne miakulu yonso,” Bantemu ba Yehowa mbantu badi mu buobumue, mu buena-muntu bulelela bua pa buloba bujima. (Buak. 7:9, Mukanda wa Mvidi Mukulu, [Katolike, MMM]) Mu bukua-panu ebu budi buabulukangane lelu’eu, bualu ebu budi budimuenekela patoke. Mmunyi mudibi bifika ku dikala nanku? Bidi nanku bualu mbatupeshe ‘muakulu mukezuke.’—Sef. 3:9.
2 Muakulu mukezuke udi wambuluisha mu mushindu wa dikema: Muakulu mukezuke eu ntshinyi? Muakulu mukezuke ngumvuilu muakane wa bulelela budi mu Dîyi dia Nzambi pa bidi bitangila Yehowa ne malu adiye mulongolole, nangananga bulelela budi butangila Bukalenge bua Nzambi. Anu bu muvuabu bamanyishe kudi Yezu, badi bamanyisha bantu bulelela ebu ku butuangaji bua “mupika wa lulamatu ne wa budimu,” njila udi umueneka wa pa buloba, ne ke tshidi tshienza bua bantu ba mu “bisamba bidi biakula miakulu mishilangane” bikala benda babuela mu ntendelelu mulelela.—Mat. 24:45; Zek. 8:23, MMM.
3 Padi bantu balonga muakulu mukezuke, bidi bibasaka bua kutuadija kutumikila mikenji ya Yehowa. Badi balonga mua kuikala ‘bakajibue tshishiki mu meji amue ne mu lungenyi lumue.’ (1 Kol. 1:10) Dilongesha dia Nzambi didi kabidi dilela munda muabu ngikadilu muakane ne muimpe, ngakuilu wa bulelela, nangananga pa bidi bitangila diambila bakuabu lumu luimpe. (Tito 2:7, 8; Eb. 13:15) Mashintuluka a dikema aa adi atumbisha Yehowa.
4 Tshilejilu, muntu mukuabu uvuabu bayishe lumu luimpe uvua ne nkonko ya bungi ya kuela, ne nkonko ayi bonso buayi bakayandamuna ne Bible. Malu akatelejaye aa akamusaka bua kutuadija kulonga misangu ibidi ku lumingu ne kubuela mu bisangilu. Biakamukemesha mushindu uvuabu bamuakidile ne musangelu ku Nzubu wa Bukalenge, pabi bantu ba bungi bavuamu bavua bantu ba makoba mashilangane. Kunyima kua tshikondo tshîpi, yeye ne mukajende bakashintulula nsombelu wabu, pashishe buobu kutambulabu. Katshia anu watambula mmuambuluishe bena mu dîku diende bavule ne bantu bakuabu bungi butue ku 40. Nansha mukadi disama dikole ditekeshe mubidi wende, mmutuadije matuku adi panshi aa mudimu wa bumpanda-njila.
5 Tulongeshayi bakuabu: Malu adi enzeka pa buloba bujima adi asaka bantu ba bungi ba malu mimpe bua kukonkolojabu tshidi meji abu ne nsombelu wabu. Tudi ne bua kubambuluisha anu bu muakenza Yezu. Dienza makumbula a nsongo ne dilonga ne bantu Bible ke mushindu menemene wa kuambuluisha bantu ba muoyo muimpe abu bua kulongabu muakulu mukezuke.
6 Umue mushindu wa kuyikila ne bantu udi mupatule bipeta bimpe patudi kumpala kua bantu batu kabayi ne dîba nkutuadija diakamue ne muntu dilonga dia Bible dîpi anu panutshidi nende ku tshibi. (km 5/02 dib. 1) Ukadiku mutete bua kuenza nanku anyi? Paudi udilongolola bua kupinganyina bantu bua kubakumbula, sungula dileja didi diakanyine muntu unuayikila nende mu tshisakidila tshia Mudimu wetu wa Bukalenge wa Tshiongo 2002. Mêyi a mua kutuadija nawu diyuki adibu baleje mu tshisakidila etshi mmalongolola bua kunuambuluisha bua nufike ku diyukila ne muntu malu adi mu broshire wa Utulomba anyi mu mukanda wa Dimanya. Ambulula dileja adi bua umone mua kutuangaja mbuelelu webe too ne ku dikonkonona dia tshikoso tshimue kuyi udia tshibanga. Sungula mvese umue ta ibidi mu tshikoso tshia kubala atshi bua nuyukidilanganepu, pashishe ulongolole lukonko lua kukomesha nalu muyuki wenu. Nelukuambuluishe bua kukoka ntema ya muntu ku tshikoso tshiudi mulongolole bua nuenu kulua kukonkonona nende musangu walonda.
7 Basadidi ba Yehowa badi bapeta mabenesha a bungi bualu badi balonga muakulu mukezuke. Tuambuluishayiku bakuabu ne tshisumi bua badisange kutudi bua ‘kubikila dîna dia Yehowa’ ne ‘kumukuatshila mudimu ne diapa dionso muinshi mua bujitu.’—Sef. 3:9.